Walk for peace ပႆတႃႇငမ်းယဵၼ်

ဝၼ်းသဝ်၊ ၸၼ်ႇဝႃႇရီႇ 3၊ 2026

ၶၢဝ်းတၢင်း ပႆတႃႇငမ်းယဵၼ် ၼႂ်းပီ 2025-2026 ၼႆႉ ယၢမ်းလဵဝ် ပဵၼ်မႃးၶၢဝ်ႇ ဢၼ်ၵူၼ်းတင်းၼမ် ၶဝ်ႈၸႂ်ဢၼ်ၼိုင်ႈဝႆႉယူႇ။ လွင်ႈတၢင်းပိူင်လူင်မၼ်းတႄႉ မီးၼင်ႇၼႆ -

ယိူင်းဢၢၼ်းလွင်ႈပႆတႃႇငမ်းယဵၼ်

ၶၢဝ်းတၢင်းဢၼ်ၼႆႉ တႄႇတီႈဝဵင်းၾူတ်ႉဝိူတ်ႉသ် Fort Worth ဝတ်ႉႁူင်တၢဝ်ဝိပတ်ႉသၼႃႇ ပုတ်ႉထဝိႁႃႇရသႅၼ်ႇတႃႇ Houng Dao Vipassana Bhavana Center သေ သင်ႇၶႃႇရႁၢၼ်းၸၢဝ်းပုတ်ႉ ၶဝ်ၸဝ်ႈၶိုင်သၢင်ႈႁၢင်ႈပွင်ယဝ်ႉ။ ၸဝ်ႈဢွၼ်ႁူဝ်ၶဝ်တႄႉ ၸိုဝ်ႈဝႃႈ ၸဝ်ႈပၺ်ၺႃၵႃၵၽိၵ်ၶု (ဢႃႇယု 59 ပီ) ၼႆသေ သင်ႇၶႃႇၸဝ်ႈ ၸၢဝ်းမိူင်းဝႅတ်ႉၼၢမ်း ဢၼ်ပဵၼ်ၵူၼ်းမိူင်းဢမႄႇရိၵၢၼ်ႇ ၶဝ်ၸဝ်ႈသၢဝ်းပၢႆ ၶဝ်ႈပႃးၸွမ်းသေ ဢမ်ႇၵႃး မႃဢွၼ်ႇတူဝ်ၼိုင်ႈ ၸိုဝ်ႈဝႃႈ ဢႃႇလေႃးၵ ၼႆၵေႃႈ ၶဝ်ႈပႃးၸွမ်းယဝ်ႉ။ ဢႃႇလေႃးၵၼႆ ပွင်ႇဝႃႈ သၢႆငဝ်းလႅင်း။

ယိူင်းဢၢၼ်း - ႁႂ်ႈယူတ်းယႃပၼ်လႆႈ ပၢႆးၸႂ် (healing) ႁႂ်ႈမီးလွင်ႈၽွမ်ႉႁူမ်ႈ (unity) ႁႂ်ႈမီးလွင်ႈမဵတ်ႉတႃႇၵရုၼႃႇ (compassion) တမ်ႈတီႈ ၼႂ်းမိူင်းဢမႄႇရိၵၢၼ်လႄႈ ၼႂ်းလူၵ်ႈ။

ၶေႃႈၶၢဝ်ႇယိုၼ်ႈ - လွင်ႈငမ်းယဵၼ်ဢၼ်ဝႃႈၼၼ်ႉ တေလႆႈၽိုၵ်းၵိူတ်ႇဢွၵ်ႇ Practice သေ တေလႆႈတႄႇမႃး တမ်ႈတီႈ ၼႂ်းမၢၵ်ႇႁူဝ်ၸႂ်ၵူၼ်းႁဝ်း ၵေႃႉလႂ်ၵေႃႉၼၼ်ႉသေ ႁႂ်ႈဢဝ်လွင်ႈငမ်းယဵၼ် တီႈတူဝ်ၸဝ်ႈၵဝ်ႇ ပၼ်ၵူၼ်းႁိူၼ်းၸဝ်ႈၵဝ်ႇ၊ ႁိမ်းႁွမ်းၸဝ်ႈၵဝ်ႇ၊ ဝၢၼ်ႈမိူင်းၸဝ်ႈၵဝ်ႇ တေႃႇထိုင် ၵူၼ်းတင်းလူၵ်ႈၵမ်ႇၽႃႇ။

ၶၢဝ်းတၢင်းၶဝ်ၸဝ်ႈ

တၢင်းၵႆၶၢဝ်းတၢင်းၶဝ်ၸဝ်ႈၼႆႉ လုၵ်ႉဢဝ်ၸႄႈမိူင်းထႅၵ်ႉသႅတ်ႉသ် တေႃႇထိုင် ငဝ်ႈၸိုင်ႈဝဵင်းလူင် ဝႃႇသျိၼ်ႇတၢၼ်ႇတီႇၸီႇ လၵ်းပွင်းမီး 2,300 လၵ်း (3,700) ၵီႇလူဝ်ႇမီႇတႃႇသေ တႄႇပႆမိူဝ်ႈ ပီ 2025 လိူၼ်ၼူဝ်ႇဝႅမ်ႇပႃႇ 26 ဝၼ်း၊ ၶၢဝ်းတၢင်းၶဝ်ၸဝ်ႈပႆ တေႁိုင်ယူႇ 120 ဝၼ်းသေ ပေႃးထိုင်မႃး ပီ 2026 လိူၼ်ၾႅပ်ႇဝႃႇရီႇ 13 ဝၼ်းၸိုင် တေဢၢၼ်းႁွတ်ႈထိုင် ဝႃႇသျိၼ်ႇတၢၼ်ႇတီႇၸီႇ တီႈလုမ်းႁေႃသၽႃးဢမႄႇရိၵၢၼ်ႇ ၼႆယဝ်ႉ။ ယၢမ်းလဵဝ် ၶၢဝ်းတၢင်းၶဝ်ၸဝ်ႈ တူၵ်းၶိုင်ႈယူႇယဝ်ႉ။

ၸႄႈမိူင်းဢၼ်ၶဝ်ၸဝ်ႈလတ်းၽၢၼ်ႇတႄႉ ပဵၼ် ထႅၵ်ႉသႅတ်ႉသ်၊ ၵျူဝ်ႇၵျီႇယႃႇ၊ ၵႃႇလူဝ်ႇလၢႆးၼႃးၸၢၼ်း၊ ၵႃႇလူဝ်ႇလၢႆးၼႃးႁွင်ႇ၊ ဝႃႇၵျီးၼီးယႃး၊ မႄႇရီႇလႅၼ်း လႄႈ ဝႃႇသျိၼ်ႇတၢၼ်ႇတီႇၸီႇၼႆသေ ပဵၼ် 10 ၸႄႈမိူင်းယဝ်ႉ။ ၶၢဝ်းတၢင်းပႆတႃႇငမ်းယဵၼ် Walk for peace ၼႆႉ ဢမ်ႇၵပ်းၵၢႆႇၵၢၼ်မိူင်း၊ ဢမ်ႇၵပ်းၵၢႆႇလွင်ႈႁူၺ်းၽႃႇသႃႇတီႈၵိူဝ်းယမ် ၵူၺ်းပဵၼ် ပုၼ်ႈတႃႇလွင်ႈငမ်းယဵၼ် ၵူၼ်းၼႂ်းလူၵ်ႈၵူႈၵေႃႉသေ ႁႂ်ႈလႆႈမေႃယူႇ ဢိင်လင်ၽင်ၼွင်ႈၵၼ်ၵူၺ်း။

ၼႂ်းၽူႈၶဝ်ႈၸုမ်းပႆၶဝ်ၸဝ်ႈၼၼ်ႉ ၸဝ်ႈဢၼ်ဢႃႇယုယႂ်ႇသေပိူၼ်ႈၵေႃႈ ပႃးဝႆႉၸဝ်ႈၼိုင်ႈ ဢႃႇယုမၼ်းၸဝ်ႈ လႆႈ 70 လိူဝ် ပဵၼ်ၸၢဝ်းဝႅတ်ႉၼၢမ်း။ ၽွင်းၶဝ်ၸဝ်ႈသိုပ်ႇၶၢဝ်းတၢင်းမႃး မိူဝ်ႈ တီႇသႅမ်ႇပႃႇ 15 ဝၼ်း ၽွင်းႁွတ်ႈထိုင် မိတ်ႉသိတ်ႉသပီႇ Mississipp တီႈၸုတ်းၶူၼ်တၢင်းလူင် မၢႆ 80 ၼၼ်ႉ လူတ်ႉလူင်လမ်းၼိုင်ႈ မႃးၽႃႇသႂ်ႇ ၽၢႆႇလင်လူတ်ႉႁၢၼ် ဢၼ်ဢဝ်လွင်ႈႁူမ်ႇလူမ်ႈ ၸွမ်းလင်ၶဝ်ၸဝ်ႈ၊ လူတ်ႉႁၢၼ်ၵေႃႈ ဝူင်မႃးၽၢႆႇၼႃႈ လေႃႇတုမ်ႉသႂ်ႇ သင်ႇၶႃႇၸဝ်ႈ ၸိူဝ်းပႆၽၢႆႇလင်ၼၼ်ႉ လႆႈမၢတ်ႇတိူဝ်ႉၸဵပ်းၵႂႃႇ မွၵ်ႈ 4 ၸဝ်ႈ၊ ဢၼ်ၸဵပ်းႁႅင်းတီႈတိၼ် သွင်ၸဝ်ႈ၊လႆႈၵႂႃႇယူတ်းယႃ တမ်ႈတီႈႁူင်းလူလွမ် Anderson Regional Medical Center လီငၢမ်း။ မႃဢွၼ်ႇဢႃႇလေႃးၵၵေႃႈ ၺႃးဢိတ်းၼိုင်ႈ ဢမ်ႇတၼ်းပဵၼ်သင်တႄႉတႄႉ။ ၸိူဝ်းဢၼ်လွတ်ႈၽေးၼၼ်ႉ ဢမ်ႇၶၢမ်ႇယႃႉလူႉၶၢဝ်းတၢင်းၶဝ်သေ သိုပ်ႇပႆထႅင်ႈယူႇ။

မိူဝ်ႈတႄႇပႆဢွၵ်ႇၶၢဝ်းတၢင်းမႃးတႄႉ ပိူၼ်ႈဢမ်ႇပေႃးၶဝ်ႈၸႂ်၊ ၵူၺ်းၵႃႈ ယိုင်ႈၶၢဝ်းတၢင်းၶဝ် ၵႆမႃးတိၵ်းတိၵ်း ပိူၼ်ႈၶႅၼ်းဢွၼ်ၵၼ် ၶဝ်ႈၸႂ်လိူဝ်မႃးတိၵ်းတိၵ်းယူႇ။ ၶဝ်ၸဝ်ႈၼႆႉ တိုဝ်းၵမ်ဢေၵသၼိၵ် ထုတၢင်ႇ ဢၼ်ၵိၼ်သွမ်း တႃႇလဵဝ်သေ ပႆၶၢဝ်းတၢင်းယၢဝ်း ထိုင်တီႈလႂ် ၼွၼ်းတီႈၼၼ်ႈ ပႆတၢင်းယၢင်ႈတိၼ် ယၢင်ႈလႂ်ၵေႃႈ ၵိုၵ်ႈလူၺ်ႈၸႂ်မဵတ်ႉတႃႇ လႄႈ ၵရုၼႃႇ ယွၼ်းသူးပၼ် ႁႂ်ႈၼႂ်းလူၵ်ႈၵမ်ႇၽႃႇၵတ်းယဵၼ်၊ ဢွင်ႈတီႈၶဝ်လိုဝ်ႈၼၼ်ႉ ၶဝ်ၸဝ်ႈဝၢၼ်းပရိတ်ႉ သူင်ႇမဵတ်ႉတႃႇ သပ်းလႅင်းၼႄ လွင်ႈငမ်းယဵၼ် လူဝ်ႇလႆႈတႄႇပဵၼ် တီႈတူဝ်ၸဝ်ႈၵဝ်ႇဢွၼ်တၢင်း လူဝ်ႇလႆႈပဵၼ်ၼင်ႇၼၼ် ၵူႈၵေႃႉသေ ၽႄႈပၼ်ၵၼ်ၸိုင် လေႃးၵတေၵတ်းယဵၼ် ၼႆယူႇ။

ယၢမ်းလဵဝ် လႆႈႁၼ်ၼိူဝ်သိုဝ်ႇၶၢဝ်ႇၼၼ်ႉ ၵူၼ်းမိူင်းဢမႄႇရိၵၢၼ်ႇၶဝ် ဢွၼ်ၵၼ် ႁပ်ႉတွၼ်ႈ သင်ႇၶႃႇၸဝ်ႈ ၸိူဝ်းလတ်းဝဵင်းၶဝ် ဝၢၼ်ႈၶဝ်ၵႂႃႇ၊ ၵမ်ႈၽွင်ႈၵေႃႈ ဢဝ်ၼမ်ႉၵတ်းၼမ်ႉဝၢၼ် မႃးယိုၼ်ႈမႅင်ႇ၊ ၵမ်ႈၽွင်ႈၵေႃႈ ဢဝ်မွၵ်ႇ ဢဝ်တၢင်းၵိၼ်မႃးလူႇတၢၼ်း ၽၢၵ်ႇတွၼ်ႈ၊ ၵမ်ႈၽွင်ႈၵေႃႈ ယွၼ်းထႆႇၶႅပ်ႈႁၢင်ႈၵိုၵ်း၊ ၵမ်ႈၽွင်ႈ ၸူမ်းၸွမ်းၼမ်ႉတႃပေႃးတူၵ်း မူၵ်းတႃပေႃးယွႆႉ ယွၼ်ႉဝႃႈ ၽႂ်ၽႂ်ၵေႃႈ တႂ်းမွင်းလွင်ႈငမ်းယဵၼ်၊ ႁၢၼ်ၶဝ် ၸႄႈတွၼ်ႈလႂ် ၸႄႈတွၼ်ႈၼၼ်ႉၵေႃႈ ၸွႆႈထႅမ် ဢဝ်ပၼ်လွင်ႈႁူမ်ႇလူမ်ႈၶဝ်ၸဝ်ႈ၊ ၶဝ်ၸဝ်ႈၵေႃႈ ဝႆႉၼႃႈယုမ်ႉ ၼႃႈမဵတ်ႉတႃႇသေ တူင်ႉတၵ်ႉၼပ်ႉယမ် ၵူၼ်းတင်းလၢႆ တေလႆႈဝႃႈ ထၢတ်ႈမဵတ်ႉတႃႇၶဝ်ၸဝ်ႈ ႁူမ်ႇငမ်းၼိူဝ်ပိူၼ်ႈမႃးယဝ်ႉလႄႈ ၽႂ်ၽႂ်ႁၼ်ၵေႃႈ ၸူမ်းသိူဝ်း ဢွၼ်ၵၼ် ယုၵ်ႉမိုဝ်းဝႆႈၵေႃႈမီး ၵၵ်းမိုဝ်းသူင်ႇသင်ႇၵေႃႈတင်းၼမ်၊ လုၵ်ႈဢွၼ်ႇယိင်းဢွၼ်ႇ ၵေႃႉၼိုင်ႈဢႃႇယုမွၵ်ႈ 5 ၶူပ်ႇ တူဝ်မၼ်းၼၢင်းတႅမ်ႈႁၢင်ႈသီသေ မႃးတွၼ်ႈမုၼ်ၸဝ်ႈ၊ မၢင်ၸိူဝ်းၵေႃႈ ႁဵတ်းၽဵင်းၵႂၢမ်း ၼႂ်းဢေႇဢၢႆႇသေ ႁပ်ႉတွၼ်ႈဢဝ်ၵုင်ႇမုၼ်ၶဝ်ၸဝ်ႈ၊ မၢင်ၸိူဝ်းၵေႃႈ တူပ်းမိုဝ်းႁပ်ႉတွၼ်ႈၶဝ်ၸဝ်ႈ ပဵၼ်လွင်ႈၸူမ်းသိူဝ်းလူၺ်ႈ ၶဝ်ၸဝ်ႈဢဝ်ယၢင်ႈတိၼ်မဵတ်ႉတႃႇသေ လတ်းမႃး ၼႂ်းဝၢၼ်ႈၼႂ်းဝဵင်းၶဝ်တႄႉတႄႉ။

ၵူၼ်းမၢင်ၸိူဝ်းၵေႃႈ ပႆသူင်ႇၶဝ် ပႆၸွမ်းၶဝ် ပဵၼ်ပွတ်းပဵၼ်တွၼ်ႈသေ ဢွၼ်ၵၼ်ယၢင်ႈပႆၸွမ်း သဵၼ်တၢင်းငမ်းယဵၼ် ပဵၼ်ဢၼ်လီႁၵ်ႉႁွမ်တႄႉတႄႉ ပဵၼ်ဢၼ်လီယဵၼ်ၸႂ်ၸွမ်းတႄႉတႄႉ။ လၢမ်းႁၼ်ဝႆႉဝႃႈ ပေႃးဝႃႈ ၶဝ်ၸဝ်ႈ ၸမ်ႁွတ်ႈထိုင် ဝႃႇသျိၼ်ႇတၢၼ်ႇမႃးၸိုင် ၵူၼ်းၸိူဝ်းႁပ်ႉတွၼ်ႈၶဝ်ၸဝ်ႈၼၼ်ႉ ၶႅၼ်းတေၼမ်ယူႇဢမ်ႇႁၢင်ႉ။ သင်ဝႃႈ ၶႂ်ႈႁူႉၶၢဝ်ႇငၢဝ်းမႂ်ႇမႂ်ႇၶဝ်ၸဝ်ႈၸိုင် ၶဝ်ႈတူၺ်းလႆႈ တီႈၼႂ်း Facebook Page : Walk for Peace လႆႈယူႇ။

မႃဢွၼ်ႇ ဢႃႇလေႃးၵၼၼ်ႉၵေႃႈ မီးဝႆႉ Facebook သုၼ်ႇတူဝ်မၼ်းၵွၼ်ႇၼႆယဝ်ႉ။ ၸဝ်ႈသင်ႇၶႃႇၶဝ် ၸိူဝ်းဢၼ်ၸွမ်းမၼ်းၼၼ်ႉ ဢဝ်ၶႅပ်းႁၢင်ႈမၼ်း လွင်ႈတူင်ႉၼိုင်မၼ်း တၢင်ႇပၼ်ၼႆယဝ်ႉ။ မၢႆၾဵတ်ႉမၼ်းတႄႉ ပဵၼ် Aloka the Peace Dog ယဝ်ႉ။ (ဢႃႇလေႃးၵ မႃငမ်းယဵၼ်) ၼႆဝႃႇ။

ငိူၼ်ႈငဝ်ႈၶၢဝ်ႇ

Dhammacetiya. "Walk For Peace – Happy New Year" — Dhammacetiya, January 1, 2026
Zoe Nicholson znicholson. "Monks, rescue dog walking thousands of miles for peace headed for SC capital" — The Post and Courier, January 2, 2026
Irene Wright. "How much longer will the Walk for Peace be in Georgia after leaving ATL?" — USA TODAY, January 2, 2026
Iris Seaton. "'Walk for Peace' will bring 19 Buddhist monks to NC. Here's when" — citizen-times, January 1, 2026
Vanessa Countryman. "'A true walker of peace,' meet Aloka, the dog seen in Georgia" — Savannah Morning News, January 2, 2026