ၵၢဝ်းလီႁွင်ႇ ပွႆႇမၢၵ်ႇၼူၾႆး

ဝၼ်းၸၼ်၊ ၸူႇလၢႆႇ 1၊ 2024 

လႅၼ်လိၼ် တီႈ ၵၢဝ်းလီ ႁွင်ႇ လႄႈ ၸၢၼ်း ၶႅၼ်ႈၵၼ်

ၵၢဝ်းလီၸၢၼ်း လၢတ်ႈဝႃႈ ၵၢဝ်းလီႁွင်ႇၶဝ် ပွႆႇမၢၵ်ႇၼူၾႆး တူၵ်းသႂ်ႇၼႂ်းပၢင်ႇလၢႆႇ ၽၢႆႇဢွၵ်ႇၶဝ် ၼႆယဝ်ႉ။ ၽူႈၵွၼ်းတပ်ႉၵွင် ၵၢဝ်းလီၸၢၼ်း​ၶဝ် လၢတ်ႈဝႃႈ ၶဝ်လႆႈပိုတ်ႇၽုၺ်ႇမႃး မိူဝ်ႈဝၼ်းၸၼ်ၼၼ်ႉ ၼႆယဝ်ႉ။ လွင်ႈတၢင်းႁူဝ်ယွႆႈမၼ်းတႄႉ ဢမ်ႇလႆႈလၢတ်ႈမႃးၼင်ႇၵဝ်ႇ။

မိူဝ်ႈဝၼ်းဢႃးတိတ်ႉၼၼ်ႉ ၵၢဝ်းလီႁွင်ႇ ႁွင်ႉဝႃႈ ပၢင်ၽိုၵ်းၽွၼ်ႉသိုၵ်း ဢၼ် ၵၢဝ်းလီၸၢၼ်း၊ ၵျႃႇပၢၼ်ႇလႄႈ ဢမေႇရိၵၢၼ်ႇ ႁူမ်ႈၵၼ်ၼႆႉ ပဵၼ်ၼင်ႇၸုမ်းၼေႇတူဝ်းဢေးသျႃးၼႆသေ မိူဝ်ႈဝၼ်းဢႃးတိတ်ႉၼၼ်ႉ ပၼ်ၾၢင်ႉဝႃႈ တေလႆႈႁူပ်ႉထူပ်း ၽွၼ်းႁၢႆႉၸႃႉ ဢၼ်ယႂ်ႇလူင်ၼႆယဝ်ႉ။ ဝၢႆးသေ ပၢင်ၽိုၵ်းၽွၼ်ႉသိုၵ်း ၶၢဝ်းတၢင်း 3 ဝၼ်းယဝ်ႉတူဝ်ႈၵႂႃႇ ဝၼ်းၼိုင်ႈယဝ်ႉ ၵၢဝ်းလီႁွင်ႇ လႆႈပိုၼ်ၽၢဝ်ႇပၼ်ၾၢင်ႉၸိူင်ႉၼႆ။

သိုဝ်ႇၶၢဝ်ႇၸိုင်ႈမိူင်း KCNA ဢွၵ်ႇၶၢဝ်ႇဝႆႉ မိူဝ်ႈဝၼ်းဢႃးတိတ်ႉၼၼ်ႉဝႃႈ ထၢၼ်ၽွင်းလူင် ၵၢၼ်ၼွၵ်ႈမိူင်း ၵၢဝ်းလီႁွင်ႇ ဢွၵ်ႇၶေႃႈပိုၼ်ၽၢဝ်ႇဝႃႈ ၶဝ်သၢၼ်ၶတ်း လွင်ႈဢၼ် လွင်ႈတိုၵ်းတေႃး ၵၢဝ်းလီႁွင်ႇ ႁၢဝ်ႈႁႅင်းမႃးၼၼ်ႉၼႆယဝ်ႉ။ ယွၼ်ႉဢမေႇရိၵၢၼ်ႇလႄႈ ၵူၼ်းၸွမ်းလင်ၶဝ် ၽွတ်ႈႁႅၼ်းၸုမ်းသိုၵ်းသေ ယုၵ်ႉယွင်ႈႁႅင်းမၼ်းမႃးၼင်ႇၼႆၼႆႉ ၵၢဝ်းလီႁွင်ႇ လႆႈလၢတ်ႈဝႆႉ တီႈၼႂ်းၶေႃႈပိုၼ်ၽၢဝ်ႇဝႃႈ တေဢဝ်လိူင်ႈ၊ တေဢမ်ႇပွႆႇဝၢင်းၶႂၢင်းပၼ် ၼႆယဝ်ႉ။

ၵၢဝ်းလီၸၢၼ်း ၵျပၢၼ်ႇ ဢမေႇရိၵၢၼ်ႇ ၶဝ် လႆႈႁူမ်ႈၵၼ်ၽိုၵ်းၽွၼ်ႉ တင်း မၢၵ်ႇၼူၾႆး လႄႈ ၶိူင်ႈၵႅတ်ႇၶႄၵၢင်ႁၢဝ် ၊ ၵၢၼ်တိုၵ်းတေႃး ႁိူဝ်းလမ်ၼမ်ႉ လႄႈ ၵၢၼ်ၵႅတ်ႇၶႄ ၼိူဝ်ဢွၼ်ႇလၢႆး။ ၵၢဝ်းလီၸၢၼ်း တေၸတ်းႁဵတ်းပၢင်ၽိုၵ်းၽွၼ်ႉသိုၵ်းႁူမ်ႈၵၼ် ၵူႈပီ ႁႂ်ႈပဵၼ်လွင်ႈၼႄလွင်ႈၽွမ်ႉႁူမ်ႈ ၽွင်းၵၢဝ်းလီႁွင်ႇ မီးလွင်ႈလွၵ်ႇငိူတ်ႈ ၼိဝ်ႇၵလီးယႃး လႄႈ လွင်ႈၶႄႇၽွင်းငမ်း ၼႂ်းပိုၼ်ႉတီႈ ၼမ်မႃး။ လွင်ႈၼႆႉ လႆႈတႅပ်းတတ်းမႃး မိူဝ်ႈပီၵၢႆ တီႈပၢင်ၵုမ် ၽူႈဢွၼ်ႁူဝ် မိူင်းၵၢဝ်းလီၸၢၼ်း၊ မိူင်းၵျႃႇပၢၼ်ႇ လႄႈ မိူင်းဢမေႇရိၵၢၼ်ႇ ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Associated Press. "North Korea launches ballistic missile toward sea, after end of US-South Korea-Japan drill" — VOA News, June 30, 2024
• Ju-min Park and Joyce Lee. "North Korea missile launch may have failed and fallen inland - South" — Reuters, July 1, 2024
• Gawon Bae and Brad Lendon. "Failed North Korean missile test may have fallen near capital Pyongyang, South Korea says" — CNN, July 1, 2024
• The Korea Times. "NK missile launch ends in mid-air explosion amid possibility of hypersonic missile test" — The Korea Times, July 1, 2024
• HYUNG-JIN KIM Associated Press. "North Korea launches a ballistic missile off its east coast, South Korea says" — ABC News, July 1, 2024
• Al Jazeera. "North Korea fires two ballistic missiles, one may have fallen on land" — Al Jazeera, July 1, 2024