ဢိင်ႇသၼ်ႇတီႈတိပႅတ်ႉ ၵူၼ်းတၢႆ ဢမ်ႇယွမ်း 126 ၵေႃႉ
ဝၼ်းပုတ်ႉ၊ ၸၼ်ႇဝႃႇရီႇ 8၊ 2025
မိူဝ်ႈဝၼ်းဢႃးတိတ်ႉၼၼ်ႉ ဢိင်ႇသၼ်ႇႁၢဝ်ႈႁႅင်း တီႈၼႃႈလိၼ်သုင် တီႈမိူင်းၶႄႇပွတ်းတူၵ်း လႄႈ တီႈၼႃႈလိၼ် မိူင်းၼေႇပေႃးသေ ႁိူၼ်းယေး ၼပ်ႉႁူဝ်ပၢၵ်ႇ လူႉၵွႆ လႄႈ သဵၼ်ႈတၢင်း ၵူၼ်ႇပင်း လႄႈ ၵူၼ်းမိူင်းတီႈတိပႅတ်ႉ လႆႈတၢႆၵႂႃႇ ဢမ်ႇယွမ်း 126 ၵေႃႉ ၼႆယဝ်ႉ။ ၵူၼ်းထႅင်ႈတင်းၼမ် တိုၵ်ႉၶမ်ဝႆႉ ဝၢႆးသေ ဢိင်ႇသၼ်ႇၼပ်ႉႁူဝ်သိပ်း ဢၼ်ႁဵတ်းႁႂ်ႈ တီႈၵႆၼၼ်ႉၵေႃႈ ပေႃးတူင်ႉၼိုင်ၵႂႃႇ။
ၵူၼ်းႁဵတ်းၵၢၼ်ၸွႆႈထႅမ်ၶဝ် ၶိုၼ်ႈၵႂႃႇၼိူဝ်ၵွင်ဢုတ်ႇဢၼ်ၵွႆသေ ၵမ်ႈၽွင်ႈၸႂ်ႉၶူဝ်လႆ တီႈဝၢၼ်ႈဢၼ်လူႉၵွႆႁၢဝ်ႈႁႅင်းၼၼ်ႉသေ သွၵ်ႈႁႃၵူၼ်းၸိူဝ်းလွတ်ႈၽေးၼၼ်ႉယူႇ။ ၶႅပ်းႁၢင်ႈ ဢၼ်ႁွင်ႈၵၢၼ်လူင် ၽၢႆႇၸတ်းၵၢၼ် လွင်ႈၶိုၵ်ႉၶၵ်ႉ မိူင်းၶႄႇ ပိုၼ်ၽႄဢွၵ်ႇၼၼ်ႉ ၼႄဝႆႉ ၵူၼ်းႁဵတ်းၵၢၼ်ၽူတ်ႇၸွႆႈ ဢၼ်ယဵပ်ႇၼိူဝ် ၶူဝ်းၶွင် ဢၼ်လူႉလႅဝ်ၵႂႃႇ တီႈႁိူၼ်းယေး ဢၼ်ၵူၼ်ႇပင်းၼၼ်ႉ ဢဝ်ၵူၼ်းသွင်ၵေႃႉ သႂ်ႇၼိူဝ် ၵူႇႁၢမ် ၼႆယဝ်ႉ။
သိုဝ်ႇၶၢဝ်ႇ သျိၼ်းႁႂႃႇ ဢၼ်ပဵၼ်တၢင်းၵၢၼ် ဢွၵ်ႇဝႆႉဝႃႈ ၼႂ်းမိူင်းတိပႅတ်ႉ ၽၢႆႇလႅၼ်လိၼ် မိူင်းၶႄႇ မီးၵူၼ်းမၢတ်ႇၸဵပ်း ဢမ်ႇယွမ်း 188 ၵေႃႉ ဝႃႈၼႆ။
ၼႂ်းပိုၼ်ႉတီႈ ဢၼ်ဢမ်ႇမီးၵူၼ်းယူႇသဝ်း လႄႈ ဢမ်ႇမီးၵူၼ်းယူႇသဝ်းၼၼ်ႉ ႁိူၼ်းယေး 1,000 လိူဝ် လႆႈလူႉၵွႆၵႂႃႇ ၼႆ ႁူင်းပွႆႇသဵင် ၸိုင်ႈမိူင်း CCTV ဢွၵ်ႇၶၢဝ်ႇဝႆႉၼင်ႇၼႆ။ ၼႂ်းၶႅပ်းႁၢင်ႈ ဢၼ်ၽူႈပိုၼ်ၽၢဝ်ႇၶဝ် ပိုၼ်ၽႄဢွၵ်ႇၼၼ်ႉ လႆႈႁၼ် ၶူဝ်းၶွင်ၵေႃႇသၢင်ႈ ဢၼ်လူႉလႅဝ်ၵႂႃႇ မၢၵ်ႇမိူဝ်ဝႆႉ ၼိူဝ်သဵၼ်ႈတၢင်း လႄႈ လူတ်ႉၵႃး ၸိူဝ်းၼႆႉၵေႃႈ ပဵၼ်ဢၼ်လူႉလႅဝ်ၵႂႃႇတင်းၼမ်။
ၵူၼ်းမိူင်းၼေႇပေႃး ပွတ်းႁွင်ႇဝၼ်းဢွၵ်ႇ လႆႈႁပ်ႉႁူႉ လွင်ႈဢိင်ႇသၼ်ႇ ႁၢဝ်ႈႁႅင်းသေတႃႉ ဢမ်ႇမီးၶၢဝ်ႇငၢဝ်း လွင်ႈၵူၼ်းမၢတ်ႇၸဵပ်း ဢမ်ႇၼၼ် လွင်ႈလူႉသုမ်း ၼႆ သုၼ်ၵၢၼ် ၽၢႆႇၶိုၵ်ႉၶၵ်ႉ ၸိူဝ်ႉၸၢတ်ႈ မိူင်းၼေႇပေႃး လၢတ်ႈၼႄၼင်ႇၼႆ။ ႁိမ်းႁွမ်းလွႆဢေႇဝရႅတ်ႉ ဢၼ်မီးၽၢႆႇၸၢၼ်းဝၼ်းတူၵ်း တီႈဢၼ်ပဵၼ် ဢိင်ႇသၼ်ႇၼၼ်ႉ မွၵ်ႈ 75 ၵီႇလူဝ်ႇမီႇတႃႇ (50 လၵ်း) ၼၼ်ႉ ၽွင်းၶၢဝ်းၵတ်း ယွၼ်ႉၵူၼ်းမိူင်းၵမ်ႈၽွင်ႈ ၶၢႆႉၵႂႃႇယူႇ တႃႇတေလွတ်ႈ လွင်ႈၵတ်းၼၼ်ႉယဝ်ႉလႄႈ ဢမ်ႇမီးၵူၼ်းယူႇဝႆႉ ဝႃႈၼႆယဝ်ႉ။
ဢိင်ႇသၼ်ႇၼႆႉ ႁဵတ်းႁႂ်ႈၵူၼ်းမိူင်း တီႈဝဵင်းလူင် Kathmandu မိူင်းၼေႇပေႃး ဢၼ်ယၢၼ်ၵႆ တီႈဢၼ်ပဵၼ် ဢိင်ႇသၼ်ႇ မွၵ်ႈ 230 ၵီႇလူဝ်ႇမီႇတႃႇ (140 လၵ်း) ၼၼ်ႉ လႆးဢွၼ်ၵၼ်တိုၼ်ႇမႃးသေ ႁဵတ်းႁႂ်ႈၶဝ် လႅၼ်ႈဢွၵ်ႇၵႂႃႇ ၼိူဝ်သဵၼ်ႈတၢင်း ဝႃႈၼႆယဝ်ႉ။
ၸုမ်းထတ်းသၢင် ၽၢႆႇလိၼ် မိူင်းဢမႄႇရိၵၢၼ်ႇၶဝ် လၢတ်ႈဝႃႈ ဢိင်ႇသၼ်ႇၼႆႉ ႁႅင်းမၼ်း မီး 7.1 မႅၵ်ႇၼီႇၵျူႉ သေ တၢင်းလိုၵ်ႉမၼ်း မီးမွၵ်ႈ 10 ၵီႇလူဝ်ႇမီႇတႃႇ (6 လၵ်း) ၼႆယဝ်ႉ။ သုၼ်ၵၢင် ၼႅၵ်ႉဝွၵ်ႉ ဢိင်ႇသၼ်ႇ မိူင်းၶႄႇ မၢႆတွင်းဝႆႉဝႃႈ ႁႅင်းဢိင်ႇသၼ်ႇ မီး 6.8 မႅၵ်ႇၼီႇၵျူႉ ၼႆယဝ်ႉ။ ဢိင်ႇသၼ်ႇ တိုၼ်ႈၼၼ်ႉ ၵႆႉႁဵတ်းႁႂ်ႈ လွင်ႈလူႉသုမ်းၼမ်လိူဝ် ဝႃႈၼႆယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Ken Moritsugu. "Tibet earthquake kills at least 126 people and leaves many trapped" — AP News, January 7, 2024
- Nectar Gan, Hassan Tayir, Fred He, Joyce Jiang and Esha Mitra. "Powerful earthquake rocks remote region of Tibet and parts of Nepal, killing more than 120" — CNN, January 8, 2024
- Joe Cash and Gopal Sharma. "Earthquake in Tibet kills more than 120, striking near holy Buddhist city" — Reuters, January 7, 2024
