Jump to content

ဢိတ်ႇသရေး ယိုဝ်းသႂ်ႇ တီႈယိူင်း ၵၢၼ်သိုၵ်း ဢီႇရၢၼ်း လႆႈၵူဝ်ပၢင်တိုၵ်း ၵႂၢင်ႈၶႂၢင်လိူဝ်ၵဝ်ႇ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းသဝ်၊ ဢွၵ်ႇထူဝ်ႇပႃႇ 26၊ 2024

ဝိဝ်းၵၢင်ၶမ်ႈ တီႈ ဝဵင်း Tehran (ၶႅပ်းႁၢင်ႈၵဝ်ႇ)

ဢိတ်ႇသရေး လၢတ်ႈဝႃႈ မိူဝ်ႈဝၼ်းဢႃးတိတ်ႉ ၸဝ်ႉၸဝ်ႉၼၼ်ႉ ၶဝ်ယိုဝ်းသႂ်ႇ ဢွင်ႈတီႈသိုၵ်း တီႈမိူင်းဢီႇရၢၼ်း တႃႇတေတွပ်ႇတႅၼ်း လွင်ႈဢၼ် တီႇႁႃႇရၢၼ်ႇ တိုၵ်းယိုဝ်း ဢိတ်ႇသရေး မိူဝ်ႈႁူဝ်လိူၼ်ၼႆႉသေ ပဵၼ်လွင်ႈတိုၵ်းယိုဝ်း ၵမ်းလိုၼ်းသုတ်း ၼႂ်းပၢင်တိုၵ်း ၼႂ်းၵႄႈ ၸုမ်းၶႄႉၶဵင်ႇ ဢၼ်ယိပ်းၵွင်ႈၵၢင်ႇ ႁၢဝ်ႈႁႅင်းၼၼ်ႉ ၼႆယဝ်ႉ။

သိုဝ်ႇၶၢဝ်ႇ ဢီႇရၢၼ်ႇၶဝ် ပိုၼ်ၽၢဝ်ႇဝႃႈ ၼႂ်းၶၢဝ်းတၢင်းလၢႆၸူဝ်ႈမူင်း တီႈဝဵင်းလူင် လႄႈ တီႈတပ်ႉပၢင်သဝ်း ဢၼ်မီးႁိမ်းႁွမ်းၼၼ်ႉ မီးလွင်ႈမၢၵ်ႇတႅၵ်ႇလၢႆလၢႆပွၵ်ႈသေတႃႉ ဢမ်ႇလႆႈႁူႉၸွမ်း လွင်ႈလူႉသုမ်း ဢမ်ႇၼၼ် လွင်ႈလူႉတၢႆ ၼႆယဝ်ႉ။

မိူဝ်ႈပႆႇထိုင် ၵၢင်ၼႂ်ၼၼ်ႉ ႁူင်းပွႆႇသဵင် ၵူၼ်းမိူင်း ဢိတ်ႇသရေး လၢတ်ႈဝႃႈ လႆႈယိုဝ်း သၢမ်ႁွၼ်ယဝ်ႉလႄႈ ၵၢၼ်ၽဵဝ်ႈမူၺ်ႉ ယဝ်ႉတူဝ်ႈၵႂႃႇယဝ်ႉ ၼႆယဝ်ႉ။

မိူင်းဝၼ်းဢွၵ်ႇတွၼ်ႈၵၢင်ၶဝ် လႆႈပႂ်ႉတူၺ်း လွင်ႈဢၼ် ဢိတ်ႇသရေး တေတွပ်ႇတႅၼ်း ယွၼ်ႉ ဢီႇရၢၼ်း ယိုဝ်းမၢၵ်ႇၼူၾႆး မိူဝ်ႈဢွၵ်ႇထူဝ်ႇပႃႇ 1 ဝၼ်းၼၼ်ႉသေ ယွၼ်ႉလွင်ႈယိုဝ်းမၢၵ်ႇၼူၾႆး 200 လုၵ်ႈပၢႆ တီႈၽင်ႇပၢင်ႇလၢႆႇ ပွတ်းတူၵ်းၼၼ်ႉလႄႈ ၵူၼ်း လႆႈတၢႆၵႂႃႇ ၵေႃႉၼိုင်ႈ ၼႆယဝ်ႉ။

လွင်ႈၶဵင်ႈၶႅင် ၼႂ်းၵႄႈ ၸုမ်းဢိတ်ႇသရေး လႄႈ ဢီႇရၢၼ်း ဢၼ်ပဵၼ် ၽူႈၶဵၼ်လူင်ၼၼ်ႉ ယႂ်ႇမႃး ဝၢႆးသေ ၸုမ်းႁမၢသ်ႉ ဢၼ်ဢီႇရၢၼ်ႇ ၵမ်ႉထႅမ်သေ ပၵ်းတီႈ ၵႃႇၸႃႇၼၼ်ႉ ၶဝ်ႈတိုၵ်း ဢိတ်ႉၸရေး မိူဝ်ႈဝၼ်းတီႈ 7/10/2023 ၼၼ်ႉသေ ၸုမ်းႁမၢသ်ႉ လႆႈႁပ်ႉတၢင်းၸွႆႈထႅမ် တီႈၸုမ်းႁႅꩡ်ႉပူဝ်းလႃႇ ဢၼ်ပၵ်းတီႈ မိူင်းလႄႇပႃႇၼွၼ်ႇ ဢၼ်ဢီႇရၢၼ်းၵေႃႉ ၵမ်ႉထႅမ်ၼၼ်ႉယဝ်ႉ။

လႆႈၵူဝ် ဢီႇရၢၼ်းလႄႈ ဢမႄႇရိၵၢၼ်ႇ တေၶဝ်ႈပႃးၼႂ်းပၢင်တိုၵ်း ၼႂ်းပိုၼ်ႉတီႈၼၼ်ႉ ယွၼ်ႉ ဢိတ်ႇသရေး တိုၵ်းယိုဝ်း ၸုမ်းႁႅꩡ်ႉပူဝ်းလႃႇ ႁၢဝ်ႈႁႅင်းမႃး ၸဵမ်မိူဝ်ႈလိူၼ်ပူၼ်ႉမႃးၼၼ်ႉသေ ပႃးၸဵမ် လွင်ႈယိုဝ်းၵွင်ႈၵၢင်ႇ တီႈဝဵင်းလူင် ပႄႇရူတ်ႉ လႄႈ လွင်ႈတူင်ႉၼိုင် ၼိူဝ်လိၼ် ဢိၵ်ႇပႃး ပၢင်တိုၵ်း ဢၼ်ပဵၼ်မႃး ၶၢဝ်းတၢင်း ပီ႞ တီႈၵႃႇၸႃႇၼၼ်ႉယဝ်ႉ။

ၽၢႆႇသိုၵ်းဢိတ်ႇသရေး ဢွၵ်ႇၶေႃႈပိုၼ်ၽၢဝ်ႇဝႃႈ “ယွၼ်ႉပိူဝ်ႈ လူင်ပွင်ၸိုင်ႈ တီႈမိူင်းဢီႇရၢၼ်း ဢမ်ႇထၢတ်ႇဢမ်ႇဝၢႆး တိုၵ်းတေႃး ၸိုင်ႈမိူင်းဢိတ်ႇသရေး မႃးလၢႆလိူၼ်လႄႈ ယၢမ်းလဵဝ် တပ်ႉၵႅတ်ႇၵင်ႈ ဢိတ်ႇသရေးၶဝ် တိုၵ်ႉယိုဝ်းသႂ်ႇ တီႈယိူင်းဢၢၼ်းသိုၵ်း တီႈမိူင်းဢီႇရၢၼ်း တႅတ်ႈတေႃးယူႇ” ၼႆယဝ်ႉ။

ဝၢႆးၼၼ်ႉ ၽၢႆႇသိုၵ်းၶဝ် လၢတ်ႈဝႃႈ ၶဝ်ႁဵတ်းသၢင်ႈ ၵၢၼ်တိုၵ်းတေႃး ဢၼ်ယိူင်းဢၢၼ်းဝႆႉ တီႈယိူင်းမၢႆ ၽၢႆႇသိုၵ်း တီႈမိူင်းဢီႇရၢၼ်းၼၼ်ႉ ယဝ်ႉတူဝ်ႈၵႂႃႇၼႆသေ ႁိူဝ်းမိၼ်ၶဝ် လႆႈပွၵ်ႈမိူဝ်းႁိူၼ်း လွတ်ႈၽေးလီငၢမ်းယဝ်ႉ ၼႆယဝ်ႉ။

ဢိတ်ႇသရေး မီးသုၼ်ႇလႄႈ ပုၼ်ႈၽွၼ်း တႃႇတေတုမ်ႉတွပ်ႇ လွင်ႈဢၼ် တီႇႁႃႇရၢၼ်ႇ လႄႈ ၽူႈတၢင်တူဝ်ၶဝ် တိုၵ်းတေႃး ဢၼ်ပႃး လွင်ႈယိုဝ်းမၢၵ်ႇၼူၾႆး ဢၼ်လုၵ်ႉတီႈ လိၼ်မိူင်းဢီႇရၢၼ်း ယိုဝ်းမႃးၼၼ်ႉ ၼႆယဝ်ႉ။

ၽူႈမီးပုၼ်ႈၽွၼ်း ဢမႄႇရိၵၢၼ်ႇ ၵေႃႉ႞ လၢတ်ႈဝႃႈ ဢၼ်ယိူင်းဢၢၼ်းဝႆႉၼၼ်ႉ ဢမ်ႇပႃး ယူင်ႉသၢင်ႈ ႁႅင်းၾႆးၾႃႉ ဢမ်ႇၼၼ် ၵၢၼ်ႁဵတ်းဢွၵ်ႇ ၼိဝ်ႇၵလီးယႃး ၼႆယဝ်ႉ။

ၸွမ်ပွင်ၸိုင်ႈ ဢမႄႇရိၵၢၼ်ႇ ၵျူဝ်းပၢႆႇတႅၼ်ႇ ပၼ်ၾၢင်ႉဝႃႈ ဝႃႇသျိၼ်ႇတၢၼ်ႇ ဢၼ်ပဵၼ် ၽူႈၵမ်ႉထႅမ် လႄႈ ၽူႈပၼ်ၵွင်ႈၵၢင်ႇ ပိူင်လူင် ဢိတ်ႇသရေးၼၼ်ႉ တေဢမ်ႇၵမ်ႉထႅမ်ႁၼ်ထိုင်ၸွမ်း တႃႇတေ ယိုဝ်းသႂ်ႇ ဢွင်ႈတီႈ ၼိဝ်ႇၵလီးယႃး တီႇႁႃႇရၢၼ်ႇၼၼ်ႉသေ လၢတ်ႈဝႃႈ ဢိတ်ႇသရေး ထုၵ်ႇလီဝူၼ်ႉ တၢင်ႇလၢႆး တႃႇတေ တိုၵ်းတေႃး ဢွင်ႈတီႈ ၼမ်ႉမၼ်းမဵၼ် ဢီႇရၢၼ်းၼၼ်ႉ ၼႆယဝ်ႉ။

ၽူႈမီးပုၼ်ႈၽွၼ်း ဢီႇရၢၼ်းၶဝ် ၵမ်းၵမ်း ပၼ်ၾၢင်ႉ ဢိတ်ႇသရေးၶဝ် ဝႃႈ ယႃႇပေႁဵတ်းလွင်ႈႁၢႆႉၸႃႉသင် ၼႆယဝ်ႉ။

ၶၢဝ်ႇ Tasnim ဢၼ်ပဵၼ်တၢင်းၵၢၼ် ၶိုင်ႈၼိုင်ႈၼၼ်ႉ လၢတ်ႈဝႃႈ “ဢီႇရၢၼ်း မီးသုၼ်ႇတုမ်ႉတွပ်ႇ လွင်ႈပူၼ်ႉပႅၼ် ဢၼ်လႂ်သေဢမ်ႇဝႃႈသေ တ​ေဢမ်ႇမီးလွင်ႈထၢင်ႇထိူမ်သင်ဝႃႈ ဢိတ်ႇသရေး တေလႆႈႁူပ်ႉထူပ်း လွင်ႈတုမ်ႉတွပ်ႇ ဢၼ်ထုၵ်ႇမႅၼ်ႈၸွမ်း လွင်ႈႁဵတ်းသၢင်ႈ ဢၼ်လႂ်သေဢမ်ႇဝႃႈ” ၼႆယဝ်ႉ။


ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ဢိတ်ႇသရေး_ယိုဝ်းသႂ်ႇ_တီႈယိူင်း_ၵၢၼ်သိုၵ်း_ဢီႇရၢၼ်း_လႆႈၵူဝ်ပၢင်တိုၵ်း_ၵႂၢင်ႈၶႂၢင်လိူဝ်ၵဝ်ႇ&oldid=9819"