ၽွင်းလူင်ၵၢၼ်ၼွၵ်ႈမိူင်း မိူင်းယူႇၶရဵၼ်း ထွၼ်တူဝ်ဢွၵ်ႇ

ဝၼ်းၽတ်း၊ သႅပ်ႇ​ထႅမ်ႇပႃႇ 5၊ 2024 

ၽွင်းလူင်ၵၢၼ်ၼွၵ်ႈမိူင်း ယူႇၶရဵၼ်း တီႇမီႇထရူဝ်ႇ ၶူဝ်ႇလ်ပႃႇ

ၽွင်းမိူဝ်ႈ မီးလွင်ႈလၢမ်းၶၢတ်ႈဝႃႈ တေလႅၵ်ႈလၢႆႈ လူင်ပွင်ၸိုင်ႈ မိူင်းယူႇၶရဵၼ်းၼႆၼၼ်ႉ ၽွင်းလူင် ၵၢၼ်ၼွၵ်ႈမိူင်း Dmytro Kuleba လႆႈယွၼ်းထွၼ်တူဝ်ဢွၵ်ႇ ၼႆယဝ်ႉ။

လွင်ႈဢၼ် ၶူဝ်ႇလ်ပႃႇ ထွၼ်တူဝ်ဢွၵ်ႇၼၼ်ႉ ၽူႈၼမ်းၼႂ်းသၽႃး မိူင်းယူႇၶရဵၼ်း ရူႇသလႅၼ်ႇ သတႅပ်ႉၾၢၼ်ႇၶျူၵ်ႉ ပိုၼ်ၽၢဝ်ႇ ၼိူဝ်ၾဵတ်ႉပုၵ်ႉ ၼႆယဝ်ႉ။ ၵႅမ်ၸွမ်ၸိုင်ႈ လၢမ်းဝႆႉဝႃႈ ၽူႈယႂ်ႇၵူၼ်းလူင် ၼႂ်းလူင်ပွင်ၸိုင်ႈ ပႃးၸဵမ်ၽွင်းလူင်ၽၢႆႇတတ်းသိၼ် တေတၢင်ႇၽိုၼ်လိၵ်ႈထွၼ်တူဝ်ဢွၵ်ႇတင်းၼမ်သေ ၸဝ်ႈၼႃႈတီႈၶဝ်လၢတ်ႈဝႃႈ မိူဝ်ႈၽုၵ်ႈ ဝၼ်းသုၵ်းၼႆႉ တေတႅင်ႇတင်ႈၼႃႈတီႈမႂ်ႇ တႃႇတေတဵမ်ၼႃႈတီႈ ဢၼ်ပဝ်ႇဝႆႉၼၼ်ႉ ၼႆယဝ်ႉ။

ၽွင်းလူင်ၵၢၼ်ၼွၵ်ႈမိူင်း မိူင်းယူႇၶရဵၼ်း ဢၼ်ထွၼ်တူဝ်ဢွၵ်ႇယၢမ်းလဵဝ်ၼၼ်ႉ လႆႈႁပ်ႉပုၼ်ႈၽွၼ်း မိူဝ်ႈပီ 2020 သေ ပဵၼ်ၵေႃႉဢၼ်ၶတ်းၸႂ် ႁႂ်ႈလုမ်ႈၾႃႉ ႁူႉၸွမ်း လွင်ႈရတ်ႈသျႃး ၶဝ်ႈတိုၵ်း ဢၼ်တႄႇမႃး မိူဝ်ႈပီ 2022 ၼၼ်ႉယဝ်ႉ။

မၼ်းလႆႈႁူပ်ႉထူပ်း ၽွင်းလူင်ၵၢၼ်ၼွၵ်ႈမိူင်း ၸုမ်းၽွမ်ႉႁူမ်ႈ ယူးရူပ်ႉ မိူဝ်ႈဝူင်ႈပူၼ်ႉမႃးၼၼ်ႉသေ တႃႇတေလႆႈတၢင်းၸွႆႈထႅမ် တႃႇမိူင်းယူႇၶရဵၼ်းၼၼ်ႉ မၼ်းယၢမ်ႈႁူပ်ႉထူပ်း ၽူႈမီးပုၼ်ႈၽွၼ်း မိူင်းဝၼ်းတူၵ်း တၢင်ႇၸိူဝ်းယူႇတႃႇသေႇ။

ၸွမ်ပွင်ၸိုင်ႈ ယူႇၶရဵၼ်း ဝေႃႇလေႃႇတီးမႃးရ် ၸႄးလႅၼ်းသၵီး လၢတ်ႈထႅင်ႈဝႃႈ မၼ်းႁၢင်ႈႁႅၼ်း တႃႇတေႁဵတ်း လွင်ႈလႅၵ်ႈလၢႆႈ ဢၼ်ယိူင်းဢၢၼ်း တႃႇႁႂ်ႈ ပွတ်းတွၼ်ႈလူင်ပွင်ၸိုင်ႈ ၵမ်ႈၽွင်ႈ မီးႁႅင်းမႃးၼႆယဝ်ႉ။

ၸွမ်ပွင်ၸိုင်ႈ မိူင်းယူႇၶရဵꧣ်း လၢတ်ႈဝႃႈ လွင်ႈလႅၵ်ႈလၢႆႈၸိူဝ်းၼႆႉ ပဵၼ်လွင်ႈလူဝ်ႇ တႃႇတေၵေႃႇသၢင်ႈ တူင်ႇဝူင်းမႂ်ႇ၊ ၶေႃႈမုၼ်း လႄႈ လွင်ႈၵပ်းသိုပ်ႇ ၼႂ်းၵႄႈ ၸုမ်းၸၢတ်ႈၸိုင်ႈလုမ်ႈၾႃႉ လႄႈ မိူင်းယူႇၶရဵၼ်း ၼႂ်းၵၢၼ်ၾိင်ႈငႄႈ လႄႈ ၵၢၼ်မိူင်း ၼႆသေ ယၢမ်းလဵဝ် ပဵၼ်ၶၢဝ်းယၢမ်း တႃႇတေပၼ် ႁႅင်းမႂ်ႇ တီႈၸုမ်းလူင်ပွင်ၸိုင်ႈ မိူင်းယူႇၶရဵၼ်း ၼႆသေ မၼ်းယိၼ်းၸူမ်းၶွပ်ႈၸႂ်ထိုင် တင်းသဵင်ႈ ၸိူဝ်းဢၼ်တေၸွႆႈထႅမ် ဝႃႈၼႆယဝ်ႉ။

ငိူၼ်ႈငဝ်ႈၶၢဝ်ႇ

• Ali Abbas Ahmadi. "Ukraine's foreign minister resigns as government reshuffle expected" — BBC News, September 4, 2024
• VOA News. "Ukrainian foreign minister submits resignation" — VOA News, September 4, 2024
• Kosta Gak, Alex Stambaugh, Helen Regan and Ivana Kottasová. "Ukraine’s foreign minister tenders resignation ahead of expected cabinet reshuffle as Russian missiles kill at least 7" — CNN, September 4, 2024
• Euronews with AP. "Ukraine's Foreign Minister Dmytro Kuleba resigns ahead of expected government reshuffle" — Euronews, September 4, 2024
• Olena Harmash. "Zelenskiy orders war's biggest reshuffle to give Ukraine 'new energy'" — Reuters, September 5, 2024
• Veronika Melkozerova. "Zelenskyy begins major shake-up as Ukraine’s foreign minister heads for exit" — Politico, September 4, 2024
• ILLIA NOVIKOV and EMMA BURROWS. "Ukrainian foreign minister resigns ahead of expected reshuffling of government leaders" — AP News, September 4, 2024