ၽွင်းလူင်ၽၢႆႇၼွၵ်ႈမိူင်းၵၢၼ်ႇ ပၼ်ၽၢင်ႉ ၵဵဝ်ႇၵပ်း ၶေႃႈတၢင်ႇၼႄ ၵိုတ်းတိုၵ်း ၵႃႇၸႃႇ

ဝၼ်းၸၼ်၊ ဢေႃးၵၢတ်ႉ 19၊ 2024 

ၽွင်းမိူဝ်ႈ ၽွင်းလူင်ၽၢႆႇၼွၵ်ႈမိူင်း ဢမႄႇရိၵၢၼ်ႇ ပလိၼ်ႇၵႅၼ်ႇ လႄႈ ၸွမ်ၸိုင်ႈ ဢိတ်ႉသရေး ဢၢႆႇသႅၵ်ႉႁႃးၸွၵ်ႉ ႁူပ်ႉထူပ်းၵၼ်

မိူဝ်ႈၼႆႉ ၶုၼ်ၽွင်းၼွၵ်ႈမိူင်း ဢမေႇရိၵၢၼ်ႇ Antony Blinken လၢတ်ႈဝႃႈ ၶေႃႈတၢင်ႇၼႄ တႃႇၵိုတ်းတိုၵ်း တီႈၵႃႇၸႃႇ ၵမ်းလိုၼ်းသုတ်းၼႆႉ ပဵၼ်လွင်ႈပွႆႇပၼ် ၵူၼ်းၺႃးၺွပ်း၊ တႃႇတေၵိုတ်းယိုတ်းလႆႈ ပၢင်တိုၵ်း ၼႂ်းၵႄႈ ဢိတ်ႉသရေး လႄႈ ၸုမ်းႁမၢသ်ႉၼၼ်ႉ ၸၢင်ႈပဵၼ် တိုဝ်ႉတၢင်း ၵမ်းလိုၼ်းသုတ်း ဝႃႈၼႆယဝ်ႉ။

ၽွင်းလူင် ပလိၼ်ႇၵႅၼ်ႇ လၢတ်ႈဝႃႈ တႃႇၵူၼ်းၺႃးၺွပ်း တေပွၵ်ႈမိူဝ်းႁိူၼ်းလႆႈ၊ တႃႇလႆႈလွင်ႈၵိုတ်းတိုၵ်း၊ တႃႇလႆႈ လွင်ႈငမ်းယဵၼ် လႄႈ လွင်ႈႁူမ်ႇလူမ်ႈ ဢၼ်မၼ်ႈၵိုမ်း ၼႆႉ ထိုင်ၶၢဝ်းယၢမ်း တေလႆႈတႅပ်းတတ်း ဢၼ်လီသုတ်း လႄႈ ဢၼ်လိုၼ်းသုတ်း ၼႆယဝ်ႉ။

ၽွင်းလူင် Blinken ႁူပ်ႉထူပ်း ၸွမ်ပွင်ၸိုင်ႈ ဢိတ်ႇသရေး ဢၢႆႇသႅၵ်ႉႁႃးၸွၵ်ႉ မိူဝ်ႈၼႆႉ။ မိူဝ်ႈၼႆႉ ဝၢႆးဝၼ်း တေႁူပ်ႉထူပ်း ၸွမ်ၽွင်းလူင် ၼႄႇတၢၼ်ႇယႃႇႁူႇ ၼႆယဝ်ႉ။ တႄႇၸဵမ်မိူဝ်ႈ ဢွၵ်ႇထူဝ်ႇပႃႇ 7 ဝၼ်း ပၢင်တိုၵ်း ဢိတ်ႇသရေး လႄႈ ၸုမ်းႁမၢသ်ႉမႃးယဝ်ႉ ၶၢဝ်းတၢင်း ၽွင်းလူင် ပလိၼ်ႇၵႅၼ်ႇၼႆႉ ပဵၼ်ပွၵ်ႈၵမ်း 9 ယဝ်ႉ။

ၽူႈဢုပ်ႇဢူဝ်း မိူင်းဢမႄႇရိၵၢၼ်ႇ၊ မိူင်းဢီးၵျိပ်ႈ လႄႈ မိူင်းၶႃႇတႃႇ လႆႈႁူပ်ႉထူပ်းၵၼ် မိူဝ်ႈဝူင်ႈပူၼ်ႉမႃး တီႈဝဵင်းတူဝ်ႇႁႃႇ မိူင်းၶႃႇတႃႇသေ ဢုပ်ႇဢူဝ်းၵၼ် တႃႇတေႁဵတ်းသၢင်ႈၸွမ်း ၶေႃႈတူၵ်းလူင်းၼၼ်ႉယူႇ။ ပၢင်ၵုမ်ဢၼ်တေၸတ်းႁဵတ်းတီႈ ၵၢႆႇရူဝ်ႇ ၼႂ်းႁၢင်ဝူင်ႈၼႆႉၵေႃႈ တိုၵ်ႉမီးတႃႇဢုပ်ႇဢူဝ်းၵၼ်ယူႇ။

ၸုမ်းႁိတ်ႉၸပူဝ်းလႃႇၶဝ် လၢတ်ႈဝႃႈ မိူဝ်ႈၽွင်း ၽူႈဢွၼ်ႁူဝ် ဢိတ်ႇသရေး ႁူပ်ႉထူပ်း ၽွင်းလူင် ပလိၼ်ႇၵႅၼ်ႇၼၼ်ႉ ၶိူင်ႈမိၼ် ဢၼ်ပႃးမၢၵ်ႇတႅၵ်ႇၼၼ်ႉ ၶဝ်ႈတိုၵ်း တပ်ႉပၢင်သဝ်း တပ်ႉသိုၵ်းဢိတ်ႇသရေး ဢၼ်မီးႁိမ်းလႅၼ်လိၼ် လႄႈ တီႈ တပ်ႉပၢင်သဝ်း သွင်တီႈ ဢၼ်မီးႁိမ်းဝဵင်း ဢႅၵ်ႉၵႃႇ ဢၼ်မီးၸွမ်းၽင်ႇပၢင်ႇလၢႆႇၼၼ်ႉ မိူဝ်ႈလဵဝ်ၵၼ်ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Humeyra Pamuk. "Blinken says 'decisive moment' for Gaza ceasefire talks" — Reuters, August 19, 2024
• Jennifer Hansler, Alex Marquardt and Michael Conte. "Blinken says Israel has agreed to US proposal to close remaining gaps on ceasefire deal and calls on Hamas to do the same" — CNN, August 19, 2024