ၽူႈမီးပုၼ်ႈၽွၼ်းၶဝ် ပိုၼ်ၽၢဝ်ႇ လွင်ႈၽၢႆႇလင် ၵေႃႉႁဵတ်းႁၢႆႉၵၢတ်ႇ ၵျႃႇမၼီႇ
ဝၼ်းဢႃးတိတ်ႉ၊ တီႇသႅမ်ႇပႃႇ 22၊ 2024
ၽူႈမီးပုၼ်ႈၽွၼ်း လူင်ပွင်ၸိုင်ႈၶဝ် လၢတ်ႈမိူဝ်ႈၼႆႉ လိူၼ်တီႇသႅမ်ႇပႃႇ 22 ဝၼ်း ၼၼ်ႉဝႃႈ ၵဵဝ်ႇလူၺ်ႈ ၵူၼ်းၵေႃႉဢၼ်ဢဝ်လူတ်ႉၵႃး ၽႃႇသႂ်ႇ ၵၢတ်ႇၶရိတ်ႉသမၢတ်ႉ တီႈမိူင်းၵျႃႇမၼီႇ ၼၼ်ႉ ၶဝ်ႁပ်ႉလႆႈ ၶၢဝ်ႇပၼ်ၽၢင်ႉ ၸဵမ်မိူဝ်ႈပီၵၢႆ ဝႃႈၼႆယဝ်ႉ။ ၽူႈမီးပုၼ်ႈၽွၼ်းၶဝ် လၢတ်ႈၸိူင်ႉၼႆ မိူဝ်ႈဢၼ်ၶေႃႈမုၼ်း ဢၼ်ၵဵဝ်ႇၵပ်း ၵူၼ်းဢၼ်လႆႈတၢႆၵႂႃႇ 5 ၵေႃႉၼၼ်ႉ ဢွၵ်ႇမႃးထႅင်ႈ ႁူဝ်ယွႆႈမၼ်းၼၼ်ႉယဝ်ႉ။
လုမ်းၽၢႆႇၶၢႆႉတီႈယူႇ လႄႈ ၵူၼ်းပၢႆႈၽေး မိူင်းၵျႃႇမၼီႇ တႅမ်ႈဝႆႉ တီႈၼိူဝ် ၼႅင်ႈတူင်ႇဝူင်းၵူၼ်း X မိူဝ်ႈၼႆႉဝႃႈ ၶေႃႈတိူင်ႇလၢတ်ႈ ဢၼ်လႆႈႁပ်ႉမႃး မိူဝ်ႈၶၢဝ်းမႆႈပူၼ်ႉမႃး သဵင်ႈၼၼ်ႉ လႆႈဢဝ်ၸႂ်သႂ်ႇ မိူၼ်ၼင်ႇ ၶေႃႈတိူင်ႇလၢတ်ႈ တၢင်ႇဢၼ်ၼၼ်ႉ ၼႆယဝ်ႉ။ ၵူၺ်းၵႃႈ ၶဝ်လၢတ်ႈဝႃႈ ႁွင်ႈၵၢၼ်ၶဝ် ဢမ်ႇမီးဢႃႇၼႃႇ တႃႇတေၵူတ်ႇထတ်းၼႆလႄႈ ၸင်ႇလႆႈသိုပ်ႇပွင်ႇၶၢဝ်ႇပၼ် ႁွင်ႈၵၢၼ်တၢင်ႇဢၼ် ဢၼ်ၵဵဝ်ႇၶွင်ႈ ၸွမ်းၼင်ႇပိူင်ၵၢၼ်ၼၼ်ႉ ၼႆယဝ်ႉ။
ပလိၵ်ႈ တီႈဝဵင်းမႅၵ်ႉတႄႇပိူတ်ႉ ပွတ်းၵၢင် ဢၼ်ပဵၼ်တီႈ လွင်ႈၼႆႉ ပဵၼ်မႃးၼၼ်ႉ လၢတ်ႈဝႃႈ ၼႂ်းၵူၼ်း 5 ၵေႃႉ ဢၼ်လႆႈတၢႆယွၼ်ႉ လူတ်ႉၵႃးၽႃႇတၢႆ မိူဝ်ႈဝၼ်းသုၵ်းပူၼ်ႉမႃး မိူဝ်ႈ တီႇသႅမ်ႇပႃႇ 20 ဝၼ်းၼၼ်ႉ ၶဝ်ႈပႃး ၼၢင်းယိင်း ဢႃႇယု 45 တေႃႇ 75 ပီ 4 ၵေႃႉ လႄႈ လုၵ်ႈဢွၼ်ႇၸၢႆး ဢႃႇယု 9 ပီ ၵေႃႉ႞ ၼႆယဝ်ႉ။ ။ ယဝ်ႉၵေႃႈ ၼႂ်းၵူၼ်းမၢတ်ႇၸဵပ်း 200 ၵေႃႉၼၼ်ႉ တႃႇ 41 ၵေႃႉ ပဵၼ်ၵူၼ်းဢၼ်ႁၢဝ်ႈႁႅင်း ၼႆ ၽူႈမီးပုၼ်ႈၽွၼ်းၶဝ် လၢတ်ႈမိူဝ်ႈဝႃး။ လႆႈႁူႉဝႃႈ ၶဝ်လႆႈယူတ်းယႃတူဝ်ဝႆႉ တီႈႁူင်းယႃဝဵင်းမႅၵ်ႉတႄႇပိူတ်ႉ ဢိၵ်ႇပႃး ႁူင်းယႃဝဵင်းတၢင်ႇတီႈ ၼႆယဝ်ႉ။
ၵူၼ်းၵေႃႉဢၼ် ဢဝ်ၵႃးၽႃႇသႂ်ႇၼၼ်ႉ ပဵၼ်မေႃယႃ မိူင်းသေႃႇတီႇဢႃႇရေးပီးယႃးသေ မႃးယူႇတီႈမိူင်းၵျႃႇမၼီႇ ၸဵမ်မိူဝ်ႈပီ 2006 သေ မီးဝႂ်ၶႂၢင်ႉယူႇသဝ်း ၶၢဝ်းယၢဝ်းၼႆ ၽူႈမီးပုၼ်ႈၽွၼ်းၶဝ် လၢတ်ႈၼႄၼင်ႇၼႆ။ မိူဝ်ႈဝႃး ဝၼ်းဢႃးတိတ်ႉၼၼ်ႉ ၵူၼ်းမိူင်းသေႃႇတီႇဢႃႇရေးပီးယႃး ဢၼ်ထၢင်ႇထိူမ်ဝႃႈ ပဵၼ်ၵူၼ်းႁဵတ်း လွင်ႈဢဝ်လူတ်ႉၽႃႇၼၼ်ႉ လႆႈမႃးၶိုၼ်ႈလုမ်းတြႃးသေ ၽူႈတႅပ်းတတ်းတြႃး ၸီႉသင်ႇႁႂ်ႈတီႉၺွပ်း ၵုမ်းၶင်ဝႆႉ မိူဝ်ႈပႆႇဢဝ်လိူင်ႈမၼ်း ၼႆယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- MICHAEL PROBST and VANESSA GERA. "German authorities received tipoffs last year about the suspect in Christmas market attack" — AP News, December 22, 2024
- AP News. "German authorities were warned last year about suspect in Christmas market ramming" — The Times of Israel, December 22, 2024