ၵူၼ်းမိူင်းမၢၼ်ႈ 100 ပၢႆ ထုၵ်ႇၺႃးၺွပ်းတီႈ ၵၢၼ်ၸၼပူးရီး

ဝၼ်းၽတ်း၊ မၢတ်ႉၶျ် 21၊ 2024 

ၽၵ်းတူမိူင်း ၵၢၼ်ၸၼပူးရီး

မိူဝ်ႈလိူၼ်မၢတ်ႉၶ်ျ ဝၼ်းထိ 19 ဝၼ်းလဵဝ်ၵူၺ်း ၵူၼ်းမိူင်းမၢၼ်ႈ 100 ပၢႆ ၸိူဝ်းၶဝ်ႈမႃးၼႂ်းမိူင်းထႆး ဢမ်ပဵၼ်တၢင်းၵၢၼ်ၼၼ်ႉ ထုၵ်ႇၺႃးၺွပ်းတီႈ ၵၢၼ်ၸၼပူးရီး တီႈ လႅၼ်လိၼ် ထႆး-မၢၼ်ႈ ၼၼ်ႉယဝ်ႉ။

ၸိူဝ်းပဵၼ် ႁူင်းပလိၵ်ႈ သင်ၶလပူးရီး တီႈၼႂ်း ၸႄႈတွၼ်ႈၵၢၼ်ၸၼပူးရီး တီႈလႅၼ်လိၼ် ထႆး-မၢၼ်ႈ၊ ၸုပ်းပလိၵ်ႈ တီႈ တပ်ႉၽႄ ပလိၵ်ႈပႂ်ႉလႅၼ်လိၼ် 134၊ ၸုမ်းပႂ်ႉလႅၼ်လိၼ် ၸုမ်းၶိုၵ်ႉတွၼ်း၊ ၽူႈမီးပုၼ်ႈၽွၼ်း ၽၢႆႇဢုပ်ႉပိူင်ႇ ၸႄႈတွၼ်ႈ သင်ႇၶလပူးရီးၶဝ် ႁူမ်ႈၵၼ်သေ လႆႈပိုတ်ႇတီႈၵူတ်ႇထတ်း တႃႇတိၺွပ်း ၽူႈၸိူဝ်းလၵ်ႉၶဝ်ႈမႃး ၼႂ်းမိူင်းထႆးၼၼ်ႉယဝ်ႉ။ မိူဝ်ႈလိူၼ်မၢတ်ႉၶျ် ဝၼ်းထိ 19 တွၼ်ႈၸဝ်ႉ ၼၼ်ႉ တိၺွပ်းလႆႈ ၵူၼ်းႁေႃႈလူတ်ႉ ၵူၼ်းမိူင်းမျၢၼ်ႇမႃႇ လႄႈ မျၢၼ်ႇမႃႇ 20 ၵေႃႉသေ ထိုင် ယၢမ်းၼႂ် 1 မူင်းမႃး တီႈလၢၼ်ႇၵူတ်ႇထတ်း ထွင်ပႃပူးၼၼ်ႉ ၶိုၼ်းတိၺွပ်းလႆႈထႅင်ႈ 33 ၵေႃႉ သေ ၽၢႆႇတပ်ႉပႂ်ႉလႅၼ်လိၼ် လႆႈတိၺွပ်းၺႃး ၵူၼ်းမျၢၼ်ႇမႃႇ ထႅင်ႈ 50 ၵေႃႉ ဢၼ်ပပ်ႉယူႇတီႈ ၼွင်လူ ၼၼ်ႉၼႆ ၽၢႆႇတပ်ႉၸုမ်းပလိၵ်ႈပႂ်ႉလႅၼ်လိၼ် ၵၢၼ်ၸၼပူးရီ လႆႈပိုၼ်ၶၢဝ်ႇဝႆႉမီးၼင်ႇၼၼ်။ လႆႈဝႃႈ ဝၼ်းလဵဝ်ၵူၺ်း တိၺွပ်းလႆႈ မျၢၼ်ႇမႃႇ 100 ပၢႆၼၼ်ႉယဝ်ႉ။ ဢူးယႄးမိၼ်း ဢၼ်ပဵၼ် ၽူႈတူင်ႉၼိုင်သုၼ်ႇၵူၼ်းႁဵတ်းၵၢၼ် လၢတ်ႈဝႃႈတႄႉ လွင်ႈဢၼ်တိၺွပ်းၵူၼ်းပဵၼ်မူႇပဵၼ်ၽုင်ၼႆႉ တိူဝ်းၼမ်မႃး ဝၢႆးသေ သိုၵ်းမၢၼ်ႈယိုတ်းဢႃႇၼႃႇ ဝၢႆးသေ သိုၵ်းမၢၼ်ႈ မၵ်းမၼ်ႈပၵ်းပိူင်ႁၢပ်ႇၵၢၼ်သိုၵ်းၼၼ်ႉယဝ်ႉ ဝႃႈၼႆ။

"ပေႃးမႃးတူၺ်း ဢၼ်ၵူၼ်းထုၵ်ႇၺႃးၺွပ်း ပဵၼ်မူႇပဵၼ်ၽုင် ၵမ်ႉၼမ် တီႈ မိူင်းထႆးၼႆႉ မၼ်းပဵၼ် ၸိူဝ်းဢၼ်မႃးၸွမ်းသဵၼ်ႈတၢင်း ဢမ်ႇပဵၼ်တၢင်းၵၢၼ် ဢမ်ႇမီးလၵ်းထၢၼ်သင်သေ မႃးၸွမ်းၵႄႇရီႇဢမ်ႇပဵၼ်တၢင်းၵၢၼ်လႄႈ ထုၵ်ႇၺႃးၺွပ်းၼၼ်ႉ ၵမ်ႉၼမ်ယဝ်ႉ။ ဝၢႆးသေ သိုၵ်းမၢၼ်ႈယိုတ်းဢႃႇၼႃႇ တီႈမိူင်းမျၢၼ်ႇမႃႇယဝ်ႉ သုၼ်ႇႁဵတ်းၵၢၼ်ငၢၼ်းၵေႃႈ ဢေႇမႃး၊ ၵၢၼ်မိူင်းဢမ်ႇၼိမ်သဝ်း၊ လွင်ႈဢိုပ်းယၢၵ်ႈၵေႃႈ ၶႅၼ်းတိူဝ်းႁၢႆႉမႃးၼၼ်ႉယဝ်ႉ။ ပိူင်လူင်မၼ်းတႄႉ ၵူၼ်းၼုမ်ႇၶဝ် ဢမ်ႇဝူၼ်ႉလႆႈ တႃႇမိူဝ်းၼႃႈၼၼ်ႉယဝ်ႉ။ ၵူၼ်းၼုမ်ႇၸိူဝ်းၼၼ်ႉ ဢွၼ်ၵၼ်ၶဝ်ႈမႃးၸွမ်း သဵၼ်ႈတၢင်းဢမ်ႇပဵၼ်တၢင်းၵၢၼ် ၶဝ်ႈမႃးၸူး တီႈ ၼႂ်းမိူင်းထႆး ဢၼ်ၸမ်သုတ်း မိူၼ်ၼင်ႇ ယၢမ်းလဵဝ်ၼႆႉယဝ်ႉ။ မိူဝ်ႈၵူႈပွၵ်ႈၵေႃႈ ယၢမ်ႈပဵၼ်မႃးယူႇ လၢႆပွၵ်ႈလၢႆၵမ်းယဝ်ႉၼင်ႇၵဝ်ႇ။ ထုၵ်ႇၺႃးၺွပ်း ပဵၼ်မူႇပဵၼ်ၽုင်။ ၺွပ်းၺႃး တီႈၼႂ်းလူတ်ႉလူင်။ ၺွပ်းၺႃး ၼႂ်းထိူၼ်ႇ၊ ၺွပ်းၺႃးၼႂ်း သူၼ်တူၼ်ႈယၢင်။ ၽွင်းမိူဝ်ႈလတ်းၶၢမ်ႈ လႅၼ်လိၼ်ယဝ်ႉ ၺွပ်းၺႃးပဵၼ်မူႇပဵၼ်ၽုင် ၽွင်းမိူဝ်ႈ တိုၵ်ႉၶိုၼ်ႈၼိူဝ်လူတ်ႉ။ ၼိူဝ်လူတ်ႉၵေႃႈ ၺွပ်းၺႃး 20၊ 30၊ 50 ၵေႃႉ။ ၵႃႈမီးၵႃႈယဵတ်ႈသေတၢင်ႇသတ်ႉၼႃႇလႄႈ ၸင်ႇၺွပ်းၺႃး။ ၽွင်းမိူဝ်ႈပႂ်ႉလူတ်ႉ တီႈၼႂ်းထိူၼ်ႇသေ ၺွပ်းၺႃး မွၵ်ႈ ၵူၼ်း 100 ပၢ၊ ၺွပ်းၺႃး ၵူၼ်း 50 ပၢႆ၊ လွၵ်းလၢႆး ၺွပ်းၺႃး မၼ်းၸေးၼႃႇ၊ လွင်ႈၺွပ်းၺႃးၵေႃႈ ပဵၼ်မႃးတိၵ်းတိုၵ်း။ တိူဝ်းႁၢႆႉၸႃႉသေ ၵူႈပွၵ်ႈယဝ်ႉ။"

ၵူၼ်းၼုမ်ႇတီႈ မျၢၼ်ႇမႃႇၼႆႉ ယၢမ်းလဵဝ်ၼႆ ဝၢႆးသေ ပၵ်းပိူင်ႁၢပ်ႇၵၢၼ်သိုၵ်းဢွၵ်ႇယဝ်ႉ ထုၵ်ႇတဵၵ်ၵဵပ်း တႃႇႁဵတ်းသိုၵ်းလႄႈ ၸင်ႇလႆႈဢွၼ်ၵၼ် ပၢႆႈဢွၵ်ႇၼွၵ်ႈမိူင်းသေ လႆႈၵၢၼ်သင်ၵေႃႈ တေဢၢၼ်းႁဵတ်းၼႆသေ ၸိူဝ်းပဵၼ်ၵူၼ်းၼုမ်ႇၶဝ်ၼႆႉ လိၵ်ႈၵေႃး ဢမ်ႇၸၢင်ႈသိုပ်ႇသွၼ်လႄႈ လႆႈဝႃႈ မိူဝ်ႈၼႃႈၶဝ်ၼႆႉ ပဵၼ်ဢၼ်ဢမ်ႇႁၼ်သဵၼ်ႈတၢင်းသင်ဝႆႉၼၼ်ႉယဝ်ႉ။

ၵူၼ်းၼုမ်ႇတီႈမျၢၼ်ႇမႃႇၸိူဝ်း ဢၼ်လုၵ်ႉၶဝ်ႈမႃးၼႂ်းမိူင်းထႆးၼႆႉ ယွၼ်ႉပိူဝ်ႈၸၢတ်ႈပၢၼ်မိူဝ်းၼႃႈၶဝ် ဢမ်ႇၼႄႉၼွၼ်းသင်လႄႈ တွၼ်ႈတႃႇႁဵတ်းၵၢၼ် ၸိူဝ်းဢၼ်ၵူၼ်းထႆးၶဝ် ဢမ်ႇၶႂ်ႈႁဵတ်းၼၼ်ႉၼႆသေ ၸင်ႇလႆႈၽိုတ်ႉၵၼ် ၶဝ်ႈမႃးၼင်ႇၼႆယဝ်ႉ။ တဵၵ်းပၼ်ငိုၼ်းသေ ၶဝ်ႈမႃးယဝ်ႉ။ မၢင်ၸိူဝ်းၼႆႉ ထုၵ်ႇၺႃးလႅၼ်၊ ၸိူဝ်းထုၵ်ႇၺႃးလႅၼ်ၼႆႉ ၼမ်လိူဝ်သေ ၸိူဝ်းဢၼ်ႁွတ်ႈၵႂႃႇၼၼ်ႉယဝ်ႉ။ ၸၢတ်ႈပၢၼ်မိူဝ်းၼႃႈ ၵူၼ်းၼုမ်ႇၸိူဝ်းၼႆႉ လႆႈဝႃႈ ႁၢႆႉၸႃႉမႃးယူႇတိၵ်းတိၵ်းယဝ်ႉ။“

တီႈ ၽင်ႇၽၢႆႇပုၼ်ႉ ဝဵင်းမျႃႉဝတီႇ၊ ၸႄႈမိူင်းယၢင်း တီႈ လႅၼ်လိၼ်ထႆး-မၢၼ်ႈ တီႈၼႂ်း ၸႄႈတွၼ်ႈတၢၵ်ႇ၊ တီႈၸႄႈဝဵင်းၽုတ်ၽရ ၼၼ်ႉၵေႃႈ မိူဝ်ႈလိူၼ်မၢတ်ႉၶ်ျ ဝၼ်းထိ 19 ၼၼ်ႉ ႁူင်းပလိၵ်ႈ ၽုတ်ၽရ ၶဝ်ပိုၼ်ၶၢဝ်ႇဝႆႉဝႃႈ တိၺွပ်းၺႃး ၵူၼ်းမျၢၼ်ႇမႃႇ 40 ဢၼ်မႃးၸွမ်းလူတ်ႉသၢမ်လမ် ဢၼ်မႃးဢမ်ႇပဵၼ်တၢင်းၵၢၼ်ၼၼ်ႉ ဝႃႈၼႆ။ ၽူႈတူင်ႉၼိုင်ၽၢႆႇႁႅင်းၵၢၼ်လၢတ်ႈဝႃႈ ယၢမ်းလဵဝ်ၼႆႉ တီႈလႅၼ်လိၼ် ထႆး-မၢၼ်ႈၼၼ်ႉ ၼႂ်းၵႃႈဝူင်ႈလဵဝ်ၵူၺ်း ၵူၼ်းဢၼ်ထုၵ်ႇၺႃးၺွပ်းၼႆႉ မီးယူႇ ဢမ်ႇယွမ်း 500 ဝႃႈၼႆယဝ်ႉ။

ငိူၼ်ႈငဝ်ႈတိုၼ်း

• VOA News. "ထိုင်းနိုင်ငံ ကန်ချနဘူရီမှာ အထောက်အထားမဲ့မြန်မာ ၁၀၀ ကျော် ဖမ်းဆီးခံရ" — VOA News, March 21, 2024
• Global New Light of Myanmar. "Arrests of undocumented Myanmar migrant workers intensify in Thailand" — New Light of Myanmar, March 19, 2024