ၸဝ်ႈၸွမ်ၸိုင်ႈယူႇၶရဵၼ်း မွၵ်ႇလၢတ်ႈၶေႃႈၵႂၢမ်းတီႈ သၽႃးၾရၢင်ႇသဵတ်ႈ

ဝၼ်းသဝ်၊ ၸုၼ်ႇ 8၊ 2024

မိူဝ်ႈဝၼ်းသုၵ်းၼၼ်ႉ ၸဝ်ႈၸွမ်ၸိုင်ႈယူႇၶရဵၼ်း Volodymyr Zelenskyy လႆႈမွၵ်ႇလၢတ်ႈတိုၵ်းသူၼ်းၵႂႃႇတီႈ သၽႃးၾရၢင်ႇသဵတ်ႈဝႃႈ ႁႂ်ႈမိူင်းဝၼ်းတူၵ်းၶဝ် ဢွၼ်ၵၼ်တိူဝ်းပၼ် တၢင်းၸွႆႈထႅမ် တွၼ်ႈတႃႇယူႇၶရဵၼ်း ဢၼ်လႆႈၺႃး မိူင်းရတ်ႈသျႃးပူၼ်ႉပႅၼ်ၶဝ်ႈတိုၵ်းၼၼ်ႉ တႃႇပေႃးလႆႈ လွင်ႈငမ်းယဵၼ် ဢၼ်မီးလွင်ႈၽဵင်ႇပဵင်း ဝႃႈၼႆယဝ်ႉ။ ၸဝ်ႈၸွမ်ၸိုင်ႈၾရၢင်ႇသဵတ်ႈ Emmanuel Macron လၢတ်ႈၵႂႃႇမိူဝ်ႈဝၼ်းၽတ်းၼၼ်ႉဝႃႈ တေဢဝ်ႁိူဝ်းမိၼ်တိုၵ်း သူင်ႇပၼ် ယူႇၶရဵၼ်း ဝႆးဝႆးၼႆလႄႈ ၸဝ်ႈၸွမ်ၸိုင်ႈယူႇၶရဵၼ်း Zelenskyy လၢတ်ႈ မၼ်းယုမ်ႇယမ်ဝႃႈ ဢဝ်ႁႅင်းဢူၺ်းလီၸိူဝ်းၼႆႉ ႁူမ်ႈၵၼ်သေ တေဢွင်ႇပႄႉလႆႈ ရတ်ႈသျႃးယူႇ ဝႃႈၼႆယဝ်ႉ။

ၸဝ်ႈၸွမ်ၸိုင်ႈယူႇၶရဵၼ်း မွၵ်ႇလၢတ်ႈတီႈ သၽႃးၾရၢင်ႇသဵတ်ႈ ဝႃႈ "ဢဝ်တင်း လွင်ႈၵုမ်းၵမ် ၵူၼ်းႁေႃႈႁိူဝ်းမိၼ် လႄႈ ၸႂ်ႉတင်း ႁိူဝ်းမိၼ်တိုၵ်းၾရၢင်ႇသဵတ်ႈ ၸိူဝ်းပဵၼ်ႁိူဝ်းမိၼ်တိုၵ်းၶိုၵ်ႉၶႅမ်ႉၸိူဝ်းၼႆႉသေ တေၼႄလၵ်းထၢၼ် လွင်ႈၶႅင်ႁႅင်း ယူးရူပ်ႉၵႂႃႇယူႇ။ ႁဝ်းၶႃႈတေၼႄၵႂႃႇ ႁဝ်းၶႃႈၼႆႉ တိူဝ်းတွၼ်းလိူဝ် ၵူၼ်းႁၢႆႉမိူၵ်ႈ ၸိူဝ်းဢၼ်ႁတ်းလွၵ်ႇငိူတ်ႈယူးရူပ်ႉ ၼၼ်ႉယူႇ။ ႁႅင်းၽွမ်ႉႁူမ်ႈႁဝ်းၶႃႈ၊ ႁႅင်းဢူၺ်းလီႁဝ်းၶႃႈ၊ လွင်ႈၸုတုမ်တၢင်းဝူၼ်ႉဢၼ်မိူၼ်ၵၼ််ၸိူဝ်းၼႆႉ မိူဝ်ႈပူၼ်ႉမႃး 80 ပီၼၼ်ႉၵေႃႈ ႁဝ်းၶႃႈ ၼႄမႃးလႆႈယဝ်ႉသေ ပွၵ်ႈၵမ်းၼႆႉၵေႃႈ ႁဝ်းၶႃႈ တေၼႄလၵ်းထၢၼ်ၵႂႃႇလႆႈယူႇ“ ဝႃႈၼႆႉယဝ်ႉ။

မိူဝ်ႈဝၼ်းၽတ်းၼၼ်ႉ ၸဝ်ႈၸွမ်ၸိုင်ႈယူႇၶရဵၼ်း ၸႄႇလႅၼ်ႇသၵီး လႆႈၶိုၼ်ႈႁွတ်ႈ ပၢင်ႇၵႅတ်ႈၶွပ်ႈၶူပ်ႇ ပၢင်တိုၵ်းၶိုၼ်ႈၽင်ႇ D-Day မိူဝ်ႈၽွင်းသိုၵ်းၵမ်ႇၽႃႇပွၵ်ႈသွင်ၼၼ်ႉ ၸိူဝ်းပဵၼ်ၸုမ်းဢူၺ်းလီမိူင်းဝၼ်းတူၵ်းၶဝ် ႁူမ်ႈၵၼ်သေ လႆႈတႄႇႁၢင်ႈသိုၵ်းတိုၵ်းတေႃးၼိူဝ် လွင်ႈၼႃႇꩡီႇၵျႃႇမၼီႇၶဝ် ပူၼ်ႉပႅၼ် တီႈ ၽင်ႇၼေႃႇမၼႇတီႇ တီႈမိူင်းၾရၢင်ႇသဵတ်ႈ မိူဝ်ႈပူၼ်ႉမႃး 80 ပီၼၼ်ႉယဝ်ႉ။

မၼ်းလႆႈၼိူင်းလၢတ်ႈၵႂႃႇဝႃႈ ၸဝ်ႈၸွမ်ၸိုင်ႈပူႇထိၼ်ႇ ၼႆႉ မၼ်းမိူၼ်ၵၼ်တင်း ႁိတ်ႇတလႃႇ ဢၼ်ပဵၼ် ၽူႈဢွၼ်ႁူဝ် ၼႃႇꩡီႇၵျႃႇမၼီႇ မိူဝ်ႈၼၼ်ႉသေ မၼ်းႁႃလိူင်ႈပူၼ်ႉပႅၼ်ယူႇ ဝႃႈၼႆယဝ်ႉ။ ၸဝ်ႈၸွမ်ၸိုင်ႈယူႇၶရဵၼ်း ၸႄႇလႅၼ်ႇသၵီးၼႆႉ တေထူပ်းၵၼ်တင်း ၸဝ်ႈၸွမ်ၸိုင်ႈ ၾရၢင်ႇသဵတ်ႈ ဢိၵ်ႇတင်း ၸဝ်ႈၸွမ်ႈၸိုင်ႈဢမႄႇရိၵၢၼ်ႇ ပၢႆႇတႅၼ်ႇ ၸိူဝ်းၼႆႉယူႇ။

ၸွင်ႇမီးတၢင်းႁၼ်ထိုင်ၼိူဝ် ၶၢဝ်ႇဢၼ်ၼႆႉႁိုဝ်? ပိုၼ်ၽႄႈပၼ်တႃႉ!

ငိူၼ်ႈငဝ်ႈတိုၼ်း

France 24. "Ukraine's Zelensky addresses French parliament" — FRANCE 24, JUNE 7, 2024
Ukrinform. "President of Ukraine Volodymyr Zelensky delivered a speech at the National Assembly (Parliament) of France." — Ukrinform, JUNE 7, 2024