ဢိတ်ႇသရေး ပၼ်ၶေႃႈမၼ်ႈၵႅၼ်ႇဝႃႈ တေဢမ်ႇယိုဝ်း ၼိဝ်ႇၵလီးယႃး လႄႈ ၼမ်ႉမၼ်းမဵၼ် ဢီႇရၢၼ်း
ဝၼ်းၽတ်း၊ ဢွၵ်ႇထူဝ်ႇပႃႇ 17၊ 2024
ၽူႈမီးပုၼ်ႈၽွၼ်း ဢမႄႇရိၵၢၼ်ႇ သွင်ၵေႃႉ လၢတ်ႈဝႃႈ လူင်ပွင်ၸိုင်ႈ ပၢႆႇတႅၼ်ႇ ယုမ်ႇယမ်ဝႃႈ လႆႈၶေႃႈမၼ်ႈၵႅၼ်ႇ တီႈဢိတ်ႇသရေး ဢၼ်ဝႃႈ တေဢမ်ႇယိုဝ်း ဢွင်ႈတီႈ ၼိဝ်ႇၵလီးယႃး ဢမ်ႇၼၼ် ဢွင်ႈတီႈ ၼမ်ႉမၼ်းမဵၼ် ဢီႇရၢၼ်း ယွၼ်ႉဝႃႈ ၶဝ်ၶႂ်ႈယိုဝ်းၶိုၼ်း ဝၢႆးသေ ဢီႇရၢၼ်း ယိုဝ်းမၢၵ်ႇၼူၾႆး မိူဝ်ႈၸဝ်ႉလိူၼ်ၼႆႉ ၼႆယဝ်ႉ။
ၽၢႆႇဢုပ်ႉပိူင်ႇၶဝ် ယုမ်ႇယမ်ဝႃႈ လွင်ႈသူင်ႇ ပႅတ်ႉထရီႇ ၽၢႆႇၵႅတ်ႇၶႄ တီႈသုင်သုတ်း တီႈႁူင်းႁိူဝ်းမိၼ် ဢမႄႇရိၵၢၼ်ႇ ၵႂႃႇတီႈ ဢိတ်ႇသရေး လႄႈ ၵူၼ်းသိုၵ်း မွၵ်ႈ 100 ၵေႃႉ တႃႇတေႁဵတ်းၵၢၼ်ၼၼ်ႉ ႁဵတ်းႁႂ်ႈ လွင်ႈမႆႈၸႂ် ဢိတ်ႇသရေး ဢၼ်တေၸၢင်ႈ တွပ်ႇတႅၼ်း ဢီႇရၢၼ်း လႄႈ လွင်ႈႁူမ်ႇလူမ်ႈ ၵူႈလွင်ႈလွင်ႈၼၼ်ႉ ယွမ်းလူင်းၵႂႃႇ ၼႆယဝ်ႉ။
ဝၢႆးသေ ဢီႇရၢၼ်း ယိုဝ်းမၢၵ်ႇၼူၾႆး သႂ်ႇ ဢိတ်ႇသရေး မိူဝ်ႈလိူၼ်ဢေႇပရႄႇ လႄႈ ဢွၵ်ႇထူဝ်ႇပႃႇၼၼ်ႉယဝ်ႉ ၽၢႆႇပႅၼ်ႇတၵူၼ်ႇ ပိုၼ်ၽၢဝ်ႇဝႃႈ လႆႈဢၼုၺၢတ်ႈ ၸွမ်းၼင်ႇ ၸွမ်ပွင်ၸိုင်ႈ ၵျူဝ်းပၢႆႇတႅၼ်ႇ ၸီႉသင်ႇၼၼ်ႉၼႆယဝ်ႉ။
ၵူၺ်းၵႃႈ ၽူႈမီးပုၼ်ႈၽွၼ်း ဢမႄႇရိၵၢၼ်ႇ ဢၼ်ဢမ်ႇၶႂ်ႈဢွၵ်ႇၸိုဝ်ႈ တႃႇဢုပ်ႇဢူဝ်း လွင်ႈဢုပ်ႇဢူဝ်း ၵၢၼ်မိူင်းသုၼ်ႇတူဝ်ၼၼ်ႉ ပၼ်ၾၢင်ႉဝႃႈ ၶေႃႈမၼ်ႈၵႅၼ်ႇ ဢိတ်ႇသရေးၼႆႉ ဢမ်ႇၸႂ်ႈ ၶေႃႈမၼ်ႈၵႅၼ်ႇ ၼင်ႇတႅင်ႈလဵၵ်းလႄႈ ငဝ်းလၢႆး ၸၢင်ႈလႅၵ်ႈလၢႆႈၵႂႃႇၼႆယဝ်ႉ။
ၽူႈမီးပုၼ်ႈၽွၼ်းၶဝ် လၢတ်ႈဝႃႈ လွင်ႈဢၼ် ဢိတ်ႇသရေး ႁဵတ်းၸွမ်း ၵႂၢမ်းမၼ်ႈ မိူဝ်ႈပူၼ်ႉမႃးၼၼ်ႉ မၼ်းမီးလွင်ႈ ၶူၼ်းၶဝ်းလေႃးလႄးၵၼ်သေ ၵႆႉၵႆႉ ၼႄပၼ် ၵၢၼ်မိူင်း ၼႂ်းမိူင်း ဢိတ်ႇသရေး ဢၼ်ႁဵတ်းႁႂ်ႈ မီးလွင်ႈပူၼ်ႉပႅၼ် ၼိူဝ် ဢၼ် ဝႃႇသျိၼ်ႇတၢၼ်ႇ မုင်ႈမွင်းဝႆႉၼၼ်ႉၼႆယဝ်ႉ။
မိူဝ်ႈဝူင်ႈပူၼ်ႉမႃးၼၼ်ႉ ၸွမ်ပွင်ၸိုင်ႈ ပၢႆႇတႅၼ်ႇ လႄႈ ၸွမ်ၽွင်းလူင် ဢိတ်ႉၸရေး ၼႄႇတၢၼ်ႇယႃႇႁူႉ လႆႈလၢတ်ႈၵႂၢမ်းတေႃႇၵၼ် လူၺ်ႈၾူၼ်း ပဵၼ်ပွၵ်ႈဢွၼ်တၢင်းသုတ်း ၼႂ်းၶၢဝ်းတၢင်း 7 ဝူင်ႈၼႆႉယဝ်ႉ။ ၵူၺ်းၵႃႈ ၽွင်းလူင်ၽၢႆႇၵႅတ်ႇၵင်ႈ ဢမႄႇရိၵၢၼ်ႇ လွႆႉဢေႃးသတိၼ်ႇ လႄႈ ၽွင်းလူင်ၽၢႆႇၵႅတ်ႇၶႄ ဢိတ်ႉၸရေး ယွပ်ႉၾ် ၵႄႇလႅၼ်ႇ ၶဝ်တႄႉ ၵပ်းသိုပ်ႇၵၼ်ယူႇတႃႇသေႇ။
ဝၢႆးသေ ဢီႇရၢၼ်း ယိုဝ်းမၢၵ်ႇၼူၾႆး 180 လုၵ်ႈ သႂ်ႇ ဢိတ်ႇသရေး မိူဝ်ႈဢွၵ်ႇထူဝ်ႇပႃႇ 1 ဝၼ်းၼၼ်ႉယဝ်ႉ ၸွမ်ပွင်ၸိုင်ႈ ပၢႆႇတႅၼ်ႇ လၢတ်ႈဝႃႈ တေဢမ်ႇယိုဝ်း ၽႅၼ်ၵၢၼ်ၼိဝ်ႇၵလီးယႃး ဢီႇရၢၼ်းၼႆယဝ်ႉ။ ၵူၺ်းၵႃႈ သင်ဝႃႈ တိုၵ်းယိုဝ်း ဢွင်ႈတီႈ မိူၼ်ၼင်ႇ ႁူင်းသိမ်းၼမ်ႉမၼ်း လႄႈ ႁူင်းၸၢၵ်ႈ ႁဵတ်းဢွၵ်ႇ ၼမ်ႉမၼ်းၼႆၸိုင် ၽွင်းပၢင်လိူၵ်ႈတင်ႈ ၸွမ်ပွင်ၸိုင်ႈ ဢမႄႇရိၵၢၼ်ႇၼၼ်ႉ ၶၼ်ၼမ်ႉမၼ်း ၸၢင်ႈၶိုၼ်ႈမႃးယူႇ။
ၶွင်ႇသီႇႁူမ်ႇလူမ်ႈၸိူဝ်ႉၸၢတ်ႈ ႁိူၼ်းၽိူၵ်ႇ ဢမ်ႇယွမ်းႁပ်ႉ တႃႇတေယိုၼ်ယၼ်ဝႃႈ ၼႄႇတၢၼ်ႇယႃႇႁူႇ ပၼ်ၶေႃႈမၼ်ႈၵႅၼ်ႇ တီႈ ပၢႆႇတႅၼ်ႇ ၵဵဝ်ႇၵပ်း လွင်ႈယိူင်းမၢႆ တႃႇယိုဝ်း ၼႆယဝ်ႉ။
ၶွင်ႇသီႇ ၽၢႆႇႁူမ်ႇလူမ်ႈၸိူဝ်ႉၸၢတ်ႈ ႁိူၼ်းၽိူၵ်ႇ ဢွၵ်ႇၶေႃႈပိုၼ်ၽၢဝ်ႇဝႃႈ “ၶေႃႈမၼ်ႈၵႅၼ်ႇ ႁဝ်းၶႃႈ တႃႇၵႅတ်ႇၶႄ ဢိတ်ႇသရေးၼႆႉ ပဵၼ်ၼင်ႇ တႅင်ႈလဵၵ်း” ၼႆယဝ်ႉ။ “ႁဝ်းၶႃႈ တေဢမ်ႇဢုပ်ႇဢူဝ်း လွင်ႈဢုပ်ႇဢူဝ်း ၵၢၼ်မိူင်း သုၼ်ႇတူဝ်သေ တေသူင်ႇသူ ၵႂႃႇၸူး လူင်ပွင်ၸိုင်ႈ ဢိတ်ႇသရေး ႁႂ်ႈလၢတ်ႈၼႄ လွင်ႈဢၼ်ၶဝ် တေၸၢင်ႈႁဵတ်းသၢင်ႈ ၵၢၼ်သိုၵ်း ႁင်းၶဝ်ၼၼ်ႉယူႇ” ၼႆယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Matthew Lee. "Israel assures US it won’t strike Iranian nuclear or oil sites, US officials say" — AP News, October 16, 2024
- Kevin Liptak. "Israel assures US it plans to target Iran’s military, not oil or nuclear sites, source says" — CNN, October 15, 2024
- Nancy A. Youssef and Alexander Ward. "Israel Assures U.S. It Will Not Strike Iran’s Oil and Nuclear Facilities, Officials Say" — The Wall Street Journal, October 14, 2024