ၶႄႇ လႄႈ ရတ်ႈသျႃး ႁူမ်ႈၵၼ်ၽိုၵ်းၽွၼ်ႉၵၢၼ်သိုၵ်း
ဝၼ်းသဝ်၊ ၸူႇလၢႆႇ 13၊ 2024
မိူဝ်ႈဝၼ်းသုၵ်းၼၼ်ႉ လူင်ပွင်ၸိုင်ႈၶႄႇ ပိုၼ်ၽၢဝ်ႇဝႆႉဝႃႈ တင်းရတ်ႈသျႃး လႆႈၽိုၵ်းၽွၼ်ႉၵၢၼ်သိုၵ်း ၸွမ်းၽင်ႇပၢင်ႇလၢႆႇ ပွတ်းၸၢၼ်းၶႄႇ ၼႆယဝ်ႉ။ လွင်ႈၽိုၵ်းၽွၼ်ႉၼႆႉ ပဵၼ်ဝၢႆးသေ ဢၼ်ပဵၼ်ၸုမ်းဢူၺ်းလီ ၽၢႆႇၵႅတ်ႇၶႄ မိူင်းဝၼ်းတူၵ်း ဢၼ်ဢမေႇရိၵၢၼ်ႇ ဢွၼ်ႁူဝ်သေ ႁူပ်ႉထူပ်းၵၼ် တီႈၼႆႈ တီႈဝဵင်းဝႃႇသျိၼ်ႇတၢၼ်ႇသေ ၵျႃႇပၢၼ်ႇ ပၼ်ၾၢင်ႉဝႃႈ လွင်ႈၶႄႇ ၵပ်းသိုပ်ႇ ရတ်ႈသျႃး ႁၢဝ်ႈႁႅင်းမႃးၼၼ်ႉ တေမီးလွင်ႈလွၵ်ႇငိူတ်ႈ ၼမ်မႃးၼႆယဝ်ႉ။
ထၢၼ်ၽွင်းလူင် ၵၢၼ်ၵႅတ်ႇၶႄ မိူင်းၶႄႇ လၢတ်ႈဝႃႈ မိူင်းၶႄႇလႄႈ ရတ်ႈသျႃး ႁူမ်ႈၵၼ် ၸတ်းႁဵတ်း ပၢင်ၽိုၵ်းၽွၼ်ႉသိုၵ်း ဢၼ်ႁွင်ႉဝႃႈ 2024 - Joint Sea (ပၢင်ႇလၢႆႇႁူမ်ႈ - 2024) ၼႆသေ ပၢင်ၽိုၵ်းၽွၼ်ႉပွၵ်ႈၼႆႉ တေၸတ်းႁဵတ်း တႄႇႁူဝ်လိူၼ်ၸူႇလၢႆႇ တေႃႇထိုင် ၵၢင်လိူၼ်ၼႆႉ ၼႆယဝ်ႉ။
ထၢၼ်ၽွင်းလူင် ၵၢၼ်ၵႅတ်ႇၵင်ႈ မိူင်းၶႄႇ လၢတ်ႈဝႃႈ တေႁဵတ်းလွင်ႈၽိုၵ်းၵၢၼ်သိုၵ်းၵႂႃႇတီႈ ႁိမ်းႁွမ်းဝဵင်း သျင်ႇၵျဵင်း၊ တီႈ ၸႄႈမိူင်းၵွၼ်ႇတၢဝ်း ပွတ်းၸၢၼ်းၶႄႇ သေ တေႁူမ်ႈၵၼ်ၽိုၵ်းၵၢၼ်သိုၵ်း တီႈၼႂ်းၼမ်ႉ တီႈၼိူဝ်ၵၢင်ႁၢဝ်သေ တေႁူမ်ႈၵၼ်ၵႄႈလိတ်ႈ လွင်ႈလွၵ်ႇငိူတ်ႈပၢႆးႁူမ်ႇလူမ်ႈသၢႆတၢင်းၼမ်ႉသေ တေႁဵတ်းသၢင်ႈႁႂ်ႈၼႂ်းပိုၼ်ႉတီႈ လႄႈ ၼႂ်းလူၵ်ႈပတ်ႉပိုၼ်ႉ မီးမႃး လွင်ႈၼိမ်မၼ်ႈ ဝႃႈၼႆယဝ်ႉ။
လိူဝ်ၼၼ်ႉ မၼ်းလၢတ်ႈဝႃႈ ပၢင်ၽိုၵ်းၽွၼ်ႉသိုၵ်းႁူမ်ႈၵၼ်ၼႆႉ ပဵၼ်တႃႇႁႂ်ႈလွင်ႈႁူမ်ႈမိုဝ်း ၼႂ်းၵႄႈၶႄႇလႄႈ ရတ်ႈသျႃး ႁႂ်ႈၶိုၼ်ႈယႂ်ႇမႂ်ႇသုင် ႁႂ်ႈပဵၼ် ၽူႈႁူမ်ႈၼႃႈၵၢၼ် ၽႅၼ်ၵၢၼ် ဢၼ်ၵုမ်ႇထူၼ်ႈ မိူဝ်းၼႃႈၼႆယဝ်ႉ။ ယင်းလၢတ်ႈထႅင်ႈဝႃႈ ၼႆႉ ပဵၼ်ပၢင်ၽိုၵ်းၽွၼ်ႉၵၢၼ်သိုၵ်း သွင်ၸိုင်ႈမိူင်း ဢၼ်တေႁူမ်ႈၵၼ်ႁဵတ်းၵႂႃႇၵူႈပီ ဝႃႈၼႆယဝ်ႉ။
ၶေႃႈပိုၼ်ၽၢဝ်ႇ ၶႄႇၼႆႉ ပဵၼ်ဝၢႆးသေ ၸုမ်းဢူၺ်းလီ ၸုမ်းၼေႇတူဝ်းၶဝ် ၸတ်းႁဵတ်းပၢင်ၵုမ် တီႈဝဵင်းဝႃႇသျိၼ်ႇတၢၼ်ႇ တီႇသီႇ တႃႇၶၢဝ်းတၢင်း 3 ဝၼ်း တႃႇၵမ်ႉထႅမ် မိူင်းယူႇၶရဵၼ်း ဢၼ်ရတ်ႈသျႃး ၶဝ်ႈတိုၵ်းၼၼ်ႉယဝ်ႉ ဝႃႈၼႆ။
ဝၢႆးသေ လွင်ႈၵပ်းသိုပ်ႇ ၶႄႇလႄႈ ရတ်ႈသျႃး ၶိုၼ်ႈယႂ်ႇမႃး ၼႂ်းၶၢဝ်းတၢင်း ပီပူၼ်ႉမႃး တေႃႇထိုင်ပေႃးပဵၼ် ဢူၺ်းၵေႃႉ ဢၼ်ဢမ်ႇမီးမၵ်းၶၢၼ်းၼၼ်ႉယဝ်ႉသေ ႁဝ်းၶႃႈ လႆႈႁၼ် လွင်ႈၵပ်းသိုပ်ႇ ဢၼ်ပဵၼ်ၼင်ႇၽူႈၶဵၼ် ၼႂ်းၵႄႈ သွင်မိူင်း လႄႈ ၸုမ်းၼေႇတူဝ်းၼၼ်ႉယူႇ။ ၽူႈဢွၼ်ႁူဝ် ၸုမ်းၼေႇတူဝ်းၶဝ် လၢတ်ႈဝႃႈ မိူဝ်ႈဝၼ်းပုတ်ႉၼၼ်ႉ ၶႄႇ ပဵၼ်မႃး ၽူႈၵမ်ႉထႅမ် ဢၼ်ၶတ်းၸႂ် တႃႇရတ်ႈသျႃး တေၶဝ်ႈတိုၵ်း မိူင်းယူႇၶရဵၼ်းၼၼ်ႉၼႆလႄႈ ႁဵတ်းႁႂ်ႈ ၶႄႇ လႆႈပၼ်ၾၢင်ႉဝႃႈ ၼႆႉပဵၼ် လွင်ႈႁဵတ်းသၢင်ႈ ဢၼ်ႁႃလိူင်ႈၵၼ် ဝႃးၼႆယဝ်ႉ။
မိူဝ်ႈဝၼ်းသုၵ်းၼၼ်ႉ လူင်ပွင်ၸိုင်ႈၵျႃႇပၢၼ်ႇ လၢတ်ႈဝႃႈ လွင်ႈဢၼ် ၶႄႇလႄႈ ရတ်ႈသျႃး ႁူမ်ႈၵၼ် ၽိုၵ်းၽွၼ်ႉ ၵၢၼ်သိုၵ်းၼၼ်ႉ ယွၼ်ႉပိူဝ်ႈ ယူႇၸမ်ၼႃႈလိၼ် ၵျႃႇပၢၼ်ႇလႄႈ ပဵၼ်လွင်ႈမႆႈၸႂ် တႃႇလွင်ႈႁူမ်ႇလူမ်ႈ မိူင်းၶဝ်တႄႉတႄႉၼႆယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Cyril Ip. "China and Russia hold drills as Japan and Nato raise alarm over Ukraine" — South China Morning Post, July 13, 2024
- AFP - Agence France Presse. "Two Russian Warships In China For Joint Naval Exercises" — Barron's, July 13, 2024
- Yasin Gungor. "China, Russia carry out joint military drills" — Anadolu Agency, July 12, 2024
- Newsweek. "China-Russia Joint Naval Drills Target 'Security Threats'" — Newsweek, July 12, 2024
- VOA News. "China, Russia announce joint naval exercises" — VOA News, July 12, 2024
