ပၢင်ၵႅဝ်ႈ ဝၼ်းပုတ်ႉထၸဝ်ႈ တီႈ ႁိူၼ်းၵႅဝ်ႈၶၢဝ် ဢမႄႇရိၵၢၼ်ႇ
ဝၼ်းသုၵ်း၊ မေႇ 24၊ 2024
မိူဝ်ႈ မေႇ 23 ဝၼ်းၽတ်းၼၼ်ႉ တီႈႁိူၼ်းၵႅဝ်ႈၶၢဝ်ႇ ဢမႄႇရိၵၢၼ်ႇ လႆႈၸတ်းႁဵတ်း ပၢင်ၵႅဝ်ႈ ဝၼ်းပုတ်ႉထၸဝ်ႈ (ဝၼ်းဝေႇသၵ်ႉ) ဢၼ်ပဵၼ် ဝၼ်းထွတ်ႈဝၼ်းမျၢတ်ႈ ၸၢဝ်းပုတ်ႉထၶဝ်ၼၼ်ႉယဝ်ႉ။ ပၢင်ၵႅဝ်ႈႁိူၼ်းၵႅဝ်ႈၶၢဝ် ဢၼ်ႁဵတ်းတီႈ တိူၵ်ႈလုမ်းၸဝ်ႈၸွမ်ၸိုင်ႈၼၼ်ႉ Douglas Emhoff ဢၼ်ပဵၼ် ၸဝ်ႈၽူဝ် ၵႅမ်ၸွမ်ၸိုင်ႈ Kamala Haris လႆႈပၢင်းမုၼ်ၸဝ်ႈသေ လႆႈဢွၼ်ၵၼ် ယွၼ်းသူးသူင်ႇမဵတ်ႉတႃႇမႃးယဝ်ႉ။
ဝၢႆးသေ ၵျူဝ်းပၢႆႇတႅၼ်ႇ ႁၢပ်ႇဢဝ်ပုၼ်ႈၽွၼ်း ၸဝ်ႈၸွမ်ၸိုင်ႈယဝ်ႉ လွင်ႈၸတ်းႁဵတ်းပၢင်ၵႅဝ်ႈ ဝၼ်းပုတ်ႉထၸဝ်ႈ ဢၼ်ႁိူၼ်းၵႅဝ်ႈၶၢဝ် ဢွၼ်ႁူဝ်ႁဵတ်းၼႆႉ ၼႆႉပဵၼ် ပွၵ်ႈၵမ်းသီႇယဝ်ႉ။ လႆႈၽိတ်ႈမွၵ်ႇ ၽူႈတၢင်တူဝ်၊ ၽွင်းတၢင်မိူင်း ၸိူဝ်းပဵၼ်မိူင်း ဢၼ်ၸၢဝ်းပုတ်ႉထၶဝ်ယူႇၼမ် မိူၼ်ၼင်ႇ ၼေႇပေႃး၊ ဢိၼ်းတီးယႃး၊ သီႇရိလၢင်းၵႃ၊ ပင်းၵလႃးတဵတ်ႈ၊ ၵမ်ႇပေႃးတီႈယႃး၊ ထႆး၊ သိင်ႇၵႃႇပူဝ်ႇ၊ မူင်ႇၵူဝ်းလီးယႃး လႄႈ လၢဝ်း ၸိူဝ်းၼႆႉယဝ်ႉ။ လုမ်းၽွင်းတၢင် မိူင်းမၢၼ်ႈတႄႉ ဢမ်ႇႁၼ်လႆႈၶဝ်ႈပႃးၸွမ်း။
Douglas Emhoff ၸဝ်ႈၽူဝ်ႈ ၵႅမ်ၸဝ်ႈၸွမ်ၸိုင်ႈ မွၵ်ႇလၢတ်ႈ တီႈ ဝၼ်းပုတ်ႉထၸဝ်ႈၼၼ်ႉဝႃႈ ႁႂ်ႈယိပ်းဢဝ် လွင်ႈတၢင်း မဵတ်ႉတႃႇတြႃး၊ လွင်ႈယွၼ်ႇယေႃႈတူဝ် လႄႈ လွင်ႈငမ်းယဵၼ် ဢၼ်တင်းၵမ်ႇၽႃႇ ႁၢပ်ႉၶၢမ်ႇယုမ်ႇယမ်ဝႆႉၼၼ်ႉ ၸတ်းႁဵတ်းၵႂႃႇ သေ ဢဝ်ဢွၼ်ၵၼ် ၵေႃႇသၢင်ႈ ၸၢတ်ႈပၢၼ်မိူဝ်းၼႃႈ ဢၼ်တိူဝ်းၶႅမ်ႉလႅပ်ႈၼၼ်ႉ ဝႃႈၼႆယဝ်ႉ။ ၽူႈမီးၸၼ်ႉ ႁိူၼ်းၵႅဝ်ႈၶၢဝ် လၢတ်ႈဝႃႈ တီႈ မိူင်းႁူမ်ႈတုမ် ဢမႄႇရိၵၢၼ်ႇၼႆႉ ဝတ်ႉၸၢဝ်းပုတ်ႉထ မီးမွၵ်ႈ သၢမ်ႁဵင်ၼႆႉသေ ၵဵဝ်ႇလူၺ်ႈတၢင်းႁၼ်ထိုင် သႃႇသၼႃႇ ဢမ်ႇမိူၼ်ၵၼ်၊ လွင်ႈပွင်ႇၸႂ်ႁပ်ႉယိုၼ်၊ မဵတ်ႉတႃႇတြႃး လႄႈ တႃႇႁႂ်ႈတင်းသဵင်ႈ ႁူမ်ႈႁွမ်းၶဝ်ႈပႃးလႆႈၼၼ်ႉ ၸင်ႇလႆႈႁူမ်ႈၵၼ် ၸတ်းႁဵတ်း ဝႃႈၼႆယဝ်ႉ။
ၸဝ်ႈၸွမ်ၸိုင်ႈ ၵျူဝ်းပၢႆႇတႅၼ်ႇ လႄႈ မႄးမၼ်းၵေႃႈ လႆႈႁဵတ်းဢွၵ်ႇၶေႃႈပိုၼ်ၽၢဝ်ႇသေ တူင်ႉတင်ႉ ၸၢဝ်းပုတ်ႉထ ဢၼ် ႁဵတ်းပၢင်ပွႆး ဝၼ်းပုတ်ႉထၸဝ်ႈ တူဝ်ႈလူၵ်ႈၼၼ်ႉယူႇ။ တီႈၼႂ်း ၶေႃႈပိုၼ်ၽၢဝ်ႇၼၼ်ႉ လၢတ်ႈဝႆႉဝႃႈ လႆႈယိုၼ်ယၼ် ၵူၼ်းဢမႄႇရိၵၢၼ်ႇ ၸိူဝ်းပဵၼ်ၸၢဝ်းပုတ်ႉထ ၸိူဝ်းဢၼ်မီးၽွၼ်းလီတေႃႇ မိူင်းႁူမ်ႈတုမ်ဢမႄႇရိၵၢၼ်ႇၼၼ်ႉယူႇ။
ၸွမ်းလူၺ်ႈ ၽိင်ႈထုင်းၸၢဝ်းပုတ်ထသေ ဝၼ်းလိူၼ်ႁူၵ်းမူၼ်းၼႆႉ လႆႈမၵ်းမၼ်ႈပဵၼ်ဝၼ်းလၢၵ်ႇလၢႆးၶိုၵ်ႉတွၼ်း ယွၼ်ႉဝႃႈ ပဵၼ်ဝၼ်း ဢၼ်ၼေႃႇလွင်း ၸဝ်ႈၸၢႆးသိတ်ႉတထ ၵိူတ်ႇ၊ ပဵၼ်ဝၼ်း လႆႈသပ်ႉပၺ်ႇၺုတၺၢၼ်ႇ၊ ပဵၼ်ဝၼ်း ဢဝ်ၼိပ်ႉပၢၼ်ႇ ၶဝ်ႈသူၼ်မၢၵ်ႇႁၢၵ်ႈၶမ်း ၼၼ်ႉယဝ်ႉ။ တီႈဝၼ်း ပုတ်ႉထၸဝ်ႈ ဢၼ်ဢိင်ၼိူဝ် ဝၼ်းလိူၼ်ႁူၵ်းမူၼ်းၼၼ်ႉသေ ပဵၼ်မႃးၼၼ်ႉ ပေႃးပဵၼ်ဝၼ်းၸိူဝ်းၼၼ်ႉ တီႈမိူင်းမၢၼ်ႈ လႄႈ မိူင်းဢသေးသျႃးၵမ်ႉၼမ် ဢွၼ်ၵၼ် ၸတ်းႁဵတ်းပၢင်ပွႆးၵူႈမဵဝ်းမဵဝ်းသေ ဢွၼ်ၵၼ် ၵမ်သိၼ် ယွၼ်းသူးယဝ်ႉ။
ငိူၼ်ႈငဝ်ႈတိုၼ်း
[မႄးထတ်း | မႄးထတ်းငဝ်ႈငႃႇ]- VOA News. "အိမ်ဖြူတော် ဗုဒ္ဓနေ့အခမ်းအနား" — VOA News, May 24, 2024
- Jack Jenkins. "White House hosts fourth annual Vesak celebration" — Religion News Service, May 23, 2024
- The White House. "Second Gentleman Emhoff Hosts the Fourth White House Vesak Celebration" — The White House, May 24, 2024
