Jump to content

လွင်ႈႁႄႉႁၢမ်ႈ ဢိၼ်ႇသတႃႇၵရႅမ်ႇ တွၼ်ႈတႃႇ ၽူႈၸႂ်ႉတိုဝ်း ၵူၼ်းၼုမ်ႇ ဢႃႇယု 18 လူင်းတႂ်ႈ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းသုၵ်း၊ သႅပ်ႇ​ထႅမ်ႇပႃႇ 20၊ 2024

ဢႅပ်ႉသိုဝ်ႇတူင်ႇဝူင်းၵူၼ်း ဢိၼ်ႇသတႃႇၵရႅမ်ႇ

ၶွမ်ႇပၼီႇ Meta ဢၼ်ပဵၼ်ၸဝ်ႈၶွင် ၾဵတ်ႉပုၵ်ႉ လႄႈ ဢိၼ်ႇသတႃႇၵရႅမ်ႇ ၼၼ်ႉ လႆႈသႂ်ႇပၼ် လွင်ႈၵုမ်းထိင်း လွင်ႈသုၼ်ႇတူဝ် လႄႈ လွင်ႈၵုမ်းထိင်း ပေႃႈမႄႈ ဢၼ်လီလိူဝ် တီႈၼႂ်း ဢၵွင်ႉ ၵူၼ်းၸႂ်ႉတိုဝ်း ဢႃႇယု 18 ပီလူင်းတႂ်ႈ (ၵူၼ်းၼုမ်ႇ) ၼႆယဝ်ႉ။ ဢၼ်ၼႆႉၵေႃႈ ပဵၼ်လွင်ႈၵႄႈလိတ်ႈပၼ်ႁႃ ဢၼ်ၵူၼ်းတင်းၼမ် မႆႈၸႂ်ၸွမ်း ၽွၼ်းႁၢႆႉၸႃႉ ဢၼ်ပဵၼ်မႃးယွၼ်ႉ သိုဝ်ႇတူင်ႇဝူင်းၵူၼ်းၼၼ်ႉယူႇ။

ဢၶွင်ႉ ဢၼ်ငမ်ႇမႅၼ်ႈတင်းသဵင်ႈၼႆႉ တေပိၼ်ႇလၢႆႈပဵၼ် Teens Account (ဢၶွင်ႉ ဢၼ်လုၵ်ႈဢွၼ်ႇဢႃႇယု 18 လူင်းတႂ်ႈ) ၵႂႃႇႁင်းမၼ်းသေ ၸိူဝ်းၼၼ်ႉတင်းသဵင်ႈၼႆႉ တေပဵၼ် Private Accounts (ပဵၼ်ဢၶွင်ႉ ပေႃးၽူႈၸႂ်ႉတိုဝ်း ႁပ်ႉယိုၼ်ပၼ် ၸင်ႇၸၢင်ႈတူၺ်းလႆႈ) ၼၼ်ႉယဝ်ႉ။ ပေႃးဝႃႈ တိတ်းတၢမ်းဝႆႉ ဢမ်ႇၼၼ် တိုၼ်းၵွင်ႉသိုပ်ႇၵၼ်ဝႆႉယဝ်ႉၼႆၸိုင် ၸင်ႇတေ ၸၢင်ႈသူင်ႇၶေႃႈၵႂၢမ်းၸူး၊ ၸင်ႇတေ ၸၢင်ႈတိတ်းထႅၵ်ႉꩡ် ၸိူဝ်းၼႆႉသေ ၼင်ႇႁိုဝ်ပေႃး တေ ဢမ်ႇၸၢင်ႈတူၺ်းလႆႈ လွင်ႈတၢင်းဢၼ်ၸၢင်ႈတိူဝ်ႉၶိူၵ်ႈငၢႆႈၼၼ်ႉၵေႃႈ တေ မၵ်းမၼ်ႈဝႆႉ လွင်ႈၵုမ်းၵမ် ဢၼ်သုင်သုတ်းယဝ်ႉ။ တႄႇဢဝ် ၵၢင်ၶမ်ႈ 10 မူင်းတေႃႇ ၵၢင်ၼႂ် 7 မူင်းၼၼ်ႉ တေဢမ်ႇႁပ်ႉလႆႈ (ၶေႃႈပၼ်ၽၢင်ႉ) Noit ၼႆယဝ်ႉ။ ပေႃးပဵၼ်သႅၼ်း ဢႃယု 16 လူင်းတႂ်ႈတႄႉ ၸိူဝ်းပဵၼ် လွင်ႈမၵ်းမၼ်ႈဝႆႉၸိူဝ်းၼႆႉ တေလႆႈဢဝ် ၶေႃႈဢၼုၺၢတ်ႈတီႈ ပေႃႈမႄႈယဝ်ႉ ၸင်ႇတေ လႅၵ်ႈလၢႆႈလႆႈ ဝႃႈၼႆယဝ်ႉ။ ၽၢႆႇပေႃႈမႄႈၵေႃႈ တေႁူႉၸွမ်းလႆႈဝႃႈ လုၵ်ႈဢွၼ်ႇၶဝ် ၶဝ်ႈၸႂ်လိူင်ႈသင်ယူႇဢၼ်ဝႃႈၼၼ်ႉသေ ၸၢင်ႈမၵ်းၶၼ်ႈလႆႈ ၶၢဝ်းယၢမ်းၸႂ်ႉတိုဝ်းမၼ်းလႆႈ ဝႃႈၼႆ။

မိူဝ်ႈဢႃႇယုတိုၵ်ႉလဵၵ်ႉၼၼ်ႉ လွင်ႈႁပ်ႉႁူႉ လွင်ႈၸႂ်တူၵ်း လႄႈ လွင်ႈမႆႈၸႂ်ၼၼ်ႉ သုင်၊ ၵၢၼ်လဵပ်ႈႁဵၼ်းလၢႆလၢႆဢၼ် လႆႈႁၼ်ဝႃႈ လွင်ႈၼမ်ႉၵတ်ႉၵၢၼ်ႁဵၼ်း ယွမ်းလူင်းၼႆႉ ၵွင်ႉၵၢႆႇၵၼ်တင်း လွင်ႈၸႂ်ႉတိုဝ်း ၼႅင်ႈသိုဝ်ႇတူင်ႇဝူင်းၵူၼ်းၼၼ်ႉယဝ်ႉ။ ယၢမ်းလဵဝ် ၶွမ်ႇပၼီႇ Meta ၶွမ်ႇပၼီႇ ByteDance ဢၼ်ပဵၼ်ၶွင် Tiktok ၊ ၶွမ်ႇပၼီႇ ၵူးၵႄး ဢၼ်ပဵၼ်ၸဝ်ႈၶွင် ယူႇထုပ်ႉၼၼ်ႉ လႆႈႁူပ်ႉထူပ်း လွင်ႈတၢင်ႇတၢင်းၽိတ်း ဢၼ်တၢင်တူဝ် လုၵ်ႈဢွၼ်ႇ လႄႈ ႁူင်းႁဵၼ်း ၼပ်ႉႁူဝ်ပၢၵ်ႇ။ မိူဝ်ႈပီၵၢႆၼၼ်ႉ မႄႇတႃႇ လႆႈထုၵ်ႇဢဝ်တၢင်းၽိတ်း တီႈၸႄႈမိူင်း ဢမႄႇရိၵၢၼ်ႇ 33 ၸႄႈမိူင်း ပႃးၸဵမ် ၶႄႇလီႇၾူဝ်းၼီးယႃး လႄႈ ၼိဝ်းယွၵ်ႉ ယွၼ်ႉမၼ်း ႁဵတ်းႁႂ်ႈၵူၼ်းမိူင်း ၽိတ်းပိူင်ႈ လွင်ႈၽေးၶဵၼ် ၼိူဝ်သိုဝ်ႇတူင်ႇဝူင်းၵူၼ်းၼၼ်ႉယဝ်ႉ။

ဢႅပ်ႉဢၼ်ၵူၼ်းၸႂ်ႉတိုဝ်းၼမ်လိူဝ်ပိူၼ်ႈ မိူၼ်ၼင်ႇ ၾဵတ်ႉပုၵ်ႉ၊ ဢိၼ်ႇသတႃႇၵရႅမ်ႇ၊ တိၵ်ႉတွၵ်ႉ ၸိူဝ်းၼႆႉ ပေႃးဝႃႈ ဢႃႇယု လႆႈ 13 ၵေႃႈ ၶဝ်ပၼ်ၸႂ်ႉယဝ်ႉ။ ဢၼ်မီးသုၼ်ႇလႆႈ တႃႇပဵၼ် Teens Accounts ၼၼ်ႉ တေဢဝ်ပိၼ်ႇလၢႆႈ ၼႂ်းမိူင်းဢမႄႇရိၵၢၼ်ႇ၊ မိူင်းယူႇၶေႇ၊ မိူင်းၶႅၼ်ႇၼေႇတႃႇ ၼႂ်းၶၢဝ်းတၢင်း 60 ဝၼ်းသေ တွၼ်ႈတႃႇ မိူင်းဢေႃးသထရေးလီးယႃး လႄႈ တီႈမိူင်း ၸုမ်းၽွမ်ႉႁူမ်ႈ ယူးရူပ်ႉတႄႉ တေတႄႇႁဵတ်း ၼႂ်းတွၼ်ႈလင် ပီၼႆႉ မႄႇတႃႇ လၢတ်ႈၼႄၼင်ႇၼႆ။ ပေႃးဢဝ်လုမ်ႈၾႃႉဝႃႈတႄႉ တေတႄႇၸႂ်ႉတိုဝ်း ၼႂ်းလိူၼ်ၸၼ်ႇဝႃႇရီႇ ပီၼႃႈ ၼႆယဝ်ႉ။


ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=လွင်ႈႁႄႉႁၢမ်ႈ_ဢိၼ်ႇသတႃႇၵရႅမ်ႇ_တွၼ်ႈတႃႇ_ၽူႈၸႂ်ႉတိုဝ်း_ၵူၼ်းၼုမ်ႇ_ဢႃႇယု_18_လူင်းတႂ်ႈ&oldid=9169"