Jump to content

ပဵၼ်လွင်ႈယိုဝ်း ထရမ်ႉ တီႈပၢင်ၵႅဝ်ႈ၊ ၸွမ်ပွင်ၸိုင်ႈၵဝ်ႇထရမ်ႉ လွတ်ႈၽေးယူႇ

ထႅမ်သႂ်ႇ လိင်ႉၶ်
လုၵ်ႉတီႈ Wikinews မႃး

ဝၼ်းဢႃးတိတ်ႉ၊ ၸူႇလၢႆႇ 14၊ 2024

လိၵ်ႈႁွမ်တွမ် ၸိူဝ်းၵဵဝ်ႇၵပ်း

<dynamicpagelist> category=ပိုၼ်ဢွၵ်ႇယဝ်ႉ category=မိူင်းႁူမ်ႈတုမ် ဢမႄႇရိၵ notcategory=disputed notcategory=no publish namespace=Main addfirstcategorydate=true count=5 </dynamicpagelist>

ဢွင်ႈတီႈ မိူင်းႁူမ်ႈတုမ် ဢမႄႇရိၵ
ႁူမ်ႈသၢင်ႈ!
မိူင်းႁူမ်ႈတုမ် ဢမႄႇရိၵ
မိူင်းႁူမ်ႈတုမ် ဢမႄႇရိၵ
ႁၢင်ႈၽၢင်ၽႅၼ်ႇလိၼ် ဢၼ်ၼႄဝႆႉ တီႈယူႇ ၽူႈပူၼ်ႉပႅၼ်၊ တေႃႇၼႄႇထရမ်ႉ လႄႈ ၸုမ်းၽၢႆႇလပ်ႉ ဢၼ်ၶိုၼ်းတွပ်ႇတႅၼ်း လွင်ႈပူၼ်ႉပႅၼ်
ၸွမ်ပွင်ၸိုင်ႈပၢႆႇတႅၼ်ႇ မွၵ်ႇလၢတ်ႈ လွင်ႈ ထရမ်ႉၺႃးယိုဝ်း

ၽူႈမီးပုၼ်ႈၽွၼ်း ၽၢႆႇႁူမ်ႇလူမ်ႈၶဝ် လႆႈဢဝ် ထရမ်ႉ ဢွၵ်ႇၶဵင်ႇၵႂႃႇ ဝၢႆးသေ ၵူၼ်းတင်းၼမ် လႆႈငိၼ်းသဵင်ၵွင်ႈ တီႈပၢင်ၵုမ် ၵၢၼ်ႁႃသဵင် ထရမ်ႉ တီႈဝဵင်း Butler ၸႄႈမိူင်း Pennsylvania ၼၼ်ႉယဝ်ႉ။ ပၢင်ၵုမ်ၶွတ်ႇၽွတ်ႈ ဢၼ်ၸတ်းႁဵတ်းမိူဝ်ႈဝၼ်းတီႈ 13 လိူၼ်ၸူႇလၢႆႇ ယၢမ်းၵၢင်ၶမ်ႈ မွၵ်ႈ 6 မူင်းၼၼ်ႉ လႆႈငိၼ်းသဵင်ယိုဝ်းၵၼ်။ ၸွမ်ပွင်ၸိုင်ႈၵဝ်ႇ ထရမ်ႉၼႆႉ မိူဝ်ႈၽွင်း ၽူႈမီးပုၼ်ႈၽွၼ်း ၽၢႆႇႁူမ်ႇလူမ်ႈၶဝ် ဢွၼ်မၼ်းဢွၵ်ႇၵႂႃႇၼၼ်ႉ တေလႆႈႁၼ် မၼ်းၵမ်တႃမိုဝ်းသေ ယုၵ်ႉမိုဝ်းမၼ်းဝႆႉ။ ၵူၺ်းၵႃႈ တီႈၼႃႈတႃၼၼ်ႉ မီးလိူတ်ႈဢိတ်းဢွတ်း။

ၸွမ်ပွင်ၸိုင်ႈၵဝ်ႇ တေႃႇၼႄႇထရမ်ႉ လွတ်ႈၽေးလီယူႇၼႆ ၽူႈတၢင်လၢတ်ႈ ၸုမ်းႁူမ်ႇလူမ်ႈၶိုၵ်ႉတွၼ်း ၸၼ်ႉသုင် မိူင်းဢမႄႇရိၵၢၼ်ႇ ဢၼ်ပဵၼ် Secret Service ၼၼ်ႉ လၢတ်ႈတီႈၼိူဝ် ၼႅတ်ႉတူင်ႇဝူင်းၵူၼ်း X ၼၼ်ႉယူႇ။ ငဝ်းလၢႆးႁူဝ်ယွႆႈမၼ်းတႄႉ တေပိုၼ်ၽၢဝ်ႇထႅင်ႈၵမ်းၼိုင်ႈ။ ဝၢႆးသေ လႆႈငိၼ်းသဵင်ၵွင်ႈယဝ်ႉၵမ်းလဵဝ် ၽူႈမီးပုၼ်ႈၽွၼ်း ၽၢႆႇႁူမ်ႇလူမ်ႈၶဝ် ၶိုၼ်ႈၼိူဝ်ၶဵင်ႇသေ ႁႄႉၵင်ႈ ထရမ်ႉလႄႈ ၵူၼ်းတင်းၼမ် ဢွၼ်ၵၼ် ႁွင်ႉသႅၼ်ႇ ၼႆယဝ်ႉ။ မိူဝ်ႈၸဝ်ႈၼႃႈတီႈ ၽၢႆႇႁူမ်ႇလူမ်ႈၶဝ် ဢွၼ်ဢဝ် ၸွမ်ပွင်ၸိုင်ႈၵဝ်ႇ ထရမ်ႉ လူင်းၶဵင်ႇ၊ ထရမ်ႉ ယုၵ်ႉမိုဝ်း ယုၵ်ႉၵွၵ်းႁူဝ်မၼ်း။ လုၵ်ႉတီႈၼၼ်ႈသေ ဢဝ်ၵႃးႁူမ်ႇလူမ်ႈ ဢဝ်ဢွၵ်ႇမႃး။

ၽူႈဢွၼ်ႁူဝ် ပႃႇတီႇတီႇမူဝ်ႇၶရႅတ်ႉ ၼႂ်းသၽႃး Hakeim Jeffries ယွၼ်းသူးပၼ် ၸွမ်ပွင်ၸိုင်ႈၵဝ်ႇ ထရမ်ႉ။ တႅမ်ႈလိၵ်ႈၼိူဝ်သိုဝ်ႇတူင်ႇဝူင်းၵူၼ်း X သေ ယွင်ႈယေႃး ၸုမ်းပၵ်းပိူင်မၢႆမီႈ ဢၼ်ၵုမ်းၵမ်လွင်ႈၼႆႉ ဝႆးဝႆးၼၼ်ႉယူႇ။ ယဝ်ႉၵေႃႈတႅမ်ႈဝႃႈ လွင်ႈႁုၵ်းႁၢႆႉၵၢၼ်မိူင်း ၸိူင်ႉႁိုဝ်ၵေႃႈ ႁဝ်းဢမ်ႇယွမ်းႁပ်ႉလႆႈ။ ၽူႈတႅၼ်းၽွင်း ၸႄႈမိူင်း ၽလေႃႇရီႇတႃႇ ရီႇပၢပ်ႉပလိၵ်ႇၵႅၼ်ႇ မႃႇၶူဝ်ႇရူဝ်ႇပီႇယႃႇၵေႃႈ တႅမ်ႈဝႆႉ တီႈၼႃႈလိၵ်ႈ တူင်ႇဝူင်းၵူၼ်း X ဝႃႈ ၽြႃးပဵၼ်ၸဝ်ႈ ၵႅတ်ႇၶႄပၼ် ၸွမ်ပွင်ၸိုင်ႈ ထရမ်ႉၼႆယဝ်ႉ။

ၵပ်းၵၢႆႇလူၺ်ႈ လွင်ႈဢၼ်ၸွမ်ပွင်ၸိုင်ႈၵဝ်ႇထရမ်ႉ ၺႃးယိုဝ်းတီႈၵၢၼ်ႁႃသဵင် ပၢင်လိူၵ်ႈတင်ႈၼၼ်ႉသေ ၸွမ်ပွင်ၸိုင်ႈၵဝ်ႇ ဢူဝ်ႇပႃးမႃးၵေႃႈ တႅမ်ႈဝႆႉၼိူဝ် သိုဝ်ႇတူင်ႇဝူင်းၵူၼ်း X ဝႃႈ လွင်ႈၵေႃႇၵၢၼ်ႁၢႆႉၵၢၼ်မိူင်းၼႆႉ ဢမ်ႇယွမ်းႁပ်ႉလႆႈ ၼႂ်းမိူင်းတီႇမူဝ်ႇၶရေႇၸီႇ သေဢိတ်းၼႆယဝ်ႉ။ ႁူဝ်ပဝ်ႈၵဝ်ႇ လုမ်းတႅၼ်းၽွင်း ၼႅၼ်ႇသီႇ ပႄႇလူဝ်ႇသီႇ လၢတ်ႈဝႃႈ လွင်ႈႁုၵ်းႁၢႆႉၵၢၼ်မိူင်းၼႆႉ ဢမ်ႇယွမ်းႁပ်ႉလႆႈ ၼႆယဝ်ႉ။ မၼ်းလၢတ်ႈဝႃႈ ယိၼ်းၸူမ်းၶွပ်ႈၸႂ်ထိုင် ၽြႃးပဵၼ်ၸဝ်ႈ တီႈဢၼ်ၸွမ်ပွင်ၸိုင်ႈၵဝ်ႇ ထရမ်ႉ လွတ်ႈၽေးလီၼၼ်ႉယူႇ။ ၸွမ်ပွင်ၸိုင်ႈ ၵျူဝ်းၿၢႆႇၻႅၼ်ႇၵေႃႈ လၢတ်ႈဝႃႈ လွင်ႈႁုၵ်းႁၢႆႉၸိူင်ႉၼင်ႇၼႆ တီႈမိူင်းဢမေႇရိၵၢၼ်ႇၼႆႉ မၼ်းဢမ်ႇႁပ်ႉလႆႈ ၼႆယဝ်ႉ။ တုၵ်းယွၼ်းႁႂ်ႈပတ်းပိုၼ်ႉမိူင်းႁူမ်ႈတုမ် ၽွမ်ႉႁူမ်ႈၵၼ်သေ သၢၼ်ၶတ်းလွင်ႈၼႆႉ။ ၽူႈၼမ်းၼႂ်းသၽႃး မၢႆႉၵျွၼ်ႇသၼ်ႇၵေႃႈ သၢၼ်ၶတ်း လွင်ႈႁဵတ်းသၢင်ႈ ဢၼ်လီထၢင်ႇထိူမ် ဢၼ်ပဵၼ် လွင်ႈႁုၵ်းႁၢႆႉၵၢၼ်မိူင်း ဢၼ်တေႃႇသူႈ ပၢင်တုမ်ၵူၼ်းမိူင်း ဢၼ်ၵတ်းယဵၼ်ၼၼ်ႉယူႇ။

ၸွမ်ပွင်ၸိုင်ႈၵဝ်ႇ ထရမ်ႉ တႅမ်ႈဝႆႉ တီႈၼိူဝ် ၼႅင်ႈသိုဝ်ႇတူင်ႇဝူင်းၵူၼ်း Truth မၼ်းဝႃႈ မၼ်းယိၼ်းၸူမ်းၶွပ်ႈၸႂ်ထိုင် ၽၢႆႇႁူမ်ႇလူမ်ႈ လႄႈ ၽူႈမီးပုၼ်ႈၽွၼ်း ၽၢႆႇႁူမ်ႇလူမ်ႈ တင်းသဵင်ႈ ဢၼ်ၸွႆႈထႅမ် လွင်ႈယိုဝ်းၵၼ် ဝႆးဝႆးၼၼ်ႉယူႇ။ မၼ်းၸဝ်ႈ လၢတ်ႈၼႄလွင်ႈမွင်ၸႂ်ၸွမ်း ၵူၼ်းႁိူၼ်းၵူၼ်းယေး ၵူၼ်းၵေႃႉၼိုင်ႈ ဢၼ်လႆႈတၢႆမၢတ်ႇၸဵပ်း ၼႂ်းလွင်ႈယိုဝ်းၵၼ်ၼၼ်ႉ။ သိုဝ်ႇၶၢဝ်ႇဢမႄႇရိၵၢၼ်ႇၶဝ် ပိုၼ်ၽၢဝ်ႇဝႃႈ ၵူၼ်းၵေႃႉဢၼ်ယိုဝ်းၼၼ်ႉ လႆႈတၢႆထင်တီႈၵမ်းလဵဝ်ၼႆယဝ်ႉ။


ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ပဵၼ်လွင်ႈယိုဝ်း_ထရမ်ႉ_တီႈပၢင်ၵႅဝ်ႈ၊_ၸွမ်ပွင်ၸိုင်ႈၵဝ်ႇထရမ်ႉ_လွတ်ႈၽေးယူႇ&oldid=1892"