Jump to content

ၵူၼ်းမိူင်းထႆး တၢႆ 4 ၵေႃႉ တီႈႁိမ်းလႅၼ်လိၼ် ဢိတ်ႇသရေး-လႄႇပႃႇၼွၼ်ႇ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းသုၵ်း၊ ၼူဝ်ႇဝႅမ်ႇပႃႇ 1၊ 2024

ၵူၼ်းသိုၵ်းဢိတ်ႇသရေး ၽိုၵ်းၵၢၼ်သိုၵ်းတီႈ လႅၼ်လိၼ် ဢိတ်ႇသရေး-လႄႇပႃႇၼွၼ်ႇ (ၶႅပ်းႁၢင်ႈၵဝ်ႇ)

ၽွင်းလူင် ၵၢၼ်ၼွၵ်ႈမိူင်း မိူင်းထႆး မႃႇရိတ်ႉသၢင်ႇၵျီႇယမ်ႇပွင်ႇသႃႇ ပိုၼ်ၽၢဝ်ႇ ၼိူဝ်ၼႅင်ႈသိုဝ်ႇတူင်ႇဝူင်းၵူၼ်း X မိူဝ်ႈဝၼ်းသုၵ်းၼၼ်ႉဝႃႈ ၵူၼ်းႁဵတ်းၵၢၼ်ၽုၵ်ႇသွမ်ႈ မိူင်းထႆး လႆႈတၢႆၵႂႃႇ 4 ၵေႃႉ လႄႈ လႆႈမၢတ်ႇၸဵပ်း 1 ၵေႃႉ တီႈႁိမ်း လႅၼ်လိၼ်လႄႇပႃႇၼွၼ်ႇ တီႈပွတ်းႁွင်ႇသုတ်း ဢိတ်ႇသရေးၼၼ်ႉၼႆယဝ်ႉ။

ၼႂ်းလိၵ်ႈပိုၼ်ၽၢဝ်ႇၼၼ်ႉ မႃႇရိတ်ႉ တႅမ်ႈဝႆႉဝႃႈ “မိူဝ်ႈၶမ်ႈဝႃး ၶႃႈသင်ႇႁႂ်ႈလုမ်းတၢင်ႁဝ်းၶႃႈ တီႈဝဵင်းတႄႇလ်ဢႃႇဝီႇ ၵႂႃႇၸွႆႈထႅမ်ပၼ် ၵူၼ်းၸိူဝ်းလႆႈမၢတ်ႇၸဵပ်း လႄႈ ၵူၼ်းႁိူၼ်းၵူၼ်းယေး ၸိူဝ်းလႆႈတၢႆၵႂႃႇၼၼ်ႉသေ လႆႈမွင်ၸႂ်ၸွမ်း လွင်ႈလူႉသုမ်း ဢၼ်ဢမ်ႇမီးတီႈသုတ်းၼၼ်ႉ ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽွင်းလူင်ၽၢႆႇႁႅင်းၵၢၼ် ၽိပတ်ႉရတ်ႉၶျၵိတ်ႉပရႃႇၵႃႇရၼ်ႇ လၢတ်ႈဝႃႈ မၼ်းၸီႉသင်ႇ ၽူႈၼမ်းၼႂ်းၸူဝ်ႈၶၢဝ်း ၽၢႆႇႁႅင်းၵၢၼ် ပူဝ်ႇသူင်ႇထပ်ႉၶျၢႆႇယုတ်ႉ ႁႂ်ႈၵပ်းသိုပ်ႇ ၽူႈၵွၼ်းႁႅင်းၵၢၼ် တီႈဝဵင်းတႄႇလ်ဢႃႇဝီႇ ႁႂ်ႈငၢႆႈလူမ်ၸႂ် တႃႇတေဢဝ်ႁႅင်းၵၢၼ်ထႆး ဢၼ်လုၵ်ႉတီႈ မိူင်းဢိတ်ႇသရေး ပွတ်းႁွင်ႇ ၶၢႆႉၵႂႃႇယူႇ တီႈဢၼ်လွတ်ႈၽေး တီႈ ၼႃႈလိၼ် ပွတ်းၸၢၼ်းၼၼ်ႉ ဝႃႈၼႆ။

ၶုၼ်ၽိၽတ်ႉ လၢတ်ႈဝႃႈ မၼ်းယင်းသင်ႇႁႂ်ႈၽူႈမီးပုၼ်ႈၽွၼ်း ၽၢႆႇႁႅင်းၵၢၼ်ၶဝ် ၵႂႃႇလႄႇ ၵူၼ်းႁိူၼ်းၵူၼ်းယေး ၸိူဝ်းလႆႈတိူဝ်ႉၸႂ်ၼၼ်ႉသေ ၸွႆႈထႅမ်ပၼ် လႄႈ သၢႆႈတႅၼ်းပၼ် ၼႆယဝ်ႉ။

ၸွမ်းၼင်ႇၶၢဝ်ႇငၢဝ်းဢွၵ်ႇမႃးၼၼ်ႉ မၢၵ်ႇလူင် 2 လုၵ်ႈ တူၵ်းသႂ်ႇတီႈၵၢင်ပၢင်ႇ ႁိမ်းဝဵင်းမေႇတူႇလႃႇသေ ၵူၼ်းတၢႆ 7 ၵေႃႉ ၼႆယဝ်ႉ။ ၼႂ်းၵူၼ်းၸိူဝ်းဢၼ်လႆႈလူႉတၢႆၼၼ်ႉ ပႃးၸဝ်ႈႁႆႈၸဝ်ႈၼႃး မိူင်းဢိတ်ႇသရေး 1 ၵေႃႉ လႄႈ ႁႅင်းၵၢၼ်ထႆး 4 ၵေႃႉ ဝႃႈၼႆ။

မိူဝ်ႈလိူၼ်ပူၼ်ႉမႃးၼၼ်ႉ ႁႅင်းၵၢၼ်ထႆးၵေႃႉ႞ လႆႈႁၼ်တၢႆဝႆႉသေ ၵေႃႉ႞သမ်ႉ လႆႈတိူဝ်ႉမၢတ်ႇၸဵပ်းႁၢဝ်ႈႁႅင်း ယွၼ်ႉမၢၵ်ႇလူင် ဢၼ်တေႃႇသူႈ ၵႃးတႅင်ႉ တီႈႁူင်းၽုၵ်ႇသွမ်ႈ ၵိပ်ႉပတ်ႉ ယီႇရူၼ်ႇ တီႈမိူင်းဢိတ်ႇသရေး ပွတ်းႁွင်ႇၼၼ်ႉယဝ်ႉ။

ၸဝ်ႈၼႃႈတီႈ ဢိတ်ႇသရေးၶဝ် လၢတ်ႈဝႃႈ မိူဝ်ႈပီၵၢႆၼၼ်ႉ ၵူၼ်းထႆး 41 ၵေႃႉ ၶဝ်ႈပႃးၼႂ်း ၵူၼ်းတၢႆ 1,200 ၵေႃႉ ယွၼ်ႉ ၸုမ်းႁမၢသ်ႉၶဝ် ပိုတ်ႇၼႃႈသိုၵ်း လတ်းၽၢၼ်ႇ လႅၼ်လိၼ် ဢိတ်ႇသရေး ၼႆယဝ်ႉ။

မိူဝ်ႈဝၼ်းတီႈ 7/10/2023 ၼၼ်ႉ ၵူၼ်းမိူင်းထႆး 30 ၵေႃႉ လႆႈထုၵ်ႇတိၺွပ်းဢဝ်ၵႂႃႇသေ 6 ၵေႃႉတႄႉ တိုၵ်ႉထုၵ်ႇၺွပ်းဝႆႉယူႇ ၸဝ်ႈၼႃႈတီႈထႆး လၢတ်ႈၼႄၼင်ႇၼႆ။

ဝၢႆးၼၼ်ႉ လွင်ႈဢၼ် ဢိတ်ႇသရေး တုမ်ႉတွပ်ႇ လွင်ႈၼႆႉ ႁဵတ်းႁႂ်ႈ ၼႃႈလိၼ် ၵႃႇၸႃႇ ပႃးလႅတ်ႈသတၢႆး လူႉလႅဝ်ၵႂႃႇသေ ၵူၼ်းတၢႆ ၼပ်ႉႁူဝ်ႁဵင် ၼႆယဝ်ႉ။ ၸုမ်းဢိတ်ႇသရေးၶဝ်ၵေႃႈ ပိုတ်ႇၼႃႈသိုၵ်းတိုၵ်းတေႃး ၸုမ်းႁႅꩡ်ႉပူဝ်းလႃႇ ဢၼ်ဢီႇရၢၼ်းၶဝ် ၵမ်ႉထႅမ်ဝႆႉ တီႈမိူင်းလႄႇပႃႇၼွၼ်ႇၼၼ်ႉယူႇ။

မိူဝ်ႈပႆႇပဵၼ်ပၢင်တိုၵ်းၼၼ်ႉ ၵူၼ်းမိူင်းထႆး 30,000 ပၢႆ ႁဵတ်းၵၢၼ်တီႈမိူင်းဢိတ်ႇသရေးသေ ၵမ်ႈၼမ်ႁဵတ်းၵၢၼ်ၽုၵ်ႇသွမ်ႈ ပဵၼ်ၸုမ်းႁႅင်းၵၢၼ်ယၢၼ်မိူင်း ဢၼ်ယႂ်ႇလိူဝ်ပိူၼ်ႈ ၼႂ်းမိူင်းဢိတ်ႇသရေး ဢၼ်ၼိုင်ႈ။


ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၵူၼ်းမိူင်းထႆး_တၢႆ_4_ၵေႃႉ_တီႈႁိမ်းလႅၼ်လိၼ်_ဢိတ်ႇသရေး-လႄႇပႃႇၼွၼ်ႇ&oldid=9889"