ၵျူဝ်းပၢႆႇတႅၼ်ႇ ဝႃႈတေဢမ်ႇၶဝ်ႈၶေႉၶဵင်ႇ ပၢင်လိူၵ်ႈတင်ႈ ၸွမ်ပွင်ၸိုင်ႈ ဢမႄႇရိၵၢၼ်ႇထႅင်ႈ

ဝၼ်းၸၼ်၊ ၸူႇလၢႆႇ 22၊ 2024 

ၸွမ်ပွင်ၸိုင်ႈ ၵျူဝ်းပၢႆႇတႅၼ်ႇ

ၸွမ်ပွင်ၸိုင်ႈ ဢမႄႇရိၵၢၼ်ႇ ယၢမ်းလဵဝ် ၵျူဝ်းပၢႆႇတႅၼ်ႇ ပိုၼ်ၽၢဝ်ႇ ၼိူဝ်သိုဝ်ႇတူင်ႇဝူင်းၵူၼ်း X ဝႃႈ တေဢမ်ႇၶဝ်ႈၶေႉၶဵင်ႇ ပၢင်လိူၵ်ႈတင်ႈ ၸွမ်ပွင်ၸိုင်ႈ ဢမႄႇရိၵၢၼ်ႇ ဢၼ်တေၸတ်းႁဵတ်း ၼႂ်းလိူၼ်ၼူဝ်ႇဝႅမ်ႇပႃႇၼၼ်ႉထႅင်ႈ ၼႆယဝ်ႉ။

လႆႈႁူႉဝႃႈ ၵျူဝ်းပၢႆႇတႅၼ်ႇ တိုၵ်းသူၼ်း ၵႃႇမႃႇလႃႇႁႄးရိသ်ႉ ႁႂ်ႈပဵၼ် ၼေႃႇတႅၼ်းၽွင်း ၸွမ်ပွင်ၸိုင်ႈ ပႃႇတီႇတီႇမူဝ်ႇၶရႅၵ်ႉတိၵ်ႉ ၼႆယဝ်ႉ။

ၸွမ်းၼင်ႇ မေႃယႃ ဢၼ်လႆႈဢဝ် ပုၼ်ႈၽွၼ်းပႂ်ႉတူၺ်း ၵျူဝ်းပၢႆႇတႅၼ်ႇ ၼၼ်ႉလၢတ်ႈဝႃႈ မၼ်းၸၢႆးၼႆႉ မီးၽၢင်ႁၢင်ႈ ဢႆသေ လူမ်းမႆႈတူဝ်ၶိင်း လႄႈ ထၢတ်ႈဢွၵ်ႇသီႇၵျိၼ်ႇ ၵေႃႈ ပဵၼ်ၸွမ်းပိူင်မၼ်းယူႇ။

ၵျူဝ်းပၢႆႇတႅၼ်ႇၼႆႉ မိူဝ်ႈလိူၼ်ၸူႇလၢႆ 17 ဝၼ်းၼၼ်ႉ မႃးၶဝ်ႈႁူမ်ႈပၢင်ၵုမ်ႁႃသဵင် တင်းၵူၼ်းမိူင်းလႅတ်ႇတိၼ်ႇဢမႄႇရိၵၢၼ်ႇ တီႈဝဵင်းလတ်ႉဝႄးၵၢသ်ႉသေတႃႉ ဝၢႆးသေ လႆႈၵူတ်ႇထတ်းႁၼ် ၸိူဝ်ႉမႅင်းတၢင်းပဵၼ် COVID-19 ယဝ်ႉလႄႈ လႆႈၶိုၼ်းပွၵ်ႈမိူဝ်းၶိုၼ်း တီႈၸႄႈမိူင်း Delaware ၼႆယဝ်ႉ။

ၸမ်ပၢင်လိူၵ်ႈတင်ႈမႃး ယွၼ်ႉပိူဝ်ႈ လွင်ႈလၢတ်ႈၵႂၢမ်းပၢႆႇတႅၼ်ႇ မီးလွင်ႈပႅၵ်ႇပိူင်ႈ၊ လွင်ႈႁဵတ်းသၢင်ႈမၼ်းၵေႃႈ ဢမ်ႇမိူၼ်ပိူင်ၵဝ်ႇမႃးလႄႈ ၼႂ်းပႃႇတီႇ တီႇမူဝ်ႇၶရေႇၸီႇ တူဝ်ၵဝ်ႇမၼ်းၵေႃႈ ၵၢင်ၸႂ် တႅၵ်ႇယၢႆႈၵၼ် လွင်ႈဝႃႈ တေၵမ်ႉထႅမ် ပၢႆႇတႅၼ်ႇ ႁႂ်ႈပဵၼ် ၽူႈတႅၼ်းၽွင်း ၸွမ်ပွင်ၸိုင်ႈ ပႃႇတီႇၼၼ်ႉယူႇ။

လွင်ႈႁဵတ်းသၢင်ႈ ၵျူဝ်းပၢႆႇတႅၼ်ႇ ဢႃႇယု 81 ပီ ၼႂ်းၶၢဝ်းတၢင်း လၢႆလိူၼ်ပူၼ်ႉမႃးၼႆႉ ဢိၵ်ႇပႃး ၶေႃႈၵႂၢမ်း ဢၼ်ဢမ်ႇလီ ၵမ်ႈၽွင်ႈ မိူဝ်ႈၽွင်း မၼ်းဢုပ်ႇဢူဝ်းၵၼ်တင်း တေႃႇၼႄႇထရမ်ႉၼၼ်ႉ ႁဵတ်းႁႂ်ႈ မီးလွင်ႈထၢင်ႇထိူမ် ၼိူဝ် ငဝ်းလၢႆးၸႂ်မၼ်းယူႇ။ လွင်ႈပၢႆးယူႇလီတူဝ်ၸႂ် ၸွမ်ၸိုင်ႈဢၼ်တေလိူၵ်ႈတင်ႈမႃးၼၼ်ႉ လႆႈထၢမ်တူၺ်း ပွၵ်ႈၼႆႉ ပဵၼ်ပွၵ်ႈဢွၼ်တၢင်းသုတ်းယဝ်ႉ။

ယွၼ်ႉပိူဝ်ႈ မၼ်းလႆႈလၢတ်ႈၸိုဝ်ႈၽိတ်း ၸွမ်ပွင်ၸိုင်ႈယူႇၶရဵၼ်း ၸႄးလႅၼ်းသၵီး ဝႃႈပဵၼ် ၸွမ်ပွင်ၸိုင်ႈပူႇထိၼ်ႇ ၼႆလႄႈ လႆႈထုၵ်ႇ သိုဝ်ႇၶၢဝ်ႇ ရတ်ႈသျႃးၶဝ် ၵိူဝ်ႉ မၼ်းယဝ်ႉ။ တီႈပၢင်ၵုမ် ၸုမ်းၼေႇတူဝ်း ဢၼ်ၸတ်းႁဵတ်းတီႈ ဝႃႇသျိၼ်ႇတၢၼ်ႇ မိူဝ်ႈလိူၼ်ၵျူႇလၢႆႇ 11 ဝၼ်းၼၼ်ႉ ၵျူဝ်းပၢႆႇတႅၼ်ႇၼႆႉ ႁူမ်ႈဝႃႈ မၼ်းလူဝ်ႇလႆႈ သိုပ်ႇမိုတ်ႈပၼ် ၸွမ်ပွင်ၸိုင်ႈ ယူႇၶရဵၼ်း ၸႄးလႅၼ်းသၵီး တႃႇမွၵ်ႇလၢတ်ႈၶေႃႈၵႂၢမ်းၼႆၼၼ်ႉ မၼ်းလႆႈ လၢတ်ႈၽိတ်းဝႃႈ ၸွမ်ပွင်ၸိုင်ႈ ပူႇထိၼ်ႇ ၼႆယဝ်ႉ။ ဝၢႆးသေ ပၢင်ၵုမ်ၼေႇတူဝ်းယဝ်ႉ တီႈပၢင်ၸႅင်ႈၶၢဝ်ႇၼၼ်ႉၵေႃႈ တီႈဢၼ်လူဝ်ႇလၢတ်ႈဝႃႈ ၵႅမ်ၸွမ်ၸိုင်ႈ ၵႃႇမႃႇလႃႇႁႄးရိသ်ႉ ၼႆၼၼ်ႉ မၼ်းလၢတ်ႈၽိတ်းမႃးဝႃႈ ၵႅမ်ၸွမ်ၸိုင်ႈထရၢမ်ႉ ၼႆယဝ်ႉ။

လွင်ႈႁဵတ်းသၢင်ႈ ဢၼ်ၽိတ်းပိူင်ႈ ထႅင်ႈဢၼ်ၼိုင်ႈ ဢၼ် ပၢႆႇတႅၼ်ႇ ႁဵတ်းၼၼ်ႉ လႆႈႁၼ် တီႈပၢင်ၵဵပ်းငိုၼ်းၵွင်ၵၢင် တႃႇပႃႇတီႇတီႇမူဝ်ႇၶရႅၵ်ႉတိၵ်ႉ မိူဝ်ႈလိူၼ်ၵျူႇလၢႆႇ 15 ဝၼ်းၼၼ်ႉယဝ်ႉ။ တီႈပၢင်ပွႆးၼၼ်ႉ ပၢႆႇတႅၼ်ႇ လႄႈ ဢူဝ်ႇပႃႇမႃႇ ၶဝ်ႈႁူမ်ႈၸွမ်း။ ဢူဝ်ႇပႃးမႃး လႆႈတူင်ႉတၵ်ႉ ၼႄမိုဝ်း တီႈၽူႈပၼ်ႁႅင်းၶဝ်သေတႃႉ ပၢႆႇတႅၼ်ႇတႄႉ ၸုၵ်းယူႇ ငိူဝ်ႈငိူဝ်ႈငဝ်ငဝ်လႄႈ ဢူဝ်ႇပႃးမႃး ၸင်ႇလႆႈယိပ်းမိုဝ်း ပၢႆႇတႅၼ်ႇသေ ဢွၼ်မၼ်းဢွၵ်ႇၵႂႃႇ တီႈၽၢႆႇၼႃႈၽူႈပၼ်ႁႅင်းၶဝ်ၼၼ်ႉယဝ်ႉ။

ငိူၼ်ႈငဝ်ႈၶၢဝ်ႇ

• Michael Williams,. "Biden will not seek reelection; endorses Harris" — CNN, July 21, 2024
• Eke Miller, Colleen Long and Darlene Superville. "Biden drops out of 2024 race after disastrous debate inflamed age concerns. VP Harris gets his nod" — AP News, July 22, 2024
• Jeff Mason , Jarrett Renshaw and Steve Holland. "Biden ends failing reelection campaign, backs Harris as nominee" — Reuters, July 22, 2024
• Katanga Johnson. "Biden Exits Race, Endorses Harris as She Shores Up Support" — Bloomberg, July 22, 2024