ပႃႇတီႇၵမ်ဢႃႇၼႃႇ ပိုၼ်ၽၢဝ်ႇဝႃႈ ၶဝ်ဢွင်ႇပႄႉ တီႈပၢင်လိူၵ်ႈတင်ႈသၽႃးၼိူဝ် ၵမ်ႇပေႃးတီးယႃး

ဝၼ်းဢႃးတိတ်ႉ၊ ၾႅပ်ႇဝႃႇရီႇ 25၊ 2024 

ႁုၼ်ႇသႅၼ်

တီႈပၢင်လိူၵ်ႈတင်ႈ သၽႃးၼိူဝ် ဢၼ်ယဝ်ႉတူဝ်ႈၵႂႃႇမိူဝ်ႈၼႆႉ တီႈ မိူင်းၵမ်ႇပေႃးတီးယႃးၼၼ်ႉ ၽၢႆႇပႃႇတီႇၵမ်ဢႃႇၼႃႇၶဝ် ပိုၼ်ၽၢဝ်ႇဝႃႈ ၶဝ်ဢွင်ႇပႄႉ ဝႃႈၼႆယဝ်ႉ။ ၸွမ်းၽွင်းလူင်ၵဝ်ႇ Hun Sen ဢၼ်ဢုပ်ႉမိူင်းမႃး ႁူဝ်သိပ်းပီၼၼ်ႉ ဝၢႆးသေ ပၢင်လိူၵ်ႈတင်ႈ ဢၼ်ဢမ်ႇမီးၽၢႆႇၶႄႉၶဵင်ႇသေ လႆႈဢွင်ႇပႄႉ ပၢင်လိူၵ်ႈတင်ႈမႃး မိူဝ်ႈပီၵၢႆၼၼ်ႉ မၼ်းလႆႈဢဝ် ဢႃႇၼႃႇပၼ် Hun Manet သေ ၵမ်းၼႆႉၵေႃႈ လႅပ်ႈတေမီးတိုဝ်းတၢင်း တႃႇတေၶိုၼ်းၶဝ်ႈမႃးၼႂ်း ၵၢၼ်မိူင်းယူႇ ဝႃႈၼႆယဝ်ႉ။

ၽူႈမီးသုၼ်ႇလၢတ်ႈပႃႇတီႇ Sok Eysan ပိုၼ်ၽၢဝ်ႇမႃး မိူဝ်ႈဝၢၼ်းဝၼ်း ၽွင်းပၢင်လိူၵ်ႈတင်ႈယဝ်ႉၼၼ်ႉဝႃႈ ပႃႇတီႇၵူၼ်းမိူင်းၵမ်ႇပေႃးတီးယႃး (CPP) ဢၼ်ၵမ်ဢႃႇၼႃႇဝႆႉယၢမ်းလဵဝ်ၼႆႉ ၼႂ်းၵႃႈ ဢွင်ႈတီႈ တႅၼ်းၽွင်း 58 တီႈၼၼ်ႉ လႆႈဢွင်ႇပႄႉဝႆႉ တီႈဢေႇသုတ်း 50 တီႈယဝ်ႉ ဝႃႈၼႆ။ ယဝ်ႉၵေႃႈ လႆႈယိုၼ်ယၼ်မႃးဝႃႈ တေလိူၵ်ႈ ႁုၼ်ႇသႅၼ် ၵေႃႉဢၼ်ပဵၼ်ၸွမ်ၽွင်းလူင်ၵဝ်ႇၼၼ်ႉ ၶိုၼ်ႈပဵၼ် ၽူႈၼမ်းသၽႃး ဝႃႈၼႆယဝ်ႉ။

သင်ၸိူဝ်ႉဝႃႈ ႁုၼ်ႇသႅၼ် တေပဵၼ်မႃး ၽူႈၼမ်း သၽႃးၼိူဝ် တီႈ သၽႃး ဢၼ်တေတႄႇ တီႈၼႂ်းလိူၼ်ဢေႇပရႄႇ တေမႃးၼၼ်ႉၼႆၸိုင် သင်ၸိူဝ်ႉဝႃႈ ၶုၼ်ႁေႃၶမ်းၵမ်ႇပေႃးတီးယႃး မီးၶၢဝ်းတၢင်း ဢွၵ်ႇၵႂႃႇၼွၵ်ႈမိူင်းၼႆၸိုင် မၼ်းတေလႆႈဢဝ် ပုၼ်ႈၽွင်း ပဵၼ် ၽူႈယႂ်ႇၸိုင်ႈမိူင်းယဝ်ႉ။ ဢၼ်ပဵၼ် ၽွၼ်းၶႅပ်းၵၢင်ၸႂ် ပဵၼ်တၢင်းၵၢၼ် ၶွင် ပၢင်လိူၵ်ႈတင်ႈၼၼ်ႉတႄႉ ထႅင်ႈလၢႆလၢႆဝူင်ႈမႃးၵွၼ်ႇ ၵေႃႇမသျိၼ်ႇ ပၢင်လိူၵ်ႈတင်ႈၸင်ႇတေ ပိုၼ်ၽၢဝ်ႇ ဝႃႈဝႆႉၼင်ႇၼၼ်။

တီႈပၢင်လိူၵ်ႈတင်ႈၼၼ်ႉ လိူဝ်သေ CPP ဢၼ်ၵမ်ဝႆႉဢႃႇၼႃႇ၊ ၸိူဝ်းပဵၼ် ပႃႇတီႈ Funcinpec ဢၼ်ပႂ်ႉပႃးသဵတ်ႉၸႃႇ ၶုၼ်ႁေႃၶမ်း ​လႄႈ ပႃႇတီႇဢွၼ်ႇ 2 ဢွၼ် ၵေႃႈ ၶဝ်ႈၶႄႉၶဵင်ႇမႃးယဝ်ႉ။

မိူဝ်ႈပၢင်လိူၵ်ႈတင်ႈ ဢၼ်ပူၼ်ႉမႃး တီႈ ပီ 2018 ၼၼ်ႉ CPP လႆႈဢွင်ႇပႄႉမႃးတင်း 58 တီႈသေ တီႈပၢင်လိူၵ်ႈတင်ႈၼၼ်ႉ ဢမ်ႇမီးပႃႇတီႈလႂ် ၶဝ်ႈၶႄႉၶဵင်ႇ၊ ဢၼ်ပဵၼ် ပႃႇတီႇၽူတ်ႇၸွႆႈၸိူဝ်ႉၸၢတ်ႈၵမ်ႇပေႃးတီးယႃး Cambodia National Rescue Party ဢၼ်ပဵၼ် ပႃႇတီႇၽၢႆႇသၢၼ်ၶတ်းၼၼ်ႉၵေႃႈ ထုၵ်ႇယႃႉပႅတ်ႈမႃးယဝ်ႉ။

လုၵ်ႈၸုမ်း တႅၼ်းၽွင်းသၽႃးၼႆႉ လႆႈႁၢပ်ႇၵၢၼ်တႃႇ ႁူၵ်းပီ၊ ပၢင်လိူၵ်ႈတင်ႈ သၽႃးၸိူဝ်ႉၸၢတ်ႈၼႆႉ ႁႃႈပီ ၸတ်းႁဵတ်းၼိုင်ႈပွၵ်ႈ။ ၼႂ်းၵႃႈ တႅၼ်းၽွင်း 62 ဢွင်ႈၼၼ်ႉ တႃႇ 2 ဢွင်ႈၼႆႉ လုၵ်ႉတီႈ ၶုၼ်ႁေႃၶမ်း တၢင်ႇပၼ်သေ တႃႇ 2 ဢွင်ႈ ၼႆႉ လုၵ်ႉတီႈ သၽႃးတႂ်ႈ တၢင်ႇၶိုၼ်ႈမႃးယဝ်ႉ။

ငိူၼ်ႈငဝ်ႈတိုၼ်း

• VOA News. "ကမ္ဘောဒီးယား အထက်လွှတ်တော် ရွေးကောက်ပွဲမှာ အနိုင်ရကြောင်း အာဏာရပါတီကြေညာ" — VOA News, February 25, 2024
• Nikkei Asia. "Cambodia's ruling party claims victory in Senate election" — Nikkei Asia, February 25, 2024