ၵူၼ်း 12 ၵေႃႉ ၸိူဝ်းၼႄၵၢင်ၸႂ် တီႈၼႂ်းသၽႃးႁွင်းၵွင်း ထုၵ်ႇၺႃးတၢမ်ႇၶွၵ်ႈ

ဝၼ်းသဝ်၊ မၢတ်ႉၶျ် 16၊ 2024

ၵပ်းၵၢႆႇလူၺ်ႈ လွင်ႈၶဝ်ႈၼႂ်းသၽႃးသေ ၼႄၵၢင်ၸႂ် တီႈႁွင်းၵွင်း မိူဝ်ႈပီ 2019 ၼၼ်ႉသေ လုၵ်ႉတီႈ လုမ်းတတ်းသိၼ်ႁွင်းၵွင်း လႆႈပၼ်တၢမ်ႇၶွၵ်ႈ ၽူႈဢွၼ်ႁူဝ်လုၵ်ႈႁဵၼ်းၵမ်ႈၽွင်း ဢိၵ်ႇတင်း ၽူႈၼႄၵၢင်ၸႂ် 12 ၵေႃႉ ၸိူဝ်း ၼႄၵၢင်ၸႂ် သၢၼ်ၶတ်းလူင်ပွင်ၸိုင်ႈ ၼၼ်ႉယဝ်ႉ။ ၽူႈဢွၼ်ႁူဝ်လုၵ်ႈႁဵၼ်း Althea Suen၊ ၸၢႆးၸိူင်း Gregory Wong၊ ၽူႈတူင်ႉတိုၼ်ႇ Ventus Lau လႄႈ Owen Chow ႁူမ်ႈ 12 ၵေႃႉၼႆႉ ဢိင်ၼိူဝ် လွင်ႈၶဝ်လႆႈၶဝ်ႈပႃး တီႈဢၼ်ၶဝ်ႈၼႂ်း သၽႃးသေ ၼႄၵၢင်ၸႂ်ၼၼ်ႉသေ ၽူႈတတ်းသိၼ် Li Chi-ho လႆႈတမ်းတၢမ်ႇၶွၵ်ႈ တႄႇ 4 ပီ တေႃႇ 7 ပီယဝ်ႉ။ ၶဝ် 12 ၵေႃႉၼႆႉ ၸဵမ်မိူဝ်ႈဢွၼ်တၢင်း ပဵၼ်ၵူၼ်းၸိူဝ်းထုၵ်ႇၺႃးတၢမ်ႇဝႆႉ ၵပ်းၵၢႆႇလူၺ်ႈ လွင်ႈသေႃႇသူၼ်းႁႂ်ႈသုၵ်ႉယုင်ႈဢူၼ်မေႃး ၼၼ်ႉယဝ်ႉ။

မိူဝ်ႈ ပီ 2019 လိူၼ်ၸူႇလၢႆႇ 1 ဝၼ်း ဢၼ်ပဵၼ် ဝၼ်းၶွပ်ႈၶူပ်ႇ ဢၼ်ပရိတ်ႈတဵၼ်ႇၶဝ် ၶိုၼ်းဢဝ် ၵုၼ်ႁွင်းၵွင်း ပၼ်ၶိုၼ်း မိူင်းၶႄႇ ထူၼ်ႈတဵမ် 22 ပီၼၼ်ႉ ၸိူဝ်းပဵၼ် ၵူၼ်းၼႄၵၢင်ၸႂ် ဢၢၼ်ႁူဝ်ႁဵင်မၼ်း ဢၼ်သၢၼ်ၶတ်းလူင်ပွင်ၸိုင်ႈၼၼ်ႉ လႆႈဢွၼ်ၵၼ် ယႃႉၽၵ်းတူႁူးလႅင်း၊ ယႃႉၶူဝ်းႁိူၼ်း လႄႈ ၶႅပ်းႁၢင်ႈ လႄႈ ၶဝ်ႈတီႈၼႂ်း သၽႃးသေ ၼႄၵၢင်ၸႂ်မႃးယဝ်ႉ။

မိူဝ်းၽွင်းၼၼ်ႉ ၸိူဝ်းပဵၼ် ၽူႈတူင်ႉၼိုင်လွင်ႈတီႇမူဝ်ႇၶရေႇသီႇၶဝ် ဢမ်ႇႁၢၼ်ႉၸႂ်ၼိူဝ် ဢၼ်ဝႃႈ တေမၵ်းမၼ်ႈၵူတ်းမၢႆ ဢၼ်တေဢဝ် ၸိူဝ်းပဵၼ် ၽူႈထုၵ်ႇထၢင်ႇထိူမ် ႁဵတ်းၵၢၼ်ၽိတ်းၽိင်ႈ တီႈ ႁွင်းၵွင်းၼၼ်ႉ သူင်ႇပၼ်တီႈ မိူင်းၶႄႇ ဢၼ်ဝႃႈၼၼ်ႉသေ ဢွၼ်ၵၼ်ၼႄၵၢင်ၸႂ်မႃး မီးႁူဝ်လိူၼ်မၼ်းသေ မႅၼ်ႈၽွင်း တိုၵ်ႉထုၵ်ႇ ၸဝ်ႈၼႃႈတီႈၶဝ် တိုၵ်းတေႃးႁဵတ်းႁၢႆႉယူႇၼၼ်ႉယဝ်ႉ။ ၵူၼ်းပိုၼ်ႉတီႈႁွင်းၵွင်းၶဝ်လၢတ်ႈဝႃႈတႄႉ ယူႇတီႈတႂ်ႈ လွင်ႈဢုပ်ႉပိူင်ႇ လူင်ပွင်ၸိုင်ႈမိူင်းၶႄႇ ၼႆႉ ယၢမ်းလဵဝ် လႆႈသုမ်း လွင်ႈလွတ်ႈလႅဝ်း မႃးယူႇ ဝႃႈၼႆ။

ၸွင်ႇမီးတၢင်းႁၼ်ထိုင်ၼိူဝ် ၶၢဝ်ႇဢၼ်ၼႆႉႁိုဝ်? ပိုၼ်ၽႄႈပၼ်တႃႉ!