Jump to content

ဢမႄႇရိၵၢၼ်ႇ ၶဝ်ႈႁူမ်ႈပၢင်ၵုမ်ၽွင်းလူင်ၽၢႆႇၵႅတ်ႇၵင်ႈ ဢႃႇသီႇယၼ်ႇ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းၽတ်း၊ ၼူဝ်ႇဝႅမ်ႇပႃႇ 21၊ 2024

ၽွင်းလူင်ၽၢႆႇၵႅတ်ႇၵင်ႈ ဢမႄႇရိၵၢၼ်ႇ Lloyd Austin

ၽွင်းလူင်ၽၢႆႇၵႅတ်ႇၶႄ မိူင်းဢမႄႇရိၵၢၼ်ႇ လွႆႉဢေႃးသတိၼ်ႇ ၶဝ်ႈႁူမ်ႈပၢင်ၵုမ် ၽွင်းလူင်ၽၢႆႇၵႅတ်ႇၶႄ ဢႃႇသီႇယၼ်ႇ တီႈဝဵင်းၸၼ်ႇ မိူင်းလၢဝ်းသေ ၶဝ်ႈႁူမ်ႈဢုပ်ႇဢူဝ်း ဢမ်ႇပဵၼ်တၢင်းၵၢၼ်။ ၽွင်းလူင် ဢေႃးသတိၼ်ႇ ႁွတ်ႈၽႅဝ် မိူင်းလၢဝ်းၼႆႉ ပဵၼ်ၽွင်း မိူင်းဢေးသျႃး ၸဵင်ႇၸၢၼ်းဝၼ်းဢွၵ်ႇၶဝ် မုင်ႈမွင်းဝႃႈ ဝၢႆးသေ ပၢင်လိူၵ်ႈတင်ႈ ဢမႄႇရိၵၢၼ်ႇယဝ်ႉ ၸွမ်ပွင်ၸိုင်ႈ လႅၵ်ႈလၢႆႈၵႂႃႇသေတႃႉ ၶေႃႈမၼ်ႈၵႅၼ်ႇ ဢမႄႇရိၵၢၼ်ႇ တေႃႇ မိူင်းဢေးသျႃး ၸဵင်ႇၸၢၼ်းဝၼ်းဢွၵ်ႇၼၼ်ႉ တေဢမ်ႇလႅၵ်ႈလၢႆႈ ၼႆယဝ်ႉ။

ၽွင်းလူင်ဢေႃးသတိၼ်ႇ ႁူပ်ႉထူပ်း ၽွင်းလူင်ၽၢႆႇၵႅတ်ႇၵင်ႈ မိူင်းလၢဝ်း လႄႈ ၽွင်းလူင်ၽၢႆႇၵႅတ်ႇၵင်ႈ မိူင်းၼိဝ်းၸီႇလႅၼ်ႇ ႁင်းၽႂ်ႁင်းမၼ်း။

ၶၢဝ်းဢၼ် ၽွင်းလူင်ၽၢႆႇၵႅတ်ႇၵင်ႈ ဢႃႇသီႇယၼ်ႇၶဝ် ႁူပ်ႉထူပ်းၵၼ်ၼႆႉ ပဵၼ် ၽွင်းမိူဝ်ႈ လွင်ႈထဵင်ထွင် ၵဵဝ်ႇၵပ်း သၢႆၼမ်ႉလိုၵ်ႉ ၼႂ်းပၢင်ႇလၢႆႇၶႄႇၸၢၼ်း ပိူင်လူင်မၼ်း ၼႂ်းၵႄႈ ၶႄႇလႄႈ ၸိုင်ႈမိူင်း ၼႂ်းပိုၼ်ႉတီႈၼၼ်ႉ ၼမ်မႃးတိၵ်းတိၵ်းၼၼ်ႉယဝ်ႉ။

လိူဝ်သေ ဢမႄႇရိၵၢၼ်ႇယဝ်ႉ မိူင်းၵျႃႇပၢၼ်ႇ၊ ၵၢဝ်းလီၸၢၼ်း၊ မိူင်းဢိၼ်းတီးယႃး၊ မိူင်းဢေႃႉသထရေးလီးယႃး လႄႈ ၽူႈမီးပုၼ်ႈၽွၼ်း ထၢၼ်ၽွင်းလူင် ၽၢႆႇၵႅတ်ႇၵင်ႈ မိူင်းၶႄႇ ၸိူဝ်းၼႆႉၵေႃႈ ၶဝ်ႈႁူမ်ႈၸွမ်း တီႈပၢင်ၵုမ်ယဝ်ႉ။ မိူဝ်ႈႁူဝ်ဝူင်ႈၼႆႉ ၽွင်းလူင်ၽၢႆႇၵႅတ်ႇၵင်ႈ ဢမႄႇရိၵၢၼ်ႇ ဢေႃးသတိၼ်ႇ ႁူပ်ႉထူပ်း ၽူႈမီးပုၼ်ႈၽွၼ်း ၼႂ်းပိုၼ်ႉတီႈ တီႈမိူင်းဢေႃႉသထရေးလီးယႃး ပႃးၸဵမ် ၽွင်းလူင်ၽၢႆႇၵႅတ်ႇၵင်ႈ ၵျႃႇပၢၼ်ႇသေ ၶိုၼ်းမၵ်းမၼ်ႈဝႃႈ ဢမႄႇရိၵၢၼ်ႇ ၵမ်ႉထႅမ် ဢႃႇသီႇယၼ်ႇ ၼႆယဝ်ႉ။

ဢူးၸေႃႇၼၢႆႇဝိၼ်း ၶုၼ်ၸတ်းၵၢၼ် ႁွင်ႈၵၢၼ်လူင် ၵၢၼ်ၵပ်းသၢၼ် ၵူႈမိူင်းမိူင်း ထၢၼ်ၽွင်းလူင် ၵၢၼ်ၵႅတ်ႇၵင်ႈ ၶွင်ႇသီႇသိုၵ်းမိူင်းမၢၼ်ႈ ၵေႃႈ ၶဝ်ႈႁူမ်ႈပၢင်ၵုမ် ၶုၼ်ၽွင်းလူင် ၵၢၼ်ၵႅတ်ႇၵင်ႈ ဢႃႇသီႇယၼ်ႇ ဢၼ်ၸတ်းႁဵတ်းယူႇ တီႈမိူင်းလႃး ယၢမ်းလဵဝ်ၼႆႉ ၼႆယဝ်ႉ။

ၽူႈဢုပ်ႉပိူင်ႇသိုၵ်းမိူင်းမၢၼ်ႈၶဝ် လႆႈထုၵ်ႇႁၢမ်ႈတၢပ်ႈ ဢမ်ႇပၼ်ၶဝ်ႈႁူမ်ႈပၢင်ၵုမ် ဢႃႇသီႇယၼ်ႇ ၸဵမ်မိူဝ်ႈႁၢင်ပီ 2021 ၼၼ်ႉသေတႃႉ ပီၼႆႉတႄႉ ၽူႈမီးပုၼ်ႈၽွၼ်း ၸၼ်ႉသုင်ၶဝ် တၢင်တူဝ် မိူင်းမၢၼ်ႈမႃး ၶဝ်ႈပႃးၸဵမ်ပၢင်ၵုမ်လူင် မိူဝ်ႈလိူၼ်ဢွၵ်ႇထူဝ်ႇပႃႇၼၼ်ႉယဝ်ႉ။


ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ဢမႄႇရိၵၢၼ်ႇ_ၶဝ်ႈႁူမ်ႈပၢင်ၵုမ်ၽွင်းလူင်ၽၢႆႇၵႅတ်ႇၵင်ႈ_ဢႃႇသီႇယၼ်ႇ&oldid=10039"