Jump to content

ႁူဝ်ၼႃႈ ၸုမ်းၼေႇတူဝ်း ၶႂ်ႈတေႃႇသူႈ ပၼ်ႁႃ ၵူႈမိူင်းမိူင်း တင်း ၸွမ်ပွင်ၸိုင်ႈမႂ်ႇ ၵၢၼ်ႇ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းၽတ်း၊ ၼူဝ်ႇဝႅမ်ႇပႃႇ 7၊ 2024

ၽူႈၼမ်းၼႂ်းလူင် ၸုမ်းၼေႇတူဝ်း Mark Rutte ဢႅဝ်ႇလႄႇ ၸုမ်းမိူင်းၽွမ်ႉႁူမ်ႈယူးရူပ်ႉ (ၶႅပ်းႁၢင်ႈၵဝ်ႇ)

ႁူဝ်ၼႃႈ ၸုမ်းဢူၺ်းလီသိုၵ်း ၼေႇတူဝ်း လၢတ်ႈဝႃႈ ၶႂ်ႈႁူမ်ႈမိုဝ်းၵၼ်တင်း ၸွမ်ပွင်ၸိုင်ႈမႂ်ႇ ဢမႄႇရိၵၢၼ်ႇသေ ၵႄႈလိတ်ႈ လွင်ႈလွၵ်ႇငိူတ်ႈ ဢၼ်ပဵၼ်ယူႇ ၼႂ်းလုမ်ႈၾႃႉၼၼ်ႉ ၼႆယဝ်ႉ။ တီႈပၢင်တိုၵ်း မိူင်းယူႇၶရဵၼ်းၼၼ်ႉ လွင်ႈဢၼ် ၵၢဝ်းလီႁွင်ႇ ယူႇၽၢႆႇ ရတ်ႈသျႃး၊ လွင်ႈဢၼ် ၶႄႇလႄႈ ဢီႇရၢၼ်း ၶဝ်ႈပႃး ၸိူဝ်းၼႆႉ ပဵၼ်ဢၼ် လီမႆႈၸႂ်သေ ၽူႈၼမ်းၼႂ်းလူင် ၸုမ်းၼေႇတူဝ်း မၢၵ်ႉၶ် ရူတ်ႉ လၢတ်ႈတီႈၽူႈသိုဝ်ႇၶၢဝ်ႇၶဝ်ဝႃႈ လူဝ်ႇလႆႈ ႁူမ်ႈၵၼ်တင်း ၸွမ်ပွင်ၸိုင်ႈ တေႃႇၼႄႇထရမ်ႉ ဢၼ်ထုၵ်ႇလိူၵ်ႈတင်ႈ ၼၼ်ႉသေ တုမ်ႉတွပ်ႇၵႂႃႇ ဝႃႈၼႆယဝ်ႉ။

ၽူႈၼမ်းၼႂ်းလူင် ၸုမ်းၼေႇတူဝ်း လၢတ်ႈမႃးဝႃႈ တေဢုပ်ႇဢူဝ်းၵၼ် လွင်ႈၶိုပ်ႈၼႃႈ ဢၼ်ပဵၼ် လွင်ႈမႆးၸႂ် ဢၼ် ၵၢဝ်းလီႁွင်ႇ၊ ဢီႇရၢၼ်း လႄႈ ၶႄႇၶဝ် လႆႈႁူမ်ႈမိုဝ်းၵၼ် တႃႇတိုၵ်းယူႇၶရဵၼ်းယူႇၼၼ်ႉသေ တႃႇတေႁူမ်ႈႁွမ်းၵၼ်တင်းသဵင်ႈသေ တုမ်ႉတွပ်ႇၶိုၼ်းၽေးၶဵၼ်ဢၼ်ၼႆႉၼႆ လႆႈမုင်ႈမွင်းဝႃႈ တႃႇဢုပ်ႇၵုမ်လႆႈတင်း ၸွမ်ပွင်ၸိုင်ႈ ထရၢမ်ႉ ဝႃႈၼႆယဝ်ႉ။ မၼ်းလၢတ်ႈတီႈ ၽူႈဢဝ်ၶၢဝ်ႇ တီႈ ပၢင်ၵုမ်လူင် တူင်ႇဝိူင်းၵၢၼ်မိူင်းယူးရူပ်ႉဢၼ်ၸတ်းႁဵတ်းတီႈ ဝဵင်းလူင် Budapest တီႈမိူင်းႁၢင်ႈၵေႇရီႇ ၼၼ်ႉဝႃႈ လွင်ႈဢၼ်ႁူမ်ႈႁွမ်းတုမ်ႉတွပ်ႇ ၽေးၶဵၼ် ဢၼ်လုမ်ႈၾႃႉ ဢၼ်ႁူပ်ႉထူပ်းၺႃးယူႇၼႆႉ မၼ်းပဵၼ် တွၼ်ႈတႃႇ ႁႂ်ႈလုမ်ႈၾႃႉလူင်မီးတၢင်းႁူမ်ႇလူမ်ႈ ဝႃႈၼႆယဝ်ႉ။ ၽူႈယႂ်ႇၼေႇတူဝ်း မွၵ်ႇလၢတ်ႈဝႃႈ တီႈပၢင်တိုၵ်း ဢၼ်တိုၵ်းယူႇတင်း ယူႇၶရဵၼ်းၼၼ်ႉ ၵူၼ်းသိုၵ်းၵၢဝ်းလီႁွင်ႇ ၶဝ်ႈတိုၵ်းပၼ်ပႃးၽၢႆႇရတ်ႈသျႃးသေ၊ ၸိူဝ်းပဵၼ် ရတ်ႈသျႃး၊ ၵၢဝ်းလီႁွင်ႇ၊ ၶႄႇ လႄႈ ဢီႇရၢၼ်းၶဝ်ၵေႃႈ ႁူမ်ႈႁွမ်းၵၼ်ယူႇသေ လႆႈပၼ်ပၢႆးၸၢင်ႈ တႃႇ ၵၢဝ်းလီႁွင်ႇယူႇလႄႈ မိူဝ်ႈၼႃႈမႃးၼႆႉ တေၸၢင်ႈပၼ်လွင်ႈလွၵ်ႇငိူတ်ႈ ဢမႄႇရိၵၢၼ်ႇ လႄႈ ယူးရူပ်ႉသေဢမ်ႇၵႃး ၸိူဝ်းပဵၼ် ဢူၺ်းလီ ဢိၼ်ႇတူဝ်ႇပၸိၽိၵ်ႉ ဢၼ်ပဵၼ် ၵျႃႇပၢၼ်ႇ လႄႈ ၵၢဝ်းလီၸၢၼ်းၸိူဝ်းၼႆႉၵေႃႈ တေၸၢင်ႈၺႃး လွင်ႈလွၵ်ႇငိူတ်ႈမိူၼ်ၵၼ် ဝႃႈၼႆယဝ်ႉ။

ၽူႈဢွၼ်ႁူဝ် ၸုမ်း EU ၶဝ် ႁူပ်ႉထူပ်းၵၼ် ၽွင်းမိူဝ်ႈ မီးလွင်ႈမႆႈၸႂ် လွင်ႈလႅၵ်ႈလၢႆႈ ၵၢၼ်ၸွႆႈထႅမ် ၸုမ်းၼေႇတူဝ်း လႄႈ မိူင်းယူႇၶရဵၼ်း ဝၢႆးသေ ထရမ်ႉ ၶိုၼ်းထုၵ်ႇလိူၵ်ႈတင်ႈၼၼ်ႉယူႇ။ ၽူႈဢွၼ်ႁူဝ် ယူးရူပ်ႉၶဝ် တိုၵ်းသူၼ်း ႁႂ်ႈဢမႄႇရိၵၢၼ်ႇ သိုပ်ႇၸွႆႈထႅမ် ယူႇၶရဵၼ်းသေ ဝႄႈလႆႈ ပၢင်တိုၵ်းၵၢၼ်ၵႃႉၶၢႆ တင်းၶႄႇ ၼႆယဝ်ႉ။


ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ႁူဝ်ၼႃႈ_ၸုမ်းၼေႇတူဝ်း_ၶႂ်ႈတေႃႇသူႈ_ပၼ်ႁႃ_ၵူႈမိူင်းမိူင်း_တင်း_ၸွမ်ပွင်ၸိုင်ႈမႂ်ႇ_ၵၢၼ်ႇ&oldid=9960"