Jump to content

ယူႇၶရဵၼ်း လၢတ်ႈဝႃႈ ၶဝ်ၶႃႈႁႅမ်တၢႆ ၸွမ်သိုၵ်းလူင် ရတ်ႈသျႃး တီႈဝဵင်းမွသ်ႉၵူဝ်ႇ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းပုတ်ႉ၊ တီႇသႅမ်ႇပႃႇ 18၊ 2024

ငဝ်းတူင်ႉ ၽွင်းမိူဝ်ႈ မၢၵ်ႇတႅၵ်ႇ

မိူဝ်ႈဝၼ်းဢႃးတိတ်ႉၼၼ်ႉ မိူင်းယူႇၶရဵၼ်း လၢတ်ႈဝႃႈ လွင်ႈဢၼ် ၸွမ်သိုၵ်းလူင် ရတ်ႈသျႃး ၵေႃႉ႞ လႆႈထုၵ်ႇၶႃႈတၢႆ တီႈၼိူဝ်သဵၼ်ႈတၢင်း ဝဵင်းမွသ်ႉၵူဝ်ႇ လူၺ်ႈ လွင်ႈဢဝ်မၢၵ်ႇတႅၵ်ႇ ဢၼ်လပ်ႉဝႆႉ ၼႂ်းလူတ်ႉသၵူဝ်ႇတႃႇ ၽၢႆႇၼွၵ်ႈ တိူၵ်ႈ ႁွင်ႈယူႇမၼ်းၼၼ်ႉ ပဵၼ်ႁွႆးမိုဝ်းၶဝ် ၼႆယဝ်ႉ။

ၸဝ်ႈသိုၵ်းလူင် Igor Kirillov ဢၼ်ပဵၼ် ၽူႈၵွၼ်းတပ်ႉၵႅတ်ႇၶႄ ၼိဝ်ႇၵလီးယႃး၊ ပၢႆးတူဝ်ၸႂ် လႄႈ ပၢႆးထၢတ်ႈ ၽၢႆႇသိုၵ်းရတ်ႈသျႃး ၼႆႉ လႆႈထုၵ်ႇၶႃႈတၢႆ ၽွင်းမိူဝ်ႈတိုၵ်ႉတေၵႂႃႇတီႈလုမ်းမၼ်းၼၼ်ႉယဝ်ႉ။ ၽူႈၸွႆႈမၼ်းၵေႃႈ လႆႈလူႉတၢႆၵႂႃႇၸွမ်း။ မိူင်းလၢႆလၢႆမိူင်း ပႃးၸဵမ် မိူင်းပရိတ်ႈတဵၼ်ႇ လႄႈ မိူင်းၶႅၼ်ႇၼေႇတႃႇ ၶဝ် လႆႈတမ်းဝၢင်း ၶေႃႈတၢမ်ႇ ၼိူဝ် Kirillov ဢႃႇယု 54 ပီ ယွၼ်ႉ လွင်ႈႁဵတ်းသၢင်ႈမၼ်း ၽွင်းမိူဝ်ႈ ရတ်ႈသျႃး ၶဝ်ႈတိုၵ်း မိူင်းယူႇၶရဵၼ်း ဢၼ်ႁိုင်မႃး ၶၢဝ်းတၢင်း ၸမ် 3 ပီၼၼ်ႉယဝ်ႉ။

မိူဝ်ႈဝၼ်းၸၼ်ၼၼ်ႉ ၸုမ်းႁူမ်ႇလူမ်ႈ မိူင်းယူႇၶရဵၼ်း SBU လၢတ်ႈဝႃႈ ယွၼ်ႉပိူဝ်ႈ မၼ်းသင်ႇႁႂ်ႈၸႂ်ႉတိုဝ်း ၶိူင်ႈၵွင်ႈၵၢင်ႇထၢတ်ႈ ဢၼ်ႁၢမ်ႈတၢပ်ႈဝႆႉၼၼ်ႉလႄႈ လႆႈထုၵ်ႇၵူတ်ႇထတ်း လိူင်ႈမၼ်းၼႆယဝ်ႉ။ မိူဝ်ႈလဵဝ် ၶဝ်ဝၢင်းၽႅၼ် တႃႇတေတိုၵ်းတေႃး ၼႆ ယွၼ်ႉဝႃႈ ၸုမ်း SBU မိူင်းယူႇၶရဵၼ်း ဢမ်ႇလႆႈဢၼုၺၢတ်ႈ တႃႇတေလၢတ်ႈၼၼ်ႉလႄႈ ၽူႈမီးပုၼ်ႈၽွၼ်း ဢၼ်ဢမ်ႇၶႂ်ႈဢွၵ်ႇၸိုဝ်ႈ ၸင်ႇလၢတ်ႈၼႄၼင်ႇၼႆ။ Kirillovၼႆႉ ပဵၼ်ၵူၼ်းပူၼ်ႉပႅၼ်ပိူင်သိုၵ်း ၵူၼ်းႁၢႆႉသိုၵ်း လႄႈ ပဵၼ်ပဝ်ႉမၢႆ ဢၼ်ထုၵ်ႇမႅၼ်ႈၸွမ်းပၵ်းပိူင် တင်းမူတ်း။

မိူဝ်ႈၽွင်း ပၢင်တိုၵ်း တင်း ရတ်ႈသျႃးၼၼ်ႉ ဢမႄႇရိၵၢၼ်ႇ ပဵၼ်ၽူႈပၼ်ၵွင်ႈၵၢင်ႇ ပိူင်လူင် တႃႇမိူင်းယူႇၶရဵၼ်းသေတႃႉ ၽူႈတၢင်လၢတ်ႈ ႁွင်ႈၵၢၼ်ၽၢႆႇၼွၵ်ႈမိူင်း Matthew Miller လၢတ်ႈဝႃႈ “ၵဝ်ၶႃႈ လၢတ်ႈလႆႈဝႃႈ ဢမႄႇရိၵၢၼ်ႇ ဢမ်ႇႁူႉၸွမ်း လွင်ႈၶႃႈႁႅမ် Kirillov ၼၼ်ႉ ဢွၼ်တၢင်းလႄႈ ဢမ်ႇၶဝ်ႈပႃးၸွမ်း” ၼႆယဝ်ႉ။

Miller သိုပ်ႇလၢတ်ႈဝႃႈ “ဢၼ်ႁၼ်ၸႅင်ႈလီတႄႉ မၼ်းပဵၼ် ၸွမ်သိုၵ်းလူင် ဢၼ်ၵဵဝ်ႇၶွင်ႈ လွင်ႈႁၢႆႉၸႃႉ တင်းၼမ်။ “မၼ်းၸၢႆးၼႆႉ ၶဝ်ႈပႃးၼႂ်းၵၢၼ်ၸႂ်ႉတိုဝ်း ၶိူင်ႈၵွင်ႈၵၢင်ႇထၢတ်ႈ တေႃႇသိုၵ်းယူႇၶရဵၼ်း ... ဢၼ်ပူၼ်ႉပႅၼ်မၢႆမီႈၸၼ်ႉလုမ်ႈၾႃႉ တီႈၼႃႈသိုၵ်း” ၼႆယဝ်ႉ။

ၸုမ်း SBU ၵေႃႈ လၢတ်ႈဝႃႈ တႄႇဢဝ် ရတ်ႈသျႃး ၶဝ်ႈတိုၵ်း မိူင်းယူႇၶရဵၼ်း မိူဝ်ႈလိူၼ်ၾႅပ်ႇဝႃႇရီႇ 2022 ၼၼ်ႉ ရတ်ႈသျႃး ၸႂ်ႉတိုဝ်း ၶိူင်ႈၵွင်ႈၵၢင်ႇထၢတ်ႈ ၼႂ်းၼႃႈသိုၵ်း မီးမႃး 4,800 ပွၵ်ႈလိူဝ်လိူဝ်ယဝ်ႉ ၼႆယဝ်ႉ။


ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ယူႇၶရဵၼ်း_လၢတ်ႈဝႃႈ_ၶဝ်ၶႃႈႁႅမ်တၢႆ_ၸွမ်သိုၵ်းလူင်_ရတ်ႈသျႃး_တီႈဝဵင်းမွသ်ႉၵူဝ်ႇ&oldid=10269"