ၵႅမ်ၸွမ်ၸိုင်ႈ ႁႄးရိသ် လႆႈႁပ်ႉလွင်ႈၵမ်ႉထႅမ် ၽူႈတႅၼ်းပႃႇတီႇ ၼိုင်ႈႁဵင်လိူဝ်
ဝၼ်းဢင်းၵၢၼ်း၊ ၸူႇလၢႆႇ 23၊ 2024
မိူဝ်ႈဝၼ်းၸၼ်ၼၼ်ႉ ၸိူဝ်းပဵၼ် တႅၼ်းၽွၼ်း ပႃႇတီႇတီႇမူဝ်ႇၶရႅတ်ႉတိၵ်ႉ၊ ၽူႈၵွၼ်း၊ ၽူႈၸွႆႈထႅမ်ငိုၼ်းတွင်းၶဝ် ပၼ်ၵမ်ႉထႅမ် ၵႅမ်ၸွမ်ပွင်ၸိုင်ႈ ၵမလႃႇႁႄးရိသ် ႁႂ်ႈပဵၼ် ၽူႈတႅၼ်းၽွင်း ၸွမ်ပွင်ၸိုင်ႈ ပႃႇတီႇတီႇမူဝ်ႇၶရႅတ်ႉတိၵ်ႉ ၼႂ်းပၢင်လိူၵ်ႈတင်ႈ ၸွမ်ပွင်ၸိုင်ႈ ဢၼ်တေၸတ်းႁဵတ်း ၼႂ်းလိူၼ်ၼူဝ်ႇဝႅမ်ႇပႃႇၼၼ်ႉယဝ်ႉ။ ၸွမ်ပွင်ၸိုင်ႈ ပၢႆႇတႅၼ်ႇ ပိုၼ်ၽၢဝ်ႇဝႃႈ မၼ်းတေဢမ်ႇၶဝ်ႈၶေႉၶဵင်ႇ ထရမ်ႉ ဢၼ်ပဵၼ် ၽူႈတႅၼ်းၽွင်း ၸွမ်ပွင်ၸိုင်ႈ ရီႇပၢပ်ႉပလိၵ်ႇၵႅၼ်ႇၶဝ်ထႅင်ႈၼႆသေ မၼ်းၵေႃႈ ၵမ်ႉထႅမ်ပၼ် ၵမလႃႇႁႄးရိသ် ၼႆယဝ်ႉ။ ၵူၺ်းၵႃႈ ပၢင်ၵုမ်လူင် ပႃႇတီႇၻီႇမူဝ်ႇၶရႅတ်ႉတိၵ်ႉ ဢၼ်တေၸတ်းႁဵတ်း ၼႂ်းလိူၼ်ဢေႃးၵၢတ်ႉ 19 ဝၼ်း တေႃႇထိုင် 21 ဝၼ်းၼၼ်ႉတႄႉ တေလိူၵ်ႈဢဝ် ၵမလႃႇႁႄးရိသ် ပဵၼ်ၼေႃႇတႅၼ်းၽွင်း ၸွမ်ပွင်ၸိုင်ႈ ပႃႇတီႇၶဝ် ပဵၼ်တၢင်းၵၢၼ်ယူႇ။
ၼႂ်းၽူႈတႅၼ်း ပၢင်ၵုမ်လူင် ပႃႇတီႇ တီႇမူဝ်ႇၶရႅတ်ႉတိၵ်ႉ 1,070 ၵေႃႉ ဢၼ်ၸုမ်းၶၢဝ်ႇ Associated Press ၶဝ် ထတ်းသၢင်ၼၼ်ႉ တႃႇ 1,000 ၵေႃႉလိူဝ် လၢတ်ႈဝႃႈ ၶဝ်ၵမ်ႉထႅမ် ၵမလႃႇႁႄးရိသ် ၼႆသေ တႃႇ 50 ၵေႃႉလိူဝ်တႄႉ လၢတ်ႈဝႃႈ ဢမ်ႇၶႂ်ႈတွပ်ႇ ဢမ်ႇၼၼ် ဢမ်ႇတႅပ်းတတ်းလႆႈ ၼႆယဝ်ႉ။ မိူဝ်ႈပႆႇႁိုင်သင်ၼႆႉ ၸွမ်းၼင်ႇပိူင်ပႃႇတီႇမီးဝႆႉၼၼ်ႉ တႃႇတေပဵၼ်ၼေႃႇတႅၼ်းၽွင်း ၸွမ်ၸိုင်ႈၼၼ်ႉ လူဝ်ႇလႆႈမီးၽူႈတႅၼ်း 1,976 ၵေႃႉၵမ်ႉထႅမ်ပၼ်ယဝ်ႉ။
ၵမလႃႇႁႄးရိသ် ၼႆႉ မိူဝ်ႈပႆႇပဵၼ် ၵႅမ်ၸွမ်ပွင်ၸိုင်ႈၼၼ်ႉ ယၢမ်ႈပဵၼ် ၽူႈတႅၼ်းၽွင်းၸႄႈမိူင်း ၵႄႇလီႇၾူဝ်းၼီးယႃး သေ သင်ဝႃႈ မၼ်းၼၢင်း ပဵၼ်မႃး ၽူႈတႅၼ်းၽွင်း ၸွမ်ပွင်ၸိုင်ႈ ဢၼ်ပဵၼ်တၢင်းၵၢၼ် ၼႂ်းပႃႇတီႇၼၼ်ႉၸိုင် မၼ်းၼၢင်း တေပဵၼ် ၼၢင်းယိင်း သႃႇၼိူဝ်ႉသီလမ် ၵေႃႉဢွၼ်တၢင်းသုတ်း လႄႈ ၽူႈတႅၼ်းၽွင်း ၸွမ်ပွင်ၸိုင်ႈ ဢေးသျႃးပွတ်းၸၢၼ်း ၵေႃႉဢွၼ်တၢင်းသုတ်း ၼႂ်းပိုၼ်း မိူင်းဢမႄႇရိၵၢၼ်ႇ ဢၼ်ႁိုင် 248 ပီၼၼ်ႉယူႇ။ ထရမ်ႉ ဢၼ်ပဵၼ်ၼေႃႇၸွမ်ပွင်ၸိုင်ႈ ရီႇပၢပ်ႉပလိၵ်ႇၵႅၼ်ႇၶဝ် လၢတ်ႈတီႈ သိုဝ်ႇၶၢဝ်ႇ CNN ဝႃႈ “ တႃႇတေပႄႉ ႁႄးရိသ်ၼႆႉ ငၢႆႈလိူဝ်သေ ပၢႆႇတႅၼ်ႇ“ ၼႆယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Arit John. "Harris will seek Democratic nomination and could be the first Black woman and Asian American to lead a major party ticket" — CNN, July 21, 2024
- Lisa Lerer, Shane Goldmacher, Katie Glueck and Reid J. Epstein. "Kamala Harris Rapidly Picks Up Democratic Support as 2024 Race Is Reborn" — The New York Times, July 21, 2024
- Sahil Kapur. "Kamala Harris is officially running for president. Will any Democrats challenge her?" — NBC News, July 22, 2024
- Oliver O'Connell, Joe Sommerlad, Gustaf Kilander, Katie Hawkinson. "Biden and Harris rally campaign staff a day after Democratic ticket shakeup: Live updates" — The Independent, July 23, 2024
- Brian Osgood and Ali Harb. "Biden endorses Kamala Harris as US presidential nominee. What happens next?" — Al Jazeera, July 21, 2024
