ၶွၼ်ႇၵႃးၾႆးၾႃႉၶႄႇ တေႃႉၶဝ်ႈမိူင်း EU ၶိုၼ်ႈမႃး

ဝၼ်းသုၵ်း၊ ၸူႇလၢႆႇ 5၊ 2024 

ၵႃးၾႆးၾႃႉၶႄႇ

မိူဝ်ႈဝၼ်းၽတ်းၼၼ်ႉ ၸုမ်းၽွမ်ႉႁူမ်ႈ ယူးရူပ်ႉ လၢတ်ႈဝႃႈ ယွၼ်ႉပိူဝ်ႈ လူင်ပွင်ၸိုင်ႈၶႄႇ ပၼ်လွင်ႈၵမ်ႉၸွႆႈ ဢၼ်ဢမ်ႇမႅၼ်ႈၸွမ်းတြႃးလႄႈ တေတိူဝ်းၵဵပ်းၶွၼ်ႇၵႃးၾႆးၾႃႉၶႄႇ ဢၼ်တေႃႉၶဝ်ႈမိူင်း EU ၼၼ်ႉ ၶိုၼ်ႈထိုင် 38% ၸူဝ်ႈၶၢဝ်းၼႆလႄႈ တေၸၢင်ႈႁဵတ်းႁႂ်ႈ လွင်ႈၶဵင်ႈၶႅင် ၼႂ်းၵႄႈ ၸုမ်းၽွမ်ႉႁူမ်ႈ ယူးရူပ်ႉ လႄႈ မိူင်းၶႄႇ ယၢမ်းလဵဝ်ၼႆႉ တိူဝ်းယႂ်ႇမႃးထႅင်ႈၼႆယဝ်ႉ။

ၸုမ်း EU ဢၼ်ၵမ်ႉထႅမ်ပၼ် ၶွမ်ႇပၼီႇလူတ်ႉၵႃး မိူင်းယူးရူပ်ႉ ႁႂ်ႈလုၵ်ႉတီႈ လူတ်ႉၵႃး ဢၼ်ၸႂ်ႉတိုဝ်း ၼမ်ႉမၼ်းၸၢၵ်ႈသေ လႅၵ်ႈလၢႆႈပဵၼ် လူတ်ႉၵႃး ဢၼ်ၸႂ်ႉၾႆးၾႃႉၼၼ်ႉ မိူဝ်ႈပီၵၢႆ လႆႈၵူတ်ႇထတ်း လွင်ႈၼႆႉသေ လႆႈႁၼ်ဝႃႈ ၶွမ်ႇပၼီႇ လူတ်ႉၵႃး EV ၶႄႇၶဝ်ယွၼ်ႇၶၢႆၵႃႈမၼ်းလႄႈ ဢမ်ႇၽဵင်ႇပဵင်း တင်း ၶွမ်ႇပၼီႇ ယူးရူပ်ႉၶဝ် ၼႆယဝ်ႉ။ ၸုမ်းၵႃႉၶၢႆၶႄႇၶဝ် တွပ်ႇလၢတ်ႈဝႃႈ ၶူဝ်းၶွင်ဢၼ် EU သူင်ႇဢွၵ်ႇၼၼ်ႉ တေလႆႈၵဵပ်းၶွၼ်ႇၼမ်လိူဝ် ယၢမ်းလဵဝ် 10% ၼႆယဝ်ႉ။ ၶဝ်ဝႃႈပၼ်ႁႃဢၼ်ၼႆႉ ဢဝ်လၢႆးဢုပ်ႇဢူဝ်းၵၼ်သေ ၵႄႈလိတ်ႈလႆႈယူႇၼႆသေတႃႉ ၽၢႆႇမိူင်းၶႄႇသမ်ႉ ၶိုၼ်းတွပ်ႇတႅၼ်းၶိုၼ်း ၽၢႆႇၵၢၼ်မိူင်း လႄႈ ၽၢႆႇၵႅတ်ႇၶႄ ၽွၼ်းလီသုၼ်ႇတူဝ် ၼႆယဝ်ႉ။

လွင်ႈၼႆႉ ၽၢႆႇ EU တႅၵ်ႇယၢႆႈၵၼ်။ မိူင်းဢၼ်တမ်းဝၢင်းဝႆႉ လၵ်းၸဵင် ၵၢၼ်ႁဵတ်းဢွၵ်ႇလူတ်ႉၵႃး မိူၼ်ၼင်ႇ မိူင်းၵျႃႇမၼီႇၼၼ်ႉ ယွၼ်ႉပိူဝ်ႈ ၵႃႉၶၢႆတင်းမိူင်းၶႄႇၼမ်လႄႈ ၵူဝ်ၶူဝ်းၶွင်ၶဝ် တုမ်ႉတိူဝ်ႉလႄႈ ယၢမ်းလဵဝ် လႆႈထုၵ်ႇၶႄႇ လွၵ်ႇငိူတ်ႈဝႆႉယူႇ။ မိူင်းဢၼ်မႆႈၸႂ်မိူၼ်ၼင်ႇ ၵျႃႇမၼီႇၼၼ်ႉ ထႅင်ႈမိူင်းၼိုင်ႈတႄႉ ပဵၼ်မိူင်းသုၺ်ႇတိၼ်ႇသေ မိူင်းၾရၢင်ႇသဵတ်ႈလႄႈ မိူင်းဢီႇတလီႇတႄႉ တိုၵ်းသူၼ်းႁႂ်ႈၵဵပ်းၶွၼ်ႇ ၼိူဝ်ၵႃး EV ၶႄႇ ၼမ်လိူဝ်မႃး။

လွင်ႈတေၶိုၼ်ႈၶွၼ်ႇၸူဝ်ႈၶၢဝ်းၼႆႉ တေတႄႇၶိုၼ်ႈမႃး ၼႂ်းဝၼ်းသုၵ်းသေ တေၶိုၼ်ႈပဵၼ်တၢင်းၵၢၼ် ၼႂ်းလိူၼ်ၼူဝ်ႇဝႅမ်ႇပႃႇ တႃႇၶၢဝ်းတၢင်း 5 ပီသေတႃႉ တိုၵ်ႉတေလႆႈပၼ်သဵင်ၵၢင်ၸႂ် တီႈမိူင်းလုၵ်ႈၸုမ်း EU 27 မိူင်းၼၼ်ႉယူႇ။

ငိူၼ်ႈငဝ်ႈၶၢဝ်ႇ

• Philip Blenkinsop and Charlotte Van Campenhout. "China-built EVs hit with duties in biggest EU trade case yet" — Reuters, July 4, 2024
• João da Silva. "EU hits Chinese electric cars with new tariffs" — BBC News, July 4, 2024
• AFP. "EU slaps Chinese electric cars with tariffs of up to 38%" — France24, July 4, 2024
• Keith Bradsher. "Europe Tells China’s Carmakers: Get Ready to Pay Tariffs" — The New York Times, July 4, 2024
• Arjun Kharpal. "China-built EVs hit with EU tariffs; Nio says it may have to raise prices in Europe" — CNBC, July 4, 2024