ၽူႈၼမ်းမႂ်ႇ ၸုမ်းၼေႇတူဝ်း Mark Rutte ၵႂႃႇဢႅဝ်ႇယဵမ်ႈ မိူင်းယူႇၶရဵၼ်း

ဝၼ်းသုၵ်း၊ ဢွၵ်ႇထူဝ်ႇပႃႇ 4၊ 2024

ၽူႈၼမ်းၼႂ်းလူင် ၸုမ်းၼေႇတူဝ်ႇ မႂ်ႇ မၢၵ်ႉၶ်ရုတ်ႉတႄႇ ၵႂႃႇဢႅဝ်ႇလႄႇ မိူင်းယူႇၶရဵၼ်း မိူဝ်ႈဝၼ်းၽတ်းၼၼ်ႉသေ ပၼ်ၵႂၢမ်းမၼ်ႈဝႃႈ ၸုမ်းဢူၺ်းလီၶဝ် တေသိုပ်ႇၵမ်ႉထႅမ် ၶိပ်ႉၾ် ၼႂ်းပၢင်တိုၵ်း တင်း ရတ်ႈသျႃးၼၼ်ႉယူႇ ဝႃႈၼႆ။

ရုတ်ႉတႄႇ လႆႈႁူပ်ႉထူပ်း ၸွမ်ပွင်ၸိုင်ႈ ယူႇၶရဵၼ်း တီႈဝဵင်းၶိပ်ႉၾ် ပဵၼ်ၽွင်း ရတ်ႈသျႃးဢဝ် လွင်ႈတိုၵ်းတေႃးၵၢင်ႁၢဝ်သေ ပိုတ်းယိုဝ်း တီႈဝဵင်းလူင် ယူႇၶရဵၼ်း သွင်ပွၵ်ႈၼၼ်ႉယဝ်ႉ။

ၽူႈၼမ်းမႂ်ႇ ၸုမ်းၼေႇတူဝ်း ပၼ်ၵႂၢမ်းမၼ်ႈ မိူဝ်ႈမၼ်း ႁပ်ႉပုၼ်ႈၽွၼ်း မိူဝ်ႈဝၼ်းဢႃးတိတ်ႉၼၼ်ႉဝႃႈ တေၸွႆႈထႅမ် ႁႂ်ႈမိူင်းဝၼ်းတူၵ်း ၵမ်ႉထႅမ် မိူင်းယူႇၶရဵၼ်း ဢၼ်တိုၵ်းတေႃး လွင်ႈရတ်ႈသျႃး ၶဝ်ႈတိုၵ်း တဵမ်ထူၼ်ႈ ၸဵမ်မိူဝ်ႈ လိူၼ်ၾႅပ်ႇဝႃႇရီႇ 2022 ၼၼ်ႉသေ ၼႂ်းပီၼႆႉ ၵမ်ႈၼမ် လႆႈၵႅတ်ႇၶႄႁႄႉၵင်ႈ ယွၼ်ႉ တပ်ႉသိုၵ်းရတ်ႈသျႃး ဢမ်ႇယွမ်းၵၢၼ်ႉ သိုပ်ႇတဵၵ်းၶဝ်ႈတီႈ ၼႂ်းၼႃႈလိၼ်ပွတ်းဢွၵ်ႇ ၸိုင်ႈမိူင်းၼၼ်ႉ ၼႆယဝ်ႉ။

ရုတ်ႉတႄႇ လၢတ်ႈဝႃႈ မၼ်းယုမ်ႇယမ်ဝႃႈ မၼ်းတေႁဵတ်းၵၢၼ်ၸွမ်း ၽူႈလႂ်ၽႂ်သေဢမ်ႇဝႃႈ ပေႃးထုၵ်ႇလိူၵ်ႈတင်ႈ ပဵၼ်ၸွမ်ပွင်ၸိုင်ႈ ဢမႄႇရိၵၢၼ်ႇ ဢၼ်ပဵၼ် ၽူႈၶဝ်ႈၸုမ်း ဢၼ်မီးဢႃႇၼႃႇလိူဝ်ပိူၼ်ႈ ၼႂ်းၸုမ်းဢူၺ်းလီၼၼ်ႉ ၼႂ်းလိူၼ်ၼူဝ်ႇဝႅမ်ႇပႃႇၼၼ်ႉယူႇ ၼႆယဝ်ႉ။ ဢၼ်ၼႆႉ ၸၢင်ႈပဵၼ် ၶၢဝ်းယၢမ်း ဢၼ်လမ်ႇလွင်ႈ တႃႇ လွင်ႈၶတ်းၸႂ် မိူင်းယူႇၶရဵၼ်း တႃႇတေသိုပ်ႇ ႁဵတ်းႁႂ်ႈ လႆႈ လွင်ႈၵမ်ႉထႅမ် မိူင်းဝၼ်းတူၵ်း ၼႆယဝ်ႉ။

ၸႄႇလႅၼ်းသၵီး လၢတ်ႈဝႃႈ မၼ်းဢုပ်ႇၵၼ်တင်း ရုတ်ႉတႄႇ လွင်ႈၽႅၼ်ၵၢၼ် ဢၼ်ယူႇၶရဵၼ်း ႁွင်ႉဝႃႈ ၽႅၼ်ၵၢၼ် ဢွင်ႇမၢၼ်ၼၼ်ႉ ဢွၼ်တၢင်း ပၢင်ၵုမ် ၼေႇတူဝ်း ဢၼ်တေၸတ်းႁဵတ်း တီႈတပ်ႉၵၢင်ႁၢဝ် ရမ်ႇသတၢႆႇ မိူင်းၵျႃႇမၼီႇ ၼႂ်းဝူင်ႈၼႃႈၼၼ်ႉၼႆယဝ်ႉ။ ပၢင်ၵုမ်ၼႆႉ ၽူႈဢွၼ်ႁူဝ် ၽၢႆႇၵႅတ်ႇၵင်ႈ ဢၼ်လုၵ်ႉတီႈ ၸိုင်ႈမိူင်း ဢၼ်ပဵၼ် ၽူႈႁူမ်ႈၼႃႈၵၢၼ် 50 မိူင်းလိူဝ်လိူဝ် ၸိူဝ်းဢၼ် ၵႆႉႁူပ်ႉထူပ်းၵၼ် တႃႇၵပ်းသိုပ်ႇ ၸွႆႈထႅမ် ၶိူင်ႈၵွင်ႈၵၢင်ႇ တႃႇပၢင်တိုၵ်းၼၼ်ႉ မႃးႁူမ်ႈၵၼ် ဝႃႈၼႆယဝ်ႉ။

ယဝ်ႉၵေႃႈ သွင်ၵေႃႉ ဢုပ်ႇၵၼ် လွင်ႈငဝ်းလၢႆး ပၢင်တိုၵ်း လႄႈ လွင်ႈလူဝ်ႇ ဢၼ်တပ်ႉသိုၵ်း ယူႇၶရဵၼ်းၶဝ် လူဝ်ႇတႅတ်ႈၼႅတ်ႈၼၼ်ႉ ၼႆယဝ်ႉ။ ၸႄႇလႅၼ်းသၵီး ၶိုၼ်းလၢတ်ႈဝႃႈ မိူင်းယူႇၶရဵၼ်းၼႆႉ လူဝ်ႇၵွင်ႈၵၢင်ႇထႅင်ႈ ပႃးၸဵမ်ၵွင်ႈၵၢင်ႇ ဢၼ်ၸၢင်ႈယိုဝ်းလႆႈ ၵႆ ဢၼ်ၶဝ်ယွၼ်းမႃး ႁိုင်ၼၼ်ႉၼႆယဝ်ႉ။

မိူဝ်ႈထၢမ်ဝႃႈ ပၢင်တိုၵ်း တီႈပွတ်းဢွၵ်ႇတွၼ်ႈၵၢင်ၼႆႉ ၸွင်ႇမၼ်းတေတုမ်ႉတိူဝ်ႉ ၶၢဝ်းယၢမ်း ဢၼ်မၼ်းဝူၼ်ႉဝႆႉ တႃႇၽႅၼ်ၵၢၼ် ဢွင်ႇပေႉၼၼ်ႉႁိုဝ်ၼႆၼၼ်ႉ ၸႄႇလႅၼ်းသၵီး မၢႆတွင်းဝႃႈ ဢမႄႇရိၵၢၼ်ႇလႄႈ ဢိင်းၵလဵတ်ႈ လၢတ်ႈဝႃႈ ဢီႇရၢၼ်း ပၼ်မၢၵ်ႇၼူၾႆး လႄႈ ႁိူဝ်းမိၼ် ဢမ်ႇပႃးၵူၼ်း တီႈရတ်ႈသျႃး တႃႇၸႂ်ႉတိုဝ်း တေႃႇ ယူႇၶရဵၼ်းၼႆယဝ်ႉ။

မၼ်းယင်းတုၵ်းယွၼ်း ႁႂ်ႈမိူင်းဝၼ်းတူၵ်းၶဝ် ယႃႉပႅတ်ႈ လွင်ႈႁႄႉႁၢမ်ႈ ဢၼ်ယူႇၶရဵၼ်း ၸႂ်ႉတိုဝ်း ၶိူင်ႈၵွင်ႈၵၢင်ႇ ဢၼ်မိူင်းဝၼ်းတူၵ်း ၵမ်ႉၸွႆႈပၼ် တႃႇယိုဝ်းသႂ်ႇ ၼႂ်းမိူင်းရတ်ႈသျႃး လိုၵ်ႉလိုၵ်ႉၼၼ်ႉ ၼႆယဝ်ႉ။

တပ်ႉၵၢင်ႁၢဝ် မိူင်းယူႇၶရဵၼ်း လၢတ်ႈဝႃႈ ၼႂ်းၵႃႈ ႁိူဝ်းမိၼ် Shahed 105 လမ်း ဢၼ်ရတ်ႈသျႃး ပွႆႇဢွၵ်ႇ ၼႂ်းၶိုၼ်းၼၼ်ႉ 78 လမ်း လႆႈလူႉလႅဝ်ၵႂႃႇ မိူဝ်ႈဝၼ်းၽတ်းၼၼ်ႉ ယွၼ်ႉဝႃႈ ၼႂ်းမိူင်းၼၼ်ႉ လႆႈထုၵ်ႇၺႃးယိုဝ်း 15 တီႈၼႆယဝ်ႉ။

ၽၢႆႇထႅင်ႈတၢင်းၼိုင်ႈ သိုၵ်းရတ်ႈသျႃး လႆႈႁႄႉႁၢမ်ႈ ႁိူဝ်းမိၼ် ယူႇၶရဵင်း 113 လမ်း ၼႂ်းၶိုၼ်းလဵဝ် ၼႆ ႁွင်ႈၵၢၼ်ၽၢႆႇၵႅတ်ႇၵင်ႈ တီႈဝဵင်းမွသ်ႉၵူဝ်ႇ ဢွၵ်ႇၶၢဝ်ႇဝႆႉၼင်ႇၼႆ။ ႁိူဝ်းမိၼ် Drone ၸိူဝ်းၼႆႉ လႆႈထုၵ်ႇယႃႉလူႉ တီႈလႅၼ်လိၼ် ရတ်ႈသျႃး 4 တီႈ ဢၼ်ပဵၼ် ဝဵင်း Belgorod, Bryansk, Kursk လႄႈ Voronezh ၸိူဝ်းၼၼ်ႉ ၼႆယဝ်ႉ။

ၸွင်ႇမီးတၢင်းႁၼ်ထိုင်ၼိူဝ် ၶၢဝ်ႇဢၼ်ၼႆႉႁိုဝ်? ပိုၼ်ၽႄႈပၼ်တႃႉ!