Jump to content

ၸုမ်းယိပ်းၵွင်ႈၵၢင်ႇပႃႇၵိတ်ႈသတၢၼ်ႇ ယိုဝ်းပလိၵ်ႈလႅၼ်လိၼ် တၢႆ 10 ၵေႃႉ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းသုၵ်း၊ ဢွၵ်ႇထူဝ်ႇပႃႇ 25၊ 2024

သိုၵ်းပႂ်ႉလႅၼ်လိၼ် ပႃႇၵိတ်ႈသတၼ်ႇ

ၽၢႆႇၼႂ်းမိူင်း ပႃႇၵိတ်ႈသတၼ်ႇ ဢွၵ်ႇၶေႃႈပိုၼ်ၽၢဝ်ႇဝႃႈ ယွၼ်ႉပိူဝ်ႈ ၸုမ်းယိပ်းၵွင်ႈၵၢင်ႇၶဝ် ယိုဝ်းတပ်ႉပၢင်သဝ်း ဢၼ်မီးႁိမ်းၽၢႆႇႁွင်ႇဝၼ်းတူၵ်း ဝဵင်း Dera Ismail Khan ၼၼ်ႉလႄႈ ပလိၵ်ႈလႅၼ်လိၼ် ပႃႇၵိတ်ႈသတၼ်ႇ လႆႈတၢႆၵႂႃႇ ဢမ်ႇယွမ်း 10 ၵေႃႉ ၼႆယဝ်ႉ။

လွင်ႈဢၼ် ၸုမ်းယိပ်းၵွင်ႈၵၢင်ႇ ဢိတ်ႉသလမ်း Tehreek-e-Taliban ၶဝ် ႁဵတ်းလွင်ႈႁၢႆႉၸႃႉ မိူဝ်ႈဝၼ်းၽတ်းၼၼ်ႉ ပဵၼ်ၽွင်း မိူင်းပႃႇၵိတ်ႈသတၼ်ႇ တိုၵ်းတေႃး လွင်ႈဢၼ် ၸုမ်းယိပ်းၵွင်ႈၵၢင်ႇ ၶိုၼ်းပဵၼ်မႃး တီႈပွတ်းႁွင်ႇဝၼ်းတူၵ်း ဢၼ်ၵူၼ်ႇပင်းၼၼ်ႉ ဢိၵ်ႇပႃး လွင်ႈလုၵ်ႉၽိုၼ်ႉ ၸၢဝ်းၶိူဝ်း ၽၢတ်ႇဢွၵ်ႇ ဢၼ်ယႂ်ႇမႃး တီႈပွတ်းၸၢၼ်းၼၼ်ႉယဝ်ႉ။

ၽွင်းလူင်ၽၢႆႇၼႂ်းမိူင်း Mohsin Naqvi သၢၼ်ၶတ်း လွင်ႈဢၼ် ၵူၼ်းႁၢႆႉၶဝ် မႃးယိုဝ်း တီႈဝဵင်း Dera Ismail Khan ၼၼ်ႉ ႁၢဝ်ႈႁၢဝ်ႈႁႅင်းႁႅင်း ၼႆ ၶေႃႈပိုၼ်ၽၢဝ်ႇ ၽၢႆႇၼႂ်းမိူင်း ဢွၵ်ႇဝႆႉၼင်ႇၼႆ။

ၽူႈမီးၸၼ်ႉ ပလိၵ်ႈ 3 ၵေႃႉ လၢတ်ႈဝႃႈ ၸုမ်းယိပ်းၵွင်ႈၵၢင်ႇ ၸုမ်းယႂ်ႇၸုမ်းလူင် ၶဝ်ႈတိုၵ်း တီႈတပ်ႉပႂ်ႉလႅၼ်လိၼ်သေ ၵူၼ်းႁဵတ်းၵၢၼ် ၽၢႆႇႁူမ်ႇလူမ်ႈ လႅၼ်လိၼ် လႆႈတၢႆၵႂႃႇ ၼႆယဝ်ႉ။

တီႈၼႂ်းၶေႃႈပိုၼ်ၽၢဝ်ႇၼၼ်ႉ ၸုမ်းထႃႇလီႇပၢၼ်ႇ ပႃႇၵိတ်ႈသတၼ်ႇ Tehreek-e-Taliban Pakistan (TTP) ၶဝ် လၢတ်ႈဝႃႈ ပဵၼ်လွင်ႈတွပ်ႇတႅၼ်း လွင်ႈဢၼ် ၽူႈဢွၼ်ႁူဝ်ၸၼ်ႉသုင် ဢူဝ်ႇသတၢတ်ႉ ၵူဝ်ႇရီႇသျီႇ လႆႈထုၵ်ႇၶႃႈတၢႆၼၼ်ႉ ၼႆယဝ်ႉ။

သိုၵ်းပႃႇၵိတ်ႈသတၼ်ႇ ဢွၵ်ႇၶေႃႈပိုၼ်ၽၢဝ်ႇ မိူဝ်ႈဝၼ်းၽတ်းၼၼ်ႉဝႃႈ မၼ်းၸၢႆးၼႆႉ ၶဝ်ႈပႃႈၼႂ်း ၵူၼ်း 9 ၵေႃႉ ဢၼ်ပႃး ၵူၼ်းၶၢမ်ႇတၢႆသေ ပွႆႇမၢၵ်ႇ 2 ၵေႃႉ ဢၼ်လႆႈတၢႆၵႂႃႇ ၼႂ်းၵၢၼ်ႁၢင်ႈသိုၵ်း တီႈၸႄႈတွၼ်ႈ Bajaur ဢၼ်တိတ်းၸပ်း ဢႃႇၾၵၢၼ်ႇၼိတ်ႉသတၢၼ်ႇၼၼ်ႉ ၼႆယဝ်ႉ။

ၸုမ်း TTP ၼႆႉ ၽၢတ်ႇဢွၵ်ႇ ၸုမ်းထႃႇလီႇပၢၼ်ႇ ဢႃႇၾၵၢၼ်ႇသေတႃႉ ပၼ်ၵႂၢမ်းမၼ်ႈ တေမီးသတ်ႉၸႃႇ ၼိူဝ် ၸုမ်းဢိတ်ႉသလမ်း ဢၼ်ယၢမ်းလဵဝ် ဢုပ်ႉပိူင်ႇ ဢႃႇၾၵၢၼ်ႇ ဝၢႆးသေ တပ်ႉသိုၵ်း ၸၼ်ႉလုမ်ႈၾႃႉ ဢၼ်ဢမႄႇရိၵၢၼ်ႇ ဢွၼ်ႁူဝ်ၼၼ်ႉ ထွၼ်တူဝ်ဢွၵ်ႇ မိူဝ်ႈပီ 2021 ၼၼ်ႉယဝ်ႉ။

ဢိတ်ႉသလမ်းပၢတ်ႉ လၢတ်ႈဝႃႈ ၸုမ်း TTP ၼႆႉ ဢဝ် ဢႃႇၾၵၢၼ်ႇၼိတ်ႉသတၢၼ်ႇ ဝႆႉပဵၼ်ငဝ်ႈငုၼ်းသေ လၢတ်ႈဝႃႈ ၸုမ်းထႃႇလီႇပၢၼ်ႇ ဢၼ်ဢုပ်ႉပိူင်ႇ မိူင်းၼၼ်ႉ ပၼ်တီႈယူႇ ဢၼ်လွတ်ႈၽေး တႃႇၸုမ်းဢၼ်ၸမ်လႅၼ်လိၼ်ၼၼ်ႉၼႆယဝ်ႉ။ ၸုမ်းထႃႇလီႇပၢၼ်ႇၶဝ်တႄႉ ပႄႇပႅတ်ႈလွင်ႈၼႆႉယူႇ။

မိူဝ်ႈလိူၼ်သႅပ်ႇထႅမ်ႇပႃႇၼၼ်ႉ ၽူႈတၢင်တူဝ် ပႃႇၵိတ်ႈသတၼ်ႇ တီႈၸၢတ်ႈၸိုင်ႈလုမ်ႈၾႃႉ မူႇၼီႇရႃႇဢႅၵ်ႉရမ်ႇ ပၼ်ၾၢင်ႉ တီႈၶွင်ႇသီႇလွင်ႈႁူမ်ႇလူမ်ႈဝႃႈ ဢမ်ႇႁိုင်သင် ၸုမ်း TTP ၼႆႉ ၸၢင်ႈပဵၼ်မႃး “ႁူဝ်ၼႃႈ ယိူင်းဢၢၼ်း ၽူႈၵေႃႇၵၢၼ်ႁၢႆႉ လုမ်ႈၾႃႉ” သေ ႁဵတ်းဢူၺ်းလီ မိူၼ်ၼင်ႇတင်း ၸုမ်းဢႄးလ်ၶၢႆးတႃႇ ၼႆယဝ်ႉ။


ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၸုမ်းယိပ်းၵွင်ႈၵၢင်ႇပႃႇၵိတ်ႈသတၢၼ်ႇ_ယိုဝ်းပလိၵ်ႈလႅၼ်လိၼ်_တၢႆ_10_ၵေႃႉ&oldid=9773"