Jump to content

ၽူႈဢွၼ်ႁူဝ် ႁႅꩡ်ႉပူဝ်းလႃႇ တၢႆ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းဢႃးတိတ်ႉ၊ သႅပ်ႇ​ထႅမ်ႇပႃႇ 29၊ 2024

ၽူႈဢွၼ်ႁူဝ် ႁႅꩡ်ႉပူဝ်းလႃႇ Hassan Nasrallah

ၽူႈဢွၼ်ႁူဝ် ၸုမ်းႁႅꩡ်ႉပူဝ်းလႃႇ ႁသ်ႉသၼ်ႇၼႃႇသရႃႇလႃႇ လႆႈတၢႆၵႂႃႇ ယွၼ်ႉ ဢိတ်ႇသရေးၶဝ် ယိုဝ်းသႂ်ႇ ၼႆ ၸုမ်းၶဝ် မၵ်းမၼ်ႈဝႆႉၼင်ႇၼႆ။ ၸုမ်းယိပ်းၵွင်ႈၵၢင်ႇ ႁႅꩡ်ႉပူဝ်းလႃႇ ဢၼ်ဢီႇရၢၼ်ႇ ၵမ်ႉထႅမ်ၼၼ်ႉ ဢွၵ်ႇၶေႃႈပိုၼ်ၽၢဝ်ႇ မိူဝ်ႈဝႃးဝႃႈ ပိၵ်ႉသမ်ႉဝႃႈ ၽူႈဢွၼ်ႁူဝ်ၶဝ် လႆႈတၢႆၵႂႃႇသေတႃႉ တေသိုပ်ႇႁဵတ်းသိုၵ်း ၽၢႆႇသႃႇသၼႃႇ တေႃႇ ၽူႈၶဵၼ်ၶဝ်သေ တေၵမ်ႉထႅမ် ပႃးလႅတ်ႈသတၢႆးယူႇ ၼႆယဝ်ႉ။

ၵႅမ်ၸွမ်ပွင်ၸိုင်ႈ ဢီႇရၢၼ်ႇ ၸေႃႇဝတ်ႉ ၸႃႇရိပ်ႉ ႁွင်ႉဝႃႈ ႁသ်ႉသၼ်ႇ ၼႃႇသရႃႇလႃႇ ပဵၼ်ၽူႈတိုၵ်းတေႃး ၽူႈတဵၵ်းတဵင် ၼႆသေ လၢတ်ႈဝႃႈ မၼ်းမွင်ၸႂ်ၸွမ်း လွင်ႈဢၼ် ၽူႈဢွၼ်ႁူဝ် ၸုမ်းႁႅꩡ်ႉပူဝ်းလႃႇ လႆႈတၢႆၵႂႃႇၼၼ်ႉယူႇ။

မိူဝ်ႈၸဝ်ႉၼႆႉ ၽၢႆႇသိုၵ်းဢိတ်ႇသရေး ဢွၵ်ႇၶေႃႈပိုၼ်ၽၢဝ်ႇဝႃႈ ၽူႈဢွၼ်ႁူဝ် ၸုမ်းႁႅꩡ်ႉပူဝ်းလႃႇ ၵေႃႉ႞ လႆႈတၢႆၵႂႃႇ ယွၼ်ႉ ႁိူဝ်းမိၼ် ဢၼ်ယိူင်းဢၢၼ်း ယိုဝ်းသႂ်ႇ ဝဵင်းပႄႇရူတ်ႉ ပွတ်းႁွင်ႇ ဢၼ်ပဵၼ် ငဝ်ႈငုၼ်း ၸုမ်းႁႅꩡ်ႉပူဝ်းလႃႇ မိူဝ်ႈဝၼ်းသုၵ်းၼၼ်ႉ ၼႆယဝ်ႉ။ ၽူႈဢွၼ်ႁူဝ် ၸုမ်းႁႅꩡ်ႉပူဝ်းလႃႇ ႁသ်ႉသၼ်ႇၼႃႇသရႃႇလႃႇ လႆႈတၢႆၵႂႃႇၸွမ်း ၽူႈၵွၼ်းသိုၵ်းတၢင်ႇၸိူဝ်း ပႃးၸဵမ် ၽူႈၵွၼ်းသိုၵ်း ႁႅꩡ်ႉပူဝ်းလႃႇ ပွတ်းၸၢၼ်း ဢႃႇလီၵႃႇၵီႇ ၼႆ ၽၢႆႇသိုၵ်းဢိတ်ႇသရေး ဢွၵ်ႇၶေႃႈပိုၼ်ၽၢဝ်ႇဝႆႉၼင်ႇၼႆ။

မၼ်းလၢတ်ႈဝႃႈ ယွၼ်ႉပိူဝ်ႈ ၶေႃႈမုၼ်းၵၢၼ်ၸွပ်ႇၶဝ် လႆႈႁူႉတႅတ်ႈၼႅတ်ႈဝႃႈ ၽူႈဢွၼ်ႁူဝ် ၸၼ်ႉသုင်ၶဝ် မီးဝႆႉ တီႈငဝ်ႈငုၼ်း ၸုမ်းႁႅꩡ်ႉပူဝ်းလႃႇ ဢၼ်မီးတႂ်ႈလိၼ်ၼၼ်ႉလႄႈ ႁိူဝ်းမိၼ်သိုၵ်း ဢိတ်ႇသရေးၶဝ် လႆႈယိုဝ်းသႂ်ႇ ႁူင်းႁေႃ ၵူၼ်းယူႇသဝ်း တီႈပွၵ်ႉ တႃႇႁီႇယႅတ်ႉ တီႈ ဝဵင်းပႄႇရူတ်ႉ ပွတ်းႁွင်ႇၼၼ်ႉၼႆယဝ်ႉ။

ႁသ်ႉသၼ်ႇ ၼႃႇသရႃႇလႃႇ ဢွၼ်ႁူဝ် ၸုမ်းႁႅꩡ်ႉပူဝ်းလႃႇ မႃး 32 ပီသေ ၵေႃႇသၢင်ႈ ၸုမ်းၵေႃႇၵၢၼ်ႁၢႆႉ ဢၼ်မီးဢဵၼ်ႁႅင်း ၼႂ်းပိုၼ်ႉတီႈၼၼ်ႉယဝ်ႉ။ လွင်ႈမၼ်းတၢႆၼႆႉ ၽူႈပႂ်ႉတူၺ်း ၼႂ်းပိုၼ်ႉတီႈၶဝ် ႁၼ်ထိုင်ဝႃႈ ပဵၼ်လွင်ႈတုမ်ႉတိူဝ်ႉႁၢဝ်ႈႁႅင်း တွၼ်ႈတႃႇ ၸုမ်းယိပ်းၵွင်ႈၵၢင်ႇ ၼႆယဝ်ႉ။

မိူင်းဝၼ်းတူၵ်းၵမ်ႈၽွင်ႈ ပႃးၸဵမ် ဢမႄႇရိၵၢၼ်ႇၶဝ် မၵ်းမၼ်ႈ ၸုမ်းႁႅꩡ်ႉပူဝ်းလႃႇ ပဵၼ်ၸုမ်းၵေႃႇၵၢၼ်ႁၢႆႉ ၼႆယဝ်ႉ။ မိူဝ်ႈဝၼ်းသုၵ်းၼၼ်ႉ ယွၼ်ႉႁိူဝ်းမိၼ် ဢိတ်ႇသရေးၶဝ် ယိုဝ်းသႂ်ႇလႄႈ ၵူၼ်းတၢႆ 6 ၵေႃႉ လႄႈ ၵူၼ်းမၢတ်ႇၸဵပ်း 91 ၵေႃႉ ၼႆ ႁွင်ႈၵၢၼ်ၽၢႆႇပၢႆးယူႇလီ မိူင်းလႄႇပႃႇၼွၼ်ႇ ပိုၼ်ၽၢဝ်ႇဝႆႉၼင်ႇၼႆ။

သိုၵ်းဢိတ်ႇသရေး ၶိုၼ်းပၼ်ၾၢင်ႉ ၵူၼ်းမိူင်းလႄႇပႃႇၼွၼ်ႇ ႁႂ်ႈယူႇၵႆယၢၼ် ၶိူင်ႈၵွင်ႈၵၢင်ႇ လႄႈ ၶူဝ်းၶွင် တိုၵ်း ႁႅꩡ်ႉပူဝ်းလႃႇ ပႃးၸဵမ် တီႈၶႅပ်ႇဝဵင်း ပွတ်းၸၢၼ်း ဝဵင်းပႄႇရူတ်ႉ လႄႈ ပွတ်းၸၢၼ်း မိူင်းလႄႇပႃႇၼွၼ်ႇ ၼႆယဝ်ႉ။ ႁွင်ႈၵၢၼ်ၽၢႆႇၼွၵ်ႈမိူင်း ဢမႄႇရိၵၢၼ်ႇ ဢွၵ်ႇလိၵ်ႈပၼ်ၾၢင်ႉ တိုၵ်းသူၼ်း ႁႂ်ႈၵူၼ်းမိူင်းဢမႄႇရိၵၢၼ်ႇ ဢွၵ်ႇမိူင်းၵႂႃႇ ၼႆယဝ်ႉ။

ၽွင်းလူင်ၽၢႆႇပၢႆးယူႇလီ မိူင်းလႄႇပႃႇၼွၼ်ႇ လၢတ်ႈဝႃႈ ၼႂ်းၶၢဝ်းတၢင်း ဢမ်ႇတဵမ်သွင်ဝူင်ႈၼႆႉ ၵူၼ်းတၢႆ 1,030 ၵေႃႉ ၼႂ်းၼၼ်ႉ ၼၢင်းယိင်း 156 ၵေႃႉ လႄႈ လုၵ်ႈဢွၼ်ႇ 87 ၵေႃႉ ၼႆယဝ်ႉ။


ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၽူႈဢွၼ်ႁူဝ်_ႁႅꩡ်ႉပူဝ်းလႃႇ_တၢႆ&oldid=9275"