ၵၢၼ်ႇၶဝ် ဝႆႉသတိသေ ပႂ်ႉတူၺ်း လွင်ႈၶဵင်ႈၶႅင်တီႈ ပွတ်းဢွၵ်ႇတွၼ်ႈၵၢင်
ဝၼ်းဢႃးတိတ်ႉ၊ ဢေႇပရႄႇ 14၊ 2024
ၵဵဝ်ႇၵပ်းလူၺ်ႈ ဢီႇရၢၼ်း တိုၵ်းတေႃးၼိူဝ် ဢိတ်ႇသရေးသေ လႆႈမီးလွင်ႈလီမႆႈၸႂ်မႃးလႄႈ ၸဝ်ႈၸွမ်ၸိုင်ႈ ဢမႄႇရိၵၢၼ်ႇ ၵျူဝ်းပၢႆႇတႅၼ်ႇ လႆႈၶပ်းၶိုင် တႃႇႁူပ်ႉထူပ်းဢုပ်ႇဢူဝ်းၵၼ်တင်း ၸုမ်းႁူမ်ႇလူမ်ႈၸိုင်ႈမိူင်းမၼ်းသေ တႃႇပႂ်ႉတူၺ်း သၢႆငၢႆ လွင်ႈၶဵင်ႈၶႅင် တီႈ ပွတ်းဢွၵ်ႇတွၼ်ႈၵၢင် ၼႆယဝ်ႉ။ ပၢႆႇတႅၼ်ႇၼႆႉ မၼ်းလႆႈၶပ်ႉၶိုင် တႃႇၵႂႃႇလိုဝ်ႈတီႈ ႁိူဝ်းၽင်ႇၼမ်ႉ ဢၼ်မီးတီႈ ၸႄႈမိူင်း တလႃႇဝႄးရ် Delaware မၼ်းၼၼ်ႉသေ လႆႈၵိုင်ႉၵၢင်ႉ ၶိုၼ်းပွၵ်ႈမႃးၸူး ႁိူၼ်းၵႅဝ်ႈၶၢဝ် ယူႇယဝ်ႉ။
တီႈလွင်ႈတိုၵ်းတေႃး လုမ်းၽွင်းတၢင်ဢွၼ်ႇဢီႇရၢၼ်း တီႈ သီးရီးယႃး ဢၼ်ထၢင်ႇဝႃႈလႆႈ ဢိတ်ႇသရေးၶဝ် တိုၵ်းတေႃးၼၼ်ႉ ၸွမ်ႁၢၼ်ထၢၼ်ႈယႂ်ႇဢီႇရၢၼ်း လႆႈတၢႆၵႂႃႇ သွင်ၵေႃႉ လႄႈ ၵူၼ်းတၢင်ႇၸိူဝ်း လႆႈတၢႆၵႂႃႇ သိပ်းသွင်ၵေႃႉသေ သၢႆငၢႆမၼ်း လႆႈတိူဝ်းႁၢႆႉမႃးလႄႈ ဝၢႆးသေ ပၢင်တိုၵ်း ဢိတ်ႇသရေး လႄႈ ႁႃးမၢတ်ႉသ် ၼႆႉပဵၼ် လွင်ႈၶဵင်ႈၶႅင် တီႈသုင်သုတ်းယဝ်ႉ။ ၽူႈမီးပုၼ်ႈၽွၼ်း ဢမႄႇရိၵၢၼ်ႇ လႄႈ ဢိတ်ႇသရေးၶဝ် လႆႈမုင်ႈမွင်းဝႆႉဝႃႈ ၼႂ်းဝူင်ႈၼႆႉ ၽၢႆႇဢီႇရၢၼ်းၶဝ် တေၸၢင်ႈတိုၵ်းတေႃးမႃး ဝႃႈၼႆယဝ်ႉ။ ဢၼ်ၼႆႉၼႆႉ လွင်ႈသုၵ်ႉယုင်ႈတိူဝ်းယႂ်ႇမႃးသေ လႆႈမႆႈၸႂ် ဝႃႈ ၼႂ်းပိုၼ်ႉတီႈ တေၸၢင်ႈပဵၼ်သိုၵ်းပဵၼ်သိူဝ်မႃး ၼႆယဝ်ႉ။
ငဝ်ႈငုၼ်းသိုၵ်း ပႅၼ်ႇတၵွၼ်ႇ ဢမႄႇရိၵၢၼ်ႇ လႆႈၽိုၼ်ၶၢဝ်ႇဝႃႈ ၽွင်းလူင်ၵၢၼ်ၵႅတ်ႇၵင်ႈ လႂၢႆႉဢေႃႉသတိၼ်ႇၵေႃႈ လႆႈဢုပ်ႇဢူဝ်းၶိုၵ်ႉၶၵ်ႉ ၵၼ်တင်း ဢိတ်ႇသရေး ၵဵဝ်ႇၵပ်းလူၺ်ႈ လွင်ႈလွၵ်ႇငိူတ်ႈၼႂ်းပိုၼ်ႉတီႈ ဝႃႈၼႆယဝ်ႉ။ သင်ဝႃႈ ဢီႇရၢၼ်း လႆႈတိုၵ်းတေႃး ဢိတ်ႇသရေးမႃးၼႆ တေၵႅတ်ႇၵင်ႈပၼ် တဵမ်တဵမ်ထူၼ်ႈထူၼ်ႈသေ တေၵမ်ႉထႅမ်ပၼ် ဢိတ်ႇသရေး တဵမ်တဵမ်ထူၼ်ႈထူၼ်ႈ ၼႆယဝ်ႉ။ Jake Sullivan ဢၼ်ပဵၼ် ၽူႈပၼ်တၢင်းၶႂ်ႈၸႂ် ပၢႆးႁူမ်ႇလူမ်ႈၸိုင်ႈမိူင်း ၸဝ်ႈၸွမ်ၸိုင်ႈ ဢမႄႇရိၵၢၼ်ႇ ၼၼ်ႉၵေႃႈ မၼ်းလၢတ်ႈဝႃႈ လႆႈလၢတ်ႇတေႃႇၵၼ်တင်း ဢိတ်ႇသရေးယဝ်ႉသေ မၼ်းလၢတ်ႈဝႃႈ မိူင်းႁူမ်ႈတုမ် ဢမႄႇရိၵၢၼ်ႇၼႆႉ “လႆႈမီးဝႆႉၵႂၢမ်းမၼ်ႈၵႅၼ်ႇ တွၼ်ႈတႃႇ ပၢႆးႁူမ်ႇလူမ်ႈ ဢိတ်ႇသရေး“ ဝႃႈၼႆယဝ်ႉ။
ဢမႄႇရိၵၢၼ်ႇၼႆႉ လႆႈဝၢင်းၸႂ်ဝႆႉ တႃႇၵႅတ်ႇၵင်ႈ ဢိတ်ႇသရေးသေ “ဢီႇရၢၼ်းၶဝ် တေ ဢမ်ႇဢွင်ႇမၢၼ်လႆႈ“ၼႆ ၵျူဝ်းပၢႆႇတႅၼ်ႇ လႆႈပၼ်ၽၢင်ႉ မိူဝ်ႈဝၼ်းသုၵ်းၼၼ်ႉယဝ်ႉ။ ၵူၼ်းဢဝ်ၶၢဝ်ႇၶဝ် တွင်ႈထၢမ်ဝႃႈ ၶႂ်ႈၽၢၵ်ႇၵႂၢမ်းထိုင် ဢီႇရၢၼ်းၶဝ်ဝႃႈသင်ၼႆ ပၢႆႇတႅၼ်ႇ လႆႈတွပ်ႇၶိုၼ်းဝႃႈ “ယႃႇပေႁဵတ်း“ ဢၼ်ၶႂ်ႈမၢႆထိုင်ဝႃႈ ယႃႇပေတိုၵ်းသိုၵ်း ဢၼ်ဝႃႈၼၼ်ႉယဝ်ႉ။ ၵႂၢမ်းထၢမ်ဢၼ်ဝႃႈ တႃႇဢမႄႇရိၵၢၼ်ႇ တေ တုမ်ႉတွပ်ႇဢီရၢၼ်းၵမ်းသိုဝ်ႈၼႆႉ ပဵၼ်လွင်ႈဢၼ်လႂ် တေ ပဵၼ်လွင်ႈတႅပ်းတတ်း ဢၼ်ဝႃႈၼၼ်ႉတႄႉ ပၢႆႇတႅၼ်ႇ ဢမ်ႇတွပ်ႇၶိုၼ်းသေ မၼ်းၵူၺ်းတွပ်ႇဝႃႈ ဢမ်ႇႁိုင်ဢမ်ႇၼၢၼ်း ဢီႇရၢၼ်းတေ တိုၵ်းတေႃးယဝ်ႉ ဝႃးၼႆ။
ငိူၼ်ႈငဝ်ႈတိုၼ်း
[မႄးထတ်း | မႄးထတ်းငဝ်ႈငႃႇ]- Pbs. "Biden meets with national security team as U.S. helps defend Israel against Iran" — PBS, April 13, 2024
- Catherine Lucey. "Biden Meets With National-Security Team" — The Wall Street Journal, April 14, 2024
- Jacob Magid. "Biden cuts weekend trip to meet with national security team on Mideast tensions" — The Times of Israel, April 13, 2024
- Steve Herman လႄႈ Anita Powell. "Biden hosts urgent White House meetings as Iran attacks Israel" — VOA, April 13, 2024
