ၼႂ်းၶၢဝ်းတၢင်းၼိုင်ႈပီ ၶိူင်ႈမိၼ်တရုၼ်း တပ်ႉသိုၵ်းယူႇၶရဵၼ်း ၼမ်မႃးသၢမ်ပုၼ်ႈ

ဝၼ်းဢင်းၵၢၼ်း၊ ဢေႇပရႄႇ 16၊ 2024 

ၵူၼ်းသိုၵ်းယူႇၶရဵၼ်း ယိပ်းဝႆႉ ၶိူင်ႈမိၼ်တရုၼ်း

ၽူႈၵွၼ်းတပ်ႉၸၼ်ႉသုင် ယူႇၶရဵၼ်း ၵေႃႉၼိုင်ႈလၢတ်ႈဝႃႈ ၶိူင်ႈမိၼ်တရုၼ်း ဢၼ်ၸႂ်ႉယူႇယၢမ်းလဵဝ် ၵႃႈတီႈ တပ်ႉယူႇၶရဵၼ်းၼႆႉ ပေႃးၸႃႇဢဝ် ပီ 2023 ၼႆ လိူဝ်မႃး သၢမ်ပုၼ်ႈ ဝႃႈၼႆႉယဝ်ႉ။ တီႈၼႂ်းတပ်ႉၸုမ်းယူႇၶရဵၼ်း ဢၼ်လႆႈတေႃႇသူႈ လွင်ႈရတ်ႈသျႃးၶဝ် တိုၵ်းတေႃးယူႇၼၼ်ႉ လႆႈတိူဝ်းၸႂ်ႉ ၶိူင်ႈမိၼ်တရုၼ်းဢၼ်ဢမ်ႇပႃးၵူၼ်းႁေႃႈ ၼၼ်ႉယဝ်ႉ။

ၸဝ်ႈသိုၵ်းလူင်တပ်ႉၸုမ်းတရုၼ်း ယူႇၶရဵၼ်း ဝႃႇၻဵမ်း သုၶႃရိပ်ႉသၵီး (Vadym Sukharevskyi)လၢတ်ႈဝႃႈ လွၵ်းလၢႆးၸိူဝ်းၼႆႉ တေသိုပ်ႇတိူဝ်းတွၼ်းမႃး ဝႃႈၼႆယဝ်ႉ။ တပ်ႉယူႇၶရဵၼ်း ဢၼ်လႆႈထူပ်း ရတ်ႈသျႃးၶဝ် တိုၵ်းတေႃး ႁိုင် ၸမ် 26 လိူၼ်ၼၼ်ႉ ၼင်ႇႁိုဝ် ၶဝ်ပေႃးတေၶဵင်ႇတႃႉ တိုၵ်းတေႃးၶိုၼ်းလႆႈ တပ်ႉရတ်ႈသျႃး ဢၼ်ဢဵၼ်ႁႅင်းငိုၼ်း ဢဵၼ်ႁႅင်းၵူၼ်းယႂ်ႇတိူဝ်းယႂ်ႇလိူဝ်ၶဝ်ၼၼ်ႉလႄႈ ၸင်ႇလႆႈၶတ်းၸႂ် တိူဝ်းႁဵတ်းဢွၵ်ႇ ၶိူင်ႈလၢၵ်ႈၼၢၵ်ႈ ဢၼ်ၸႂ်ႉပၢႆးၸၢင်ႈၵၢပ်ႈပၢၼ်မႂ်ႇၼၼ်ႉယဝ်ႉ။

ၸဝ်ႈသိုၵ်းလူင် ဝႃႇၻဵမ်း သုၶႃရိပ်ႉသၵီး လႆႈမွၵ်ႇလၢတ်ႈ တီႈ ပၢင်ၼႄ ၶိူင်ႈဢၼ်ႁဵတ်းဢွၵ်ႇတီႈမိူင်းယူႇၶရဵၼ်း ၸိူဝ်းပဵၼ် ၶိူင်ႈဢၼ်ဢမ်ႇပႃးၵူၼ်းႁေႃႈ ဢၼ်ပဵၼ် ၶိူင်ႈၵႂႃႇၼိူဝ်လိၼ်၊ ၶိူင်ႈၵႂႃႇၼႂ်းၼမ်ႉ လႄႈ ၶိူင်ႈမိၼ် ပိူင်ႁၢင်ႈသိုၵ်း ဢီႇလႅတ်ႇထရေႃးၼိတ်ႉ လႄႈ ၵႃးလဵၵ်း ၸိူဝ်းၼၼ်ႉယဝ်ႉ။ တရုၼ်း ဢၼ်ၸႂ်ႉယူႇတီႈ တပ်ႉသိုၵ်းယူႇၶရဵၼ်း တႃႇ ႁူဝ်ပၢၵ်ႇ 99 ၼႆႉ ပဵၼ် တရုၼ်းၸိူဝ်းဢၼ်ႁဵတ်းဢွၵ်ႇ ၼႂ်းမိူင်း ဝႃႈၼႆယဝ်ႉ။ ယွၼ်ႉပိူဝ်ႈဝႃႈ ဢဵၼ်ႁႅင်းၵူၼ်း၊ ဢဵၼ်ႁႅင်းၶိူင်ႈလၢၵ်ႈၼၢၵ်ႈ ၽၢႆႇယူႇၶရဵၼ်းၶဝ် ယွမ်းမႃးလႄႈ ရတ်ႈသျႃးၶဝ် လႆႈပႄႉပုၼ်ႈမႃးတီႈ ၼႃႈသိုၵ်းယူႇယဝ်ႉ။

တီႈတပ်ႉ တင်းသွင်ၽၢႆႇၼႆႉ ယွၼ်ႉပိူဝ်ႈ ဢွၼ်ၵၼ် တိူဝ်းၸႂ်ႉတရုၼ်းမႃးလႄႈ လွင်ႈသုၵ်ႉယုင်ႈၼႆႉ လုၵ်ႉဢဝ်တီႈ ၼႃႈသိုၵ်းသေ တိူဝ်းဝႆႉယိူင်းမၢႆတိုၵ်းတေႃး ၸိူဝ်းပဵၼ် တပ်ႉသိုၵ်း၊ ႁူင်းၸၢၵ်ႈၽလၢင်း လႄႈ ၵၢၼ်တေႃႉသူင်ႇ ၸိူဝ်းၼႆႉယဝ်ႉ။

ငိူၼ်ႈငဝ်ႈတိုၼ်း

• VOA. "ယူကရိန်းစစ်တပ် ဒရုန်းယာဉ် တနှစ်အတွင်းသုံးဆတိုး" — VOA, April 16, 2024