ၸွမ်ပွင်ၸိုင်ႈၶႄႇတိုၵ်းသူၼ်း ႁႂ်ႈမီးငဝ်းလၢႆး တႃႇယူႇၶရဵၼ်းလႄႈ ရတ်ႈသျႃး ထူပ်းၵၼ်လႆႈ
ဝၼ်းၸၼ်၊ ၸူႇလၢႆႇ 8၊ 2024
ၸွမ်ပွင်ၸိုင်ႈၶႄႇ သျီးၸိၼ်းပိင်ႇ လၢတ်ႈဝႃႈ တူင်ႇဝူင်းၸၢတ်ႈၸိုင်ႈလုမ်ႈၾႃႉ လူဝ်ႇလႆႈႁဵတ်းပၼ် ငဝ်းလၢႆး တႃႇဢုပ်ႇဢူဝ်းၵၼ် ၼႂ်းၵႄႈ ယူႇၶရဵၼ်းလႄႈ ရတ်ႈသျႃး ၼႆယဝ်ႉ။ ၸွမ်ပွင်ၸိုင်ႈ သျီးၸိၼ်းပိင်ႇ လၢတ်ႈၸိူင်ႉၼႆ မိူဝ်ႈၸွမ်ၽွင်းလူင် ႁၢင်ႇၵေႇရီႇ Viktor Orban ၵႂႃႇဢႅဝ်ႇမိူင်းၶႄႇၼၼ်ႉယဝ်ႉ။
ၽၢႆႇၼိုင်ႈတၢင်းၼိုင်ႈ မိူဝ်ႈလိူၼ်ၸူႇလၢႆႇ 8 ဝၼ်းၼၼ်ႉၵေႃႈ ရတ်ႈသျႃး ဢဝ်မၢၵ်ႇလူင်ယိုဝ်းသႂ်ႇ ႁူင်းယႃလုၵ်ႈဢွၼ်ႇ တီႈဝဵင်း Kyiv မိူင်းယူႇၶရဵၼ်းသေ ၵူၼ်းတၢႆ ဢမ်ႇယွမ်း 20 ၵေႃႉ။ ၸွမ်ပွင်ၸိုင်ႈ ယူႇၶရဵင်း ဝေႃႇလေႃႇတီးမႃးရ် ၸႄးလႅၼ်းသၵီး လၢတ်ႈဝႃႈ ၸုမ်းၸွႆႈထႅမ်ၶဝ် တိုၵ်ႉသွၵ်ႈႁႃ ၵူၼ်းဢၼ်လွတ်ႈၽေးယူႇ ၼႂ်းၵႄႈ မၢၵ်ႇႁိၼ်ဢၼ်လူႉလႅဝ်ၵႂႃႇၼၼ်ႉသေ လွင်ႈလူႉသုမ်းတၢႆၼၼ်ႉ ပႆႇလႆႈႁူႉတႅတ်ႈတေႃး ၼႆယဝ်ႉ။
လွင်ႈဝႃႈ ရတ်ႈသျႃးၶဝ် ဢဝ်မၢၵ်ႇၼူၾႆးၶဝ် ယိုဝ်းသႂ်ႇတီႈလႂ်ၼႆၼၼ်ႉ ရတ်ႈသျႃးၵေႃႈ ဢမ်ႇထဵင်လႆႈ။ ၸွမ်ပွင်ၸိုင်ႈ ၸႄးလႅၼ်းသၵီး လၢတ်ႈဝႃႈ လွင်ႈဢၼ် လုၵ်ႈဢွၼ်ႇၶဝ်၊ ၵူၼ်းဢမ်ႇမီးတၢင်းၽိတ်းသင် လႆႈထုၵ်ႇ ႁဵတ်းႁၢႆႉၸႃႉ ၸိူင်ႉၼႆၼႆႉ ရတ်ႈသျႃးတေဢဝ်ပုၼ်ႈၽွၼ်း ၼႆယဝ်ႉ။ ယင်းလၢတ်ႈဝႃႈ တင်းလုမ်ႈၾႃႉၵေႃႈ ယႃႇပေယူႇယဵၼ်ယဵၼ် ၼိူဝ်လွင်ႈႁဵတ်းသၢင်ႈ ရတ်ႈသျႃး ဝႃႈၼႆ။
တီႈလွင်ႈတိုၵ်းတေႃး ထုင်ႉၼႂ်းမိူင်းယူႇၶရဵၼ်း ၵမ်ႈၽွင်ႈၼၼ်ႉ ၵူၼ်းတၢႆ 7 ၵေႃႉသေ ႁူင်းႁေႃၵမ်ႈၽွင်ႈၵေႃႈ လႆႈလူႉၵွႆၵႂႃႇ ၼႆယဝ်ႉ။ Oleksandr Vilkul ၽူႈၶၢၼ်ပၢၵ်ႇၽၢႆႇဢုပ်ႉပိူင်ႇသိုၵ်း လၢတ်ႈဝႃႈ ယွၼ်ႉလွင်ႈယိုဝ်းၵၼ် တီႈဝဵင်းၵိူတ်ႇ ၸွမ်ပွင်ၸိုင်ႈ Zlansky ဢၼ်ပဵၼ် Kryvyi Rih ၼၼ်ႉသေ ၵူၼ်းတၢႆ ဢမ်ႇယွမ်း 10 ၵေႃႉ မၢတ်ႇၸဵပ်း 31 ၵေႃႉ ၼႆယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Simina Mistreanu. "China’s Xi calls on world powers to help Russia and Ukraine resume direct dialogue" — AP News, July 8, 2024
- Huaxia. "Xi meets Hungarian prime minister, exchanging views on ties, Ukraine crisis" — Xinhua, July 8, 2024
- Cao Desheng. "Political resolution of Ukraine crisis urged" — China Daily, July 9, 2024
