ဢမႄႇရိၵၢၼ်ႇ ပၼ်တူတ်ႈတၢမ်ႇ ၸုမ်းၸိူဝ်းႁႃငိုၼ်းၵွင်ၵၢင် တႃႇၸုမ်းႁမၢသ်ႉ
ဝၼ်းဢင်းၵၢၼ်း၊ ဢွၵ်ႇထူဝ်ႇပႃႇ 8၊ 2024
မိူဝ်ႈဝၼ်းၸၼ်ၼၼ်ႉ ဢမႄႇရိၵၢၼ်ႇ လႆႈတမ်းဝၢင်း လွင်ႈႁႄႉႁၢမ်ႈၼိူဝ် ၸုမ်းၵွင်ႉသၢၼ်ဢၼ်ၵဵပ်းငိုၼ်းၵွင်ၵၢင်ႁမၢသ်ႉ ၸၼ်ႉလုမ်ႈၾႃႉသေ ၼႄးဝႃႈ ပဵၼ်တႃႇ ၸုမ်းယိပ်းၵွင်ႈၵၢင်ႇ ပႃးလႅတ်ႈသတၢႆး ဢၼ်ႁဵတ်းသၢင်ႈ လွင်ႈတူင်ႉၼိုင် ပၢင်တိုၵ်း ၵႃႇၸႃႇ ၶွပ်ႈတဵမ် 1 ပီၼၼ်ႉၼႆယဝ်ႉ။
ၼႂ်းၶေႃႈပိုၼ်ၽၢဝ်ႇ ႁွင်ႈၵၢၼ်ၽၢႆႇငိုၼ်းတွင်း မိူင်းဢမႄႇရိၵၢၼ်ႇၼၼ်ႉ လၢတ်ႈဝႃႈ လႆႈတမ်းဝၢင်းတၢမ်ႇၼိူဝ် ၵူၼ်းသၢမ်ၵေႃႉ လႄႈ ၸုမ်းဢၼ်ၶဝ်ႁွင်ႉဝႃႈ “ၸုမ်းပရႁိတ သျၢမ်း” ဢၼ်ၶဝ်ၼႄးဝႃႈ ပဵၼ်ၽူႈၵမ်ႉထႅမ်ငိုၼ်းတွင်း ၸၼ်ႉလုမ်ႈၾႃႉ ဢၼ်ၸိုဝ်ႈသဵင်ယႂ်ႇ တႃႇၸုမ်းႁမၢသ်ႉၼၼ်ႉ ဢိၵ်ႇပႃး ယေးငိုၼ်း Al-Intaj တီႈဝဵင်းၵႃႇၸႃႇ ဢၼ်ၶဝ်ဝႃႈ ထုၵ်ႇၸုမ်းၶဝ်ၵုမ်းၵမ်ဝႆႉၼၼ်ႉ ၼႆယဝ်ႉ။
ႁွင်ႈၵၢၼ် ၽၢႆႇငိုၼ်းတွင်း လၢတ်ႈၼႄဝႃႈ လိူဝ်ၼၼ်ႉ လႆႈထုၵ်ႇယိူင်းၸူး ၽူႈၵမ်ႉထႅမ် ၸုမ်းႁမၢသ်ႉ ဢၼ်ယၢမ်ႈမီးမႃး ႁိုင်ၼၢၼ်း ဢၼ်ပဵၼ်ၵူၼ်းမိူင်းယႄႇမႅၼ်ႇ ဢၼ်ယူႇသဝ်း တီႈမိူင်းတိူဝ်ႇၵီႇ လႄႈ ႁူင်းၵၢၼ်မၼ်း 9 ဢၼ် ၼႆ ယဝ်ႉ။
ၽူႈၼမ်းၼႂ်း ၽၢႆႇငိုၼ်းတွင်း ၸေႊၼႅတ်ႉ ယႄႇလႅၼ်ႇ လၢတ်ႈဝႃႈ “ယွၼ်ႉပိူဝ်ႈ ၸုမ်းႁမၢသ်ႉ ႁဵတ်းလွင်ႈႁၢႆႉၸႃႉ မႃး ၶၢဝ်းတၢင်း ၼိုင်ႈပီယဝ်ႉလႄႈ ႁွင်ႈၵၢၼ် ၽၢႆႇငိုၼ်းတွင်း တေသိုပ်ႇ ယႃႉပႅတ်ႈ ၼမ်ႉၵတ်ႉ ၸုမ်းႁမၢသ်ႉ လႄႈ ၽူႈတၢင်တူဝ် ဢီႇရၢၼ်း ဢၼ်ႁဵတ်းႁႂ်ႈ ဢမ်ႇၼိမ်သဝ်း တၢင်ႇၸိူဝ်း တႃႇတေ ၵမ်ႉၸွႆႈငိုၼ်း တႃႇႁဵတ်းၵၢၼ် လႄႈ ႁဵတ်းသၢင်ႈ လွင်ႈႁၢႆႉၸႃႉ ထႅင်ႈယူႇ” ၼႆယဝ်ႉ။
“ႁွင်ႈၵၢၼ် ၽၢႆႇငိုၼ်းတွင်း တေၸႂ်ႉတိုဝ်း ၶိူင်ႈမိုဝ်း ဢၼ်မီးဝႆႉ တီႈႁဝ်းၶႃႈ တင်းမူတ်း တႃႇတေ ၵိုတ်းယိုတ်းလႆႈ ႁမၢသ်ႉ လႄႈ ၽူႈပၼ်ႁႅင်းၶဝ် ဢိၵ်ႇပႃး ၸိူဝ်းဢၼ် ႁႃလၢႆး တႃႇတေ ၸႂ်ႉတိုဝ်း ငဝ်းလၢႆး တႃႇတေ ႁူမ်ႇလူမ်ႈ ငိုၼ်းၶဝ်ႈ ၽိူမ်ႉထႅမ်ၼၼ်ႉယဝ်ႉ။”
မိူဝ်ႈပူၼ်ႉမႃး ပီ ႞ ၼၼ်ႉ ၸုမ်းယိပ်းၵွင်ႈၵၢင်ႇ ဢၼ်ၸုမ်း ႁမၢသ်ႉ ဢွၼ်ႁူဝ်ၼၼ်ႉ လႆႈၶႃႈႁႅမ်တၢႆ ၵူၼ်းမွၵ်ႈ 1,200 ၵေႃႉသေ ဢဝ်ၵူၼ်း 250 ၵေႃႉ ပွၵ်ႈမိူဝ်းတီႈ Gaza ၼႆယဝ်ႉ။
လွင်ႈႁူမ်ႇလူမ်ႈ ဢိတ်ႇသရေး လူႉလႅဝ်ၵႂႃႇ ယႂ်ႇလူင်ၼၼ်ႉ ႁဵတ်းႁႂ်ႈ ၵူၼ်းၸၢဝ်းၵျူးၶဝ် လႆႈတၢႆၼမ်လိူဝ်ပိူၼ်ႈ ဝၢႆးသေ ၼႃႇၸီႇၶဝ် ၶႃႈႁႅမ်တၢႆ ၵူၼ်းၸၢဝ်းၵျူးၶဝ်ၼၼ်ႉသေ ႁဵတ်းႁႂ်ႈ လွင်ႈႁူမ်ႇလူမ်ႈ ၵူၼ်းမိူင်း တင်းၼမ် လူႉလႅဝ်ၵႂႃႇသေ လွင်ႈယုမ်ႇယမ် ၽူႈဢွၼ်ႁူဝ်ၶဝ် လႆႈတူၵ်းသုမ်းၵႂႃႇ တီႈသုင်သုတ်းယဝ်ႉ။
လွင်ႈဢၼ် ၸုမ်းႁမၢသ်ႉၶဝ် ၶဝ်ႈတိုၵ်းၼၼ်ႉ ႁဵတ်းႁႂ်ႈ ဢိတ်ႇသရေးၶဝ် ၶဝ်ႈတိုၵ်း ၵႃႇၸႃႇသေ ႁဵတ်းႁႂ်ႈ ၼႃႈလိၼ် ဢၼ်ၵူၼ်းယူႇသဝ်း ၼမ်ၼၼ်ႉ ပေႃးလႆႈၽႅပ်ႉပဵင်းလိၼ်ၵႂႃႇသေ ၵူၼ်းတၢႆ 42,000 ပၢႆ ၼႆ ၽူႈမီးပုၼ်ႈၽွၼ်း ပၢႆးယူႇလီ မိူင်းပႃးလႅတ်ႈသတၢႆးၶဝ် လၢတ်ႈၼႄၼင်ႇၼႆ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Daphne Psaledakis. "US targets Hamas with sanctions on anniversary of Gaza war" — Reuters, October 7, 2024
- AFP. "US targets Hamas backers with fresh sanctions on attack anniversary" — The Standard, October 7, 2024
- U.S. Department of the Treasury. "Treasury Targets Significant International Hamas Fundraising Network" — U.S. Department of the Treasury, October 8, 2024
