တီႈမၢၵ်ႇတႅၵ်ႇ လႄႇပႃႇၼွၼ်ႇပွတ်းၸၢၼ်း ၵူၼ်းၸုမ်းၸၢတ်ႈၸိုင်ႈလုမ်ႈၾႃႉ လႆႈတၢင်းၸဵပ်းမၢတ်ႇ

ဝၼ်းဢႃးတိတ်ႉ၊ မၢတ်ႉၶျ် 31၊ 2024 

ၵူၼ်းၸုမ်းၸၢတ်ႈၸိုင်ႈလုမ်ႈၾႃႉ တီႈ လႄႇပႃႇၼွၼ်ႇ (ၶႅပ်းႁၢင်ႈၵဝ်ႇ)

ၸုမ်းၸၢတ်ႈၸိုင်ႈလုမ်ႈၾႃႉ လၢတ်ႈဝႃႈ ယွၼ်ႉပိူဝ်ႈ မၢၵ်ႇလူင် တူၵ်းသႂ်ႇႁိမ်း ၵူၼ်းႁၢပ်ႇၵၢၼ် ၸုမ်းၸၢတ်ႈၸိုင်ႈလုမ်ႈၾႃႉ ဢၼ်တိုၵ်ႉလဵပ်ႈႁဵၼ်း သၢႆငၢႆၵၢၼ်သိုၵ်းယူႇတီႈ မိူင်းလႄႇပႃႇၼွၼ်ႇ ပွတ်းၸၢၼ်းၼၼ်ႉလႄႈ ၵူၼ်းသီႇၵေႃႉ လႆႈတၢင်းၸဵပ်းမၢတ်ႇၵႂႃႇဝႃႈၼႆယဝ်ႉ။ ၸုမ်းလဵပ်ႈႁဵၼ်းတူၺ်းထိုင် လွင်ႈၵိုတ်းတိုၵ်း ၸုမ်းၸၢတ်ႈၸိုင်ႈလုမ်ႈၾႃႉ UNTSO ပိုၼ်ၽၢဝ်ႇဝႃႈ မၢၵ်ႇလူင်တူၵ်းတႅၵ်ႇၺႃး ႁိမ်း လုၵ်ႈၸုမ်း UNTSO သီႇၵေႃႉ ဢၼ်ၶဝ် တိုၵ်ႉပႆတိၼ်ၸွမ်း လႅၼ်လိၼ် ဢိတ်ႇသရေး လႄႈ လႄႇပႃႇၼွၼ်ႇယူႇ ဝႃႈၼႆယဝ်ႉ။

ၼႆႉ မၼ်းပဵၼ်ၵႂႃႇတီႈ လႅၼ်လိၼ် ဢၼ် တပ်ႉသိုၵ်းဢိတ်ႇသရေး လႄႈ ၸုမ်း ႁႅတ်ႉသ်ပူဝ်ႇလႃႇ ဢၼ်မီးတီႈၼႂ်း လႄႇပႃႇၼွၼ်ႇၼၼ်ႉ ၶဵင်ႇပိုတ်းယိုဝ်းၵၼ်ယူႇၼၼ်ႉယဝ်ႉ။ ၽၢႆႇ UNTSO ပႆႇၸၢင်ႈလၢတ်ႈဝႃႈ မၢၵ်ႇဢၼ်ၼႆႉ မၼ်းလုၵ်ႉၽၢႆႇလႂ်မႃးၼႆသေတႃႉ ၽၢႆႇလႄႇပႃႇၼွၼ်ႇတႄႉဝႃႈ မၼ်းလုၵ်ႉတီႈတၢင်း ၽၢႆႇဢိတ်ႇသရေးသေမႃး ဝႃႈၼႆယဝ်ႉ။ တီႈၶေႃႈပိုၼ်ၽၢဝ်ႇ ၸုမ်းၸၢတ်ႈၸိုင်ႈလုမ်ႈၾႃႉၼၼ်ႉလၢတ်ႈဝႃႈ လွင်ႈဢၼ်ဝႆႉယိူင်းမၢႆၼိူဝ် ၵူၼ်းႁၢပ်ႇၵၢၼ် ၸုမ်းၸၢတ်ႈၸိုင်ႈလုမ်ႈၾႃႉ ဢၼ်ပႂ်ႉထိင်းလွင်ႈငမ်းယဵၼ်ၼၼ်ႉ တိုၼ်းဝႃႈ ပဵၼ်လွင်ႈ ဢမ်ႇယွမ်းႁပ်ႉလႆႈလႃးလႃး ဝႃႈၼႆယဝ်ႉ။

UNTSO ၶိုၼ်းသိုပ်ႇတုၵ်းယွၼ်း တင်းသွင်ပႃႈသွင်ၽၢႆႇဝႃႈ ဢမ်ႇမီးလွင်ႈမီးတၢင်းမၼ်းသေ ယႃႇပေႁႂ်ႈလႆႈပဵၼ် လွင်ႈပိုတ်းယိုဝ်းၵၼ်ထႅင်ႈ ၼႆယဝ်ႉ။ ၼႂ်းၵႄႈ တပ်ႉသိုၵ်းဢိတ်ႇသရေး လႄႈ ၸုမ်း ႁိတ်ႉသ်ပူဝ်ႇလႃႇ ဢၼ်ၵမ်ႉထႅမ်ၽၢႆႇ ၸုမ်းၵေႃႇၵၢၼ်ႁၢႆႉ ႁႃးမၢတ်ႉသ် ၶဝ်ၼၼ်ႉ မီးလွင်ႈပိုတ်းယိုဝ်းၵၼ်ယူႇ ၵူႈဝၼ်းယဝ်ႉ။

ၸုမ်းၽၵ်ႇလိူၼ်လႅင် ပႃးလဵတ်ႈသတၢႆး လၢတ်ႈဝႃႈတႄႉ တီႈဝဵင်းၵႃႇၸႃႇၼၼ်ႉ ယွၼ်ႉပဵၼ်လွင်ႈဢဝ်ၵွင်ႈယိုဝ်းတီႈ ဢၼ်ၽႄပၼ်ၶဝ်ႈၼမ်ႉတၢင်းၵိၼ်လႄႈ၊ ယွၼ်ႉၵူၼ်းယဵပ်ႇၺႃးၵၼ်တဵင်ၵၼ်သေ ၵူၼ်းဢၼ်လႆႈတၢႆၵႂႃႇ မီး ဢမ်ႇယွမ်း ႁႃႈၵေႃႉ ဝႃႈၼႆႉယဝ်ႉ။ တီႈၼႂ်း ငဝ်းတူင်ႉၼၼ်ႉ လႆႈႁၼ် မိူဝ်ႈၶၢဝ်းႁူဝ်မိူင်းသႂ်ႇၼၼ်ႉ လႆႈႁၼ်လူတ်ႉၸိူဝ်းတၢင်ႇ ၶူဝ်းၸွႆးထႅမ် ၶဵၼ်သေႁေႃလတ်းၵႂႃႇတီႈ ဢွင်ႈတီႈၽႆးမႆႈ တီႈႁိမ်း ဢၼ်ၽႄပၼ် ၶဝ်ႈၼမ်ႉတၢင်းၵိၼ်ၼၼ်ႉၼႆယဝ်ႉ။

တီႈၼႂ်း ငဝ်းတူင်ႉၼၼ်ႉ လႆႈငိၼ်းပႃး သဵင်ႈၵွင်ႈၸိူဝ်းၼႆႉယဝ်ႉ။ ၵူၼ်းၸိူဝ်းတူဝ်ထူပ်းတႃႁၼ်လၢတ်ႈဝႃႈတႄႉ သဵင်ၵွင်ႈမၢင်ၸိူဝ်းၼႆႉ ပဵၼ်သဵင်ၵွင်ႈ ဢၼ်လၼ်ႇပၼ်ၽၢင်ႉ ဝႃႈၼႆႉယဝ်ႉ။ ၸုမ်းၽၢၵ်ႇလိူၼ်လႅင် ပႃးလဵတ်ႈသတၢႆး လၢတ်ႈဝႃႈတႄႉ ၵူၼ်းႁူဝ်ႁဵင် ဢွၼ်ၵၼ်ပႂ်ႉတီႈဢၼ် လူတ်ႉဢၼ်တၢင်ႇၶဝ်ႈၼမ်ႉတၢင်းၵိၼ် မႃး 15 တေၽႅဝ်မႃးၼၼ်ႉသေ ၸင်ႇလႆႈမီး လွင်ႈလူႉတၢႆၸိူင်ႉၼႆယဝ်ႉ ဝႃႈၼႆ။

ငိူၼ်ႈငဝ်ႈတိုၼ်း

• VOA News. "လက်ဘနွန်တောင်ပိုင်းပေါက်ကွဲမှု ကုလဝန်ထမ်းတချို့ ဒဏ်ရာရ" — VOA News, March 31, 2024
• Bassem Mroue and Kareem Chehayeb. "3 UN military observers, a Lebanese interpreter wounded in blast while patrolling southern border" — Associated Press, March 31, 2024
• Reuters. "Three UN observers and a translator wounded in south Lebanon, peacekeeping mission says" — Reuters, March 31, 2024
• Middle East Monitor. "3 UN peacekeepers injured in Israeli attack in Lebanon" — Middle East Monitor, March 30, 2024