ၸွမ်ၽွင်းလူင် ဢိၼ်းတီးယႃး တေၵႂႃႇမိူင်းရတ်ႈသျႃး

ဝၼ်းသဝ်၊ ၸူႇလၢႆႇ 6၊ 2024 

ၸွမ်ၽွင်းလူင် ဢိၼ်းတီးယႃး လႄႈ ၸွမ်ပွင်ၸိုင်ႈ ရတ်ႈသျႃး (ၶႅပ်းႁၢင်ႈၵဝ်ႇ)

လူင်ပွင်ၸိုင်ႈရတ်ႈသျႃး ပိုၼ်ၽၢဝ်ႇဝႃႈ မိူဝ်ႈဝၼ်းၸၼ်ၼၼ်ႉ ၸွမ်ၽွင်းလူင် ဢိၼ်းတီးယႃး တေၵႂႃႇလႄႇ မိူင်းရတ်ႈသျႃး တႃႇၶၢဝ်းတၢင်း 2 ဝၼ်းၼႆယဝ်ႉ။ ဝၼ်းဢၼ်ၸွမ်ၽွင်းလူင် ဢိၼ်းတီးယႃး တေမႃးဢႅဝ်ႇယဵမ်ႈၼၼ်ႉ ပွၵ်ႈၼႆႉ ပဵၼ်ပွၵ်ႈၵမ်းႁႅၵ်ႈ ပိုၼ်ၽၢဝ်ႇပဵၼ်တၢင်းၵၢၼ်။ ၸဵမ်မိူဝ်ႈပၢၼ် သူဝ်ႇဝီႇယႅတ်ႉၼၼ်ႉ ရတ်ႈသျႃး မီးလွင်ႈၵပ်းသိုပ်ႇ တင်း ဢိၼ်းတီးယႃး ႁၢဝ်ႈႁႅင်းမႃးသေ တႄႇဢဝ် မိူဝ်ႈပီ 2022 ၼၼ်ႉ ရတ်ႈသျႃး ၶဝ်ႈတိုၵ်း မိူင်းယူႇၶရဵၼ်းၼၼ်ႉ ဢိၼ်းတီးယႃး ပဵၼ်မႃး ၽူႈႁူမ်ႈၵႃႉၶၢႆ ရတ်ႈသျႃး ဢၼ်လမ်ႇလွင်ႈၼၼ်ႉယဝ်ႉ။

ၶႄႇလႄႈ ဢိၼ်းတီးယႃး ပဵၼ်မႃး မိူင်းဢၼ်သိုဝ်ႉဢဝ် ၼမ်ႉမၼ်းမဵၼ် လႄႈ ၵႅတ်ႉသ် သၽႃႇဝ မိူင်းရတ်ႈသျႃး ပိူင်လူင်မၼ်း ၸဵမ်မိူဝ်ႈ ဢမႄႇရိၵၢၼ်ႇ လႄႈ ၸုမ်းဢူၺ်းလီၶဝ် တမ်းဝၢင်း ၶေႃႈပူင် တႃႇႁႄႉႁၢမ်ႈ ၶူဝ်းၶွင် ဢၼ်ရတ်ႈသျႃး တေႃႉသူင်ႇဢွၵ်ႇ ၼႂ်းၵၢတ်ႇ မိူင်းဝၼ်းတူၵ်းၼၼ်ႉယဝ်ႉ။ မိူဝ်ႈပၢၼ် ၸွမ်ၽွင်းလူင် ၼရႅၼ်ႇတရႃႇ မူဝ်ႇတီႇၼၼ်ႉ ဢိၼ်းတီးယႃး ဢမ်ႇသၢၼ်ၶတ်း လွင်ႈဢၼ် ရတ်ႈသျႃး သိမ်းဢဝ် မိူင်းယူႇၶရဵၼ်းၼၼ်ႉသေတႃႉ ၵူၺ်းလၢတ်ႈဝႃႈ လူဝ်ႇလႆႈႁႃလၢႆးၵႄႈလိတ်ႈ ဢၼ်ၵတ်းယဵၼ် ၼႆယဝ်ႉ။

ၵူၺ်းၵႃႈ ၸဵမ်မိူဝ်ႈ ရတ်ႈသျႃး ၵပ်းသိုပ်ႇၸမ်ၸႂ်ၵၼ်တင်း မိူင်းၶႄႇ ဢၼ်ပဵၼ် ၽူႈၶႄႉၶဵင်ႇလူင် ဢိၼ်းတီးယႃးၼၼ်ႉ လွင်ႈၵပ်းသိုပ်ႇ ရတ်ႈသျႃး-ဢိၼ်းတီးယႃး လႆႈၶဵင်ႈၶႅင်မႃး။ ၸွမ်ၽွင်းလူင် ဢိၼ်းတီးယႃးၵေႃႈ ဢမ်ႇလႆႈၶဝ်ႈႁူမ်ႈ ပၢင်ၵုမ်လူင် ၸုမ်းႁူမ်ႈသၢင်ႈ သျၢၼ်းႁၢႆး ဢၼ်ရတ်ႈသျႃးလႄႈ ၶႄႇ ၸတ်းႁဵတ်း တႃႇတေ တိုၵ်းတေႃး ၸုမ်းဢူၺ်းလီ မိူင်းဝၼ်းတူၵ်း မိူဝ်ႈဝၼ်းၽတ်းၼၼ်ႉ။

ပၢင်ၵုမ်ၵူႈပီ တီႈဝဵင်းဢႃႇသတႃႇၼႃႇ မိူင်းၵႃႇၸၢၵ်ႈသတၢၼ်ႇၼၼ်ႉ မူဝ်ႇတီႇ သူင်ႇၽွင်းလူင် ၵၢၼ်ၼွၵ်ႈမိူင်းမၼ်းၵူၺ်းသေ ၸွမ်ပွင်ၸိုင်ႈရသျႃး ပူႇတိၼ်ႇ လႄႈ ၸွမ်ပွင်ၸိုင်ႈၶႄႇ သျီးၸိၼ်းပိင်ႇၶဝ်တႄႉ လႆႈၶဝ်ႈႁူမ်ႈၸွမ်းယူႇ။

ပွၵ်ႈၵမ်းလိုၼ်းသုတ်း ဢၼ်ၸွမ်ၽွင်းလူင် မူဝ်ႇၻီႇ ၵႂႃႇမိူင်းရသျႃးၼႆႉ ပဵၼ်တႃႇၵႂႃႇၶဝ်ႈႁူမ်ႈ ပၢင်ၵုမ်လူင် ပၢႆးမၢၵ်ႈမီး ပီ 2019 တီႈဝဵင်း Vladivostok မိူင်းရတ်ႈသျႃး ပွတ်းဢွၵ်ႇၼၼ်ႉယဝ်ႉ။ ၽူႈမီးပုၼ်ႈၽွၼ်း လူင်ပွင်ၸိုင်ႈၶဝ်တႄႉ လၢတ်ႈဝႃႈ လွင်ႈဢၼ် မူဝ်ႇတီႇ တေၵႂႃႇဢႅဝ်ႇမိူင်းရတ်ႈသျႃး ၼႂ်းဝူင်ႈၼႃႈၼႆႉ တေၶိုၼ်းမႄး လွင်ႈဢမ်ႇၽဵင်ႇပဵင်း ၵၢၼ်ၵႃႉၶၢႆ ၼႂ်းၵႄႈ ဢိၼ်းတီးယႃးလႄႈ ရတ်ႈသျႃးၼၼ်ႉသေဢမ်ႇၵႃး တေဢုပ်ႇဢူဝ်းၵၼ် လွင်ႈၼႃႈတီႈ ဢိၼ်းတီးယႃး ၼႂ်းပၢင်တိုၵ်း မိူင်းယူႇၶရဵၼ်းၼၼ်ႉ ၼႆယဝ်ႉ။ လွင်ႈဢႅဝ်ႇမိူင်းရတ်ႈသျႃး မိူဝ်ႈလိူၼ်ၸူႇလၢႆႇ 8 ဝၼ်း လႄႈ 9 ဝၼ်းၼၼ်ႉ ပဵၼ်တွၼ်ႈၼိုင်ႈ ၼႂ်းပၢင်ၵုမ် ဢိၼ်းတီးယႃး လႄႈ ရတ်ႈသျႃး ဢၼ်တႄႇႁဵတ်းမႃး မိူဝ်ႈပီ 2000 ၼၼ်ႉ ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Hannah Ellis-Petersen and agencies. "India PM Modi to meet Putin in first trip to Russia since Ukraine war began" — The Guardian, July 5, 2024
• Rhea Mogul. "Modi to visit Moscow next week as Kremlin says ‘all issues on the agenda’" — CNN, July 4, 2024
• Vladimir Isachenkov and Ashok Sharma. "India’s Modi will meet with Putin on 2-day visit to Russia starting Monday, Kremlin says" — AP News, July 5, 2024
• AP News. "India's Modi will meet with Putin on 2-day visit to Russia starting Monday, Kremlin says" — VOA News, July 5, 2024
• The Times of India. "PM Modi's two-day Russia visit from July 8: Check details" — The Times of India, July 5, 2024
• Rajesh Roy, Ann M. Simm ons and Tripti Lahiri. "India’s Modi Seeks to Shore Up Ties With Russia and Offset China’s Sway" — The Wall Street Journal, July 5, 2024
• Sakshi Dayal and Tanvi Mehta. "Modi to seek early discharge of Indians from Russian army in Moscow talks" — Reuters, July 5, 2024