ႁိူဝ်းမိၼ် ဢိတ်ႇသရေး ယိုဝ်း ႁူင်းႁဵၼ်း UN လႄႈ ႁိူၼ်းၵူၼ်း တီႈၵႃႇꩡႃႇ ၵူၼ်းတၢႆ ဢမ်ႇယွမ်း 34

ဝၼ်းၽတ်း၊ သႅပ်ႇ​ထႅမ်ႇပႃႇ 12၊ 2024 

တိူၵ်ႈတီႈၵႃႇၸႃႇ ၸိူဝ်းၺႃး မၢၵ်ႇဢိတ်ႇသရေး မိူဝ်ႈပီ 2023

ၽူႈမီးပုၼ်ႈၽွၼ်း ႁူင်းယႃၶဝ် လၢတ်ႈဝႃႈ မိူဝ်ႈၶမ်ႈဝႃး လႄႈ မိူဝ်ႈဝၼ်းပုတ်ႉၼၼ်ႉ ဢိတ်ႇသရေးၶဝ် ယိုဝ်းသႂ်ႇ ႁူင်းႁဵၼ်း U.N ဢၼ်မီး ၵူၼ်းႁိူၼ်း ပႃးလဵတ်ႈသတၢႆး ၸိူဝ်းလႆႈပၢႆႈၽေးၼၼ်ႉ ဢိၵ်ႇပႃး ႁိူၼ်းယေး သွင်လင်သေ ၵူၼ်းတၢႆ ဢမ်ႇယွမ်း 34 ၵေႃႉ ပႃးၸဵမ် ၼၢင်းယိင်း လႄႈ လုၵ်ႈဢွၼ်ႇ 19 ၵေႃႉ ၼႆယဝ်ႉ။ ၽူႈမီးပုၼ်ႈၽွၼ်း U.N ၵေႃႉ႞ လၢတ်ႈဝႃႈ ၼႂ်းၵူၼ်းတၢႆၼၼ်ႉ ၶဝ်ႈပႃးၵူၼ်းႁဵတ်းၵၢၼ် 6 ၵေႃႉ ဝႃႈၼႆယဝ်ႉ။

ပၢင်တိုၵ်း တီႈၵႃႇၸႃႇၼႆႉ ယၢမ်းလဵဝ် ၶဝ်ႈမႃးၼႂ်းလိူၼ် 11 ယဝ်ႉလႄႈ ၵူၼ်းတၢႆၼပ်ႉႁူဝ်ႁဵင် လႄႈ လွင်ႈဢၼ် ၸၢတ်ႈၸိုင်ႈလုမ်ႈၾႃႉ ၶတ်းၸႂ် တႃႇတေ ၵႄႈလိတ်ႈ လွင်ႈၵိုတ်းတိုၵ်း ၼႂ်းၵႄႈ ဢိတ်ႇသရေး လႄႈ ၸုမ်းယိပ်းၵွင်ႈၵၢင်ႇ ႁမၢသ်ႉၼၼ်ႉ ၵမ်းၵမ်း ၵိုတ်းယင်ႉၵႂႃႇ ယွၼ်ႉၶဝ် ၼႄးၵၼ်ဝႃႈ တိူဝ်းတုၵ်းယွၼ်းထႅင်ႈ ဢၼ်ဢမ်ႇယွမ်းႁပ်ႉလႆႈၼၼ်ႉယဝ်ႉ။

တီႈၽင်ႇပၢင်ႇလၢႆႇ ပွတ်းတူၵ်း ဢၼ်သိုၵ်းဢိတ်ႇသရေးၶဝ် သိမ်းဝႆႉၼၼ်ႉ သိုၵ်းဢိတ်ႇသရေးၶဝ် ပိုတ်ႇၽုၺ်ႇၵၢၼ်ႁၢင်ႈသိုၵ်း ၸူးဝဵင်းလၢႆလၢႆဝဵင်း ဢၼ်လႆႈႁပ်ႉလွင်ႈၵမ်ႉထႅမ် လူၺ်ႈ လွင်ႈယိုဝ်းၵွင်ႈၵၢင်ႇသေ သိုပ်ႇၽဵဝ်ႈမူၺ်ႉ ၼႃႈလိၼ် ဢၼ်သိုၵ်းၶဝ် လၢတ်ႈဝႃႈ ပဵၼ်ယိူင်းဢၢၼ်း ၸုမ်းယိပ်းၵွင်ႈၵၢင်ႇ ၵူၺ်းၵႃႈ ယႃႉလူႉ ပွၵ်ႉႁိမ်းႁွမ်း လႄႈ ၵူၼ်းမိူင်း လႆႈတၢႆၵႂႃႇၼၼ်ႉယူႇ။ ၵူၼ်းႁႃႈၵေႃႉ ဢၼ်လႆႈတၢႆၵႂႃႇတီႈၼႂ်း လွင်ႈတိုၵ်းတေႃးၵၢင်ႁၢဝ်ၼၼ်ႉ ပဵၼ်ၸုမ်းယိပ်းၵွင်ႈၵၢင်ႇ ဢၼ်လွၵ်ႇငိူတ်ႈ သိုၵ်းဢိတ်ႇသရေးၶဝ် ဝႃႈၼႆယဝ်ႉ။ ႁွင်ႈၵၢၼ်ၽၢႆႇပၢႆးယူႇလီ မိူင်းပႃးလဵတ်ႈသတၢႆး လၢတ်ႈဝႃႈ မိူဝ်ႈယိုဝ်းၵႃး ပွၵ်ႈၵမ်းသွင်ၼၼ်ႉ ၵူၼ်းတၢႆ ဢမ်ႇယွမ်း 3 ၵေႃႉ ၼႆယဝ်ႉ။

ၵူၼ်းႁၢႆႉၵေႃႉ႞ ဢဝ်ၵႃးတၢင်ႇၼမ်ႉမၼ်း ၽႃႇၺႃး တီႈၵိုတ်းလူတ်ႉၵႃး ၽင်ႇပၢင်ႇလၢႆႇဝၼ်းတူၵ်း ႁိမ်းတီႈယူႇ ဢိတ်ႇသရေး GIvat Assaf သေ ၵူၼ်းသိုၵ်းဢိတ်ႇသရေး ၵေႃႉ႞ လႆႈတၢႆၵႂႃႇ ၼႆယဝ်ႉ။ ၽူႈမီးပုၼ်ႈၽွၼ်းၶဝ် လၢတ်ႈဝႃႈ ၵူၼ်းသိုၵ်းလႄႈ ၵူၼ်းမိူင်း ဢၼ်ယိပ်းၵွင်ႈၵၢင်ႇ ၵေႃႉ႞ “ႁဵတ်းႁႂ်ႈ ၵူၼ်းႁၢႆႉၼၼ်ႉ ဢမ်ႇမီးသၢႆၸႂ်” ၼႆယဝ်ႉ။

ၽူႈမီးပုၼ်ႈၽွၼ်း ႁူင်းယႃ Awda လႄႈ al-Aqsa Martyrs ၶဝ် လၢတ်ႈဝႃႈ လွင်ႈယိုဝ်းသႂ်ႇ ႁူင်းႁဵၼ်းလုၵ်ႈဢွၼ်ႇၸၢႆး ဢၼ်ႁၢင်ႈႁႅၼ်းဝႆႉ တီႈပၢင်သဝ်း ၵူၼ်းပၢႆႈၽေး Nuseirat ၼၼ်ႉ ႁဵတ်းႁႂ်ႈ ၵူၼ်းတၢႆ ဢမ်ႇယွမ်း 14 ၵေႃႉ ပႃးၸဵမ်လုၵ်ႈဢွၼ်ႇ 2 ၵေႃႉ လႄႈ ၼၢင်းယိင်းၵေႃႉ႞ ၼႆယဝ်ႉ။ ၵူၼ်းမၢတ်ႇၸဵပ်း ဢမ်ႇယွမ်း 18 ၵေႃႉ ဝႃႈၼႆ။

ၽၢႆႇသိုၵ်းဢိတ်ႇသရေးၶဝ် လၢတ်ႈဝႃႈ ၶဝ်ယိူင်းၸူး ၸုမ်းႁမၢသ်ႉ ဢၼ်ၽႅၼ်ၵၢၼ် တႃႇလုၵ်ႉတီႈၼႂ်းႁူင်းႁဵၼ်းၼၼ်ႉသေ ယိုဝ်း ဝႃႈၼႆယဝ်ႉ။ ၶေႃႈမွၵ်ႇလၢတ်ႈၼၼ်ႉ ဢမ်ႇၸၢင်ႈယိုၼ်ယၼ်လႆႈ လွတ်ႈလွတ်ႈလႅဝ်းလႅဝ်း။

လုၵ်ႈဢွၼ်ႇ ဢၼ်လႆႈတၢႆၵႂႃႇၼၼ်ႉ ၵေႃႉ႞ ပဵၼ်လုၵ်ႈယိင်း Momin Selmi ၽူႈၶဝ်ႈၸုမ်း ၸုမ်းၵႅတ်ႇၶႄၵူၼ်းမိူင်း ၵႃႇၸႃႇ ဢၼ်ၵူတ်ႇထတ်း ၵူၼ်းမၢတ်ႇၸဵပ်း လႄႈ ဢဝ်တူဝ်တၢႆ ဝၢႆးသေ ယိုဝ်းၵၼ်ၼၼ်ႉ ၼႆယဝ်ႉ။

ႁူင်းႁဵၼ်း ၵႃႇၸႃႇ ၸိူဝ်းၼႆႉ ၵူၼ်းပႃးလဵတ်ႈသတၢႆး ၼပ်ႉႁူဝ်ႁဵင် လႆႈထုၵ်ႇ ဢိတ်ႇသရေးၶဝ် ႁေႃႈဢွၵ်ႇ ႁိူၼ်းယေးၶဝ် လႄႈ ပၼ်ၶေႃႈၸီႉသင်ႇ ႁႂ်ႈဢွၵ်ႇႁိူၼ်းယေး ၼႆယဝ်ႉ။ ႁူင်းႁဵၼ်း al-Jaouni ဢၼ်ပဵၼ်ႁူင်းႁဵၼ်း ဢၼ်မီးတီႈ ၵႃႇၸႃႇ ဢၼ်ၸုမ်း U.N လႆႈလႅၼ်ႈဝႆႉ တႃႇၵူၼ်းမိူင်းပႃးလဵတ်ႈသတၢႆး ဢမ်ႇၼၼ် UNWRA ၶဝ် ၵုမ်းၵမ်ဝႆႉၼၼ်ႉ လႆႈထုၵ်ႇယိုဝ်းသႂ်ႇ လၢႆလၢႆပွၵ်ႈ ၽွင်းသိုၵ်းၼၼ်ႉယဝ်ႉ။

ၸုမ်း UNRWA လၢတ်ႈဝႃႈ ၵူၼ်းႁဵတ်းၵၢၼ် ဢၼ်ၸွႆႈထႅမ်ၵူၼ်းပၢႆႈၽေး 6 ၵေႃႉ ပႃးၸဵမ်ၽူႈၸတ်းၵၢၼ် ႁူင်းႁႅမ်းၼၼ်ႉ လႆႈတၢႆၵႂႃႇ ၼႆယဝ်ႉ။ “ၵူၼ်းႁဵတ်းၵၢၼ် ၽၢႆႇၸွႆႈထႅမ်ၵူၼ်း၊ ဢွင်ႈတီႈ လႄႈ ၵၢၼ်ႁဵတ်းသၢင်ႈ ၸိူဝ်းၼႆႉ လႆႈထုၵ်ႇ ဢမ်ႇဝႆႉၼၵ်းၼိူဝ် ၸဵမ်မိူဝ်ႈ ပၢင်တိုၵ်း တႄႇပဵၼ်မႃးၼၼ်ႉ” ၼႆ ၽူႈၵွၼ်း ႁွင်ႈၵၢၼ် Philippe Lazzarini တႅမ်ႈဝႆႉ တီႈ X ၼၼ်ႉယဝ်ႉ။

ဢိတ်ႇသရေးၶဝ် ၵႆႉဢဝ်မၢၵ်ႇပွႆႇသႂ်ႇ ႁူင်းႁဵၼ်းသေ လၢတ်ႈဝႃႈ ႁူင်းႁဵၼ်းၸိူဝ်းၼၼ်ႉ ပဵၼ်ၸုမ်းယိပ်းၵွင်ႈၵၢင်ႇ ႁမၢသ်ႉၶဝ် ၸႂ်ႉတိုဝ်းၼႆယဝ်ႉ။ ၶဝ်ၼႄးဝႃႈ ၸုမ်းႁမၢသ်ႉ ႁဵတ်းႁႂ်ႈၵူၼ်းမိူင်း လႆႈလူႉတၢႆယွၼ်ႉ လွင်ႈယိုဝ်းၵၼ်ၼၼ်ႉသေ လၢတ်ႈဝႃႈ ၸုမ်းသိုၵ်းၶဝ် ပၵ်းသဝ်းဝႆႉ ႁင်းၶဝ်သေ တူင်ႉၼိုင် ၼႂ်းပွၵ်ႉဢၼ်ၵူၼ်းယူႇသဝ်းၼမ်ၼၼ်ႉၼႆယဝ်ႉ။

ၸုမ်းပၢႆးပၺ်ႇၺႃႇ ဢၼ်ၸုမ်း UNICEF လႄႈ ၸုမ်းၵႅတ်ႇၶႄလုၵ်ႈဢွၼ်ႇ ဢွၼ်ႁူဝ်ၼၼ်ႉ လႆႈထတ်းသၢင် မိူဝ်ႈလိူၼ်ၵျူႇလၢႆႇၼၼ်ႉ လၢတ်ႈဝႃႈ ႁူင်းႁဵၼ်း ၼႂ်းပိုၼ်ႉတီႈ ၵႃႇၸႃႇ 90 ဝၢၵ်ႈလိူဝ်လိူဝ် လႆႈလူႉၵွႆႁၢဝ်ႈႁႅင်း ဢမ်ႇၼၼ် လႆႈလူႉၵွႆ ၵမ်ႈၽွင်ႈသေ ႁူင်းႁဵၼ်း ၶိုင်ႈလိူဝ်လိူဝ် လႆႈထုၵ်ႇ ၵူၼ်းၸိူဝ်း လႆႈပၢႆႈၽေးသိုၵ်း တုမ်ႉတိူဝ်ႉ ၼႆယဝ်ႉ။

ႁွင်ႈၵၢၼ်ၽၢႆႇပၢႆးယူႇလီ မိူင်းပႃးလဵတ်ႈသတၢႆး လၢတ်ႈဝႃႈ လွင်ႈဢၼ် ဢိတ်ႇသရေး ၶဝ်ႈတိုၵ်း တီႈၵႃႇၸႃႇၼၼ်ႉ ႁဵတ်းႁႂ်ႈ ၵူၼ်းမိူင်းပႃးလဵတ်ႈသတၢႆး လႆႈတၢႆၵႂႃႇ ဢမ်ႇယွမ်း 41,084 ၵေႃႉသေ လႆႈမၢတ်ႇၸဵပ်းထႅင်ႈ 95,029 ၵေႃႉ ၼႆယဝ်ႉ။ ၵၢၼ်ၼပ်ႉသွၼ်ႇ ႁွင်ႈၵၢၼ်လူင်ၼၼ်ႉ ဢမ်ႇလႆႈၸႅၵ်ႇၽႄ ၵူၼ်းမိူင်း လႄႈ ၸုမ်းယိပ်းၵွင်ႈၵၢင်ႇ။ ဝၢႆးသေ ၸုမ်းယိပ်းၵွင်ႈၵၢင်ႇၶဝ် ယိုဝ်းဢိတ်ႇသရေး ပွတ်းႁွင်ႇ မိူဝ်ႈဝၼ်းတီႈ 7 လိူၼ်ဢွၵ်ႇထူဝ်ႇပႃႇၼၼ်ႉ ၵူၼ်းတၢႆ 1,200 ၵေႃႉ လႄႈ တိၺွပ်းဢဝ်ၵႂႃႇ 250 ၵေႃႉၼၼ်ႉယဝ်ႉ ဢိတ်ႇသရေး လႆႈတႄႇႁဵတ်း ၵၢၼ်ႁႃသဵင် ဢၼ်ပၼ်ၵႂၢမ်းမၼ်ႈဝႃႈ တေယႃႉပႅတ်ႈ ၸုမ်းႁမၢသ်ႉ ၼႆယဝ်ႉ။

မိူဝ်ႈၸဝ်ႉဝၼ်းပုတ်ႉၼၼ်ႉ လွင်ႈယိုဝ်းသႂ်ႇႁိူၼ်း ဢၼ်မီးႁိမ်းဝဵင်းၵႃႇၸႃႇ ပွတ်းႁွင်ႇ ၶၢၼ်ႇယူဝ်းၼိတ်ႉၼၼ်ႉ ၵူၼ်းတၢႆ 11 ၵေႃႉ ပႃးၸဵမ်ပီႈၼွင်ႉ တႄႇဢဝ် ဢႃႇယု 21 လိူၼ် တေႃႇထိုင် 21 ပီ 6 ၵေႃႉ ၼႆ ႁူင်းယႃ ယူးရူပ်ႉ ဢၼ်ႁပ်ႉဢဝ် ၵူၼ်းတၢႆၼၼ်ႉ လၢတ်ႈၼႄၼင်ႇၼႆ။

တီႈလွင်ႈယိုဝ်းသႂ်ႇ ႁိူၼ်းလင်႞ တီႈဝဵင်း Jabaliya ဢၼ်မီးတီႈ ၵႃႇၸႃႇ ပွတ်းႁွင်ႇ မိူဝ်ႈဝၼ်းဢႃးတိတ်ႉ ဝၢႆးဝၼ်းၼၼ်ႉလႄႈ ၵူၼ်းပၢႆႈၽေး လႆႈတၢႆၵႂႃႇ 9 ၵေႃႉ ပႃးၸဵမ်ၼၢင်းယိင်း လႄႈ လုၵ်ႈဢွၼ်ႇ 6 ၵေႃႉ ၼႆယဝ်ႉ။ ၽၢႆႇၵႅတ်ႇၶႄၵူၼ်းမိူင်းတႄႉ လၢတ်ႈဝႃႈ ႁိူၼ်းၼၼ်ႉ ပဵၼ်ၶွင် Akram al-Najjar ဢၼ်ပဵၼ် ၶူးသွၼ် တီႈၸၼ်ႉၸွမ် al-Quds Open သေ မၼ်းလွတ်ႈၽေးမႃးၼႆယဝ်ႉ။

ၽၢႆႇသိုၵ်းဢိတ်ႇသရေးၶဝ် လၢတ်ႈဝႃႈ ၽွင်းမိူဝ်ႈ ၶဝ်တေဢဝ် ၵူၼ်းသိုၵ်း ၸိူဝ်းမၢတ်ႇၸဵပ်းသေ ဢွၵ်ႇၵႂႃႇၼၼ်ႉ ႁိူဝ်းမိၼ်ႁႄႇလီႇၶွပ်ႇတႃႇ ဢၼ်ၶဝ်ၶီႇၼၼ်ႉ တူၵ်းၵႂႃႇ တီႈၵႃႇၸႃႇ ပွတ်းႁွင်ႇလႄႈ ၵူၼ်းသိုၵ်းၶဝ် လႆႈတၢႆၵႂႃႇ 2 ၵေႃႉသေ လႆႈမၢတ်ႇၸဵပ်း 7 ၵေႃႉ ၼႆယဝ်ႉ။ လွင်ႈဢၼ် ႁိူဝ်းမိၼ်တူၵ်းၶိုၼ်းၼၼ်ႉ ဢမ်ႇၸႂ်ႈယွၼ်ႉ ၽူႈၶဵၼ်ယိုဝ်းလႄႈ တိုၵ်ႉၵူတ်ႇထတ်းယူႇ ၼႆယဝ်ႉ။ ဝၢႆးသေ တႄႇႁဵတ်းၵၢၼ်ၽဵဝ်ႈမူၺ်ႉ တီႈၵႃႇၸႃႇ မိူဝ်ႈႁၢင်လိူၼ်ဢွၵ်ႇထူဝ်ႇပႃႇၼၼ်ႉ ၵူၼ်းသိုၵ်းဢိတ်ႇသရေး လႆႈတၢႆၵႂႃႇ 340 ၵေႃႉသေ ၼႂ်းၼၼ်ႉ ဢမ်ႇယွမ်း 50 ၵေႃႉ လႆႈတၢႆယွၼ်ႉ လွင်ႈၽေးၶိုၵ်ႉၶၵ်ႉ ၼႆယဝ်ႉ။

တီႈၽင်ႇပၢင်ႇလၢႆႇဝၼ်းတူၵ်းၵေႃႈ လႆႈႁၼ် လွင်ႈႁုၵ်းႁၢႆႉ ၼမ်မႃး။ ဢိတ်ႇသရေးၶဝ် ယၢင်ႈၶိုၼ်ႈမႃး တီႈၼၼ်ႈသေ လၢတ်ႈဝႃႈ ၶဝ်ႁဵတ်းၵၢၼ် တႃႇတေယႃႉပႅတ်ႈ ၸုမ်းယိပ်းၵွင်ႈၵၢင်ႇသေ ႁႄႉၵင်ႈ လွင်ႈၸုမ်းယိပ်းၵွင်ႈၵၢင်ႇ တိုၵ်းယိုဝ်း ၵူၼ်းမိူင်းဢိတ်ႇသရေး ၼမ်မႃးတိၵ်းတိၵ်းၼႆယဝ်ႉ။ ၵူၼ်းမိူင်းပႃးလဵတ်ႈသတၢႆးၶဝ်တႄႉ လၢတ်ႈဝႃႈ လွင်ႈႁဵတ်းသၢင်ႈၸိူင်ႉၼႆၼႆႉ ယိူင်းဢၢၼ်း တႃႇတေ မိူၼ်ႁႂ်ႈ ဢိတ်ႇသရေး ပိုတ်ႇၽုၺ်ႇ ၽွင်းငမ်းသိုၵ်း ၼိူဝ်ၼႃႈလိၼ်ၼၼ်ႉ တိူဝ်းၼမ်မႃးၼႆယဝ်ႉ။ မိူဝ်ႈလဵဝ် ၵူၼ်းၸၢဝ်းၵျူး ၸိူဝ်းမႃးယူႇသဝ်း တီႈမိူင်းပႃးလဵတ်ႈသတၢႆးၶဝ် ဝႆးမႃး ဝႃႈၼႆ။

မိူဝ်ႈဝၼ်းပုတ်ႉၼၼ်ႉ ၽၢႆႇသိုၵ်းၶဝ် လၢတ်ႈဝႃႈ လႆႈပိုတ်ႇပၢင်တိုၵ်း ႁိမ်းႁွမ်း ဝဵင်းတူးလ်ၵႃႇရႅမ်ႇ ဢၼ်မီးတီႈ ၽင်ႇပၢင်ႇလၢႆႇ ပွတ်းတူၵ်း လႄႈ တီႈဝဵင်းပွတ်းႁွင်ႇ သွင်ဝဵင်း ၼႆယဝ်ႉ။ လၢတ်ႈဝႃႈ လႆႈယႃႉပႅတ်ႈ ႁွင်ႈၽႃႇတတ်း ၶိူင်ႈမၢၵ်ႇတႅၵ်ႇ ႁွင်ႈၵၢၼ် ႁဵတ်းဢွၵ်ႇ ၶိူင်ႈၵွင်ႈၵၢင်ႇ ဢိၵ်ႇတင်း လူတ်ႉၵႃး ဢၼ်ပႃး ၶိူင်ႈမၢၵ်ႇတႅၵ်ႇ ၼႆယဝ်ႉ။ ၽၢႆႇသိုၵ်းၶဝ်တႄႉ လၢတ်ႈဝႃႈ ၵၢၼ်တူင်ႉၼိုင် တီႈဝဵင်းတူႇပၢတ်ႉၼၼ်ႉ ဢၼ်ဢဝ်ၶိူင်းယိုဝ်းၵၢင်ႁၢဝ် ယိုဝ်းသႂ်ႇၼၼ်ႉ ႁဵတ်းႁႂ်ႈ ၵူၼ်းႁၢႆႉ 5 ၵေႃႉ လႆႈတၢႆၵႂႃႇၼႆယဝ်ႉ။ ႁွင်ႈၵၢၼ်ၽၢႆႇပၢႆးယူႇလီ မိူင်းပႃးလဵတ်ႈသတၢႆး မၵ်းမၼ်ႈဝႃႈ ၵူၼ်းတၢႆ 5 ၵေႃႉၼႆသေတႃႉ ဢမ်ႇလၢတ်ႈဝႃႈ ပဵၼ်ၵူၼ်းႁၢႆႉ ႁိုဝ် ၵူၼ်းမိူင်း ၼႆယဝ်ႉ။

ၸုမ်း Red Crescent လၢတ်ႈဝႃႈ ၵူၼ်း 3 ၵေႃႉ လႆႈတၢႆယွၼ်ႉ လူတ်ႉၵႃး ဢၼ်မီးတီႈ ဝၢၼ်ႈၼွၵ်ႈဝဵင်း တူႇလ်ၵႃႇရႅမ်ႇၼၼ်ႉ ၼႆယဝ်ႉ။ ၽၢႆႇတပ်ႉသိုၵ်း မၵ်းမၼ်ႈဝႃႈ ၶဝ်ယိုဝ်းတီႈၼၼ်ႈသေတႃႉ ဢမ်ႇလႆႈႁူႉၶေႃႈမုၼ်း ၵမ်းလဵဝ်။

ငိူၼ်ႈငဝ်ႈၶၢဝ်ႇ

• Wafaa Shurafa. "Israeli airstrikes hit UN school and homes in Gaza and kill at least 34 people, hospitals say" — AP News, September 12, 2024
• France 24. "Israeli airstrikes hit UN school and homes in Gaza, killing dozens" — FRANCE 24, September 12, 2024
• VOA News. "Israeli airstrikes kill 34 in Gaza, including at UN school" — VOA News, September 11, 2024