Jump to content

Tik Tok ဢဝ်ဢွၵ်ႇပႅတ်ႈ ၼႃႈလိၵ်ႈသိုဝ်ႇၶၢဝ်ႇ လူင်ပွင်ၸိုင်ႈရတ်ႈသျႃး

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းပုတ်ႉ၊ သႅပ်ႇ​ထႅမ်ႇပႃႇ 25၊ 2024

ႁွင်ႈၵၢၼ်ၶၢဝ်ႇ RT မိူင်းရတ်ႈသျႃး

မိူဝ်ႈပႆႇထိုင် ပၢင်လိူၵ်ႈတင်ႈ ဢမႄႇရိၵၢၼ်ႇၼၼ်ႉ ၼႅတ်ႉတူင်ႇဝူင်းၵူၼ်း Tik Tok (တိၵ်ႉတွၵ်ႉ) ၼႆႉ လႆႈဢဝ်ဢွၵ်ႇပႅတ်ႈ ၼႃႈလိၵ်ႈသိုဝ်ႇၶၢဝ်ႇ လူင်ပွင်ၸိုင်ႈ ရတ်ႈသျႃး လႄႈ ၼႃႈလိၵ်ႈ ဢၼ်ၵဵဝ်ႇၵပ်း လွင်ႈၼႆႉ ယွၼ်ႉဝႃႈ မၼ်းႁဵတ်းႁႂ်ႈ မီးလွင်ႈႁူမ်ႇငမ်းၼိူဝ် ပၢင်လိူၵ်ႈတင်ႈ ဢမႄႇရိၵၢၼ်ႇ ၼႆယဝ်ႉ။

မိူဝ်ႈဝၼ်းၸၼ်ၼၼ်ႉ လုၵ်ႉတီႈ တိၵ်ႉတွၵ်ႉ ႁဵတ်းဢွၵ်ႇ ငဝ်းတူင်ႉပွတ်းဢွၼ်ႇသေ မွၵ်ႇလၢတ်ႈဝႃႈ ၶဝ် ဢိုတ်းပႅတ်ႈ ၼႃႈလိၵ်ႈသိုဝ်ႇၶၢဝ်ႇ ၸိူဝ်းပဵၼ်ၶွင် ၶွမ်ႇပၼီႇ ၶွင် ႁွင်ႈၵၢၼ်ၶၢဝ်ႇ RT ႁွင်ႈၵၢၼ်ၶၢဝ်ႇလူင်ပွင်ၸိုင်ႈရတ်ႈသျႃး ဢၼ်ပဵၼ် TV-Novosti၊ ၸုမ်းသိုဝ်ႇၶၢဝ်ႇ Rossiya Segodnya ‌ဢၼ်ယူႇၽၢႆႇလင် Sputnik လႄႈ ႁွင်ႈၵၢၼ်ၶၢဝ်ႇ လူင်ပွင်ၸိုင်ႈရတ်ႈသျႃး RIA Novosti ၸိူဝ်းၼၼ်ႉယဝ်ႉ။

ယွၼ်ႉပိူဝ်ႈဝႃႈ Meta ဢၼ်ပိူင်ႇ ၾဵတ်ႉပုၵ်ႉၶ်၊ ဝတ်ႉသ်ဢႅပ်ႉ လႄႈ ဢိၼ်ႇသတႃႇၵရမ်ႇ ၼၼ်ႉ လႆႈပိုၼ်ၽၢဝ်ႇမႃးဝႃႈ ၶဝ်လႆႈဢိုတ်းပႅတ်ႈၼႃႈလိၵ်ႈ ၸိူဝ်းပဵၼ် ၸုမ်းသိုဝ်ႇၶၢဝ်ႇ ရူဝ်ႇၸီးယႃး သီႇၵွၻ်ႉၺႃး၊ ၸုမ်းၸိူဝ်းၵဵဝ်ႇၵပ်းၵၼ်တင်း RT ၸိူဝ်းၼၼ်ႉၼႆလႄႈ လူင်ပွင်ၸိုင်ႈ ရတ်ႈသျႃး တင်း ႁွင်ႈၵၢၼ်ၶၢဝ်ႇသွင်ဢၼ် လႆႈမီးလွင်ႈသၢၼ်ၶတ်းမႃးႁၢဝ်ႈႁၢဝ်ႈႁႅင်းႁႅင်းသေ ယူႇထႅင်ႈဝူင်ႈၼိုင်ႈ ၽၢႆႇတိၵ်ႉတွၵ်ႉၵေႃႈ လႆႈပိုၼ်ၽၢဝ်ႇမႃးၼင်ႇၼႆယဝ်ႉ။

“ၵူၼ်းၸိူဝ်းဢၼ်လုၵ်ႉတီႈ ၸိုင်ႈမိူင်းလၢႆလၢႆမိူင်းသေ ဝႆႉၵႃႈၶၼ် တၢင်းႁၼ်ထိုင် ဢၼ်ဢမ်ႇမိူၼ်ၵၼ် ဢၼ်ၵဵဝ်ႇလူၺ်ႈ လွင်ႈတၢင်း ဢၼ်ပဵၼ်ယူႇ ၼႂ်းလုမ်ႈၾႃႉၼၼ်ႉ မီးတင်းၼမ်။ ယဝ်ႉၵေႃႈ ႁဝ်းၶႃႈ တေႁႃလၢႆးတၢင်း တႃႇတေဢဝ်ဢွၵ်ႇမႃး တီႈၼၼ်ႈယူႇ” ၼႆ ၸုမ်းသိုဝ်ႇၶၢဝ်ႇ Rossiya Segodnya ၶဝ် ဢွၵ်ႇၶေႃႈပိုၼ်ၽၢဝ်ႇ ဝၢႆးသေ TikTok ပိုၼ်ၽၢဝ်ႇၼၼ်ႉယဝ်ႉ။

ၵဵဝ်ႇၵပ်းလွင်ႈၼႆႉ RT ဢမ်ႇတွပ်ႇၶိုၼ်းၵမ်းလဵဝ်။

ႁင်းၶေႃမၼ်းမၼ်းသေ တိၵ်ႉတၵ်ႉၵေႃႈ ႁဵတ်းလွင်ႈလႅၵ်ႈလၢႆႈ ႁိမ်းႁွမ်း ၵၢၼ်ပၢႆးမၢၵ်ႈမီးမၼ်း ၵမ်ႈၽွင်ႈယူႇ။

ၽၢႆႇၶွမ်ႇပၼီႇ လႆႈမွၵ်ႇလၢတ်ႈ တီႈၼႂ်း ၶေႃႈပိုၼ်ၽၢဝ်ႇဢၼ်ဢမ်ႇပႃးဝၼ်းမၼ်း တီႈဝႅပ်ႉသၢႆႉမၼ်းဝႃႈ ၶဝ်တေဢိုတ်းပႅတ်ႈ ၵၢၼ်ႁပ်ႉၸႂ်ႉ ၽဵင်းၵႂၢမ်းၶဝ် ဢၼ်ပဵၼ် TikTok Music ၼႂ်း လိူၼ်ၼူဝ်ႇဝႅမ်ႇပႃႇ 28 ၼႆယဝ်ႉ။ ၵၢၼ်ႁပ်ႉၸႂ်ဢၼ် လႆႈတႄႇပိုတ်ႇမႃး မိူဝ်ႈပူၼ်ႉမႃးသွင်ပီၼၼ်ႉ ၸႂ်ႉလႆႈ တီး မိူင်းႁႃႈမိူင်း ဢၼ်ၶဝ်ႈပႃး တီႈလွၵ်းၵၢတ်ႇ ၸိုဝ်ႈသဵင်ယႂ်ႇ မိူၼ်ၼင်ႇ ပရႃႇꩡီး လႄႈ ဢေႃးသထရေးလီးယႃး။ တီႈ ယူႇဢႅသ်ႉတႄႉ ဢမ်ႇၸႂ်ႉလႆႈ။


ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=Tik_Tok_ဢဝ်ဢွၵ်ႇပႅတ်ႈ_ၼႃႈလိၵ်ႈသိုဝ်ႇၶၢဝ်ႇ_လူင်ပွင်ၸိုင်ႈရတ်ႈသျႃး&oldid=9178"