ၵၢၼ်ႇၽွမ်ႉၸႂ် လွင်ႈမၵ်းၶၢၼ်ႈ တူဝ်တႅၼ်းမိူင်းမၢၼ်ႈ တီႈ ပၢင်ၵုမ်ဢႃႇသီႇယၼ်ႇ ပွၵ်ႈၼႃႈၼႆႉ
ဝၼ်းဢင်းၵၢၼ်း၊ ၸူႇလၢႆႇ 23၊ 2024
ၽူႈမီးၸၼ်ႉ ႁွင်ႈၵၢၼ်လူင် ၽၢႆႇၼွၵ်ႈမိူင်း ၵေႃႉ႞ လၢတ်ႈဝႃႈ တီႈပၢင်ၵုမ် ၶုၼ်ၽွင်းၼွၵ်ႈမိူင်း မိူင်းဢႃႇသီႇယၼ်ႇ လႄႈ မိူင်းဢေးသျႃးၸဵင်ႇၸၢၼ်းဝၼ်းဢွၵ်ႇ ဢၼ်တေၸတ်းႁဵတ်း တီႈမိူင်းလၢဝ်း ၼႂ်းဝူင်ႈၼႆႉၼၼ်ႉ မိူင်းဢမႄႇရိၵၢၼ်ႇ လႆႈၸႂ်ၵၼ်ဝႆႉဝႃႈ တေပၼ် ၽူႈတၢင်တူဝ် မိူင်းမၢၼ်ႈ ဢၼ်ဢမ်ႇၸႂ်ႈၵၢၼ်မိူင်းၼၼ်ႉၵွႆး ၶဝ်ႈႁူမ်ႈၸွမ်း ၼႆယဝ်ႉ။ ဢႅၼ်ႇတူဝ်ႇၼီႇ ပလိၼ်ႇၵႅၼ်ႇ ၽွင်းလူင်ၽၢႆႇၼွၵ်ႈမိူင်း မိူင်းဢမႄႇရိၵၢၼ်ႇ တေတႄႇၶၢဝ်းတၢင်း ဢေးသျႃး ၼႂ်းဝူင်ႈၼႆႉသေ တေဢုပ်ႇဢူဝ်းၵၼ်တင်း ၽူႈဢွၼ်ႁူဝ် ဢႃႇသီႇယၼ်ႇၶဝ် လွင်ႈတၢင်းလၢႆလၢႆလွင်ႈ ပႃးၸဵမ်ပၼ်ႁႃ မိူင်းမၢၼ်ႈ ၼႆယဝ်ႉ။
ၽူႈမီးပုၼ်ႈၽွၼ်း ဢမႄႇရိၵၢၼ်ႇၶဝ်တႄႉ လၢတ်ႈဝႃႈ ၵဵဝ်ႇၵပ်းလွင်ႈမိူင်းမၢၼ်ႈၼႆႉ ဢမႄႇရိၵၢၼ်ႇၶဝ် တေသိုပ်ႇယိူင်းၸူး ၸုမ်းသၢၼ်ၶတ်း ၽၢႆႇတီႇမူဝ်ႇၶရေႇၸီႇၶဝ်ယူႇ ၼႆယဝ်ႉ။ Daniel Kritenbrink ၽူႈၸွႆႈၶုၼ်ၽွင်းလူင် မိူင်းဢမႄႇရိၵၢၼ်ႇ ၽၢႆႇဢေးသျႃးပွတ်းဢွၵ်ႇ လႄႈ ပၸိၾိၵ်ႉ လၢတ်ႈတီႈႁွင်ႈၶၢဝ်ႇ ဝီႇဢူဝ်ႇဢေႇဝႃႈ ႁူႉယူႇဝႃႈ ၶုၼ်ၼၢမ်းၵၢၼ် ႁွင်ႈၵၢၼ်ၽၢႆႇၼွၵ်ႈမိူင်း ဢၼ်ဢမ်ႇၸႂ်ႈတူဝ်တႅၼ်းၵၢၼ်မိူင်း မိူင်းမၢၼ်ႈၼၼ်ႉ တေၶဝ်ႈႁူမ်ႈပၢင်ၵုမ် ဢႃႇသီႇယၼ်ႇ ဢၼ်တေၸတ်းႁဵတ်း ၼႂ်းၶၢဝ်းတၢင်းၼႃႈၼႆႉၼႆယဝ်ႉ။
တင်ႈတႄႇမိူဝ်ႈပီ 2021 ဢၼ်သိုၵ်းယိုတ်းဢႃႇၼႃႇ ၼႂ်းမိူင်းမၢၼ်ႈၼၼ်ႉမႃး ပၢင်ၵုမ်ၸၼ်ႉသုင် ဢႃႇသီႇယၼ်ႇၼႆႉ လႆႈႁၢမ်ႈတၢပ်ႈဝႆႉ ၵူၼ်းႁဵတ်းၵၢၼ်လူင်ပွင်ၸိုင်ႈ ၸၼ်ႉတႅမ်ႇၶဝ် ဢမ်ႇၸႂ်ႈၽူႈတၢင်တူဝ်ၵၢၼ်မိူင်း မိူင်းမၢၼ်ႈၼၼ်ႉၵူၺ်း တေ ၸၢင်ႈၶိုၼ်ႈႁွတ်ႈ ပၢင်ၵုမ်ၼႆယဝ်ႉ။ မိူဝ်ႈလိူၼ်ၵျၼ်ႇဝႃႇရီႇပူၼ်ႉမႃးၼၼ်ႉၵေႃႈ ၶွင်ႇသီႇသိုၵ်းမိူင်းမၢၼ်ႈ သူင်ႇၽူႈမီးၸၼ်ႉ ၼႂ်းထၢၼ်ၽွင်းလူင် ၵၢၼ်ၼွၵ်ႈမိူင်း ၵေႃႉၼိုင်ႈ ၵႂႃႇႁူပ်ႉထူပ်း ၽွင်းလူင်ၽၢႆႇၼွၵ်ႈမိူင်း တီႈမိူင်းလၢဝ်းၼၼ်ႉယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Nike Ching. "US supports non-political representation by Myanmar at ASEAN" — VOA News, July 22, 2024
