ယွၼ်ႉလူမ်းလႅင်ႉတီႈ ပင်းၵလႃးတဵတ်ႈလႄႈ ၵူၼ်းတၢႆ ဢမ်ႇယွမ်းသိပ်းၵေႃႉ

ဝၼ်းၸၼ်၊ မေႇ 27၊ 2024 

လူမ်းလႅင်ႉ Remal တီႈ ပင်းၵလႃးတဵတ်ႈ

ၽူႈမီးပုၼ်ႈၽွၼ်းပိုၼ်ႉတီႈ ပင်းၵလႃးတဵတ်ႈ မွၵ်ႇလၢတ်ႈမိူဝ်ႈၼႆႉဝႃႈ ယွၼ်ႉပိူဝ်ႈလူမ်းလႅင်ႉလူင် ဢၼ်ၶဝ်ႈထွင်းပဝ်ႇ တီႈ ထုင်ႉၼႃႈလိၼ်တႅမ်ႇ တီႈ မိူင်းပင်းၵလႃးတဵတ်ႈၼၼ်ႉလႄႈ ႁူဝ်ၼပ်ႉၵူၼ်းတၢႆ ၶိုၼ်ႈမႃး မီး သိပ်းၵေႃႉသေ လင်ႁိူၼ်း ဢၼ်လႆႈလုလႅဝ်ၵႂႃႇ မီး သၢမ်မိုၼ်ပၢႆယဝ်ႉ ဝႃႈၼႆ။

Showkat Ali ဢၼ်ပဵၼ် ၶုၼ်ၵွၼ်း​ၸႄႈတွၼ်ႈ Barisal ဢၼ် ၵူၼ်းလႆႈတၢႆမႃး 7 ၵေႃႉၼၼ်ႉဝႃႈ ၵူၼ်းၸိူဝ်းတၢႆ ၵမ်ႉၼမ်ၼႆႉ ပဵၼ်ယွၼ်ႉ ၽႃႁိူၼ်းၵူၼ်ႇတဵင်သေတၢႆၼႆယဝ်ႉ။ တီႈၸႄႈတွၼ်ႈႁိမ်းႁွမ်း ​ၸႄႈတွၼ်ႈ Barisal ၼၼ်ႉတႄႉ ယွၼ်ႉလူၺ်ႈ ၸူမ်ၼမ်သေ ၵူၼ်းလႆႈတၢႆမႃး သၢမ်​ၵေႃႉၼႆယဝ်ႉ။

လူမ်းလႅင်ႉလူင် Remal ၼႆႉ လႆႈၶဝ်ႈမႃးပွတ်းၼႂ်းၵွင်းလွႆ မိူဝ်ႈဝၼ်းတိတ်ႉ ၵၢင်ၶမ်ႈၼၼ်ႉသေ ႁွၼ်ၼမ်ႉလူင်ၸိူဝ်းၼႆႉၵေႃႉ လႆႈၽင်ႇၽၢပ်ႈၽင်ႇၼမ်ႉမႃးယဝ်ႉ။ ဝၢႆးဝၼ်း ဝၼ်းၸၼ်ၼၼ်ႉတႄႉ လူမ်းလႅင်ႉ Remal ၼႆႉ ႁႅင်းဢူၼ်ႈၵႂႃႇသေတႃႉ တီႈထုင်ႉၽင်ႇပၢင်ႇလၢႆႇၼၼ်ႉတႄႉ ၽူၼ်တိုၵ်ႉမႃးႁႅင်း လူမ်းတိုၵ်ႉပဝ်ႇႁႅင်းယူႇ ၼႆယဝ်ႉ။။

Helal Mahmud ဢၼ်ပဵၼ် ၶုၼ်ပွင်ၵၢၼ် လူင်ပွင်ၸိုင်ႈ ၸႄႈတွၼ်ႈ Khulan ဝႃႈ ယွၼ်ႉလူမ်းလႅင်းလႄႈ လင်ႁိူၼ်း ဢၼ်လႆႈလုလႅဝ်မႃး မီးယူႇ 123,000 သေ ၼႂ်းၵႃႈၼၼ်ႉ တႃႇ 31,000 ၼႆႉ ပဵၼ်ဢၼ်လုလႅဝ်ၵႂႃႇမူတ်းဝႃႈၼႆယဝ်ႉ။ ယွၼ်ႉပိူဝ်ႈ ၽူၼ်မႃးႁႅင်း လူမ်းပဝ်ႇႁႅင်းလႄႈ ၵူၼ်းမွၵ်ႈ သီႇမိုၼ်ႇပၢႆၼႆႉ တိုၵ်ႉလႆႈယူႇသဝ်းယူႇတီႈ ပၢင်သဝ်းၵႅတ်ႇၵင်ႈလူမ်းလႅင်ႉ ဝႃႈၼႆယဝ်ႉ။ Tofael Islam ၽူႈၵွၼ်းၸႄႈတွၼ်ႈ ၸိတ်ႉတၵွင်း လၢတ်ႈဝႃႈ တီႈၸႄႈတွၼ်ႈ ၸိတ်ႉတၵွင်းၵေႃႈ ၵူၼ်းလႆႈတၢႆၵႂႃႇထႅင်ႈၵေႃႉၼိုင်ႈဝႃႈၼႆယဝ်ႉ။ ၸွမ်ဢိၼ်ႇၵျိၼ်ႇၼီႇယႃႇ Biswanath Sikder တီႈ ၶွမ်ႇပၼီႇ ၽၢႆႇပိုၼ်ၽႄႈၾႆးၾႃႉ ဢၼ်ယႂ်ႇသုတ်း ၶွင် လူင်ပွင်ၸိုင်ႈၼၼ်ႉလၢတ်ႈဝႃႈ ယွၼ်ႉလူၺ်ႈ ၾႆးၾႃႉလႆႈၶၢတ်ႇၵႂႃႇ တွၼ်ႈတႃႇ ၵူၼ်း 12.5 လၢၼ်ႉလႄႈ တေႁဵတ်းသၢင်ႈၵႂႃႇ တႃႇႁႂ်ႈၶိုၼ်းလႆႈၾႆးၾႃႉ ဝႃႈၼႆယဝ်ႉ။

ငိူၼ်ႈငဝ်ႈတိုၼ်း

• Mohammad Ponir Hossain, Ruma Paul and Subrata Nag Choudhury. "Cyclone Remal kills 16, snaps power links to millions in India, Bangladesh" — Reuters, May 27, 2024
• Rhea Mogul and Esha Mitra. "Seven killed and over 1 million evacuated as Cyclone Remal lashes South Asia" — CNN, May 27, 2024
• Al Jazeera Staff. "Cyclone Remal slams into India, Bangladesh: What we know" — Al Jazeera, May 27, 2024