Jump to content

မၼ်မူဝ်ႁၼ်သိင်း ၸွမ်းၽွင်းလူင်ၵဝ်ႇ ဢိၼ်းတီးယႃး လူႉသဵင်ႈၵႂႃႇ မိူဝ်ႈဢႃႇယု 92

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းသုၵ်း၊ တီႇသႅမ်ႇပႃႇ 27၊ 2024

ၸွမ်းၽွင်းလူင်ၵဝ်ႇ ဢိၼ်းတီးယႃး မၼ်မူဝ်ႁၼ်သိင်း

ၸွမ်ၽွင်းလူင်ၵဝ်ႇ ဢိၼ်းတီးယႃး မၼ်မူႁၼ်သိင်း လႆႈလူႉသဵင်ႈၵႂႃႇ မိူဝ်ႈဢႃႇယု လႆႈ 92 ၼႆ လႆႈႁူႉၸွမ်းၼင်ႇ ၶေႃႈပိုၼ်ၽၢဝ်ႇ ဢၼ်မႃးတီႈ All India Institute of Medical Sciences (AIIMS) ၼၼ်ႉယဝ်ႉ။

ႁူင်းယႃ လၢတ်ႈဝႃႈ မိူဝ်ႈဝၼ်းၽတ်းၼၼ်ႉ မၼ်းၸဝ်ႈ လႆႈလူႉသဵင်ႈၸႂ်ၵႂႃႇ တီႈႁိူၼ်းသေ လႆႈဢဝ်မႃးတီႈ ႁူင်းယႃ AIIMS တီႈဝဵင်းၼိဝ်းတေႇလီႇ ၼႆယဝ်ႉ။

ၸုမ်း AIIMS တႅမ်ႈဝႃႈ “မၼ်းၸၢႆး လႆႈယူတ်းယႃတူဝ် ယွၼ်ႉတၢင်းပဵၼ် ဢၼ်ၵဵဝ်ႇၵပ်း ဢႃႇယုသေ ၵိုင်ႉၵၢင်ႉ ဢမ်ႇႁူႉတူဝ် တီႈႁိူၼ်း မိူဝ်ႈဝၼ်းတီႈ 26/12/2024 ၼၼ်ႉ” ၼႆယဝ်ႉ။ “ လႆႈတႄႇႁဵတ်းၵၢၼ် တႃႇပၼ်ႁႅင်းၸႂ် တီႈႁိူၼ်းၵမ်းလဵဝ်။ လႆႈဢဝ်မႃးတီႈ ႁူင်းယႃၶိုၵ်ႉၶၵ်ႉ တီႈႁူင်းယႃ AIIMS” ၼႆယဝ်ႉ။

ၵူၺ်းၵႃႈ ပိၵ်ႉသမ်ႉဝႃႈ ႁူင်းယႃၶဝ် ၶတ်းၸႂ်ယူႇသေတႃႉ မိူဝ်ႈယၢမ်းၵၢင်ၼႂ် 9:51 မူင်းၼၼ်ႉ လႆႈပိုၼ်ၽၢဝ်ႇဝႃႈ သိင်း လႆႈလူႉသဵင်ႈၵႂႃႇယဝ်ႉ။ ယၢမ်းပိုၼ်ႉတီႈ - (11:21 မူင်း ET)။

ၸွမ်ၽွင်းလူင် မိူင်းဢိၼ်းတီးယႃး ၼရႅၼ်ႇတရႃႇမူဝ်ႇတီႇ လၢတ်ႈဝႃႈ မိူင်းဢိၼ်းတီးယႃး လႆႈမွင်ၸႂ်ၸွမ်း လွင်ႈဢၼ် သိင်း လႆႈလူႉသဵင်ႈၵႂႃႇၼၼ်ႉသေ ႁွင်ႉမၼ်းဝႃႈ ပဵၼ်ၽူႈဢွၼ်ႁူဝ် ဢၼ်မီးၸိုဝ်ႈသဵင် ၼႂ်းမိူင်းဢိၼ်းတီးယႃး ၵေႃႉ႞ ၼႆယဝ်ႉ။

မိူဝ်ႈဝၼ်းၽတ်းၼၼ်ႉ မူဝ်ႇတီႇ တႅမ်ႈဝႆႉ တီႈ X ဝႃႈ “ၼႂ်းထၢၼ်ႈၸွမ်ၽွင်းလူင်ႁဝ်းၼၼ်ႉ မၼ်းၶတ်းၸႂ် ၵႂၢင်ႈၵႂၢင်ႈၶႂၢင်ၶႂၢင် တႃႇတေႁဵတ်းႁႂ်ႈ ၸၢတ်ႈပၢၼ်ၵူၼ်းမိူင်း လီမႃး။

သိင်း လႆႈႁၢပ်ႇၵၢၼ် ၸွမ်ၽွင်းလူင် သွင်ပွၵ်ႈ။ မိူဝ်ႈပီ 2004 ၼၼ်ႉ ဝၢႆးသေ ၽူႈဢွၼ်ႁူဝ် ပႃႇတီႇၶွၼ်ႇၵရႅတ်ႉ သူဝ်ႇၼီႇယႃႇ ၵၼ်ႇတီႇ လႆႈဢွင်ႇပေႉ ပၢင်လိူၵ်ႈတင်ႈ ၸၼ်ႉၸိုင်ႈမိူင်းႁူမ်ႈတုမ် ဢမ်ႇထၢင်ႇသေ တႅပ်းတတ်းဝႃႈ မၼ်းၼၢင်း ဢမ်ႇၶႂ်ႈလႆႈ ၼႃႈတီႈသုင်သုတ်း ၼႂ်းမိူင်းၼၼ်ႉယဝ်ႉ။

မၼ်းၼၢင်း လႆႈလႅၵ်ႈလၢႆႈပိၼ်ႇပၼ်ၸူး သိင်း ဢၼ်မိူဝ်ႈၼၼ်ႉ လႆႈၸိုဝ်ႈသဵင် ၵွပ်ႈပိူဝ်ႈ မၼ်းႁဵတ်းႁႂ်ႈ လွင်ႈမူၼ်ႉမႄး ပၢႆးမၢၵ်ႈမီး ဢၼ်ႁတ်းႁၢၼ် မိူဝ်ႈၸဝ်ႉ ၶၢဝ်း ပီ 90 ၼၼ်ႉ ၽွင်းမၼ်းပဵၼ် ၽွင်းလူင် ၽၢႆႇငိုၼ်းတွင်းၼၼ်ႉယဝ်ႉ။

လူင်ပွင်ၸိုင်ႈမၼ်း လႆႈတႄႇႁဵတ်း ၵၢၼ်ၵမ်ႉၸွႆႈ မိူၼ်ၼင်ႇ လွင်ႈပၼ်ၵၢၼ်ငၢၼ်း တႃႇၵူၼ်းၽၢၼ် ဝၢၼ်ႈၼွၵ်ႈၼႃးပၢင်ႇ ၼႆ သိုဝ်ႇၶၢဝ်ႇ Reuters ဢွၵ်ႇဝႆႉၼင်ႇၼႆ။ မိူဝ်ႈပီ 2008 ၼၼ်ႉ သိင်း လႆႈလူင်းလၢႆးမိုဝ်း ၶေႃႈတူၵ်းလူင်း ဢၼ်ပဵၼ်တီႈမၢႆတွင်း ဢၼ်ပၼ်ၶႂၢင်ႉ တႃႇတေၵႃႉၶၢႆ ႁႅင်းၼိဝ်ႇၵလီးယႃး တင်း ဢမႄႇရိၵၢၼ်ႇ လူၺ်ႈလွင်ႈငမ်းယဵၼ် ပွၵ်ႈဢွၼ်တၢင်းသုတ်း ၼႂ်းၶၢဝ်းတၢင်း သၢမ်သိပ်းပီ ၼႆယဝ်ႉ။ ယူႇထႅင်ႈပီ႞ မၼ်းလႆႈပဵၼ် ၶႅၵ်ႇလီ တီႈပၢင်ၵိၼ်ၶဝ်ႈၶမ်ႈ ႁိူၼ်းၵႅဝ်ႈၽိူၵ်ႇ ၸွမ်ပွင်ၸိုင်ႈ ဢူဝ်ႇပႃးမႃး မိူဝ်ႈၼၼ်ႉ ပွၵ်ႈဢွၼ်တၢင်းသုတ်းၼၼ်ႉယဝ်ႉ။

မိူဝ်ႈၽွင်း ၶၢဝ်းတၢင်း ပွၵ်ႈၵမ်းသွင် မၼ်း ယဝ်ႉတူဝ်ႈၵႂႃႇၼၼ်ႉ လွင်ႈဢွင်ႇမၢၼ် သိင်း ၼႆႉ လႆႈထုၵ်ႇ လိူင်ႈၵၢၼ် ၵိၼ်ငိုၼ်း ဢၼ်မီးၸိုဝ်ႈသဵင် ၼႂ်းၵၢၼ်ၽွင်းငမ်းမၼ်းၼၼ်ႉ ႁူမ်ႇငမ်းဝႆႉ။ သိင်းၼႆႉ ဢမ်ႇတွၼ်ႉလႆႈထုၵ်ႇၼႄးဝႃႈ မၼ်းၵိၼ်ငိုၼ်း ၵူၺ်းၵႃႈ ႁၢင်ႈငဝ်းမၼ်း လႆႈထုၵ်ႇမီးႁွႆးၵႂႃႇ။

မိူဝ်ႈပႆႇတၢႆ လၢႆလိူၼ်ၼၼ်ႉ သိင်း လၢတ်ႈတီႈပၢင်သပ်းၸႅင်ႈၶၢဝ်ႇဝႃႈ မၼ်းႁဵတ်းၵၢၼ် ၸွမ်ၽွင်းလူင် ႁႂ်ႈလီတီႈသုတ်းၼႆ သိုဝ်ႇၶၢဝ်ႇ Reuters ဢွၵ်ႇဝႆႉၼင်ႇၼႆ။ ၸွမ်းၼင်ႇ သိုဝ်ႇၶၢဝ်ႇ Reuters ဢွၵ်ႇဝႆႉၼၼ်ႉ မၼ်းလၢတ်ႈဝႃႈ “ၶႃႈယုမ်ႇယမ် သိုဝ်ႈသိုဝ်ႈဝႃႈ ပိုၼ်းၼႆႉ တေမီးၸႂ်လီတေႃႇၶႃႈ လိူဝ်သေ သိုဝ်ႇၶၢဝ်ႇ ၵၢပ်ႈပၢၼ်မႂ်ႇ ဢမ်ႇၼၼ် ပႃႇတီႇသၢၼ်ၶတ်း ၼႂ်းသၽႃး” ဝႃႈၼႆယဝ်ႉ။

သိင်းၼႆႉ ၵိုတ်းဝႆႉ မေးမၼ်းလႄႈ လုၵ်ႈယိင်းမၼ်း 3 ၵေႃႉ ၼႆ သိုဝ်ႇၶၢဝ်ႇ Reuters ဢွၵ်ႇဝႆႉၼင်ႇၼႆ။


ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=မၼ်မူဝ်ႁၼ်သိင်း_ၸွမ်းၽွင်းလူင်ၵဝ်ႇ_ဢိၼ်းတီးယႃး_လူႉသဵင်ႈၵႂႃႇ_မိူဝ်ႈဢႃႇယု_92&oldid=10329"