ၸွမ်ၸိုင်ႈမိူင်းဝႅတ်ႉၼမ်း လႆႈထုၵ်ႇတႅင်ႇတင်ႈပဵၼ်ႁူဝ်ၼႃႈ ပႃႇတီႇၶွမ်ႇမိဝ်ႇၼိတ်ႈ

ဝၼ်းဢႃးတိတ်ႉ၊ ဢေႃးၵၢတ်ႉ 4၊ 2024 

ၸွမ်ၸိုင်ႈဝႅတ်ႉၼမ်း တဵၼ်လမ်

မိူဝ်ႈလိူၼ်ဢေႃးၵၢတ်ႉ 3 ဝၼ်းၼၼ်ႉ ၸွမ်ၸိုင်ႈမိူင်းဝႅတ်ႉၼမ်း တဵၼ်လမ် လႆႈထုၵ်ႇ ယိုၼ်ယၼ် တႅင်ႇတင်ႈပဵၼ်ႁူဝ်ၼႃႈ ပႃႇတီႇၶွမ်ႇမိဝ်ႇၼိတ်ႈယဝ်ႉ။ ႁပ်ႉတၼ်းႁဵင်း ပုတ်ႈတႅၼ်းတီႈ ႁူဝ်ပဝ်ႈပႃႇတီႇ ဢၼ်သဵင်ႈၵၢမ်ႇၵႂႃႇ မိူဝ်ႈလိူၼ်ၵျူႇလၢႆႇ 19 ဝၼ်းၼၼ်ႉယဝ်ႉ။

သိုဝ်ႇၶၢဝ်ႇ ဢၼ်လူင်ပွင်ၸိုင်ႈၶဝ် ၵုမ်းၵမ်ၼၼ်ႉ ဢွၵ်ႇၶၢဝ်ႇဝႃႈ ၸွမ်ၸိုင်ႈ တဵၼ်လမ် လႆႈၼႃႈတီႈ ၽူႈၼမ်းၼႂ်းၵူႈလွင်ႈလွင်ႈ ပႃႇတီႇၶွမ်ႇမိဝ်ႇၼိတ်ႈ ဢၼ်ပဵၼ် ၼႃႈတီႈ ဢၼ်မီးဢႃႇၼႃႇ ၵၢၼ်မိူင်း တီႈမိူင်းဝႅတ်ႉၼမ်းၼၼ်ႉ ၼႆယဝ်ႉ။ ၵူၺ်းၵႃႈ ၸွင်ႇတေသိုပ်ႇႁၢပ်ႇၵိုတ်ႉပုၼ်ႈၽွၼ်း ႁူဝ်ပဝ်ႈႁူမ်ႈပွင်ၵၢၼ်တင်း ၸွမ်ၸိုင်ႈ ဢၼ်ဝႃႈၼၼ်ႉတႄႉ ပႆႇၸၢင်ႈလၢတ်ႈလႆႈ ၼႆယဝ်ႉ။

ၽူႈၼမ်းၵဝ်ႇပႃႇတီႇ ငူၺ်ႇၽူးထရွင်း ဢၼ်သဵင်ႈၵၢမ်ႇသုတ်းမုၼ်ၵႂႃႇၼႆႉ ၸဵမ်မိူဝ်ႈမၼ်းၶိုၼ်ႈႁၢပ်ႇၵၢၼ်မိူင်း မိူဝ်ႈပီ 2011 ၼၼ်ႉ မၼ်းႁူမ်ႇငမ်းၼိူဝ် တူင်ႇဝူင်းၵၢၼ်မိူင်း မိူင်းဝႅတ်ႉၼမ်း။ ငူၺ်ႇၽူးထရွင်းၼႆႉ လႆႈထုၵ်ႇလိူၵ်ႈပဵၼ် ၽူႈၼမ်းၼႂ်းပႃႇတီႇ ၼႂ်းပီ 2021 ပဵၼ်ပွၵ်ႈၵမ်း 3 ထပ်းၵၼ်။ မၼ်းပဵၼ်ၽူႈမီးပၢႆးဝူၼ်ႉ ဢၼ်ႁၼ်ထိုင်ဝႃႈ လွင်ႈၵိၼ်ငိုၼ်းၼႆႉ ပဵၼ်လွင်ႈလွၵ်ႇငိူတ်ႈလူင် တႃႇပႃႇတီႇၶွမ်ႇမိဝ်ႇၼိတ်ႉ ၼႆယဝ်ႉ။

မိူဝ်ႈပဵၼ်ႁူဝ်ၼႃႈ ပႃႇတီႇၶွမ်ႇမိဝ်ႇၼိတ်ႈ ပွၵ်ႈဢွၼ်တၢင်းသုတ်းၼၼ်ႉ တဵၼ်လမ် လၢတ်ႈၵမ်းသိုဝ်ႈဝႃႈ ယွၼ်ႉပိူဝ်ႈ လူဝ်ႇလႆႈမီး ၽူႈၼမ်းပႃႇတီႇ ၶၼ်ၶၼ်ဝႆးဝႆးလႄႈ ၸင်ႇလႆႈလိူၵ်ႈမၼ်း ၼႆယဝ်ႉ။

တဵၼ်လမ်ၼႆႉ ယၢမ်ႈႁၢပ်ႇၵၢၼ် ၼႂ်းထၢၼ်ၽွင်းလူင် ၵၢၼ်ႁူမ်ႇလူမ်ႈၵူၼ်းမိူင်းမႃး 40 ပီယဝ်ႉသေ ဢမ်ႇႁိုင်သင်ၼႆႉ ဝၢႆးသေ လႆႈႁပ်ႉပုၼ်ႈၽွၼ်း ပဵၼ်ၽွင်းလူင် ႁွင်ႈၵၢၼ်ၼၼ်ႉယဝ်ႉ လႆႈထုၵ်ႇလိူၵ်ႈပဵၼ် ၸွမ်ၸိုင်ႈ ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Associated Press. "Vietnam's president confirmed as new Communist Party chief" — VOA News, August 3, 2024
• Associated Press. "Vietnam President To Lam is confirmed as the new Communist Party chief, the country's most powerful political role" — ABC News, August 3, 2024
• Lien Hoang. "Vietnam confirms To Lam as Communist Party chief" — Nikkei, August 3, 2024