Jump to content

ၽွင်းလူင်ၽၢႆႇၼွၵ်ႈမိူင်း ၵၢၼ်ႇ လႄႈ ၸွမ်ၽွင်းလူင် မိူင်းလႄႇပႃႇၼွၼ်ႇ ထူပ်းၵၼ်

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းသုၵ်း၊ ဢွၵ်ႇထူဝ်ႇပႃႇ 25၊ 2024

ၽူႈၼမ်းၼႂ်း ပလိၼ်ႇၵႅၼ်ႇ ႁူပ်ႉထူပ်း ၸွမ်ၽွင်းလူင် ၽၢႆႇၵုမ်းၵမ် မိူင်းလႄႇပႃႇၼွၼ်ႇ

ၽွင်းလူင်ၽၢႆႇၼွၵ်ႈမိူင်း ဢမႄႇရိၵၢၼ်ႇ ဢႅၼ်ႇတူဝ်ႇၼီႇ ပလိၼ်ႇၵႅၼ်ႇ ႁူပ်ႉထူပ်း ၸွမ်ၽွင်းလူင် မိူင်းလႄႇပႃႇၼွၼ်ႇ မိူဝ်ႈဝၼ်းသုၵ်းၼၼ်ႉသေ ဢုပ်ႇဢူဝ်းၵၼ် လွင်ႈဢၼ် ဢိတ်ႇသရေး တိုၵ်းတေႃး လႄႈ ဝႃႇသျိၼ်ႇတၢၼ်ႇ လႆႈတဵၵ်းတဵင် လူင်ပွင်ၸိုင်ႈ ပႄႇရူတ်ႉ ႁႂ်ႈဢဝ်လိူင်ႈ သၢၼ်ၶတ်း ၸုမ်းႁႅꩡ်ႉပူဝ်းလႃႇၼၼ်ႉယဝ်ႉ။

ပလိၼ်ႇၵႅၼ်ႇ ဢၼ်ပွၵ်ႈမႃး တီႈၶၢဝ်းတၢင်း ပွတ်းဢွၵ်ႇတွၼ်ႈၵၢင်ၼၼ်ႉ မၼ်းလႆႈႁူပ်ႉထူပ်း ၸွမ်ၽွင်းလူင် ၼႃႇၸိပ်ႉ မိၵႃႇတီႇ တီႈဝဵင်းလၼ်ႇတၼ်ႇ ဢၼ်လုၵ်ႉတီႈ ပၢင်ၵုမ် လွင်ႈလႄႇပႃႇၼွၼ်ႇ တီႈဝဵင်းပႄးရိတ်ႉ မိူဝ်ႈဝၼ်းဢွၼ်တၢင်းၼၼ်ႉယဝ်ႉ။

သွင်ၵေႃႉ ယုမ်ႉ ၽၢႆႇၼႃႈၵွင်ႈထႆႇသေတႃႉ ဢမ်ႇလၢတ်ႈသင်။

ဢ​ႄမႄႇရိၵၢၼ်ႇ ဢၼ်ပဵၼ် ဢူၺ်းလီၵၢၼ်မိူင်း လႄႈ ၵၢၼ်သိုၵ်း ပိူင်လူင် ဢိတ်ႇသရေးၼၼ်ႉ ၵိုတ်းယိုတ်း လွင်ႈတုၵ်းယွၼ်း ႁႂ်ႈၵိုတ်းယိုတ်း လွင်ႈတိုၵ်းတေႃးၵၼ် ၵမ်းလဵဝ် ၼႂ်းၶၢဝ်းတၢင်း လိူၼ်ဢၼ် ဢိတ်ႇသရေး ဢဝ်မၢၵ်ႇလူင် ယိုဝ်းသႂ်ႇ မိူင်းလႄႇပႃႇၼွၼ်ႇ ဢၼ်ယိူင်းၸူး ၸုမ်းႁႅꩡ်ႉပူဝ်းလႃႇ ဢၼ်ဢီႇရၢၼ်ႇ ၵမ်ႉထႅမ်ၼၼ်ႉယဝ်ႉ။

ၵူၺ်းၵႃႈ ပလိၼ်ႇၵႅၼ်ႇၵေႃႈ တုၵ်းယွၼ်းဝႃႈ ႁႂ်ႈဢဝ်လၢႆးၵၢၼ်မိူင်း ၵႄႈလိတ်ႈဝႆးဝႆး။

မိူဝ်ႈဝၼ်းၽတ်း တီႈဝဵင်းတူဝ်ႇႁႃႇၼၼ်ႉ ပလိၼ်ႇၵႅၼ်ႇ လၢတ်ႈဝႃႈ “ႁဝ်းၶႃႈ လႆႈလၢတ်ႈၸႅင်ႈလႅင်းလီဝႃႈ လွင်ႈၼႆႉ ဢမ်ႇၸၢင်ႈႁဵတ်းႁႂ်ႈ - ဢမ်ႇထုၵ်ႇလီႁဵတ်းႁႂ်ႈ - ႁႂ်းပဵၼ် လွင်ႈတူင်ႉၼိုင် ၶၢဝ်းယၢဝ်း လႄႈ ဢိတ်ႇသရေး တေလႆႈဢဝ်လၢႆးတၢင်း ဢၼ်လူဝ်ႇ တႃႇတေ ငိူင်ႉဝႄႈ လွင်ႈၵူၼ်းမိူင်း လႆႈလူႉတၢႆ လႄႈ တေဢမ်ႇလႆႈ ႁဵတ်းႁႂ်ႈ ၸုမ်းပႂ်ႉငမ်းယဵၼ် UN ဢမ်ႇၼၼ် တပ်ႉသိုၵ်း လႄႇပႃႇၼွၼ်ႇၶဝ် မီးၽေးၶဵၼ် ၼႆယဝ်ႉ။ ။

ဢမႄႇရိၵၢၼ်ႇ တုၵ်းယွၼ်း ႁႂ်ႈလူင်ပွင်ၸိုင်ႈ သုၼ်ၵၢင် မိူင်းလႄႇပႃႇၼွၼ်ႇ ဢၼ်တူင်ႉၼိုင်မႃး ၶၢဝ်းႁိုင်ၼၼ်ႉ ဢဝ်ပုၼ်ႈၽွၼ်း ၽၢႆႇႁူမ်ႇလူမ်ႈ လႄႈ ႁႂ်ႈယိုတ်းၵွင်ႈၵၢင်ႇ ၸုမ်းႁႅꩡ်ႉပူဝ်းလႃႇ ဢၼ်ပဵၼ် ၸုမ်းသျီႇဢီႇ ဢၼ်ဢီႇရၢၼ်း ၵမ်ႉထႅမ်သေ မီးတပ်ႉသိုၵ်းႁင်းၶေႃ ဢၼ်မီးၽွၼ်းလီၼၼ်ႉ ၼႆယဝ်ႉ။

မိူဝ်ႈႁူပ်ႉထူပ်း ပလိၼ်ႇၵႅၼ်ႇၼၼ်ႉ မိၵႃႇတီႇ ဢမ်ႇလၢတ်ႈသင် တီႈၼႃႈၽူႈသိုဝ်ႇၶၢဝ်ႇၶဝ်။

ၽွင်းလူင် ၵၢၼ်ၼွၵ်ႈမိူင်း ၵျေႃႇတၼ်ႇ ဢၢႆႇမႅၼ်ႇ သႃႇၾႃႇတီႇ ႁူပ်ႉထူပ်း ပလိၼ်ႇၵႅၼ်ႇ ႁင်းၶေႃသေ လၢတ်ႈတီႈမၼ်းဝႃႈ လူင်ပွင်ၸိုင်ႈ လႄႇပႃႇၼွၼ်ႇ လၢတ်ႈၸႅင်ႈလႅင်းဝႃႈ တေႁဵတ်းၸွမ်း ၶေႃႈတႅပ်းတတ်း 1701 ၼႆယဝ်ႉ။

သႃႇၾႃႇတီႇ လၢတ်ႈဝႃႈ “လွင်ႈပူၼ်ႉပႅၼ် မိူင်းလႄႇပႃႇၼွၼ်ႇၼႆႉ တေလႆႈၵိုတ်းယိုတ်းၵမ်းလဵဝ် ဢမ်ႇမီးလွင်ႈသင် ဢၼ်တေႁဵတ်းႁႂ်ႈ မၼ်းသိုပ်ႇပဵၼ်မႃးလႆႈ” ၼႆယဝ်ႉ။

ၸုမ်းႁႅꩡ်ႉပူဝ်းလႃႇ လႆႈယိုဝ်းမၢၵ်ႇၼူၾႆး ၸူးဢိတ်ႇသရေး ၼႄလွင်ႈၽွမ်ႉႁူမ်ႈၵၼ်တင်း ၸုမ်းႁမၢသ်ႉ ၸဵမ်မိူဝ်ႈ ၸုမ်းယိပ်းၵွင်ႈၵၢင်ႇ ပႃႇလႅတ်ႈသတၢႆးၶဝ် ယိုဝ်းသႂ်ႇ တီႈ ဢိတ်ႇသရေး မိူဝ်ႈဝၼ်းတီႈ 7/10/2023 ၼၼ်ႉသေ ႁဵတ်းႁႂ်ႈ ဢိတ်ႇသရေး တိုၵ်းတေႃး ၵႃႇၸႃႇ တင်းၼမ်တင်းလၢႆၼၼ်ႉယဝ်ႉ။

မိူဝ်ႈဝၼ်းပုတ်ႉၼၼ်ႉ ၽွင်းလူင်ၽၢႆႇၵႅတ်ႇၵင်ႈ ဢမႄႇရိၵၢၼ်ႇ လွႆႉဢေႃးသတိၼ်ႇ လၢတ်ႈဝႃႈ မၼ်းမႆႈၸႂ်ၸွမ်း လွင်ႈဢၼ် ဢိတ်ႇသရေး ယိုဝ်းတပ်ႉသိုၵ်း လႄႇပႃႇၼွၼ်ႇ ဢၼ်ႁဵတ်းႁႂ်ႈ ၵူၼ်းသိုၵ်း လႄႇပႃႇၼွၼ်ႇ လႆႈတၢႆၵႂႃႇ ဢမ်ႇယွမ်း 11 ၵေႃႉ ၼႆယဝ်ႉ။


ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၽွင်းလူင်ၽၢႆႇၼွၵ်ႈမိူင်း_ၵၢၼ်ႇ_လႄႈ_ၸွမ်ၽွင်းလူင်_မိူင်းလႄႇပႃႇၼွၼ်ႇ_ထူပ်းၵၼ်&oldid=9796"