ရတ်းသျႃး ထွၼ်ဢွၵ်ႇ ၽူႈမီးပုၼ်ႈၽွၼ်း ဢိင်းၵလဵတ်ႈ 6 ၵေႃႉ ဢၼ်ၼႄးဝႃႈ ပဵၼ်ၽူႈၸွပ်ႇၶၢဝ်ႇ

ဝၼ်းသုၵ်း၊ သႅပ်ႇ​ထႅမ်ႇပႃႇ 13၊ 2024 

ဝိဝ်း လုမ်းၽွင်းတၢင်မိူင်း ဢိင်းၵလဵတ်ႈ တီႈ ဝဵင်းမွသ်ႉၵူဝ်ႇ၊ မိူင်းရတ်ႈသျႃး

မိူဝ်ႈဝၼ်းသုၵ်းၼၼ်ႉ ရတ်ႈသျႃး ၼႄးဝႃႈ ၽူႈတၢင်ၵၢၼ်မိူင်း ဢိင်းၵလဵတ်ႈ 6 ၵေႃႉ ပဵၼ်ၽူႈၸွပ်ႇၶၢဝ်ႇၼႆသေ လၢတ်ႈဝႃႈ တႅပ်းတတ်း တႃႇတေ ထွၼ်ၶဝ်ဢွၵ်ႇ ၼႆယဝ်ႉ။ မိူင်းဢိင်းၵလဵတ်ႈ လၢတ်ႈဝႃႈ လွင်ႈဢၼ် ဢမ်ႇမီးပိုၼ်ႉထၢၼ် တဵမ်ထူၼ်ႈၼၼ်ႉ ပဵၼ်မိူဝ်ႈပူၼ်ႉမႃး လၢႆဝူင်ႈၼၼ်ႉသေ ၵွင်ႉၵၢႆႇၵၼ်တင်း လွင်ႈဢၼ်ၶဝ် ႁဵတ်းသၢင်ႈ မိူဝ်ႈလိူၼ်မေႇၼၼ်ႉ တႃႇတေ ယိုတ်းပႅတ်ႈ ဝႂ်ၵပ်းတူဝ် ၽူႈတၢင်တူဝ် တီႈလုမ်းတၢင် ရတ်ႈသျႃး လႄႈ မၵ်းၶၼ်ႈ လွင်ႈတူင်ႉၼိုင် ၵၢၼ်မိူင်း မွသ်ႉၵူဝ်ႇ တီႈဝဵင်းလၼ်ႇတၼ်ႇၼၼ်ႉၼႆယဝ်ႉ။

လွင်ႈၶဵင်ႈၶႅင် ပွတ်းဢွၵ်ႇလႄႈ ပွတ်းတူၵ်း ဢၼ်ပဵၼ်မႃး ၵမ်းလိုၼ်းသုတ်းၼႆႉ ပဵၼ်ယွၼ်ႉ ၸွမ်ၽွင်းလူင် ဢိင်းၵလဵတ်ႈ Keir Starmer ၵႂႃႇဢုပ်ႇၵၼ် တီႈဝဵင်းဝႃႇသျိၼ်ႇတၢၼ်ႇသေ တေပႃး လွင်ႈယူႇၶရဵၼ်း ယွၼ်းၸႂ်ႉတိုဝ်း ၶိူင်ႈၵွင်ႈၵၢင်ႇ ဢၼ်မိူင်းဝၼ်းတူၵ်း ၵမ်ႉၸွႆႈပၼ်ၼၼ်ႉသေ ယိုဝ်းသႂ်ႇ တီႈယိူင်းမၢႆ ၼႂ်းမိူင်းရတ်ႈသျႃးၼၼ်ႉယဝ်ႉ။ ၸွမ်ပွင်ၸိုင်ႈ ပူႇတိၼ်ႇ ပၼ်ၾၢင်ႉဝႃႈ လွင်ႈဢၼ် ၶိပ်ႉ ၸႂ်ႉတိုဝ်း ၵွင်ႈၵၢင်ႇ ဢၼ်ၸၢင်ႈယိုဝ်းလႆႈ တၢင်းၵႆၼၼ်ႉ တေႁဵတ်းႁႂ်ႈ ၸုမ်းၼေႇတူဝ်ႇ ပဵၼ်ပၢင်တိုၵ်းၵၼ်တင်း မွသ်ႉၵူဝ်ႇၼႆယဝ်ႉ။

ၽၢႆႇႁူမ်ႇလူမ်ႈ မိူင်းရတ်ႈသျႃး ပိုၼ်ၽၢဝ်ႇ ၼိူဝ်ဢွၼ်ႇလၢႆးဝႃႈ ၽၢႆႇၼွၵ်ႈမိူင်း ယိုတ်းပႅတ်ႈ လွင်ႈမၵ်းမၼ်ႈ ၽူႈတၢင်တူဝ် ဢိင်းၵလဵတ်ႈၶဝ်ၼႆသေ ငဝ်းႁၢင်ႈသဵင် ရတ်ႈသျႃး ဢိင်ၼိူဝ် ၽူႈမီးပုၼ်ႈၽွၼ်း FSB ၵေႃႉ႞ လၢတ်ႈဝႃႈ လႆႈတႅပ်းတတ်း တႃႇတေ ထွၼ်ဢွၵ်ႇ ၼႆယဝ်ႉ။

FSB လၢတ်ႈဝႃႈ လႆႈႁပ်ႉၽိုၼ်လိၵ်ႈ ဢၼ်ၼႄဝႃႈ ၽူႈမီးပုၼ်ႈၽွၼ်း ၽၢႆႇၵၢၼ်မိူင်းၶဝ် လႆႈထုၵ်ႇ ႁွင်ႈၵၢၼ်ၽၢႆႇၼွၵ်ႈမိူင်း မိူင်းဢိင်းၵလဵတ်ႈ သူင်ႇၵႂႃႇ တီႈမိူင်းရတ်ႈသျႃး “ဢၼ်ၼႃႈၵၢၼ် ပိူင်လူင်မၼ်း ပဵၼ်တႃႇ ႁဵတ်းႁႂ်ႈ မိူင်းႁဝ်း တူၵ်းသုမ်း ၽၢႆႇၽႅၼ်ၵၢၼ်” ၼႆသေ ၶဝ်ၶဝ်ႈပႃးၼႂ်း “ၵၢၼ်ၵဵပ်းၶေႃႈမုၼ်း လႄႈ လွင်ႈတူင်ႉၼိုင် ၵၢၼ်ယႃႉၵဝ်း ၼႆယဝ်ႉ"။ ဢမ်ႇလႆႈမၵ်းမၼ်ႈ ၽူႈမီးပုၼ်ႈၽွၼ်း ၽၢႆႇၵၢၼ်မိူင်း 6 ၵေႃႉၼၼ်ႉ။

ၸုမ်း FSB ပၼ်ၾၢင်ႉဝႃႈ သင်ဝႃႈ လႆႈႁၼ် ၽူႈမီးပုၼ်ႈၽွၼ်း ၽၢႆႇၵၢၼ်မိူင်း တၢင်ႇၸိူဝ်း ႁဵတ်းၵၢၼ် “မိူၼ်ၵၼ်” ၼႆၸိုင် “တေတုၵ်းယွၼ်း ႁႂ်ႈၵိုတ်းယိုတ်း ၼႃႈၵၢၼ် ဢၼ်ၶဝ် သူင်ႇၸူး ရတ်ႈသျႃးၼၼ်ႉ ၸဝ်ႉၸဝ်ႉ” ၼႆယဝ်ႉ။

ငဝ်းႁၢင်ႈသဵင် ရတ်ႈသျႃး လၢတ်ႈဝႃႈ ၽူႈမီးပုၼ်ႈၽွၼ်း ၽၢႆႇၵၢၼ်မိူင်း 6 ၵေႃႉၼၼ်ႉ လႆႈႁူပ်ႉထူပ်း ၸုမ်းသိုဝ်ႇၶၢဝ်ႇ လႄႈ ၸုမ်းသုၼ်ႇလႆႈသုၼ်ႇပဵၼ် လွတ်ႈလႅဝ်း ၸိူဝ်းဢၼ် ပိုၼ်ၽၢဝ်ႇဝႃႈ ပဵၼ် “ၽူႈတၢင်တူဝ် ၼွၵ်ႈမိူင်း” ၼႆၼၼ်ႉယဝ်ႉ။

ၽူႈတၢင်လၢတ်ႈ ၽၢႆႇၼွၵ်ႈမိူင်း မႃႇရီႇယႃႇ ၸႃႇၶႃႇရူဝ်ႇဝႃႇ လၢတ်ႈဝႃႈ ၽူႈမီးပုၼ်ႈၽွၼ်း ၽၢႆႇၵၢၼ်မိူင်းၶဝ် ႁဵတ်းသၢင်ႈ “ၵၢၼ်လုၵ်ႉၽိုၼ်ႉ ဢၼ်ယိူင်းဢၢၼ်း တႃႇတေႁဵတ်းႁႂ်ႈ ၵူၼ်းမိူင်းႁဝ်း လႆႈတိူဝ်ႉၸႂ်” ၼႆယဝ်ႉ။

ငိူၼ်ႈငဝ်ႈၶၢဝ်ႇ

• DASHA LITVINOVA and JILL LAWLESS. "Russia expels 6 British diplomats it accuses of spying. The UK calls it ‘completely baseless’" — AP News, September 13, 2024
• Rob Picheta,. "Russia expels 6 British diplomats amid spat over long-range weapons" — CNN, September 13, 2024
• AFP. "Moscow Expels 6 British Diplomats Over Suspected Spying" — The Moscow Times, September 13, 2024
• Olivia Land. "Russia expels 6 British diplomats amid feud over long-range weapons" — New York Post, September 13, 2024