တေဢဝ်မၢၵ်ႇမိသ်ႉသၢႆးႁႅင်းယႂ်ႇ သူင်ႇပၼ် ယူႇၶရဵၼ်းဢွၼ်တၢင်း - ႁိူၼ်းၵႅဝ်ႈၶၢဝ်ဢမႄႇရိၵၢၼ်ႇ

ဝၼ်းသုၵ်း၊ ၸုၼ်ႇ 21၊ 2024

ဝၢႆးသေ ရတ်ႈသျႃး ဢဝ်မၢၵ်ႇမိသ်ႉသၢႆး လႄႈ တရူၼ်း တိုၵ်းတေႃး ႁူင်းၸၢၵ်ႈပၼ်ၾႆးၾႃႉ ယူႇၶရဵၼ်းယဝ်ႉ ႁိူၼ်းၵႅဝ်ႈၶၢဝ် လႆႈပိုၼ်ၽၢဝ်ႇ မိူဝ်ႈဝၼ်းၽတ်းၼၼ်ႉဝႃႈ တေဢဝ် မၢၵ်ႇမိသ်ႉသၢႆး ၵၢၼ်ၵႅတ်ႇၵင်ႈၵၢင်ႁၢဝ် ဢၼ်ႁႅင်းယႂ်ႇ သူင်ႇပၼ် ယူႇၶရဵၼ်း ဝႃႈၼႆယဝ်ႉ။

ၽူႈမီးသုၼ်ႇလၢတ်ႈ ၶွင်ႇသီႇၵၢၼ်ႁူမ်ႇလူမ်ႈၸိုင်ႈမိူင်း ႁိူၼ်းၵႅဝ်ႈၶၢဝ် ၸဝ်ႈၸွမ်ၸိုင်ႈ ၵျွၼ်ႇၵႃႇပီႇ လႆႈမွၵ်ႇလၢတ်ႈဝႃႈ တေဢဝ် မၢၵ်ႇမိသ်ႉသၢႆး Patriot လႄႈ NASAM ႁူဝ်ပၢၵ်ႇမၼ်း ဢၼ်ႁဵတ်းဢွၵ်ႇလိုၼ်းသုတ်းၼၼ်ႉ သူင်ႇပၼ်ယူႇၶရဵၼ်း ဢွၼ်တၢင်းဝႃးၼႆႉယဝ်ႉ။ မၢၵ်ႇမိသ်ႉသၢႆးၸိူဝ်းၼႆႉ လႆႈႁၢင်ႈႁႅၼ်းဝႆႉ တႃႇသူင်ႇပၼ် ထၢႆႇဝၢၼ်း လႄႈ ဢိတ်ႇသရေးယဝ်ႉ။ ၵူၺ်းၵႃႈဝႃႈ ၽၢႆႇထၢႆႇဝၢၼ်း လႄႈ ဢိတ်ႇသရေးၶဝ်ၵေႃႈ လႆႈၵမ်ႉထႅမ် တႃႇႁႂ်ႈပၼ် ယူႇၶရဵၼ်း ဢွၼ်တၢင်းယူႇ ဝႃႈၼႆယဝ်ႉ။

မၼ်းလၢတ်ႈဝႃႈ လူင်ပွင်ၸိုင်ႈ ဢမႄႇရိၵၢၼ်ႇၼႆႉ လႆႈတႅပ်းတတ်းယၢပ်ႇယၢပ်ႇယဵၼ်းယဵၼ်း တွၼ်ႈတႃႇဢဝ် မၢၵ်ႇမိသ်ႉသၢႆး ပၼ်တီႈဢၼ် လူဝ်ႇၼႅၼ်ႇ ဢွၼ်တၢင်းၼၼ်ႉ ဝႃႈၼႆယဝ်ႉ။ ဝၢႆးသေ ယူႇၶရဵၼ်းၶဝ် ပိုၼ်ၽၢဝ်ႇမႃးဝႃႈ ၶဝ်လႆႈထူပ်း လွင်ႈၾႆးၾႃႉၶၢတ်ႇၼႆသေ ထႅင်ႈဝၼ်းၼိုင်ႈၵေႃႈ ၽၢႆႇရတ်ႈသျႃးၶဝ် ဢဝ် တရူၼ်း လႄႈ မၢၵ်ႇမိသ်ႉသၢႆး တိုၵ်းတေႃး ႁူင်းၸၢၵ်ႈၾႆးၾႃႉ ယူႇၶရဵၼ်းၶဝ် တင်းၶိုၼ်းၼၼ်ႉယဝ်ႉ။ တီႈယူႇၶရဵၼ်းၼၼ်ႉ ႁူင်းၸၢၵ်ႈပၼ်ၾႆးၾႃႉ ဢၼ်ၸႂ်ႉႁႅင်းမႆႈ လႆႈလုလႅဝ်ၵႂႃႇ လင်ၼိုင်ႈသေ ၵူၼ်းႁဵတ်းၵၢၼ်သၢမ်ၵေႃႉ လႆႈတၢင်းၸဵပ်းမၢတ်ႇၵႂႃႇဝႃႈၼႆသေ ဢၼ်ပဵၼ် ႁွင်ႈၵၢၼ်ပၼ်ၾႆးၾႃႉ ယူႇၶရဵၼ်း Ukrenergo လၢတ်ႈမိူဝ်ႈဝၼ်းၽတ်းတွၼ်ႈၸဝ်ႉၼၼ်ႉဝႃႈ ၸိူဝ်းပဵၼ် ႁူင်းၸၢၵ်ႈၾႆးၾႃႉ ဢၼ်မီးတီႈ Kyiv ၊ Donetsk လႄႈ Dnipropetrovsk ၼၼ်ႉ လႆႈလ်ုႉလႅဝ်ၵႂႃႇ ဝႃႈၼႆယဝ်ႉ။

ၸဝ်ႈၸွမ်ၸိုင်ႈယူႇၶရဵၼ်း ဝေႃႇလေႃႇတီးမႃးရ် ၸႄးလႅၼ်းသၵီး လၢတ်ႈမႃး မိူဝ်ႈႁူဝ်လိူၼ်ၼႆႉဝႃႈ ယွၼ်ႉပိူဝ်ႈ လွင်ႈတိုၵ်းတေႃးရတ်ႈသျႃးၶဝ်သေ ႁႅင်းၾႆးၾႃႉ ဢၼ်ပၼ်လႆႈ တီႈယူႇၶရဵၼ်းၼႆႉ လႆႈယွမ်းတူၵ်းၵႂႃႇ ၶိုင်ႈၼိုင်ႈသေ တိုၵ်ႉႁႃ လွၵ်းလၢႆး တွၼ်ႈတႃႇ ႁႂ်ႈတိူဝ်းၶႅမ်ႉမႃးလိူဝ်ၼႆႉ ဝႃႈၼႆယဝ်ႉ။ တပ်ႉၵၢင်ႁၢဝ်ယူႇၶရဵၼ်း လၢတ်ႈဝႃႈ မိူဝ်ႈဝၼ်းၽတ်းၼၼ်ႉ တီႈ ၸႄႈမိူင်း ယူႇၶရဵၼ်း 10 ၸႄႈမိူင်းၼၼ်ႉ ၼႂ်းၵႃႈ မၢၵ်ႇမိသ်ႉသၢႆး ၵဝ်ႈလုၵ်ႈ ဢၼ်ရတ်ႈသျႃးၶဝ် ပိုတ်းယိုဝ်းမႃးၼၼ်ႉ ယိုဝ်းတူၵ်းလႆႈ ႁႃႈလုၵ်ႈ လႄႈ ယိုဝ်းတူၵ်းလႆႈ တရူၼ်း 27 လမ်း ဝႃႈၼႆယဝ်ႉ။ ၶဝ်ဝႆႉယိူင်းမၢႆပိူင်လူင်သေ တိုၵ်းတေႃး ထုင်ႉ Dnipro petrovsk ယူႇၶရဵၼ်း ဝႃႈၼႆယဝ်ႉ။

ယူႇၶရဵၼ်ႈၶဝ်ၸမ်ႉ ဝႆႉယိူင်းမၢႆသေ ဢဝ် တရူၼ်းတိုၵ်းတေႃး တီႈသိမ်းၼမ်ႉမၼ်းမဵၼ် ဢၼ်မီးတီႈ ထုင်ႉၵရႃႇၸၼူဝ်ႇၻႃႇ တီႈ ပွတ်းၸၢၼ်းမိူင်းရတ်ႈသျႃးၼၼ်ႉ ဝႃႈၼႆယဝ်ႉ။

ၸွင်ႇမီးတၢင်းႁၼ်ထိုင်ၼိူဝ် ၶၢဝ်ႇဢၼ်ၼႆႉႁိုဝ်? ပိုၼ်ၽႄႈပၼ်တႃႉ!