ၸွမ်ၽွင်းလူင် မိူင်းၶႅၼ်ႇၼေႇတႃႇ ပိုၼ်ၽၢဝ်ႇတေထွၼ်တူဝ်ဢွၵ်ႇ

ဝၼ်းဢင်းၵၢၼ်း၊ ၸၼ်ႇဝႃႇရီႇ 7၊ 2025

ၸွမ်ၽွင်းလူင် မိူင်းၶႅၼ်ႇၼေႇတႃႇ Justin Trudeau ပိုၼ်ၽၢဝ်ႇ လွင်ႈထွၼ်တူဝ်ဢွၵ်ႇ မိူဝ်ႈဝၼ်းၸၼ် ဝၢႆးသေ မၼ်းလႆႈ ဢႃႇၼႃႇမႃး ၸမ်သိပ်းပီယဝ်ႉ ယွၼ်ႉ လွင်ႈဢမ်ႇပဵင်းပေႃးၸႂ် ၼိူဝ် လွင်ႈဢွၼ်ႁူဝ်မၼ်း လႄႈ လွင်ႈသုၵ်ႉယုင်ႈ ၼႂ်းလူင်ပွင်ၸိုင်ႈမၼ်း ဢၼ်ယႂ်ႇမႃး ယွၼ်ႉ ၽွင်းလူင် ၽၢႆႇငိုၼ်းတွင်း မၼ်း ၵိုင်ႉၵၢင်ႉဢွၵ်ႇၵႂႃႇ ၼၼ်ႉယဝ်ႉ။

တီႈပၢင်သပ်းၸႅင်ႈၶၢဝ်ႇ ဢၼ်ၸတ်းႁဵတ်းတီႈ ဝဵင်းလူင်ဢူဝ်ႇတႃႇဝႃႇၼၼ်ႉ ၸတ်ႉတိၼ်ႇထရူဝ်း လၢတ်ႈဝႃႈ မၼ်းတေထွၼ်တူဝ်ဢွၵ်ႇ တီႈၼႃႈတီႈ ႁူဝ်ၼႃႈ ပႃႇတီႇလိပ်ႇပရႄႇ လႄႈ ၸွမ်ၽွင်းလူင် ၼႆယဝ်ႉ။

မၼ်းလႆႈႁူပ်ႉထူပ်း လွင်ႈတုၵ်းယွၼ်း ႁႂ်ႈထွၼ်တူဝ်ဢွၵ်ႇ ၼႂ်းပႃႇတီႇမၼ်း လႄႈ လႆႈၵႄႈလိတ်ႈ လွင်ႈဢၼ်မၼ်း လၢတ်ႈဝႃႈ ပဵၼ်သၽႃး ဢၼ် "ဢမ်ႇႁဵတ်းၵၢၼ်လႆႈ" ဢၼ်ဝႃႈၼၼ်ႉယဝ်ႉ။

Trudeau လၢတ်ႈဝႃႈ တေႃႇထိုင် ပႃႇတီႇမၼ်း လိူၵ်ႈၽူႈဢွၼ်ႁူဝ်မႂ်ႇၼၼ်ႉ မၼ်းတေယူႇၼႂ်းၼႃႈတီႈမၼ်းသေ လၢတ်ႈဝႃႈ “မိူင်းၼႆႉ ထုၵ်ႇလီလႆႈလိူၵ်ႈ ၽူႈဢွၼ်ႁူဝ် ဢၼ်တႄႉတႄႉ တႃႇပၢင်လိူၵ်ႈတင်ႈ ဢၼ်တေမႃးၼၼ်ႉယူႇ” ၼႆသေ မၼ်းၸႅင်ႈလႅင်းမႃးဝႃႈ သင်ဝႃႈ ၶႃႈတေလႆႈ တိုၵ်းတေႃး ၽၢႆႇၼႂ်းၼႆၸိုင် ၶႃႈဢမ်ႇၸၢင်ႈ ပဵၼ်တၢင်းလိူၵ်ႈဢၼ်လီသုတ်း တီႈၼ်ႂးပၢင်လိူၵ်ႈတင်ႈၼၼ်ႉ ဝႃႈၼႆယဝ်ႉ။"

ၵူၼ်းမိူင်းၶႅၼ်ႇၼေႇတႃႇၶဝ် လႆႈၸႂ်တူၵ်း ယွၼ်ႉငိုၼ်းၽိူဝ်း လႄႈ ၶၼ်ႁိူၼ်းယေး ၶိုၼ်ႈမႃးလႄႈ ႁဵတ်းႁႂ်ႈ Trudeau လႆႈထုၵ်ႇ ပႃႇတီႇမၼ်း လႄႈ ပႃႇတီႇသၢၼ်ၶတ်းၶဝ် တဵၵ်းတဵင် ႁၢဝ်ႈႁႅင်းတႄႉတႄႉ။

ယွၼ်ႉၵူၼ်းမိူင်းၶႅၼ်ႇၼေႇတႃႇၶဝ် ဢမ်ႇပဵင်းပေႃးၸႂ် လွင်ႈပၢႆးမၢၵ်ႈမီး တင်း ၵၢၼ်မိူင်းလႄႈ လွင်ႈၸိုဝ်ႈသဵင် Trudeau လႆႈတူၵ်းလူင်းမႃး ၼႂ်းပီပူၼ်ႉမႃးၸိူဝ်းၼႆႉ။

လွင်ႈဢၼ် ၸွမ်ပွင်ၸိုင်ႈ ဢမႄႇရိၵၢၼ်ႇ ဢၼ်ထုၵ်ႇလိူၵ်ႈတင်ႈ တေႃႇၼႄႇထရမ်ႉ လွၵ်ႇငိူတ်ႈဝႃႈ တေၵဵပ်းၶွၼ်ႇ 25 ဝၢၵ်ႈ ၼိူဝ်ၶူဝ်းၶွင် ၶႅၼ်ႇၼေႇတႃႇၼၼ်ႉၵေႃႈ ႁဵတ်းႁႂ်ႈ ၵၢၼ်မိူင်း မိူင်းၶႅၼ်ႇၼေႇတႃႇ လႆႈသၼ်ႇၶွၼ်းၵႂႃႇယူႇ။

ၵႅမ်ၸွမ်ၽွင်းလူင် လႄႈ ၽွင်းလူင်ၽၢႆႇငိုၼ်းတွင်း ၶရိတ်ႉသတီးယႃး ၾရီႇလႅၼ်ႇ ၵိုင်ႉၵၢင်ႉထွၼ်တူဝ်ဢွၵ်ႇ မိူဝ်ႈလိူၼ်တီႇသႅမ်ႇပႃႇ ယွၼ်ႉတေႁဵတ်းႁိုဝ် ၵႄႈလိတ်ႈ ပေႃႇလသီႇ ထရမ်ႉ လႄႈ လွင်ႈဢမ်ႇၽွမ်ႉၸႂ်ၵၼ် တၢင်ႇလွင်ႈၼၼ်ႉယဝ်ႉ။ လွင်ႈတူင်ႉၼိုင် မၼ်းၼၢင်း ၼႆႉ ပဵၼ်လွင်ႈသိူဝ်ႇသဵၼ်ႈတၢင်း တႃႇTrudeau တေတူၵ်းသုမ်းၼၼ်ႉယဝ်ႉ။

ၸွင်ႇမီးတၢင်းႁၼ်ထိုင်ၼိူဝ် ၶၢဝ်ႇဢၼ်ၼႆႉႁိုဝ်? ပိုၼ်ၽႄႈပၼ်တႃႉ!

ငိူၼ်ႈငဝ်ႈၶၢဝ်ႇ

David Ljunggren. "Canada PM Trudeau is likely to announce resignation, source says" — Reuters, January 6, 2024
Paula Newton, Hanna Park, Christian Edwards and Eve Brennan. "Canadian Prime Minister Justin Trudeau has announced his resignation. What happens now?" — CNN, January 6, 2024
Mike Wendling, Nadine Yousif in Toronto and John Sudworth in Ottawa. "Canada's Justin Trudeau cites 'internal battles' as he ends nine-year run" — BBC News, January 7, 2024
Rob Gillies. "Canada’s Trudeau announces resignation after nearly a decade as prime minister" — AP News, January 7, 2024
NHK News. "Canadian prime minister announces resignation" — NHK News, January 7, 2024

ပိုၼ်ၽႄ :