ႁိူဝ်းမိၼ်ရတ်ႈသျႃး ဢၼ်တၢင်ႇ ၶႃႈသိုၵ်း ယူႇၶရဵၼ်း 65 ၵေႃႉ မႃးၼၼ်ႉ လူႉတူၵ်း
ဝၼ်းၽတ်း၊ ၸၼ်ႇဝႃႇရီႇ 25၊ 2024
ႁိူဝ်းမိၼ် ၽၢႆႇတေႃႉသူင်ႇၵၢၼ်သိုၵ်း ရတ်ႈသျႃး လမ်းၼိုင်ႈ လႆႈလူႉတူၵ်း တီႈႁိမ်း Belgorod ဢၼ်မီးၸမ်ၵၼ်တင်း လႅၼ်လိၼ်ယူႇၶရဵၼ်ႈၼၼ်ႉသေ ၵူၼ်းတင်းသဵင်ႈ ၸိူဝ်းပႃးမႃးၼိူဝ်ႁိူၼ်းမိၼ်ၼၼ်ႉ လႆႈလူႉတၢႆၵႂႃႇ တင်းမူတ်းၼႆ ဢၼ်ပဵၼ် ၽူႈဢုပ်ႉပိူင်ႇၼႃႈလိၼ် Belgorod မွၵ်ႇလၢတ်ႈ ထၢၼ်ၶၢဝ်ႇ Reuters ဝႃႈၼၼ်ယဝ်ႉ။
"ၽူႈမီးပုၼ်ႈၽွၼ်းယူႇၶရဵၼ်းၶဝ်ၼႆႉ ၶဝ်ၶိုၼ်းယိုဝ်းတူၵ်း ၵူၼ်းသိုၵ်းၶဝ်ယဝ်ႉ။ ၸိူဝ်းပဵၼ် မႄႈၶဝ်၊ လုၵ်ႈလၢင်းၼၢင်းမေးၶဝ် (ၶႃႈသိုၵ်းၸိူဝ်းလႆႈတၢႆၵႂႃႇ) ၼၼ်ႉ တိုၵ်ႉဢွၼ်ၵၼ် မုင်ႈမွင်းပႂ်ႉထႃႈ တႃႇၶဝ်တေၶိုၼ်းပွၵ်ႈမႃးယူႇ။ ၸိူဝ်းပဵၼ် ၵူၼ်းၶပ်းႁိူၼ်းမိၼ် လႄႈ ႁိူၼ်းမိၼ်ႁဝ်းၶႃႈ ဢၼ်တိုၵ်ႉႁဵတ်း ၵၢၼ်လွင်ႈၸွႆႈထႅမ်ၵူၼ်းယူႇၼၼ်ႉ ထုၵ်ႇဢဝ်တင်း မၢၵ်ႇၼူၽႆး ဢမႄႇရိၵၢၼ်ႇ လႄႈ ၵျႃႇမၼ်ႇၶဝ် သေ ယိုဝ်းတူၵ်းယဝ်ႉ။ ယွၼ်ႉၼၼ်လႄႈ ၸိူဝ်းပဵၼ် ၽွင်းသၢင်ႈၽိင်ႈမိူင်း တီႈမိူင်းၼႆႉၼႆႉ ၶဝ်ၸွႆႈထႅမ်ၽႂ်ယူႇ၊ ၶဝ်ဝၢႆႇၼႃႈၸူးယူႇတၢင်းလႂ် ဢၼ်ဝႃႈၼၼ်ႉ ၶဝ်လူဝ်ႇပွင်ႇၸႂ်ယဝ်ႉ" ၼႆ ဢၼ်ပဵၼ် ၽူႈမီးသုၼ်ႇလၢတ်ႈ သၽႃးရတ်ႈသျႃး VYACHESLAV VOLODIN မွၵ်ႇလၢတ်ႈဝႃႈၼၼ်ယဝ်ႉ။
ထၢၼ်ၶၢဝ်ႇၸိုင်ႈမိူင်းၵေႃႈ ဢၢင်ႈဢိင်ၼိူဝ် ထၢၼ်ၽွင်းလူင် ၽၢႆႇၵႅတ်ႇၵင်ႈရတ်ႈသျႃး မွၵ်ႇလၢတ်ႈသေ တႅမ်ႈတၢင်ႇဝႆႉဝႃႈ ၸွမ်းလူၺ်ႈၶပ်ႉမၢႆ လႅၵ်ႈလၢႆႈၵူၼ်းတူၵ်းၶွၵ်ႈ သေ တီႈၼိူဝ်ႁိူၼ်းမိၼ်ၼၼ်ႉ ပႃးဝႆႉ ၵူၼ်း 74 ၵေႃႉ ဢိၵ်ႇပႃးတင်း သိုၵ်းၶႃႈ ယူႇၶရဵၼ်း 65 ၵေႃႉၼႆယဝ်ႉ။
ထၢၼ်ၶၢဝ် Reuters တၢင်ႇဝႆႉတႄႉ ၽူႈဢုပ်ႉပိူင်ႇ ၼႃႈလိၼ် Belgorod မိူင်းရတ်ႈသျႃးဝႃႈတႄႉ ၸိူဝ်းပႃးမႃးၸွမ်းႁိူဝ်းမိၼ်ၼၼ်ႉ တၢႆၵႂႃႇတင်းသဵင်ႈတင်းမူတ်းယဝ်ႉ ဝႃႈၼႆ။ ၽၢႆႇတပ်ႉသိုၵ်းယူႇၶရဵၼ်းတႄႉၵေႃႈ ၵဵဝ်ႇၵပ်းလူၺ်ႈ ပိူင်ပဵၼ်ၼႆႉသေ ဢမ်ႇပႆႇပၼ် တၢင်းႁၼ်ထိုင်သင်ၼင်ႇၵဝ်ႇ။ ထၢၼ်ၽွင်းလူင် ၽၢႆႇၵႅတ်ႇၵင်ႈ ရတ်ႈသျႃးဝႃႈတႄႉ တီႈႁိူဝ်းမိၼ်ၼၼ်ႉ ၶဝ်ႈပႃး ၵူၼ်းႁၢပ်ႇၵၢၼ်ႁိူဝ်းမိၼ် 6 ၵေႃႉ လႄႈ ၵူၼ်းပႂ်ႉ 3 ၵေႃႉ ၼႆယဝ်ႉ။
ၽၢႆႇရတ်ႈသျႃးၶဝ်ဝႃႈ ၶဝ်ယိုဝ်းတူၵ်းလႆႈ တရုၼ်းလမ်းၼိုင်ႈ တီႈ ထုင်ႉ Belgorod သေ တီႈထုင်ႉ Oryol ဢၼ်မီးပွတ်းတူၵ်း ရတ်ႈသျႃးၼၼ်ႉၵေႃႈ ၶဝ်ၵႅတ်ႇႁႄႉလႆႈ တရုၼ်းသီႇလမ်း ဢၼ်ပဵၼ် ၶွင် ယူႇၶရဵၼ်းၼၼ်ႉ ဝႃႈၼႆ။ ၸွမ်ၸိုင်ႈယူႇၶရဵၼ်း Volodymyr Zelenskyy ၵေႃႈ မွၵ်ႇလၢတ်ႈဝႃႈ မိူဝ်ႈဝၼ်းဢင်းၵၢၼ်းၼၼ်ႉ ယွၼ်ႉ ၽၢႆႇရတ်ႈသျႃးၶဝ် ဢဝ်မၢၵ်ႇမိတ်ႉသ်သၢႆးဢဵၼ်ႁႅင်းယႂ်ႇသေ ပိုတ်းယိုဝ်းလႄႈ ၵူၼ်းလႆႈတၢႆၵႂႃႇ 18 ၵေႃႉ ဝႃႈၼႆယဝ်ႉ။
တီႈ ဝဵင်းလူင် ၵိယႅပ်ႉ လႄႈ ၸဵင်ႇႁွင်ႇဝၼ်းဢွၵ်ႇ ၶႃႇၶိပ်ႉၼၼ်ႉ လႆႈတိူဝ်ႉၶိူၵ်ႈၵႂႃႇႁႅင်းႁႅင်းယဝ်ႉ။ ၸွမ်ၸိုင်ႈ Zelenskyy မွၵ်ႇလၢတ်ႈ တီႈ ၶေႃႈမွၵ်ႇလၢတ်ႈၵူႈၶမ်ႈ မိူဝ်ႈဝၼ်းဢင်းၵၢၼ်းၼၼ်ႉ ဝႃႈတႄႉ ၵူၼ်း လႆႈတၢင်းၸဵပ်းမၢတ်ႇ မီးၵႂႃႇ 130 ပၢႆသေ လင်ႁိူၼ်း ၸိူဝ်းလူႉလႅဝ်ၵႂႃႇ မီးဝႆႉ 139 လင် ဝႃႈၼႆယဝ်ႉ။
ငိူၼ်ႈငဝ်ႈတိုၼ်း
[မႄးထတ်း | မႄးထတ်းငဝ်ႈငႃႇ]- Andrew Carey, Radina Gigova, Katharina Krebs, Yulia Kesaieva, Anna Chernova, Olga Voitovych and Sophie Tanno. "Russia accuses Ukraine of shooting down military plane, killing all 74 on board" — CNN, January 24, 2024
- VOA. "ယူကရိန်းစစ်သုံ့ပန်း ၆၅ ဦးတင်လာတဲ့ ရုရှားလေယာဉ်ပျက်ကျ" — VOA, January 25, 2024
