Jump to content

ၽေးၵိုင်ႉၵၢင်ႉႁိူဝ်းမိၼ် ဢၼ်ႁၢႆႉၸႃႉလိူဝ်ပိူၼ်ႈ ၼိူဝ်လိၼ်ၵၢဝ်းလီၸၢၼ်း ၵူၼ်းတၢႆ 179 ၵေႃႉ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းၸၼ်၊ တီႇသႅမ်ႇပႃႇ 30၊ 2024

ႁိူဝ်းမိၼ် သၢႆၵၢၼ်မိၼ် Jeju Air

မိူဝ်ႈဝၼ်းဢႃးတိတ်ႉ တီႈမိူင်းၵၢဝ်းလီၸၢၼ်းၼၼ်ႉ ႁိူဝ်းမိၼ် လမ်းၼိုင်ႈ လႅၼ်ႈဢွၵ်ႇတီႈ သဵၼ်ႈတၢင်း ႁိူဝ်းမိၼ်သေ ၽႃႇၺႃး ႁူးၽၵ်းတူ ၶွၼ်ႇၵရိတ်ႉသေ ၾႆးမႆႈၵႂႃႇ ဝၢႆးသေ ၶိူင်ႈလူင်းႁိူဝ်းမိၼ် ဢမ်ႇႁဵတ်းၵၢၼ်လႆႈၼၼ်ႉယဝ်ႉ။ ၼႂ်းၵူၼ်း 181 ၵေႃႉ ဢၼ်ၶီႇၼိူဝ်ႁိူဝ်းမိၼ်ၼၼ်ႉ လိူဝ်သေ 2 ၵေႃႉၼၼ်ႉ လႆႈတၢႆၵႂႃႇ ၼႂ်းၽေးၶဵၼ် ၵၢၼ်မိၼ် ဢၼ်ႁၢႆႉၸႃႉလိူဝ်ပိူၼ်ႈ ၼႂ်းမိူင်းၼၼ်ႉ ၼႆယဝ်ႉ။

ႁိူဝ်းမိၼ် 737-800 ဢၼ်ပဵၼ် ၶွင်ႁိူဝ်းမိၼ် Jeju Air ၸတ်းၵၢၼ်ၼၼ်ႉ လုၵ်ႉတီႈ ဝဵင်းၵုင်းထဵပ်ႈ မႃးထိုင်သေ ၽွင်းတိုၵ်ႉၶတ်းၸႂ် လူင်းတီႈဝဵင်းမုၼ်း ဢၼ်မီးၽၢႆႇႁွင်ႇဝဵင်းသျူဝ်းလ် မွၵ်ႈ 290 ၵီႇလူဝ်ႇမီႇတႃႇ (180 လၵ်း) ၼၼ်ႉ လႆႈလူႉတူၵ်းၵႂႃႇ။

ငဝ်းတူင်ႉ ဢၼ်ငဝ်းႁၢင်ႈသဵင် ၵၢဝ်းလီၸၢၼ်းၶဝ် ပွႆႇဢွၵ်ႇၼၼ်ႉ ၼႄဝႆႉဝႃႈ ႁိူဝ်းမိၼ်ၼၼ်ႉ လႅၼ်ႈၶၢမ်ႈ ၶူင်ႇႁိူဝ်းမိၼ် ဝႆးဝႆးသေ လႅပ်ႈတေပဵၼ်လူၺ်ႈ ၶိူင်ႈလူင်းႁိူဝ်းမိၼ် ဢၼ်တိုၵ်ႉဢိုတ်းဝႆႉၼၼ်ႉသေ ၵႂႃႇၽႃႇၺႃးႁူဝ်ႉသေ ႁဵတ်းႁႂ်ႈ ႁိူဝ်းမိၼ်တႅၵ်ႇသေ ဢွၵ်ႇမႃး ၵွၼ်းၽႆးလမ် ဢၼ်တၼ်တၼ်ၼၼ်ႉယဝ်ႉ။

ႁွင်ႈၵၢၼ်ၽၢႆႇၶႄၾႆး မိူင်းၵၢဝ်းလီၸၢၼ်းၶဝ် ပိုၼ်ၽၢဝ်ႇဝႃႈ ႁိူဝ်းမိၼ်တူၵ်းၼႆႉ မီးၵူၼ်းတၢႆ 179 ၵေႃႉ ၼႆယဝ်ႉ။ ၵူၼ်းႁဵတ်းၵၢၼ်ၶိုၵ်ႉၶၵ်ႉၶဝ် ၸၼ်ဢဝ်ၵူၼ်းႁဵတ်းၵၢၼ် သွင်ၵေႃႉ ၵႂႃႇတီႈလွတ်ႈၽေး။ ၶဝ်သွင်ၵေႃႉၼႆႉ ႁူႉတူဝ်သေ ဢမ်ႇႁၼ်မီးလွင်ႈမၢတ်ႇၸဵပ်း ဢၼ်ၸၢင်ႈတၢႆလႆႈ ၼႆ ၽူႈမီးပုၼ်ႈၽွၼ်း ၽၢႆႇပၢႆးယူႇလီၶဝ် လၢတ်ႈၼႄၼင်ႇၼႆ။

Lee Jeong-hyeon ၽူႈၵွၼ်းႁူင်းၶႄၾႆး ဝဵင်းမုၼ်း လၢတ်ႈတီႈ ပၢင်သပ်းၸႅင်ႈၶၢဝ်ႇ ဢၼ်ဢွၵ်ႇတီႈ ငဝ်းႁၢင်ႈသဵင်ၼၼ်ႉဝႃႈ ႁိူဝ်းမိၼ်ၼၼ်ႉ လႆႈလူႉလႅဝ်ၵႂႃႇ တင်းမူတ်းသေ ၼႂ်းၶူဝ်းၶွင် ဢၼ်လူႉလႅဝ်ၵႂႃႇၼၼ်ႉ ၵူၺ်းႁၼ်လႆႈ ၶိူင်ႈႁၢင်မၼ်းၵွႆးၼႆယဝ်ႉ။ ၽူႈမီးပုၼ်ႈၽွၼ်းၶဝ် တိုၵ်ႉၵူတ်ႇထတ်း လွင်ႈတၢင်း ဢၼ်ႁဵတ်းႁႂ်ႈ ႁိူဝ်းမိၼ်တူၵ်းၼၼ်ႉယူႇ ဢိၵ်ႇပႃး လွင်ႈဝႃႈ ႁိူဝ်းမိၼ်ၼၼ်ႉ ၸွင်ႇၽႃႇၺႃး ၼူၵ်ႉႁိုဝ် ဢမ်ႇၽႃႇၺႃးၼႆ Lee လၢတ်ႈၼႄၼင်ႇၼႆ။

ၽူႈမီးပုၼ်ႈၽွၼ်း ၽၢႆႇႁွင်ႈၵၢၼ်ၽွင်းလူင်ၶဝ် လၢတ်ႈဝႃႈ ႁေႃၵုမ်းထိင်း လႆႈပၼ်ၾၢင်ႉ လွင်ႈၼူၵ်ႉ တီႈႁိူဝ်းမိၼ် မိူဝ်ႈၼႃးတေဢၢၼ်းလူင်း ဢမ်ႇႁိုင်သင်ၼၼ်ႉသေ ပၼ်ၶႂၢင်ႉ ၵူၼ်းႁဵတ်းၵၢၼ် ႁိူဝ်းမိၼ် ႁႂ်ႈလူင်းတီႈ ဢၼ်ဢမ်ႇမိူၼ်ၵၼ် ၼႆယဝ်ႉ။ မိူဝ်ႈပႆႇတူၵ်းၼၼ်ႉ ၵူၼ်းႁဵတ်းၵၢၼ် ၼႂ်းႁိူဝ်းမိၼ်ၶဝ် သူင်ႇသၢႆငၢႆ လွင်ႈၶီၸႂ် ၼႆ ၽူႈမီးပုၼ်ႈၽွၼ်းၶဝ် လၢတ်ႈၼႄၼင်ႇၼႆ။

ၽူႈမီးၸၼ်ႉသုင် ၽၢႆႇထၢၼ်ၽွင်းလူင် ၵၢၼ်တေႃႉသူင်ႇ Joo Jong-wan လၢတ်ႈဝႃႈ ၵူၼ်းႁဵတ်းၵၢၼ်ၶဝ် လႆႈဢဝ်ၶေႃႈမုၼ်း လွင်ႈႁိူဝ်းမိၼ် ၵျႅတ်ႉ လႄႈ ၶိူင်ႈမၢႆသဵင် ၼႂ်းႁွင်ႈၶီႇႁိူဝ်းမိၼ် ၼႆယဝ်ႉ။ တႃႇတေၵူတ်ႇထတ်း ႁႂ်ႈယဝ်ႉတူဝ်ႈၼၼ်ႉ တေၸၢင်ႈႁိုင်လၢႆလိူၼ် ၼႆယဝ်ႉ။ သဵၼ်ႈတၢင်းႁိူဝ်းမိၼ် တီႈၶူင်ႇႁိူဝ်းမိၼ် မုၼ်းၼၼ်ႉ တေဢိုတ်းဝႆႉ တေႃႇထိုင် လိူၼ်ၸၼ်ႇဝႃႇရီႇ 1 ဝၼ်း ၼႆယဝ်ႉ။


ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၽေးၵိုင်ႉၵၢင်ႉႁိူဝ်းမိၼ်_ဢၼ်ႁၢႆႉၸႃႉလိူဝ်ပိူၼ်ႈ_ၼိူဝ်လိၼ်ၵၢဝ်းလီၸၢၼ်း_ၵူၼ်းတၢႆ_179_ၵေႃႉ&oldid=10348"