Jump to content

ၸွမ်ၽွင်းလူင် ဢိၼ်းတီးယႃး သႄႉသွမ်း လွင်ႈႁဵတ်းႁၢႆႉၵျွင်းႁိၼ်ႇတူႇ တီႈမိူင်းၶႅၼ်ႇၼေႇတႃႇ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းဢင်းၵၢၼ်း၊ ၼူဝ်ႇဝႅမ်ႇပႃႇ 5၊ 2024

ၸွမ်ၽွင်းလူင် ဢိၼ်းတီးယႃး လႄႈ ၸွမ်ၽွင်းလူင် ၶႅၼ်ႇၼေႇတႃႇ (ၶႅပ်းႁၢင်ႈၵဝ်ႇ)

မိူဝ်ႈဝၼ်းၸၼ်ၼၼ်ႉ ၸွမ်ၽွင်းလူင် ဢိၼ်းတီးယႃး ၼရႅၼ်ႇတရႃႇမူဝ်ႇတီႇသႄႉသွမ်း လွင်ႈဢၼ် ၽူႈတူင်ႉၼိုင် သႃႇသၼႃႇ သိၵ်ႉၶ်ၶဝ် တင်ႈၸႂ် မႃးႁဵတ်းႁၢႆႉ ၵျွင်းႁိၼ်ႇတူႇ တီႈမိူင်းၶႅၼ်ႇၼေႇတႃႇၼၼ်ႉ ၼႆယဝ်ႉ။ လွင်ႈၵပ်းသိုပ်ႇ ဢိၼ်ႇတီးယႃး လႄႈ ၶႅၼ်ႇၼေႇတႃႇ ဢၼ်ယၢမ်ႈၶဵင်ႈၶႅင်မႃး ၸဵမ်မိူဝ်ႈတႄႇမၼ်းၼၼ်ႉ ယွၼ်ႉလွင်ႈတၢင်း ဢၼ်ပဵၼ်မႃး ၵမ်းလိုၼ်းသုတ်းၼႆႉသေ လႆႈတိူဝ်းတုမ်ႉတိူဝ်ႉလိူဝ်မႃးထႅင်ႈယဝ်ႈ။

မၼ်းသႄႉသွမ်းႁၢဝ်ႈႁႅင်း လွင်ႈဢၼ် မႃးႁဵတ်းႁၢႆႉ ၵျွင်းႁိၼ်ႇတူႇၼၼ်ႉ ၼႆယဝ်ႉ။ ၸွမ်ၽွင်းလူင် မိူင်းဢိၼ်းတီးယႃး တႅမ်ႈဝႆႉ တီႈၼိူဝ် ၼႅင်ႈသိုဝ်ႇတူင်ႇဝူင်းၵူၼ်း X ဝႃႈ လွင်ႈၼႆႉ ပဵၼ်လွင်ႈႁဵတ်းသၢင်ႈ ဢၼ်ၵူဝ်ႁႄ ဢၼ်ႁဵတ်းႁႂ်ႈ လွင်ႈၵပ်းသိုပ်ႇ ၵၢၼ်မိူင်း သွင်မိူင်း လူႉလႅဝ်ၵႂႃႇ ၼႆယဝ်ႉ။

မိူင်းၶႅၼ်ႇၼေႇတႃႇၼႆႉ မီးႁူဝ်ၼပ်ႉၵူၼ်း သိၵ်ႉၶ် ၼမ်လိူဝ်ပိူၼ်ႈ ၼွၵ်ႈသေ မိူင်းဢိၼ်းတီးယႃးၼၼ်ႉယဝ်ႈ။ ၼႂ်းၼၼ်ႉ ပႃးၸၢဝ်းသႃႇသၼႃႇ သိၵ်ႉၶ် ဢၼ်ႁွင်ႉဝႃႈ ၶႃႇလီႇသတၢၼ်ႇ ဢၼ်ၶဝ်ႈပႃးၼႂ်း ၵၢၼ်တူင်ႉၼိုင် တႃႇတေၽၢတ်ႇဢွၵ်ႇ ဢိၼ်းတီးယႃးသေ ၸုၵ်းမၼ်ႈ ပဵၼ်ၸိုင်ႈမိူင်းလွတ်ႈလႅဝ်းသဝ်းၶေႃၼၼ်ႉယဝ်ႉ။

ဝၢႆးသေ လူင်ပွင်ၸိုင်ႈ ၶႅၼ်ႇၼေႇတႃႇ ၼႄးဝႃႈ လူင်ပွင်ၸိုင်ႈ ဢိၼ်ႇတီးယႃး ၶဝ်ႈပႃးၽၢႆႇလင် လွင်ႈဢၼ် ၵူၼ်းမိူင်းၶႅၼ်ႇၼေႇတႃႇ ဢၼ်ပဵၼ်ၽူႈတူင်ႉၼိုင် ၶႃႇလီႇသတၢၼ်ႇ Hardeep Singh Nijjar ဢႃႇယု 45 ပီ လႆႈထုၵ်ႇၶႃႈတၢႆ တီႈဝဵင်းဝႅၼ်ႇၵူးဝႃး ၼႂ်းပီ 2023 ၼၼ်ႉယဝ်ႉ လွင်ႈၵပ်းသိုပ်ႇ ၼႂ်းၵႄႈ သွင်မိူင်း ၸင်ႇၵတ်းမႃး။ ဢိၼ်းတီးယႃးၵေႃႈ ၼႄးဝႃႈ မိူင်းၶႅၼ်ႇၼေႇတႃႇၼႆႉ ပၼ်တီႈယူႇ ၵူၼ်းၵေႃႇၵၢၼ်ႁၢႆႉ ၽၢႆႇသႃႇသၼႃႇ မႃးလၢႆသိပ်းပီယဝ်ႉ။

လွင်ႈဢၼ်ပဵၼ်မႃး ၵမ်းလိုၼ်းသုတ်းတႄႉ ပဵၼ်လွင်ႈ ၵူၼ်းႁၢႆႉၶဝ် မႃးႁဵတ်းႁၢႆႉတေႃႇ ၵျွင်းႁိၼ်ႇတူႇ တီႈဝဵင်း Brampton ဢၼ်မီး ၽၢႆႇႁွင်ႇဝၼ်းတူၵ်း ဝဵင်း Toronto မွၵ်ႈ 30 လၵ်း မိူဝ်ႈဝၼ်းဢႃးတိတ်ႉ လိူၼ်ၼူဝ်ႇဝႅမ်ႇပႃႇ 3 ဝၼ်းၼၼ်ႉ ယဝ်ႉ။ မိူဝ်ႈၸဝ်ႉၼၼ်ႉ ၸွမ်ၽွင်းလူင် မိူင်းၶႅၼ်ႇၼေႇတႃႇ Justin Trudeau လၢတ်ႈဝႃႈ လွင်ႈၼႆႉ ဢမ်ႇယွမ်းႁပ်ႉလႆႈ ၼႆယဝ်ႉ။ ၸွမ်ၽွင်းလူင် ဢိၼ်းတီးယႃး မူဝ်ႇတီႇၵေႃႈ လၢတ်ႈဝႃႈ မုင်ႈမွင်းဝႃႈ လူင်ပွင်ၸိုင်ႈ မိူင်းၶႅၼ်ႇၼေႇတႃႇ တေၼပ်ႉယမ် ပၵ်းပိူင်မၢႆမီႈသေ တေႁဵတ်းသၢင်ႈ ႁႂ်ႈမီး လွင်ႈၽဵင်ႇပဵင်း ၼႆယဝ်ႉ။


ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၸွမ်ၽွင်းလူင်_ဢိၼ်းတီးယႃး_သႄႉသွမ်း_လွင်ႈႁဵတ်းႁၢႆႉၵျွင်းႁိၼ်ႇတူႇ_တီႈမိူင်းၶႅၼ်ႇၼေႇတႃႇ&oldid=9936"