ၼွၵ်ႈမိူင်းၼႂ်းမိူင်း သႄႉသွမ်းၼိူဝ် လွင်ႈၶတ်းၸႂ် တႃႇၶႃႈႁႅမ် ၸွမ်ပွင်ၸိုင်ႈၵဝ်ႇ ထရမ်ႉ

ဝၼ်းၸၼ်၊ သႅပ်ႇ​ထႅမ်ႇပႃႇ 16၊ 2024 

ၸွမ်ပွင်ၸိုင်ႈၵဝ်ႇ တေႃႇၼႄႇထရမ်ႉ

ဝၢႆးသေ လုမ်းၵူတ်ႇထတ်း မိူင်းႁူမ်ႈတုမ် FBI မၵ်းမၼ်ႈဝႃႈ မီးလွင်ႈၶတ်းၸႂ် တႃႇတေၶႃႈႁႅမ် ၸွမ်ပွင်ၸိုင်ႈၵဝ်ႇ ဢမႄႇရိၵၢၼ်ႇ တေႃႇၼႄႇထရမ်ႉယဝ်ႉ ၸိူဝ်းပဵၼ် ၼႂ်းမိူင်း လႄႈ လွင်ႈၼွၵ်ႈမိူင်း ဢၼ်ၵၼ်သၢၼ်ၶတ်းသႄႉသွမ်းၼိူဝ် လွင်ႈၵေႃႇၵၢၼ်ႁၢႆႉ လႄႈ တုၵ်းယွၼ်းႁၢဝ်ႈႁႅင်းမႃး ႁႂ်ႈတိူဝ်းပၼ်လွင်ႈႁူမ်ႇလူမ်ႈ ၼႆယဝ်ႉ။

ၸွမ်ၽွင်းလူင် ဢိင်းၵလဵတ်ႈ ၶီႇယႃႇသတႃႇမႃႇ လၢတ်ႈဝႃႈ “လႆႈငိၼ်းၶၢဝ်ႇၼႆႉ ပဵၼ်ဢၼ်လႆႈ မႆႈၸႂ်တႄႉတႄႉ” ဝႃႈၼႆ။ မိူၼ်ၼင်ႇဝႃႈ မၼ်းၶတ်းၸႂ်ၶႃႈႁႅမ်တၢႆ။ ယွၼ်ႉဝႃႈ ၵၢၼ်ၵူတ်ႇထတ်းၼႆႉ တိုၵ်ႉသိုပ်ႇႁဵတ်းယူႇလႄႈ ဢမ်ႇၶႂ်ႈၶဝ်ႈလၢတ်ႈၵႂႃႇႁူဝ်ယွႆႈမၼ်း။ ၵူၺ်းၵႃႈ လွင်ႈႁဵတ်းသၢင်ႈ ဢၼ်ႁၢႆႉၸႃႉၼၼ်ႉ ဢမ်ႇမီးတီႈယူႇ ၼႂ်းတူင်ႇဝူင်းၵၢၼ်မိူင်း သေဢိတ်း။ ႁဝ်းၶႃႈ လူဝ်ႇလၢတ်ႈၸႅင်ႈဝႃႈ လွင်ႈႁဵတ်းသၢင်ႈ ၽူႈၵေႃႇၵၢၼ်ႁၢႆႉၸိူင်ႉၼႆၼႆႉ ဢမ်ႇယွမ်းႁပ်ႉလႆႈသေဢိတ်း” ဝႃးၼႆ။ မၼ်းၸဝ်ႈလၢတ်ႈဝႃႈ လွင်ႈၼႆႉ မၼ်းၸဝ်ႈလႆႈမွင်ၸႂ်ၸွမ်းတႄႉတႄႉဝႃႈဝႃႈသေ လၢတ်ႈဝႃႈ ၵၢၼ်မိူင်းၼႆႉ ယႃႇပေဢဝ်မႃးလေႃးလႄးၵၼ် တင်းၵၢၼ်ႁုၵ်းႁၢႆႉ ၼႆယဝ်ႉ။

ၵႅမ်ၸွမ်ပွင်ၸိုင်ႈယၢမ်းလဵဝ် ၵႃႇမႃႇလႃႇႁႄးရိသ် ၽူႈၶေႉၶဵင်ႇ တၢင်တူဝ်ပႃႇတီႇ တီႇမူဝ်ႇၶရႅတ်ႉတိၵ်ႉ တႃႇပၢင်လိူၵ်ႈတင်ႈ ၸွမ်ပွင်ၸိုင်ႈ ၼႂ်းလိူၼ်ၼူဝ်ႇဝႅမ်ႇပႃႇၼၼ်ႉ လၢတ်ႈဝႃႈ လွင်ႈပဵၼ်မႃး တီႈ ၸွမ်ပွင်ၸိုင်ႈၵဝ်ႇ ထရမ်ႉ ဢၼ်ၽွင်းတိုၵ်ႉမီးတီႈ ပၢင်ႇလဵၼ်ႈၵွပ်ႉၾ် မိူဝ်ႈဝၼ်းဢႃးတိတ်ႉၼၼ်ႉ မၼ်းၼၢင်း လႆႈတူၵ်းၸႂ်ၵူဝ်ႁႄ ၼႆယဝ်ႉ။ ယဝ်ႉၵေႃႈ လၢတ်ႈဝႃႈ ၼင်ႇႁိုဝ် လွင်ႈႁုၵ်းႁၢႆႉ တေဢမ်ႇယႂ်ႇမႃးထႅင်ႈၼၼ်ႉ တေလႆႈၶတ်းၸႂ် တင်းမူတ်း ၼႆယဝ်ႉ။

ၸွမ်ပွင်ၸိုင်ႈ ၵျူဝ်းပၢႆႇတႅၼ်ႇ ပိုၼ်ၽၢဝ်ႇဝႃႈ တေသိုပ်ႇႁဵတ်းပၼ် လွင်ႈလူဝ်ႇ တပ်ႉႁူမ်ႇလူမ်ႈ ၶိုၵ်ႉတွၼ်း ၶွင် Secret Service တႃႇႁႂ်ႈ ၸွမ်ပွင်ၸိုင်ႈၵဝ်ႇ ထရမ်ႉ တေလွတ်ႈၽေး ၼႆယဝ်ႉ။ တွၼ်ႈတႃႇလွင်ႈဢၼ်ပဵၼ်မႃးမိူဝ်ႈဝၼ်းဢႃးတိတ်ႉၼၼ်ႉ ၽူႈတႅၼ်းသၽႃး ရီႇပၢပ်ႉပလိၵ်ႇၵႅၼ်ႇ ၸွမ်ပွင်ၸိုင်ႈၵဝ်ႇထရမ်ႉ၊ လိူဝ်သေ ၽူႈၵွၼ်းၸႄႈမိူင်းၶဝ်ယဝ်ႉ ၽူႈတႅၼ်းၽွင်း ၶွၼ်ႇၵရႅတ်ႉ ဢၼ်လုၵ်ႉတီႈ ပႃႇတီႇ တီႇမူဝ်ႇၶရႅတ်ႉ မႃးၼၼ်ႉၵေႃႈ ဢွၼ်ၵၼ် သႄႉသွမ်း။

ၸွမ်ပွင်ၸိုင်ႈ ယူႇၶရဵၼ်း ဝေႃႇလေႃႇၻီးမႃးရ် ၸႄးလႅၼ်းသၵီး လၢတ်ႈဝႃႈ ယွၼ်ႉလႆႈငိၼ်းဝႃႈ ၸွမ်ပွင်ၸိုင်ႈၵဝ်ႇ ထရမ်ႉတႄႉ ဢမ်ႇတိူဝ်ႉမၢတ်ႇသင်လႄႈ ၸူမ်းသိူဝ်းတႄႉတႄႉ ၼႆယဝ်ႉ။ ၽွင်းလူင် ၵၢၼ်ၼွၵ်ႈမိူင်း ဢိတ်ႉၸရေး ဢိတ်ႇသရေး ၶႅတ်ႉၸ် ၵေႃႈ လႆႈယွၼ်းပၼ် တႃႇၸွမ်ပွင်ၸိုင်ႈၵဝ်ႇ ထရမ်ႉ ဢၼ်လႆႈႁူပ်ႉထူပ်း လွင်ႈၶတ်းၸႂ် ၶႃႈႁႅမ်တၢႆ ပွၵ်ႈၵမ်းသွင်ၼၼ်ႉယူႇ။

ငိူၼ်ႈငဝ်ႈၶၢဝ်ႇ

• Malu Cursino. "What we know about the apparent Trump shooting attempt" — BBC News, September 16, 2024
• VOA News. "သမ္မတဟောင်းထရမ့်အပေါ် လုပ်ကြံဖို့ ကြိးစားမှုအတွက် ပြည်တွင်း၊ ပြည်ပ ရှုတ်ချ" — VOA News, September 16, 2024