သင်ႁႃးမၢတ်ႉသ်ၶဝ်ၽွမ်ႉ လၢႆးၵၢၼ်ၵိုတ်းတိုၵ်းၼႆ ၵၢၼ်ႇၶဝ် မုင်ႈမွင်း ဢိတ်ႇသရေးၵေႃႈ တေႁပ််ႉ
ဝၼ်းဢင်းၵၢၼ်း၊ ၸုၼ်ႇ 4၊ 2024
ၽူႈမီးသုၼ်ႇလၢတ်ႈ ပၢႆးႁူမ်ႇလူမ်ႈၸိုင်ႈမိူင်း ႁိူၼ်းၵႅဝ်ႈၶၢဝ်ၸွမ်ပွင်ၸိုင်ႈ လၢတ်ႈဝႃႈ သင်ၸိူဝ်ႉဝႃႈ ႁႃးမၢတ်ႉသ်ၶဝ် ၽွမ်ႉၸႂ် ၶေႃႈတၢင်ႇလၢတ်ႈ တွၼ်ႈတႃႇ ၵိုတ်းတိုၵ်းတီႈ ထုင်ႉၷႃႇꩡႃႇၼႆၸိုင် ၽၢႆႇဢမႄႇရိၵၢၼ်ႇၶဝ် မုင်ႈမွင်းဝႆႉဝႃႈ ဢိတ်ႇသရေးၵေႃႈ တေယွမ်းႁပ်ႉ လၢႆးၵၢၼ်ၼၼ်ႉယူႇ ဝႃႈၼႆယဝ်ႉ။
ပိူင်ယုၵ်းယၢင်ႇ ၶေႃႈတၢင်ႇလၢတ်ႈ ဢၼ် ၸဝ်ႈၸွမ်ၸိုင်ႈဢမႄႇရိၵၢၼ်ႇ ၵျူဝ်းပၢႆႇတႅၼ်ႇ ၸၼ်ဝႆႉပၼ်ၼၼ်ႉ ပဵၼ်တႃႇၵိုတ်းတိုၵ်းသေ ႁႂ်ႈပွႆႇပၼ်ၵူၼ်းၸိူဝ်းၺႃးၺွပ်းဝႆႉၼႆသေ ၽူႈငူပ်ႉငိလွင်ႈငမ်းယဵၼ် ဢီးၵျိပ်ႈ လႄႈ ၶႃႇတႃႇ ဢိၵ်ႇတင်း မိူင်းႁူမ်ႈတုမ် ဢမႄႇရိၵၢၼ်ႇၶဝ် တိုၵ်းသူၼ်းတင်းသွင်ပႃႈသွင်ၽၢႆႇ ႁႂ်းဢွၼ်ၵၼ် ယွမ်းႁပ်ႉပၼ် ၶေႃႈတၢင်ႇလၢတ်ႈၼၼ်ႉ ဝႃႈၼႆယဝ်ႉ။
Yoav Gallant မွၵ်ႇလၢတ်ႈ မိူဝ်ႈဝၼ်းတိတ်ႉၼၼ်ႉဝႃႈ ၼႂ်းၵႃႈ ၽွင်းၶၢဝ်းသၢင်ႈလွင်ႈငမ်းယဵၼ်ၼ်ႉ ၶဝ်တေဢမ်ႇယွမ်းႁႂ်ႈ ႁႃးမၢတ်ႉသ် ၽွင်းငမ်းတီႈ ၷႃႇꩡႃႇသေ ၶဝ်တိုၵ်ႉထတ်းသၢင်ယူႇဝႃႈ ဢၼ်ဢမ်ႇၸႂ်ႈႁႃးမၢတ်ႉသေ တၢင်ႇၸိူဝ်း တေပဵၼ်ၽႂ်လႆႈထႅင်ႈ ဢၼ်ဝႃႈၼၼ်ႉယူႇ ဝႃႈၼႆယဝ်ႉ။ ၽွင်းလူင် ၵၢၼ်ၵႅတ်ႇၵင်ႈဢိတ်ႇသရေး လၢတ်ႈဝႃႈ တေဝႆႉသေၸုမ်းၸုမ်း ဢၼ်တေလွၵ်ႇငိူတ်ႈလႆႈ ႁႃးမၢတ်ႉသ် ဢၼ်တေဢုပ်ႉပိူင်ႇ တီႈၷႃႇꩡႃႇ ဝႃႈၼႆယဝ်ႉ။ ပဵၼ်ၵၢၼ်ဢုပ်ႉပိူင်ႇၸိူင်ႉႁိုဝ်ဢၼ်ဝႃႈၼၼ်ႉတႄႉ ဢမ်ႇလႆႈလၢတ်ႈဝႆႉ ႁူဝ်ယွႆႈမၼ်းၼင်ႇၵဝ်ႇ။ ၸွမ်ၽွင်းလူင် ဢိတ်ႇသရေး ၼႄႇတၼ်ႇယႃႇႁု မွၵ်ႇလၢတ်ႈမိူဝ်ႈဝၼ်းတိတ်ႉၼၼ်ႉဝႃႈတႄႉ ၵဵဝ်ႇၵပ်းလူၺ်ႈ လွင်ႈၵိုတ်းတိုၵ်းၼႆႉ ဢၼ်ပဵၼ် လွင်ႈၸိူဝ်းဢၼ် ဢိတ်ႇသရေး လႆႈလူင်ႈၼႃႈမၵ်းမၼ်ႈဝႆႉၼၼ်ႉ တေဢမ်ႇမီးလွင်ႈလႅၵ်ႈလၢႆႈသင် ဝႃႈၼႆယဝ်ႉ။
ၸိူဝ်းၼၼ်ႉတႄႉပဵၼ် တႃႇၽဵဝ်ႈမူၺ်ႉ ၵၢၼ်ဢုပ်ႉပိူင်ႇ လႄႈ ၵၢၼ်သိုၵ်း ႁႃးမၢတ်ႉသ်၊ တွၼ်ႈတႃႇၵူၼ်းၸိူဝ်းၺႃးၺွပ်းၵႂႃႇ ႁႂ်ႈလွတ်ႈဢွၵ်ႇမႃး လႄႈ ၷႃႇꩡႃႇၼႆႉ ယႃႇႁႂ်ႈမီးလွင်ႈလွၵ်ႇငိူတ်ႈၼိူဝ် ဢိတ်ႇသရေး ၸိူဝ်းၼႆႉယဝ်ႉ။ ၵူၺ်းၵႃႈဝႃႈ တီႈၼႂ်းၵႄႈ ၼႄႇတၼ်ႇယႃႇႁု လႄႈ ၸုမ်းႁူမ်ႈပွင်းမိုဝ်းၶႂႃၶဝ်ၼၼ်ႉ လႆႈမီးလွင်ႈၸတ်ႉၵၼ်ဝႆႉယူႇ။ လၢႆးၵၢၼ်ဢိတ်ႇသရေး ၵဵဝ်ႇၵပ်းလူၺ်ႈ လွင်ႈႁႃးမၢတ်ႉသ် လႄႈ ၷႃႇꩡႃႇၼၼ်ႉ ၽၢႆႇသၢၼ်ၶတ်းၶဝ် လႆႈထူပ်းႁဵင်းတဵၵ်းၼႂ်းမိူင်းဝႆႉယူႇ။ တီႈၼႂ်းၸုမ်းလူင်ပွင်ၸိုင်ႈ ၵေႃႈ လႆႈမီးလွင်ႈလွၵ်ႇငိူတ်ႈဝႃႈ သင်ၸိူဝ်ႉဝႃႈ ယွမ်ႉႁပ်ႉ လၢႆးၵၢၼ်ၵိုတ်းတိုၵ်း ဢၼ်ၸဝ်ႈၸွမ်ၸိုင်ႈပၢႆႇတႅၼ်ႇ တၢင်ႇလၢတ်ႈဝႆႉၼၼ်ႉၸိုင် တေႁဵတ်းႁႂ်ႈ လူင်ပွင်ၸိုင်ႈၼႄႇတၼ်ႇယႃႇႁု လႆႈတူၵ်း ဝႃႈၼႆသေ ၽူႈဢွၼ်ႁူဝ် ၽၢႆႇသၢၼ်ၶတ်း Lapid တႄႉ တိုၵ်းသူၼ်းၼႄႇတၼ်ႇယႃႇႁု ႁႂ်ႈယွမ်းႁပ်ႉ ၶေႃႈတၢင်ႇလၢတ်ႈ ဢၼ်ၼၼ်ႉ ဝႃႈၼႆယဝ်ႉ။
ငိူၼ်ႈငဝ်ႈတိုၼ်း
[မႄးထတ်း | မႄးထတ်းငဝ်ႈငႃႇ]- Bernd Debusmann Jr. "US expects Israel will accept Gaza ceasefire plan if Hamas does" — BBC News, JUNE 3, 2024
- Tovah Lazaroff. "Roadblock to Gaza ceasefire is Hamas, not Israel" — The Jerusalem Post, JUNE 3, 2024
- Jacob Magid. "US expects Israel to commit to its hostage deal proposal if Hamas agrees" — The Times of Israel, JUNE 3, 2024
