ၸုမ်းၼေႇတူဝ်း တေၸွႆႈထႅမ်ပၼ် မိူင်းယူႇၶရဵၼ်းထႅင်ႈ

ဝၼ်းဢင်းၵၢၼ်း၊ ၸူႇလၢႆႇ 9၊ 2024 

ၸွမ်ပွင်ၸိုင်ႈယူႇၶရဵၼ်း ဝေႃႇလေႃႇတီးမႃးရ် ၸႄးလႅၼ်းသၵီး

ယွၼ်ႉပိူဝ်ႈ ၸုမ်းဢူၺ်းလီ ၼေႇတူဝ်းၶဝ် ႁၢင်ႈႁႅၼ်းတႃႇတေၸတ်းႁဵတ်း ပၢင်ၵုမ်လူင် မိူဝ်ႈလိူၼ်ၸူႇလၢႆႇ 9 ဝၼ်း တီႈဝဵင်းဝႃႇသျိၼ်ႇတၢၼ်ႇ တီႇသီႇ မိူင်းဢမႄႇရိၵၢၼ်ႇ ဢၼ်ပဵၼ် ဝၼ်းၶွပ်ႈၶူပ်ႇ 75 ပီၼၼ်ႉလႄႈ ၽူႈဢွၼ်ႁူဝ် ၼေႇတူဝ်းၶဝ် ၶတ်းၸႂ် တႃႇတေ ၵမ်ႉၸွႆႈပၼ် လွင်ႈယူႇၶရဵၼ်း တေၶတ်းၶၢၼ်ႉ လွင်ႈရတ်ႈသျႃး ၶဝ်ႈတိုၵ်းၼၼ်ႉ ထႅင်ႈယူႇ။

ၸိုင်ႈမိူင်းလုၵ်ႈၸုမ်း NATO တင်းသဵင်ႈ ၶႂ်ႈလႆႈလွင်ႈငမ်းယဵၼ်၊ ၸွမ်ပွင်ၸိုင်ႈ ၸုမ်းၼေႇတူဝ်း Jens Stoltenberg လၢတ်ႈဝႃႈ သင်ဝႃႈ ၸွမ်ပွင်ၸိုင်ႈရတ်ႈသျႃး ပူႇထိၼ်ႇ ပွင်ႇၸႂ်သေ ႁပ်ႉႁွင်းဝႃႈ ပၢင်တိုၵ်းပွၵ်ႈၼႆႉ ဢမ်ႇဢွင်ႇပႄႉလႆႈၼႆၸိုင် လွင်ႈငမ်းယဵၼ်ၼႆႉ တေၸၢင်ႈပဵၼ်မႃးလႆႈယူႇ ၼႆယဝ်ႉ။

Jens Stoltenberg လၢတ်ႈဝႃႈ “လၢႆးတၢင်းဢၼ်ဝႆးသေပိူၼ်ႈ တႃႇတေၵိုတ်းယိုတ်းပၢင်တိုၵ်းၼၼ်ႉ ပဵၼ်လွင်ႈဝၢင်းၶိူင်ႈ ၵူၺ်းၵႃႈ လွင်ႈဝၢင်းၶိူင်ႈၸိူင်ႉၼႆၼႆႉ တေဢမ်ႇႁဵတ်းႁႂ်ႈမီးလွင်ႈငမ်းယဵၼ် မၼ်းတေပဵၼ်လွင်ႈပူၼ်ႉပႅၼ် လႄႈ လွင်ႈသိမ်းဢဝ်မိူင်း” ၼႆယဝ်ႉ။

Jens Stoltenberg လၢတ်ႈဝႃႈ လွင်ႈလမ်ႇလွင်ႈ ဢၼ်ၸုမ်းဢူၺ်းလီ ၼေႇတူဝ်း တေႁဵတ်းပၼ် မိူင်းယူႇၶရဵၼ်းၼၼ်ႉ ၵမ်ႈၽွင်ႈ မိူၼ်ၼင်ႇ တေပိုတ်ႇငဝ်ႈငုၼ်း ၵုမ်းၵမ်သိုၵ်း တီႈမိူင်းၵျႃႇမၼီႇ၊ တေယုၵ်ႉသုင် လွင်ႈၸွႆႈထႅမ်ငိုၼ်းတွင်း လႄႈ ၵၢၼ်သိုၵ်း၊ Jens Stoltenberg ၵေႃႈလၢတ်ႈဝႃႈ လွင်ႈယူႇၶရဵၼ်း တေၶဝ်ႈပႃးၼႂ်းၸုမ်းၼေႇတူဝ်းၼၼ်ႉ တိုၵ်ႉဢုပ်ႇဢူဝ်းၵၼ်ယူႇ ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Matthew Lee. "NATO leaders are descending on Washington. Here’s what to know" — AP News, July 9, 2024
• LORNE COOK Associated Press. "What is the NATO military alliance and how is it helping Ukraine?" — ABC News, July 9, 2024