Kemi Badenoch ပဵၼ်မႃး ၽူႈဢွၼ်ႁူဝ် ပႃႇတီႇ ၶွၼ်ႇသႃႇဝေးထိပ်ႉ မိူင်းယူႇၶေႇ
ဝၼ်းဢႃးတိတ်ႉ၊ ၼူဝ်ႇဝႅမ်ႇပႃႇ 3၊ 2024
ဝၢႆးသေ လႆႈဢွင်ႇပႄႉ ပၢင်ၶႄႉၶဵင်ႇ ၽူႈဢွၼ်ႁူဝ် ဢၼ်ပၼ်ၵႂၢမ်းမၼ်ႈဝႃႈ တေၶိုၼ်းဢဝ် လၵ်းၵၢၼ်ပႃႇတီႇ ဢၼ်တႄႇတင်ႈမႃးၼၼ်ႉယဝ်ႉ ၶႄႇမီႇ ပတႅၼ်ႇၼေႃႉ ပဵၼ်မႃး ၽူႈဢွၼ်ႁူဝ်မႂ်ႇ ပႃႇတီႇ ၶွၼ်ႇသႃႇဝေးထိပ်ႉ လႄႈ ပဵၼ်ၼၢင်းယိင်း သီလမ် ၵေႃႉဢွၼ်တၢင်းသုတ်း ဢၼ်ဢွၼ်ႁူဝ် ပႃႇတီႇၵၢၼ်မိူင်း ဢၼ်လမ်ႇလွင်ႈ မိူင်းဢိင်းၵလဵတ်ႈၼၼ်ႉယဝ်ႉ။
Badenoch ဢႃႇယု 44 ပီ မႃးပုတ်ႈတႅၼ်း ၸွမ်ၽွင်းလူင်ၵဝ်ႇ Rishi Sunak သေ ပၼ်ၵႂၢမ်းမၼ်ႈဝႃႈ တေဢွၼ်ႁူဝ် ပႃႇတီႇ ၼႂ်းၶၢဝ်းတၢင်း ဢၼ်တေႁဵတ်းမႂ်ႇ ဝၢႆးသေ လႆႈတူၵ်းသုမ်း တီႈပၢင်လိူၵ်ႈတင်ႈ လိူၼ်ၵျူႇလၢႆႇ မိူင်းဢိင်းၵလဵတ်ႈၼၼ်ႉယဝ်ႉ။
တီႈ ပႃႇတီႇ ၶွၼ်ႇသႃႇဝေးထိပ်ႉ ၽၢႆႇၶႂႃ ၼၼ်ႉ Badenoch တေၵမ်ႉထႅမ် ပေႃႇလသီႇ တႃႇတေ ယွၼ်ႇယွမ်း ၸႄႈမိူင်းသေ ၶဵင်ႇတႃႉ ဢၼ်မၼ်းၼၢင်း လၢတ်ႈဝႃႈ ပဵၼ်ပၢႆးဝူၼ်ႉ ၽၢႆႇသၢႆႉ ဢၼ်ပဵၼ် ၽိင်ႈပိူင်ၼၼ်ႉသေ လၢတ်ႈဝႃႈ ထိုင်ၶၢဝ်းယၢမ်း တေလႆႈ ၵႅတ်ႇၶႄ လၵ်းၵၢၼ် လွင်ႈလၢတ်ႈလွတ်ႈလႅဝ်းထၢင်ႇႁၢင်ႈ၊ ၵၢၼ်ငၢၼ်း ဢၼ်လွတ်ႈလႅင်းထၢင်ႇႁၢင်ႈ လႄႈ လွၵ်းၵၢတ်ႇ ဢၼ်လွတ်ႈလႅဝ်းထၢင်ႇႁၢင်ႈ ၼၼ်ႉ ၼႆယဝ်ႉ။
ဝၢႆးသေ လႆႈၶႅပ်းၵၢင်ၸႂ် ၽူႈၶဝ်ႈၸုမ်း ပႃႇတီႇ 57% တီႈၶၵ်ႉတွၼ်ႈလိုၼ်းသုတ်း ဢၼ်လႆႈၶႄႉၶဵင်ႇၵၼ် ၶၢဝ်းတၢင်း လၢႆလိူၼ်ၼၼ်ႉသေ လႆႈပဵၼ်မႃး ၽူႈဢွၼ်ႁူဝ် ပႃႇတီႇ ၶွၼ်ႇသႃႇဝေးထိပ်ႉ ၵေႃႉထူၼ်ႈႁႃႈ ၸဵမ်မိူဝ်ႈ ၵၢင်ပီ 2016 ၼၼ်ႉယဝ်ႉ။ မၼ်းၼၢင်း လႆႈပႄႉပုၼ်ႈ ၽွင်းလူင် ၽၢႆႇၵူၼ်းၶဝ်ႈမိူင်း ၵဝ်ႇ ရေႃးပတ်ႉ ၵျႅၼ်ႇရိၵ်ႉ ဢၼ်လႆႈၶႅပ်းၵၢင်ၸႂ် 43% ၼၼ်ႉယဝ်ႉ။
ၸွမ်ၽွင်းလူင် ၽၢႆႇလေႇပႃႇ ပႃႇတီႇ Keir Starmer ႁပ်ႉတွၼ်ႈ လွင်ႈဢွင်ႇပႄႉမၼ်းၼၢင်းသေ လၢတ်ႈဝႃႈ "ၽူႈဢွၼ်ႁူဝ် ၵူၼ်းၶိူဝ်းသႃႇၼိူဝ်ႉလမ် ၵေႃႉဢွၼ်တၢင်းသုတ်း ၶွင်ပႃႇတီႇ Westminster ၼႆႉ ပဵၼ်ၶၢဝ်းယၢမ်းဢၼ်လီယွင်ႈယေႃး တွၼ်ႈတႃႇ ၸိုင်ႈမိူင်းႁဝ်း" ၼႆယဝ်ႉ။
တူဝ်မၼ်းၼၢင်း Badenoch ၵေႃႈ လၢတ်ႈၼႄ ၵူၼ်းတင်းၼမ်ဝႃႈ မၼ်းၼၢင်း ဢမ်ႇၶႂ်ႈဝႆႉၸႂ်ၼိူဝ် ၸၢဝ်းၶိူဝ်းမၼ်းၼၢင်း။
မိူဝ်ႈထၢမ်တီႈပၢင်ၵုမ်လူင် ပႃႇတီႇၶွၼ်ႇသႃႇဝေးထိပ်ႉ မိူဝ်ႈၸဝ်ႉပီၼႆႉဝႃႈ ပေႃးပဵၼ်မႃး ၽူႈဢွၼ်ႁူဝ် ၼၢင်းယိင်း သႃႇၼိူဝ်ႉလမ် ၵေႃႉဢွၼ်တၢင်းသုတ်း ၼႂ်းပႃႇတီႇၼၼ်ႉ တေႁၼ်ထိုင်ၸိူင်ႉႁိုဝ်ၼႆၼၼ်ႉ မၼ်းၼၢင်းလၢတ်ႈဝႃႈ “ၵဝ်ၶႃႈၼႆႉ ပဵၼ်ၵူၼ်းၵေႃႉဢၼ် ၶႂ်ႈႁႂ်ႈသီၼိူဝ်ႉႁဝ်း ဢမ်ႇပဵၼ်လွင်ႈလမ်ႇလွင်ႈလိူဝ် သီၶူၼ်ႁူဝ်ႁဝ်း ဢမ်ႇၼၼ် သီတႃႁဝ်း" ဝႃႈၼႆ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Elizabeth Piper and Andrew Macaskill. "Kemi Badenoch becomes first Black woman to lead UK Conservatives" — Reuters, November 3, 2024
- Jill Lawless. "UK Conservatives pick Kemi Badenoch as new leader, first Black woman to head a big British party" — AP News, November 2, 2024
- Stefan Boscia and Esther Webber. "Tories pick first Black woman to lead a major UK political party" — Politico, November 2, 2024
