ၸုမ်းႁႃးမၢတ်ႉသ်ၶဝ် တႄႇၽွမ်ႉၸွမ်း လွင်ႈၵိုတ်းတိုၵ်း ဢၼ်ၵၢၼ်ႇၶဝ် ၵမ်ႉထႅမ်ၸွမ်း
ဝၼ်းဢႃးတိတ်ႉ၊ ၸူႇလၢႆႇ 7၊ 2024
ၽူႈမီးပုၼ်ႈၽွၼ်း ၸုမ်းႁႃးမၢတ်ႉသ် ၵေႃႉ႞ လႄႈ ၽူႈမီးပုၼ်ႈၽွၼ်း ဢီးၵျိပ်ႈ ၵေႃႉ႞ လၢတ်ႈတီႈ သိုဝ်ႇၶၢဝ်ႇ The Associated Press မိူဝ်ႈၶမ်ႈဝႃးၼၼ်ႉ ၸုမ်းႁႃးမၢတ်ႉသ်ၶဝ် လႆႈၸႂ်ၸွမ်း ၶေႃႈတၢင်ႇၼႄ ဢၼ်ဢမေႇရိၵၢၼ်ႇ ၵမ်ႉထႅမ် တႃႇတေ ၵိုတ်းတိုၵ်း တီႈၵႃႇၸႃႇ ပွတ်းႁွင်ႇၼၼ်ႉယဝ်ႉ။ ၸုမ်းႁႃးမၢတ်ႉသ်ၶဝ် လူတ်းယွမ်းပၼ် ၶေႃႈတုၵ်းယွၼ်း ပိူင်လူင် ဢၼ်ဝႃႈ ဢိတ်ႈၸရေး တေလႆႈ ႁပ်ႉပဝ်ႊ တႃႇတေ ၵိုတ်းယိုတ်း ပၢင်တိုၵ်း ၵမ်းလိုၼ်းသုတ်း ဢၼ်ၶဝ် လႆႈတမ်းဝၢင်းမႃး ၸူဝ်ႈပၢၼ်ၼၼ်ႉယဝ်ႉ။
ၵူၺ်းၵႃႈ တင်းသွင်ၽၢႆႇ ပၼ်ၾၢင်ႉဝႃႈ ၶေႃႈတူၵ်းလူင်း ဢၼ်ဝႃႈဝႆႉၼၼ်ႉ ပႆႇမၼ်ႈၸႂ်လႆႈ။ ၽူႈမီးပုၼ်ႈၽွၼ်းၶဝ်တႄႉ လၢတ်ႈဝႃႈ ၸုမ်းႁႃးမၢတ်ႉသ်ၶဝ် တိုၵ်ႉၶႂ်ႈလႆႈ လိၵ်ႈမၼ်ႈၸႂ် တီႈၽူႈၵပ်းသိုပ်ႇၶဝ်ဝႃႈ ပေႃးဝႃႈ ၶေႃႈတူၵ်းလူင်း ၶၵ်ႉတွၼ်ႈဢွၼ်တၢင်းသုတ်း တေတႄႇၸႂ်ႉတိုဝ်းမႃးၼႆ ဢိတ်ႉၸရေး တေသိုပ်ႇဢုပ်ႇဢူဝ်း တႃႇၵိုတ်းတိုၵ်း ၸူဝ်ႈၶၢဝ်းၼႆယဝ်ႉ။
ၽူႈမီးပုၼ်ႈၽွၼ်း ႁႃးမၢတ်ႉသ် ၵေႃႉ႞ လၢတ်ႈတီႈ AP ဝႃႈ မိူဝ်ႈတႄႇမၼ်း မၼ်းလႆႈၽွမ်ႉၸႂ် တႃႇတေၵိုတ်းတိုၵ်း ၵမ်းၸၼ်ႉၸၼ်ႉ ဝၢႆးသေ လႆႈႁပ်ႉ ၶေႃႈမၼ်ႈၵႅၼ်ႇ ဢၼ်ဝႃႈ ပၢင်တိုၵ်း တေဢမ်ႇၶိုၼ်းတႄႇၶိုၼ်း လႄႈ တေသိုပ်ႇဢုပ်ႇဢူဝ်းၵၼ် တေႃႇထိုင် လႆႈတူၵ်းလူင်း ၵိုတ်းတိုၵ်း ၵႂႃႇတေႃႇၸူဝ်ႈ ၼႆယဝ်ႉ။ ၵူၺ်းၵႃႈ မၼ်းလၢတ်ႈဝႃႈ "ၶႃႈၶႂ်ႈႁႂ်ႈလွင်ႈႁပ်ႉပဝ်ႊၸိူဝ်းၼၼ်ႉ တႅမ်ႈဝႆႉၼိူဝ်ၽိုၼ်လိၵ်ႈ"ၼႆယဝ်ႉ။
ၸွမ်းၼင်ႇ ၽူႈမီးပုၼ်ႈၽွၼ်း ၸုမ်းႁႃးမၢတ်ႉသ် လႄႈ ၸုမ်းဢီးၵျိပ်ႈ သွင်ၵေႃႉ ဢၼ်ဢမ်ႇၶႂ်ႈဢွၵ်ႇၸိုဝ်ႈၼၼ်ႉ လၢတ်ႈဝႃႈ ၼႂ်းၶေႃႈတူၵ်းလူင်း ဢၼ်ဢမႄရိၵၢၼ်ႇ တၢင်ႇလၢတ်ႈ တႃႇႁဵတ်းၵႂႃႇ ၵမ်းၸၼ်ႉၸၼ်ႉၼၼ်ႉ တေပႃး တႃႇဢဝ် ၵူၼ်းထဝ်ႈ၊ ၵူၼ်းပၢႆးယူႇလီဢမ်ႇၶႅမ်ႉ လႄႈ ၼၢင်းယိင်း ၸိူဝ်းဢၼ်ၸုမ်းႁႃႇမတ်ႉ ၶဝ် တိၺွပ်းဝႆႉၼၼ်ႉ လႅၵ်ႈလၢႆႈၵၼ်တင်း ၵူၼ်းသိုၵ်း ပႃႇလႅတ်ႉသတၢႆး ၼပ်ႉႁူဝ်ပၢၵ်ႇၼၼ်ႉ လူဝ်ႇလႆႈတႄႇၵိုတ်ႈတိုၵ်းတင်းသဵင်ႈ တႃႇ ၶၢဝ်းတၢင်း ႁူၵ်းႁူင်ႈ ၼႆယဝ်ႉ။ ၼႂ်းၶၢဝ်းတၢင်း 42 ဝၼ်းၼၼ်ႉ တပ်ႉသိုၵ်းဢိတ်ႇၸရေး တေလႆႈထွၼ်တူဝ်ဢွၵ်ႇ တီႈၼႃႈလိၼ် ဢၼ်မီးၵူၼ်းၼမ် တီႈၵႃႇၸႃႇၼၼ်ႉသေ ၵူၼ်းပႃးလႅတ်ႈသတၢႆး ၸိူဝ်းပၢႆႈဢွၵ်ႇ ၵႃႇၸႃႇပွတ်းႁွင်ႇၼၼ်ႉ တေလႆႈပၼ်ၶႂၢင်ႉပွၵ်ႈမိူဝ်းၶိုၼ်း ဝႃႈၼႆယဝ်ႉ။
ၽူႈမီးပုၼ်ႈၽွၼ်းၶဝ် လၢတ်ႈဝႃႈ ၼႂ်းၵႃႈၶၢဝ်းတၢင်းၼၼ်ႉ ၽူႈၶဝ်ႈငူပ်ႉငိပၼ်ၼႂ်းၵႄႈၵၢင် ၸုမ်းႁႃးမၢတ်ႉသ် လႄႈ ဢိတ်ႇသရေးၶဝ်ၼႆႉ တေလႆႈငူပ်ႉငိပၼ် ၶေႃႈမၵ်းမၼ်ႈ တွၼ်ႈတႃႇၶၵ်ႉတွၼ်ႈသွင် ဢၼ်ပဵၼ် တႃႇပွႆႇပၼ် ၵူၼ်းမိူင်း၊ ၵူၼ်းသိုၵ်း ၸိူဝ်းပဵၼ် ၵူၼ်းၸိူဝ်းတိၺွပ်းဝႆႉၼၼ်ႉ ၼႆယဝ်ႉ။ ၽၢႆႇဢိတ်ႇသရေးၶဝ်သမ်ႉ တေလႆႈပွႆႇပၼ် ၵူၼ်းပႃးလဵတ်ႈသတၢႆး လႄႈ ၵူၼ်းၸိူဝ်းထုၵ်ႇၵုမ်းၶင်ဝႆႉၼၼ်ႉ ၼႆယဝ်ႉ။ ၶေႃႈတူၵ်းလူင်း ၶၵ်ႉတွၼ်ႈ 3 ၼႆႉ တေလႆႈပွႆႇပၼ် ၵူၼ်းဢၼ်ထုၵ်ႇၺွပ်းဝႆႉ ဢိၵ်ႇတင်း ၶၢပ်ႈတူဝ် ၵူၼ်ႈၸိူဝ်းလႆႈတၢႆၵႂႃႇၼၼ်ႉလႄႈ ၶဝ်ႈပႃး တႃႇတေတႄႇႁဵတ်း ၽႅၼ်ၵၢၼ် မူၼ်ႉမႄး ၶၢဝ်းတၢင်းလၢႆပီ ၼႆယဝ်ႉ။
ၽၢႆႇထႅင်ႈတၢင်းၼိုင်ႈ ႁွင်ႈၵၢၼ်ၽၢႆႇပၢႆးယူႇလီ ၵႃႇၸႃႇ ဢၼ်ၸုမ်းႁႃးမၢတ်ႉသ် ၵုမ်းၵမ်ၼၼ်ႉ လၢတ်ႈဝႃႈ ယွၼ်ႉပိူဝ်ႈ ဢိတ်ႇၸရေး ဢဝ်ႁိူဝ်းမိၼ် ယိုဝ်းသႂ်ႇ တီႈၵႃႇၸႃႇ တီႈပၢင်သဝ်းၵူၼ်းပၢႆႈၽေး ၼူႇသီႇရတ်ႉ ဢၼ်ၸုမ်းၵူၼ်းပၢႆႈၽေး ၸၢတ်ႈၸိုင်ႈလုမ်ႈၾႃႉ (UNRWA) ၵုမ်းၵမ်ၼၼ်ႉလႄႈ ၵူၼ်းတၢႆ 16 ၵေႃႉ လႄႈ ၵူၼ်းမၢတ်ႇၸဵပ်း ဢမ်ႇယွမ်း 50 ၵေႃႉ ၼႆယဝ်ႉ။ ၼႂ်းၵူၼ်းမၢတ်ႇၸဵပ်းၼၼ်ႉ ပႃးလုၵ်ႈဢွၼ်ႇ၊ ၽၢႆႇသိုၵ်းဢိတ်ႇၸရေးၶဝ် ပိုၼ်ၽၢဝ်ႇဝႆႉဝႃႈ ၶဝ်တိုၵ်ႉၸွပ်ႇထၢမ် လွင်ႈၼႆႉယူႇ ၼႆယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Lorenzo Tondo in Jerusalem and Julian Borger in Washington. "Israel-Hamas talks to resume, raising hopes of a Gaza ceasefire" — The Guardian, July 5, 2024
- VOA News. "ကန်ထောက်ခံတဲ့ ဂါဇာအပစ်ရပ်ရေး ဟားမတ်စ် ကနဦး သဘောတူ" — VOA News, July 7, 2024
